Baby Bag

„მისდიეთ სამ მთავარ რამეს...მხოლოდ ასე ცხოვრება ბადებს კეთილგანწყობას ადამიანთა შორის, იმედსა და ჰარმონიის შეგრძნებას“ - გია მურღულიას მილოცვა მეთორმეტეკლასელებს

„მისდიეთ სამ მთავარ რამეს...მხოლოდ ასე ცხოვრება ბადებს კეთილგანწყობას ადამიანთა შორის, იმედსა და ჰარმონიის შეგრძნებას“ - გია მურღულიას მილოცვა მეთორმეტეკლასელებს

ასე ულოცავს ფილოლოგი, პედაგოგი გია მურღულია მეთორმეტეკლასელებს სკოლის დამთვრებას სოციალურ ქსელში. 

„საქართველოს მეთორმეტეკლასელებო, გილოცავთ სკოლის დამთავრებას.

თუ ისწავლეთ და გაიგეთ, რა გსურთ ცხოვრებაში, რას ისახავთ მიზნად და იცით, როგორ მიაღწიოთ ამ მიზნებს ისე, რომ სხვებს იგივეს გაკეთებაში ხელი არ შეუშალოთ, მაშინ ამ წლებს თქვენთვის ფუჭად არ ჩაუვლია.

ძველთა გონიერების არ იყოს, მისდიეთ სამ მთავარ რამეს: კეთილ ფიქრს, კეთილ სიტყვასა და კეთილ საქმეს - არაფერი უკეთესი კაცობრიობას არ გამოუგონია. მხოლოდ ასე ცხოვრება ბადებს კეთილგანწყობას ადამიანთა შორის, იმედსა და ჰარმონიის შეგრძნებას.

ყოველთვის გახსოვდეთ, რომ ადამიანი ტანჯვისთვის კი არა (როგორც ხანდახან ამბობენ), ბედნიერებისთვის არის გაჩენილი.

თქვენ გაქვთ უფლება იყოთ ბედნიერნი და იბრძოლოთ ამისთვის, თუმცა ამ ბრძოლის მეგზური მხოლოდ სიყვარული და სიმართლე შეიძლება იყოს.

მე მუდამ მახსოვს ჩემი მოსწავლეების ღიმილი, ფიქრი და განწყობა. ეს შეუდარებელი შეგრძნებაა და მისგან "გათავისუფლება" არასდროს მომინდება. ახლაც თვალწინ მიდგანან ჩემი მოსწავლეები.

თუმცა მე მხოლოდ ერთი ვარ მრავალთაგან.

ყველაზე მნიშვნელოვანი „ერთი“ კი საქართველოა.

ის არის ყველა ჩვენგანის მთავარი მასწავლებელი.

მას მოუყევით ყველა იმ სიკეთის შესახებ, რასაც ცხოვრებაში ხალხისთვის გააკეთებთ.

ადამიანი ამისთვის სწავლობს.“

შეიძლება დაინტერესდეთ

2022 წლის ერთიანი ეროვნული გამოცდებისათვის რეგისტრაციის ვადები ცნობილია

2022 წლის ერთიანი ეროვნული გამოცდებისათვის რეგისტრაციის ვადები ცნობილია
2022 წლის ერთიანი ეროვნული გამოცდებისათვის რეგისტრაცია 1 მარტის 10:00 საათზე დაიწყება და 4 აპრილის 18:00 საათამდე გაგრძელდება. რეგისტრაციას გამოსაცდელები მხოლოდ ელექტრონულად შეძლებენ შეფასებისა და გამოცდების ეროვნული ცენტრის ვებგვერდზე online.naec.ge.

ამ თემასთან დაკავშირებით შეფასებისა და გამოცდების ეროვნული ცენტრის დირექტორმა ბრიფინგი გამართა. სოფიო გორგოძემ აბიტურიენტებს მოუწოდა, ყურადღება მიაქციონ რეგისტრაციის პროცედურებსა და ვადებს, მანამდე კი აუცილებლად გაეცნონ შეფასებისა და გამოცდების ეროვნული ცენტრის ოფიციალურ ვებგვერდზე ელექტრონულ კრებულს - „ცნობარი აბიტურიენტებისათვის“.

კრებული თავს უყრის 2022 წლის სიახლეებს, საგანმანათლებლო პროგრამების ჩამონათვალს, ხშირად დასმულ კითხვებსა და საგამოცდო პროცესთან დაკავშირებულ ყველა მნიშვნელოვან საკითხს.

აბიტურიენტთა რეგისტრაციის პროცესი წელსაც რამდენიმე ეტაპად ჩატარდება:

  • პირველ ეტაპზე აბიტურიენტი ვალდებულია შეავსოს პირადი მონაცემები, აირჩიოს საგამოცდო ქალაქი, ჩასაბარებელი საგნები და საჭიროების შემთხვევაში მონიშნოს სპეცპირობა;
  • საგნის შეცვლა ან დამატება, ასევე გამოცდის ენის შეცვლა აბიტურიენტებს 14 აპრილის 18:00 საათამდე შეეძლებათ;
  • საგანმანათლებლო პროგრამების ჩამონათვალში ცვლილებების შეტანის შესაძლებლობა გამოსაცდელებს აპელაციის შედეგების გამოქვეყნებიდან მომდევნო დღის ჩათვლით ექნებათ.

დეტალური ინფორმაცია რეგისტრაციისა და გადახდის შესაძლო საშუალებების შესახებ შეფასებისა და გამოცდების ეროვნული ცენტრის ვებგვერდზე www.naec.ge 1 მარტს გამოქვეყნდება.


წაიკითხეთ სრულად