Baby Bag

თუ ბავშვს რცხვენია, დისკომფორტს უქმნის ან თრგუნავს არასასურველი თმა, უბრალოდ მოვაშოროთ ის - ან გაპარსვით ან სხვა მეთოდებით

თუ ბავშვს რცხვენია, დისკომფორტს უქმნის ან თრგუნავს არასასურველი თმა, უბრალოდ მოვაშოროთ ის - ან გაპარსვით ან სხვა მეთოდებით

არასასურველი თმის გაპარსვა/მოშორების შესახებ დერმატო-ვენეროლოგი ზაზა თელია წერს. გთავაზობთ მის ნათქვამს სიტყვა-სიტყვით:

„თემა, რომელიც არ ეხება მხოლოდ კოსმეტიკურ პრობლემას. ხშირად ბავშვებისთვის (10-13 წელი) და მომწიფების ასაკის თინეიჯერებისთვის კოსმეტიკურად მიუღებელია თმის ქონა სახეზე, ხელებზე, ტორსზე და ფეხებზე, სერიოზული ფსიქოლოგიური სტრესის გამომწვევი ფაქტორია. მათში ეს სირცხვილს იწვევს და საკუთარ თავში თავდაჯერებულობას აზიანებს. უპირატესად ამ ასაკში თმის მოცილების სურვილი მშობლების მხრიდან იბლოკება.

სამეცნიერო მტკიცებულება იმის შესახებ, რომ თმის გაპარსვა იწვევს მის გასქელებას, გაუხეშებას, ფერის ცვლილებას ან თმის ზრდის დაჩქარებას - არ არსებობს.

ასე, რომ თუ ვამჩნევთ, რომ ბავშვს რცხვენია, დისკომფორტს უქმნის ან თრგუნავს არასასურველი თმის არსებობა, უბრალოდ მოვაშოროთ ის - ან გაპარსვით ან სხვა მეთოდებით, მაგალითად, ლაზერული ეპილაციით.

ლაზერული ეპილაციის დროს ტალღოვანი სიხშირის შერჩევა უნდა განხორციელდეს ადამიანის კანის ტიპის მიხედვით (Fitzpatrick Skin Types), განსაკუთრებული ყურადღება მართებთ მუქი ფერის კანის მქონე ადამიანებს ლაზერული ეპილაციის გაკეთებისას, რადგან არასწორმა ტალღოვანმა სიხშირემ შესაძლებელია გვერდითი ეფექტები გამოიწვიოს, როგორიცაა მაგალითად ჰიპერპიგმენტური ან ჰიპოპიგმენტური ლაქების განვითარება.

ასევე კრიტიკულად მნიშვნელოვანია ლაზერული ეპილაციის შემდგომ კანის სწორი მოვლა, რაც გულისხმობს - რუჯის მიღებისგან თავის არიდებას, მზის დამცავის გამოყენებას, კანის დატენიანებას, გაღიზიანებისგან და დაზიანებისგან დაცვას.

შეგახსენებთ რომ ლაზერის ტალღოვანი სიხშირე აღიქვამს თმის მელანინს (პიგმენტს) აქედან გამომდინარე ლაზერული ეპილაცია ყველაზე ეფექტური იმ ადამიანებშია, რომლებსაც ღია ფერის კანის ტიპი და მუქი ფერის თმა აქვთ (ამ შემთხვევაში კანის მელანინი არ მოდის კონკურენციაში თმის მელანინთან, ანუ ლაზერი იჭერს მხოლოდ თმის მელანინს). შესაბამისად გარუჯულ კანზე ეპილაციის გაკეთება არ არის რეკომენდირებული.

ღია ფერის ან თეთრ თმას ლაზერული ეპილაციის სხივი ვერ აღიქვამს აქედან გამომდინარე ამ ტიპის თმის შემთხვევაში ლაზერული ეპილაცია არაეფექტურია.

ყველაზე კარგ შედეგს იძლევა ლაზერული ეპილაციის შემდგომ - Eflornithine (Vaniqa) კრემის გამოყენება, რომელიც თმის ამოსვლის ინჰიბირებას (ბლოკირება) ახდენს, მაგრამ სამწუხაროდ საქართველოში არ არის ხელმისაწვდომი,“

შეიძლება დაინტერესდეთ

პროდუქტების სია, რომელიც დაბერებას უშლის ხელს - როგორ ვიკვებოთ 40 წლიდან?

პროდუქტების სია, რომელიც დაბერებას უშლის ხელს - როგორ ვიკვებოთ 40 წლიდან?

როგორ ვიკვებოთ 40 წლიდან? - ამ თემაზე „დილა მშვიდობისა საქართველოს“ პირდაპირ ეთერში დიეტოლოგმა ნატალია გოგავამ ისაუბრა.

