„ნუ შეგვეცოდება ბავშვი, რომ ლიმიტები დავაწესოთ, ნუ შეგვეშინდება ლიმიტების დაწესების,“- ზანდა ჩეჩელაშვილის რჩევები მშობლებს

ფსიქოლოგმა ზანდა ჩეჩელაშვილმა ბავშვის ეკრანთან ყოფნის კონტროლის მნიშვნელობაზე ისაუბრა და მშობლებს საინტერესო რჩევები მისცა:

„ბოლო დროს განსაკუთრებით 6-12 წლის ასაკის ბავშვებთან მიმართებით მშობლები ღელავენ, რომ ეკრანდამოკიდებულის დრო გაიზარდა. ამ ასაკობრივ ჯგუფში, პირველი, რაც კარგად უნდა გვესმოდეს, უნდა მივიღოთ, რომ ტექნოლოგიების სამყაროში ვცხოვრობთ. ამას ბავშვს მთლიანად ვერ მოვაშორებთ. მისი განვითარება დიდწილად ნამდვილად ამაზეა დამოკიდებული. ამით ჩვენს თავს ცოტა საქმე გავუმარტივოთ. ნუ დავიდანაშაულებთ თავს, რომ ცუდი მშობლები ვართ და ბავშვს სხვა რაღაცებით ვერ ვაინტერესებთ. ამ ასაკში ტექნიკასთან დროის გატარების მოთხოვნილება ბევრად მეტია. მოგვიწევს, რომ ამას ცოტა მოვერგოთ.

მნიშვნელოვანი ის კი არ არის ბავშვი რომ ტექნიკასთან დროს ატარებს და რამდენ საათს ატარებს. მნიშვნელოვანი ის არის, ბავშვი რას აკეთებს ტექნიკასთან. თუ მე ეკრანთან ვსწავლობ, ვვითარდები, ვურთიერთობ, ახალ უნარ-ჩვევევს ვიძენ, ეს არ არის დრამატული და არც პრობლემა არ არის. ცოტა ბავშვების მდგომარეობაშიც შევიდეთ. მთელი დღე ისედაც ეკრანთან ზიხარ? - ბავშვს ეუბნებიან. ეს არ არის ერთი და იგივე. მე რომ გაკვეთილზე ვზივარ ეკრანთან, ეს ვერ მიცვლის იმ მოთხოვნილებას, რომ ვითამაშო კიდეც, სოციალურ ქსელში შევიდე. ამ ფრაზებს მე მოვერიდებოდი.

ნუ შეგვეშინდება ლიმიტების დაწესების. ნუ შეგვეცოდება ბავშვი, რომ ლიმიტები დავაწესოთ. თუ ტექნიკასთან დღის განმავლობაში გატარებული დრო 1 საათია ლიმიტი, ეს ერთი საათი უნდა იყოს ერთი საათი და ამას მშობელი უნდა აკონტროლებდეს. მთავარია ჩვენ ვიცოდეთ ბავშვი იქ რას აკეთებს. ეს არ უნდა იყოს საფრთხის შემცველი, ბავშვის ასაკისთვის შეუფერებელი. ამის უფლება მშობელს აქვს და ნუ შეგეშინდებათ, რომ ბავშვს ეს არ ესიამოვნოს,”-აღნიშნა ზანდა ჩეჩელაშვილმა.

წყარო: ​„მშობლები განათლებისთვის“

შეიძლება დაინტერესდეთ

„არ შეიძლება მუდმივად ერთი საქმის კეთება! გადართვა არის აუცილებელი,“- ფსიქოთერაპევტი ლალი ბადრიძე

ფსიქოთერაპევტმა ლალი ბადრიძემ ადამიანისთვის დასვენებისა და ძალების აღდგენის მნიშვნელობაზე ისაუბრა:

„შრომის განწყობაზე რომ ვიყოთ, უნდა დავისვენოთ. როდესაც სულ მუდამ იმ რეჟიმში ხარ, რომ მუშაობ, დაკავებული ხარ და დღე და ღამე გასწორებული გაქვს, შრომის უნარიანობა ძალიან იკლებს. თუ ჩვენს უფროსებს გავაგებინებთ, რომ აუცილებლად გვჭირდება დასვენება იმისთვის, რომ ჩვენი შრომისუნარიანობა უფრო მაღალი იყოს, მაშინ, ალბათ, მოგვცემენ იმის საშუალებას, რომ დავისვენოთ. შაბათ-კვირა ხომ გვაქვს, არა? ის შაბათი და კვირა გამოვიყენოთ დასვენებისთვის. არსებობს აქტიური და პასიური დასვენება. პირველ რიგში, უნდა ვიცოდეთ ჩვენ რა გვინდა. უნდა შეგვეძლოს ჩვენი სხეულის მოსმენა. ზოგჯერ მინდა, რომ დავწვე და არაფერი არ ვაკეთო, ზოგჯერ მინდა, რომ კლუბში წავიდე, გავისეირნო. მოვუსმინოთ საკუთარ თავს და დავისვენოთ ისე, როგორც ჩვენ მოგვწონს.

ძალიან სწორია, რომ მუშაობის პროცესში ზოგჯერ ტელეფონში იყურება ადამიანი. არ შეიძლება მუდმივად ერთი საქმის კეთება. გადართვა არის აუცილებელი. ერთი საათი მუშაობ და 5 წუთი გადაერთვები სადღაც. ასე შრომის ნაყოფიერება უფრო მაღალია და მეც უფრო ვისვენებ. არიან ადამიანები, რომლებიც ამბობენ: „მე არ ვიღლები, სულ ენერგიული ვარ, სულ შემიძლია.“ სინამდვილეში აჟიტირებულია ეს ადამიანი. ბავშვებზე იციან ხოლმე, დაჰყავთ ინგლისურზე, ფრანგულზე, ხატვაზე, ცეკვაზე და არ იღლებაო, შეუძლიაო ბავშვს, ამბობენ. განა არ იღლება ბავშვი, აჟიტირებულია უბრალოდ. ამ დროს დასვენება გჭირდებათ აუცილებლად. როგორი ფორმით, ეს თავად უნდა გადაწყვიტოთ,“- მოცემულ საკითხზე ლალი ბადრიძემ ტელეკომპანია POSTV-ის გადაცემაში „პოსტ ალიონი“ ისაუბრა.

წყარო:​ „პოსტ ალიონი“

წაიკითხეთ სრულად