Baby Bag

„დიდი ალბათობაა, რომ უმაღლესი განათლების მქონე, დასაქმებულმა დედამ აღზარდოს საზოგადოების ნაყოფიერი წევრი,“ - ფსიქოლოგი ნინო გოგიჩაძე

„დიდი ალბათობაა, რომ უმაღლესი განათლების მქონე, დასაქმებულმა დედამ აღზარდოს საზოგადოების ნაყოფიერი წევრი,“ - ფსიქოლოგი ნინო გოგიჩაძე

ფსიქოლოგმა ნინო გოგიჩაძემ დასაქმებული და უმაღლესი განათლების მქონე დედების შესახებ ისაუბრა და აღნიშნა, რომ უმეტესწილად ისინი საზოგადოების ნაყოფიერ წევრებს ზრდიან:

„უმაღლესი განათლების მქონე დედებს, რომლებიც მუშაობენ თავიანთ სფეროში, უფრო დიდი ალბათობით, ეყოლებათ შვილები, რომლებიც უმაღლეს განათლებას მიიღებენ და იმუშავებენ. ეს ალბათობა არსებობს, რომ ისინი მიიღებენ განათლებას და შეეცდებიან, რომ თავისი პროფესიული ნიშნით დასაქმდნენ. საზოგადოების გადარჩენისთვის მნიშვნელოვანია, რომ მას ნაყოფიერი წევრები ჰყავდეს. ჩვენ თუ ვიგულისხმებთ, რომ ქალი, რომელიც მუშაობს, საზოგადოების ნაყოფიერი წევრია, უფრო დიდი ალბათობაა, რომ საზოგადოების ნაყოფიერმა წევრმა აღზარდოს ნაყოფიერი შვილი, რომელსაც ექნება უფრო მეტი მოქნილობა.

დედა, რომელიც გადის, ის უკვე შედის საზოგადოებაში. ის გამოდის ჩაკეტილი ოჯახური სისტემიდან და სხვა სისტემაში შედის. სისტემისთვის მნიშვნელოვანია, რომ ეს ღიაობა იყოს და სისტემის ერთეულები ერთმანეთთან კავშირში იყოს. ჩვენ თუ ვქმნით ჩაკეტილ სისტემებს, ჩაკეტილი სისტემები უფრო მალე ინგრევა. ღია სისტემა უფრო მდგრადია. თუ ქალი არის განათლებული, აქვს დასაქმების შესაძლებლობა და აკეთებს პროფესიულ რეალიზაციას, მისი შემდეგი თაობაც უფრო დიდი ალბათობით დადგება იმავე გზაზე. მასაც ექნება შესაძლებლობა, რომ მიიღოს განათლება, ჰქონდეს პროფესია, იყოს საზოგადოების ნაყოფიერი წევრი, რაც მნიშვნელოვანია.

მომუშავე დედამ იცის, როგორ განსაზღვროს პრიორიტეტები და ამას ასწავლის ბავშვებს ძალიან მარტივად, მაგალითის ჩვენებით. ის ამას აკეთებს მხოლოდ იმ შემთხვევაში, თუ დროს უთმობს შვილებს. მნიშვნელოვანი როლი აქვს აღზრდის სტილსაც. თუ მე თავს ავტორიტეტად აღვიქვამ, მე შემიძლია ამის უფლება მივცე შვილსაც, რომ მან თავი ავტორიტეტად აღიქვას. დედას, რომელიც მუშაობს, სჭირდება მხარდაჭერა სამსახურიდან, სადაც ის მუშაობს,“- მოცემულ საკითხზე ნინო გოგიჩაძემ საქართველოს პირველი არხის გადაცემაში „პირადი ექიმი - მარი მალაზონია“ ისაუბრა.

წყარო: ​„პირადი ექიმი - მარი მალაზონია“

შეიძლება დაინტერესდეთ

„ბავშვი რომ ცუდად იქცევა, ეს შეიძლება განპირობებული იყოს იმით, რომ ჩვენ ხშირად მის კარგ საქციელზე არანაირ რეაგირებას არ ვაკეთებთ,“ - მაია ხერხეულიძე

„ბავშვი რომ ცუდად იქცევა, ეს შეიძლება განპირობებული იყოს იმით, რომ ჩვენ ხშირად მის კარგ საქციელზე არანაირ რეაგირებას არ ვაკეთებთ,“ - მაია ხერხეულიძე

პედიატრმა მაია ხერხეულიძემ ერთიდან სამ წლამდე ასაკის ბავშვებში ტირილის და ჭირვეულობის ხშირი გამოვლენის მიზეზებზე ისაუბრა. მისი თქმით, ერთი წლის ასაკში ბავშვის ემოციური განვითარება წინ უსრებს მისი მეტყველების განვითარებას, რის გამოც ის ზოგჯერ აგრესიული ხდება:

