Baby Bag

„ზამთარში აუცილებელია კანის დატენიანება, რადგან სიცივე და სუსხი იწვევს კანის გამოშრობას“ - დერმატო-კოსმეტოლოგი თინათინ გოგოლაშვილი

„ზამთარში აუცილებელია კანის დატენიანება, რადგან სიცივე და სუსხი იწვევს კანის გამოშრობას“ - დერმატო-კოსმეტოლოგი თინათინ გოგოლაშვილი

რა პროცედურებს გულისხმობს კოსმეტოლოგია, რა ასაკიდან უნდა მივმართოთ კოსმეტოლოგს, წელიწადში რამდენჯერ არის რეკომენდებული სახის გაწმენდა ? - ​Moms.ge-ს ამ და სხვა კითხვებს კლინიკა „მედის“ კოსმეტოლოგიური განყოფილების ხელმძღვანელმა, დერმატო-კოსმეტოლოგმა თინათინ გოგოლაშვილმა უპასუხა. 

- ქალბატონო თინათინ, თავიდანვე რომ განვმარტოთ, რა პროცედურებს გულისხმობს კოსმეტოლოგია?

- კოსმეტოლოგია ფართო სფეროა და გულისხმობს სახის კანის მოვლას უბრალო ჰიგიენური წმენდიდან დაწყებული ღრმა ჩარევებით დამთავრებულ სხვადასხვა მანიპულაციებს.

- რა ასაკიდან უნდა მივმართოთ კოსმეტოლოგს?

- კოსმეტოლოგის ჩარევის საჭიროება განისაზღვრება სახის კანის მდგომარეობით და არა ასაკით, კანის ტიპის მიხედვით 13-14 წლიდანაც შეიძლება მივმართოთ კოსმეტოლოგიურ პროცედურებს, მაგალითად აკნესა და აკნეს შემდგომი გართულებების სამკურნალოდ.

- წელიწადში რამდენჯერ არის რეკომენდებული სახის გაწმენდა?

- კანის ცხიმიანობის მიხედვით ისაზღვრება კანის წმენდის სიხშირე, მშრალი კანის შემთხვევაში არ არის სასურველი პროცედურის ხშირად ჩატარება, ცხიმიანი კანის შემთხვევაში კი პროცედურის გამეორება წელიწადში 2-3-ჯერ შეიძლება გახდეს საჭირო.

- პილინგის პროცედურაზეც რომ გვესაუბროთ? 

- პილინგების სეზონი შემოდგომით იწყება და ზამთრის ბოლომდე გრძელდება, ვინაიდან პროცედურის შემდგომ იკრძალება მზის აბაზანები. ზოგადად, პილინგი გამოიყენება პიგმენტური ლაქების, აკნეს შემდგომი ნაწიბურების, მოდუნებული კანის, წვრილი ნაოჭებისა და სტრიების სამკურნალოდ. პილინგი 2 სახისაა - ლაზრული და ქიმიური. ეს კი თავისთავად 3 ქვეკატეგორიად იყოფა: ზედაპირული, საშუალო და ღრმა. მნიშვნელოვანია პილინგის სახეობა და სიღრმე პროფესიონალი დერმატო-კოსმეტოლოგის მიერ სწორად იყოს განსაზღვრული.

- როგორ მოვუაროთ სახის კანს ზამთარში?

- ზამთარში აუცილებელია კანის დატენიანება, რადგან სიცივე და სუსხი იწვევს კანის გამოშრობას, ასევე მწვავდება კაპილარული პათოლოგიები, ამ ყველაფრის თავიდან ასარიდებლად არსებობს დამატენიანებელი პროცედურების სრული სპექტრი: პლაზმოლიფტინგი, მეზოტერაპია, ბიორევიტალიზაცია, PRP პლაზმოთერაპია (რეჯენლაბის ლაბორატორიიდან), ბოლო თაობის ბიორევიტალიზანტი - ბუსტერი.

- მიზანშეწონილია თუ არა გარდატეხის ასაკში აკნეს მკურნალობა? 

- აკნეს მკურნალობა აუცილებელია მოხდეს ექიმი დერმატო-კოსმეტოლოგის მიერ (ასაკსაც ის განსაზღვრავს). ვინაიდან აკნე პოლიეტილოგიური დაავადებაა, ხშირად საჭიროებს გინეკოლოგის, ენდოკრინოლოგისა და გასტროენტეროლოგის ჩართვას.

- რა შემთხვევეშია რეკომენდებული ფილერის, ბიორევიტალიზაციისა და ბოტოქსის გაკეთება?

- ჩვენებების მიხედვით განისაზღვრება რა შემთხვევაში რომელი პროცედურის გაკეთებაა საჭირო. თუ კანი გამომშრალი, მოდუნებულია და შეიმჩნევა წვრილი ნაოჭები, კეთდება ბიორევიტალიზაცია ან სხვა სახის დამატენიანებელი პროცედურა. გამოხატული მიმიკური ნაოჭების შემთხვევაში მივმართავთ ბოტულინოთერაპიას, ხოლო ბუნებრივი შემავსებლით შესაძლებელია როგორც არამიმიკური ნაოჭების გასწორება, ასევე ცალკეული ზონებისა და მთლიანად სახის მოდელირება.