„ჯანმრთელობისთვის ჩვენს ორგანიზმს ესაჭიროება მთელი რიგი ნუტრიენტები, საჭირო რაოდენობით. თუ კვება იქნება სწორი, დაბალანსებული და მრავალფეროვანი ჩვენ ამ ამოცანას შევასრულებთ. როდესაც ეს პროცესი მწყობრშია, შესაბამისად, დაბერების პროცესიც ნელდება. სხვადასხვა დაავადებისგან და დროული ან ნაადრევი სიბერისგან თავდაცვის მიზნით ჩვენ გვჭირდება ნივთიერებები, რომლებსაც ორ ან მაქსიმუმ სამ ჯგუფად დავყოფ:

  1. ანტიოქსიდანტები - ნივთიერებები, როგორიცაა A,E,C ვიტამინები, ბეტა - კაროტინი, თუთია, ლიკოპინი. მათი მთავარი ამოცანაა ორგანიზმის თითოეული უჯრედი დაიცვან მავნე რადიკალების ზემოქმედებისგან;
  2. არანაჯერი ცხიმ-მჟავები - განსაკუთრებით ომეგა 3.
  3. ნივთიერებები, რომლებიც აფერხებენ კოლაგენის გლიკაციის პროცესს. მოგეხსენებათ, რომ კოლაგენი არის ჩვენი კანის მთავარი სტრუქტურა, რომელიც უნარჩუნებს ფორმას, სიმკვრივეს, ელასტიკურობას, ფერს. ამ პროცესის შეფერხების შემდეგ კოლაგენი კარგავს ამ თვისებებს, შესაბამისად, ჩვენი კანი ნაკლებად მკვრივი ხდება.

პროდუქტების არჩევანი საკმაოდ დიდი გვაქვს, თუმცა, მთავარია როგორ არის მოყვანილი, რამდენად ვარგისიანია და ბევრი სხვა დეტალი. არ შემიძლია არ აღვნიშნო პომიდორი, რომელიც შეიცავს ლიკოპინს. ლიკოპინი არის ნივთიერება, რომელიც ებრძვის ულტრაიისფერ გამოსხივებას, რაც ხელს უწყობს ჩვენი კანის სიჯანსაღეს და ახალგაზრდობას. ლიკოპინი არ იშლება თერმული დაზიანების დროს და პირიქით, უკეთესადაც კი ხდება მისი ათვისება. თუ ადამიანს პრობლემა არ აქვს ნაღვლის ბუშტზე, პომიდორის მიღება შეუძლია კანით, როგორც ცოცხლად, ასევე, გამომცხვარი. ლიკოპინს გააჩნია კიდევ ერთი ძალიან კარგი თვისება, ის ამცირებს თრომბების წარმოქმნის რისკს, ამკვრივებს ჩვენი სისხლძარღვების კედლებს, ქოლესტერინის დონეს დაბლა წევს. რადგან ლიკოპინზე ვსაუბრობთ, აუცილებელია ვახსენოთ წითელი ბულგარული წიწაკა. წითელი ბულგარული წიწაკაც შეიცავს დიდი რაოდენობით ლიკოპინს და ასევე, ბეტა-კარატინოიდებს, რომელიც ებრძვის დაბერებას;

კომბოსტო - მას აქვს ბევრი დადებითი თვისება, C ვიტამინის და კალცის მაღალი დონე. განსაკუთრებით სასარგებლოა ბროკოლი, რომელიც ყველა სხვა კომბოსტოსგან განსხვავებით E ვიტამინსაც შეიცავს ( უმიც დასაშვებია და ოდნავ თერმულად დამუშავებულიც - არ უნდა იყოს ძალიან გადახარშული, დადებითი თვისებების შესანარჩუნებლად). ისპანახი, ოხრახუში (აკავებს კალცს, ებრძვის შეშუპებას, შეიცავს დიდი რაოდენობით ანტიოქსიდანტებს, შეიცავს უჯრედისს, რაც მნიშვნელოვანია ჩვენი ნაწლავების მიკროფლორისთვის);

კაკაო და შავი შოკოლადი - განსაკუთრებულ ნივთიერებებს შეიცავს, ებრძვის ანთებით პროცესებს, აფერხებს ზოგიერთი სახეობის სიმსივნის განვითარებას. თუმცა, ზომიერება არ უნდა დაგვავიწყდეს. შოკოლადის მიღების დროს, ორგანიზმში გამოიყოფა ენდორფინები, ამიტომ ხშირად სტრესის დროს ვიღებთ ხოლმე.

თხილეული და სხვადასხვა სახის თესლი - ჯანსაღი ცხიმის შემცველი პროდუქტები. ომეგა 3-ის შემცველობით პირველ ადგილზეა სელის თესლი, რომელიც შეიცავს კალიუმს, მაგნიუმს, B ჯგუფის ვიტამინებს, უჯრედისს, ამცირებს ქოლესტერინის დონეს სისხლში, სასარგებლოა საჭმლის მონელებისთვის. გოგრის თესლი - მის შემადგენლობაშია ისეთი ნივთიერებები, რომლებიც ებრძვის სიმსივნეს. ნუში - ჯანსაღი ცხიმების შემცველობასთან ერთად, ცილის წყაროა და ამასთან, შეიცავს დიდი რაოდენობით მაგნიუმს.

ჯანსაღი ცხიმის შემცველ პროდუქტებს დავამატოთ - ზეითუნის ზეთი, ცხიმიანი თევზი (ქაშაყი, სარდინები, სკუმბრია, ორაგული).

ანტიოქსიდანტები - კენკრა (ჟოლო, მოცვი, მარწყვი, შტოში); სხვადასხვა მწვანილი(სალათის ფურცელი, რუკოლა, აისბერგი).

მთავარია, ჩვენი კვება იყოს დაბალანსებული და მრავალფეროვანი, სხვადასხვა ელემენტით და ნივთიერებით'' - აღნიშნა დიეტოლოგმა ნატალია გოგავამ. 

წყარო: ​,,დილა მშვიდობისა საქართველო''

წაიკითხეთ სრულად