​ერთი წლიდან სამ წლამდე ტირილის შემთხვევები საკმაოდ ხშირია. ერთი წლის ასაკში ხშირად ამბობენ ხოლმე: „ყველაფერზე ტირის.“ ეს გასაგებია, იმიტომ, რომ მეტყველება ჯერ ისე არ არის ჩამოყალიბებული. ამ ასაკში ემოციის განვითარება წინ უსწრებს მეტყველების განვითარებას. ბავშვს ემოციები აქვს, მაგრამ ამას მეტყველებით ვერ გამოხატავს. ამას ვეძახით კიდეც ერთი წლის კრიზისს. შესაძლებელია, ამ პერიოდში ბავშვი რაღაცებს აგრესიით გამოხატავდეს.“

მაია ხერხეულიძემ აღნიშნა, რომ ორი წლის შემდეგ ბავშვებს პიროვნული „მე“ უჩნდებათ, რის გამოც ისინი ჯიუტები ხდებიან:

„შემდეგი პერიოდი არის ორწლინახევრიდან სამ წლამდე, ​როდესაც შემოდის პიროვნული „მე.“ თუ აქამდე ბავშვი თავის თავზე ლაპარაკობდა მესამე პირში, რაღაცებს ასე არ ითხოვდა, უცებ შემოვიდა პიროვნული „მე.“ ბავშვმა აღიქვა თავისი თავი, როგორც პიროვნება. ის ითხოვს, რომ ყველაფერი თვითონ გააკეთოს. ამ დროს იწყება პირველადი სიჯიუტის პერიოდი. ბავშვს უნდა, რომ ყველაფერი გაკეთდეს ისე, როგორც მას უნდა. ხშირ შემთხვევაში თავისი სურვილები რომ შეისრულოს, არამხოლოდ ტირილით, ისტერიული შეტევითაც გამოხატავს ამას. შეიძლება ის ძირს დაეცეს, ფეხები აბაკუნოს.“

მაია ხერხეულიძის თქმით, მშობელმა ოჯახში წესები უნდა დააწესოს, რომელიც ბავშვის გარდა ოჯახის ყველა სხვა წევრმაც უნდა შეასრულოს:

„მშობელმა, პირველ რიგში, უნდა დააწესოს წესები ოჯახში, თუ რა წესებს უნდა ექვემდებარებოდეს ოჯახის ყველა წევრი. ეს წესები აუცილებლად ყველამ უნდა შეასრულოს. ხშირად ასე ხდება ხოლმე, რომ მშობლები ბავშვს არ აძლევენ რაღაცის უფლებას, ბებია და ბაბუა კი პირიქით. ბავშვი იბნევა. ვერ ხვდება, რატომ არის, რომ რაღაც ვიღაცასთან შეიძლება, ვიღაცასთან არ შეიძლება. წესს უნდა დაექვემდებაროს აბსოლუტურად ყველა. ​ისტერიულ შეტევას სჭირდება იგნორირება. რაღაცნაირად სიმშვიდე უნდა შევინარჩუნოთ. როდესაც ბავშვი გაჩერდება, აუცილებლად უნდა მოეხვიოთ, უნდა უთხრათ, რომ ძალიან გიყვართ. მშობელმა ბავშვს უნდა უთხრას, რომ ყველაფერს შეუსრულებს, მაგრამ ასეთ საქციელს არ დაუშვებს.“

„ბავშვი რომ ცუდად იქცევა, ეს შეიძლება განპირობებული იყოს იმით, რომ ჩვენ ხშირად მის კარგ საქციელზე საერთოდ არანაირ რეაგირებას არ ვაკეთებთ. ჩვენ მხოლოდ ცუდ საქციელზე ვაკეთებთ რეაგირებას. ზოგჯერ ბავშვი ცუდად იქცევა იმიტომ, რომ მშობლის ყურადღება მან სხვანაირად ვერ მიიპყრო. მხოლოდ მაშინ აქცევს მშობელი ყურადღებას, როდესაც ის ასე იქცევა. ​წავახალისოთ ბავშვის ყველა კარგი საქციელი, ჩავეხუტოთ, ტაში დავუკრათ. ის ცდილობს, რომ მშობლის ყურადღება მაქსიმალურად მიიპყროს, ამიტომ ის ეცდება, რომ კარგად მოიქცეს,“ - აღნიშნულ საკითხებზე მაია ხერხეულიძემ საქართველოს პირველი არხის გადაცემაში „პირადი ექიმი - მარი მალაზონია“ ისაუბრა.

წყარო: ​„პირადი ექიმი - მარი მალაზონია“

წაიკითხეთ სრულად