- რა სიხშირით შეიძლება ამ პროცედურების ჩატარება?

- ნებისმიერი პროცედურის ინტენსივობა ჩვენების მიხედვით განისაზღვრება ინდივიდუალურად.

- და ბოლოს, რა ასაკიდან არის ეპილაცია მიზანშეწონილი?

- ლაზერული ეპილაცია ალექსანდრიტის ბოლო თაობის, უსაფრთხო და უმტკივნეულო ლაზერით, დასაშვებია გაკეთდეს 13 წლის ასაკიდან.

ესაუბრა თამუნა კიკალიშვილი 

შეიძლება დაინტერესდეთ

„ფარისებრი ჯირკვლის კვანძების 90% კეთილთვისებიანია, 10% შემთხვევაში ისინი შეიძლება იყვნენ ავთვისებიანი,“ - ენდოკრინოლოგი ნაია ლატარია

„ფარისებრი ჯირკვლის კვანძების 90% კეთილთვისებიანია, 10% შემთხვევაში ისინი შეიძლება იყვნენ ავთვისებიანი,“ - ენდოკრინოლოგი ნაია ლატარია

ენდოკრინოლოგ-ნუტრიციოლოგმა ნაია ლატარიამ ჩიყვის გამომწვევ მიზეზებსა და დაავადების მიმდინარეობის თავისებურებებზე ისაუბრა. მან აღნიშნა, რომ ჩიყვს უმეტესად უსიმპტომო მიმდინარეობა აქვს:

„ჩიყვი არის ფარისებრი ჯირკვლის მოცულობაში გაზრდა. ასევე ჩიყვი არის, თუ ნორმალური მოცულობის პირობებში ფარისებრ ჯირკვალში წარმოიქმნა კვანძოვანი ჩანართები. შეიძლება ეს კვანძები სხვადასხვა ზომის იყოს. დიფუზური და კვანძოვანი ჩიყვი ძირითად შემთხვევებში უსიმპტომოდ მიმდინარეობს. სიმპტომები გამოვლინდება იმ შემთხვევაში, თუ მოცულობაში ძალიან გაიზარდა ფარისებრი ჯირკვალი. თუ კვანძები გაიზარდა ზომაში, შეიძლება მოხრჩობის შეგრძნებამ შეაწუხოს ადამიანი, ყლაპვის გაძნელებამ. ​ზოგიერთ თანმხლებ დაავადებას ასევე ტკივილის სინდრომიც ახასიათებს. სხვა შემთხვევაში, როგორც წესი უსიმპტომოდ მიმდინარეობს და შემთხვევით ხდება აღმოჩენა.“

ნაია ლატარიას თქმით, კვანძოვანი წარმონაქმნები ფარისებრი ჯირკვლის ფუნქციურ ცვლილებებსაც იწვევს:

„კვანძოვან წარმონაქმნებს ფუნქციური ცვლილებაც ახლავს ფარისებრი ჯირკვლის, ​როდესაც ჰორმონების დონე არის შეცვლილი. სიმპტომები, როგორებიც არის უძილობა, თავის ტკივილი, საერთო სისუსტე, ადვილად დაღლა, წონაში მატება, კლება, ეს ყველაფერი უკვე ფუნქციურ დარღვევებს ახასიათებს. ფარისებრი ჯირკვლის და კვანძის წარმოქმნის ყველაზე ხშირი მიზეზი არის იოდის დეფიციტი ან აუტოიმუნური პროცესები, როდესაც ფარისებს ჯირკვალს იმუნური სისტემა ებრძვის. იოდდეფიციტით გამოწვეული ჩიყვის შემთხვევაში, ეს არ ნიშნავს იმას, რომ პაციენტს შემდგომ იოდის პრეპარატები უნდა მივცეთ და ამით დავიწყოთ მკურნალობა.“

„ფარისებრი ჯირკვლის კვანძების 90 % კეთილთვისებიანია. 10 % შემთხვევაში ისინი შეიძლება იყვნენ ავთვისებიანი. ერთ-ერთი გზა ამის დასადგენად არის ბიოფსიური კვლევა. თუ კვანძები არის კეთილთვისებიანი, მედიკამენტოზური თერაპია არ ინიშნება. ინიშნება მხოლოდ დინამიკაში დაკვირვება. ​თუ კვანძები არის ავთვისებიანი, მაშინ ქირურგიულად უნდა მოხდეს მათი მოშორება. ავთვისებიანი კვანძებიც ფარისებრი ჯირკვლის შემთხვევაში საიმედო პროგნოზით ხასიათდება და მკურნალობას ადვილად ექვემდებარება,“- აღნიშნულ საკითხებზე ნაია ლატარიამ ტელეკომპანია „რუსთავი 2“ - ის გადაცემაში „დილა მშვიდობისა საქართველო“ ისაუბრა.

წყარო: ​„დილა მშვიდობისა საქართველო“

წაიკითხეთ სრულად