Baby Bag

რა გავლენას ახდენს ორსულსა და ნაყოფზე ეკრანთან ხანგრძლივი დროის გატარება? - თამარ ედიბერიძის პასუხი

რა გავლენას ახდენს ორსულსა და ნაყოფზე ეკრანთან ხანგრძლივი დროის გატარება? - თამარ ედიბერიძის პასუხი

ბავშვთა ნევროლოგმა თამარ ედიბერიძემ ორსული ქალების მიერ მობილური ტელეფონებისა და კომპიუტერის გამოყენების შესახებ ისაუბრა და აღნიშნა, რომ ამ კუთხით რეჟიმის დაცვა მნიშვნელოვანია:

„მნიშვნელოვანია დავიცვათ რეჟიმი. ორსულის ექსპოზიცია მსგავსი ტიპის მოწყობილობებთან უნდა იყოს დოზირებული, ლიმიტირებული და ორგანიზებული. ყველა ის რისკ-ფაქტორი, რომელიც არაორსულის შემთხვევაში არის არააქტუალური, ორსულის შემთხვევაშიც რჩება. ხანგრძლივად, უწყვეტ რეჟიმში ერთი და იგივე საქმიანობის განხორციელება, რომელიც ელექტრონულ მოწყობილობებს უკავშირდება, ეს არის საყრდენ-მამოძრავებელ სისტემაზე განსხვავებული დატვირთვა, მხედველობაზე განსხვავებული დატვირთვა, ნერვულ სისტემაზე განსხვავებული დატვირთვა. ელექტრონული მოწყობილობა ბლოკავს სხეულიდან სხვადასხვა სიმპტომისა და ჩივილის შეგრძნებას. ჩვენ უფრო გვიან მივხვდებით, რომ გვეტკინა წელი, უფრო გვიან ვიგრძნობთ, რომ ხელი დაგვეღალა, თვალი დაგვეღალა. ამ დროს უფრო ნაკლებად ვახამხამებთ თვალებს. ეს ყველაფერი არის სტრესის მაღალი დონე და ეს ორსულს არაფერში არ სჭირდება.

ის, რაც მაღალი სტრესისა და მაღალი შფოთვის დონისთვის არის დამახასიათებელი, ამის მიმართ ორსული ისეთივე მგრძნობიარეა, როგორც არაორსული. ნაყოფი ზოგადად მეტად მგრძნობიარეა სტრესული ფაქტორების მიმართ. ორსული ქალბატონისთვის კიდევ უფრო მეტად მნიშვნელოვანია რეჟიმი, ვიდრე არაორსულობის შემთხვევაში. ჩვენ ამ დროს პასუხისმგებელი აღარ ვართ მხოლოდ საკუთარ სხეულზე, პასუხისმგებლობა გვაქვს ნაყოფის წინაშე,“- მოცემულ საკითხზე თამარ ედიბერიძემ საქართველოს პირველი არხის გადაცემაში „პირადი ექიმი - მარი მალაზონია“ ისაუბრა.

წყარო:​ „პირადი ექიმი - მარი მალაზონია“ 

შეიძლება დაინტერესდეთ

რა იწვევს ორსულობის შეწყვეტას და რამდენ ხანშია შესაძლებელი ხელმეორე ორსულობა?

რა იწვევს ორსულობის შეწყვეტას და  რამდენ ხანშია შესაძლებელი ხელმეორე ორსულობა?
რა იწვევს ორსულობის შეწყვეტას და შესაძლებელია თუ არა ისე შეწყდეს ორსულობა, რომ ქალმა ვერ გაიგოს? - ამ და სხვა საკითხებზე ამ თემაზე MomsEdu.ge-ს ესაუბრა ექიმი რადიოლოგი, მეან-გინეკოლოგი, მედიცინის დოქტორი ნინო დათოშვილი.
- ხშირ შემთხვევაში რა იწვევს ორსულობის შეწყვეტას?
  • გენეტიკური ანომალიები - დედის ან მამის ქრომოსომული, ან გენური დარღვევები;
  • ინფექციური დაავადებები - როგორც ვირუსული, ასევე ბაქტერიული;
  • ქალის შეძენილი ან თანდაყოლილი ანატომიური დეფექტები-ანომალიები: ერთრქიანი საშვილოსნო, ორრქიანი საშვილოსნო, საშვილოსნოს ტიხარი, T ფორმის საშვილოსნო, შეხორცებები საშვილოსნოს ღრუში - აშერმანის სინდრომი, საშვილოსნოს ღრუს პოლიპოზი და სუბმუკოზური კვანძი;
  • ჰორმონული დარღვევები: შაქრიანი დიაბეტი, ფარისებრი ჯირკვლის ფუნქციის დარღვევა, თირკმელზედა ჯირკვლის დისფუნქცია, პოლიცისტური საკვერცხეების სინდრომი, პროგესტერონის უკმარისობა;
  • სისხლის შემადედებელი სისტემის პათოლოგიები - თრომბოფილია, როგორც შეძენილი - ანტიფოსფოლიპიდური სინდრომი, ასევე თანდაყოლული: II - პროთრომბინის, 5-ლეიდენის, MTHFR-გენის მუტაცია, PAI-1 მუტაცია, ასევე ჰიპერჰომოცისტეინემია;
- შესაძლოა თუ არა ისე შეწყდეს ორსულობა რომ ადამიანი ვერ მიხვდეს და რამდენად დიდ საფრთხეს წარმოადგენს ქალის ჯანმრთელობისთვის?
- შესაძლებელია ორსულობა ისე შეწყდეს, რომ ქალი ვერც კი მიხვდეს. ხშირ შემთხვევებში ორსულობათა თითქმის ნახევარზე მეტი წყდება მენსტრუაციის გადაცდენამდე, ანუ მანამ, სანამ ქალი გაიგებს, რომ ორსულადაა. ამას ბიოქიმიური ორსულობა ეწოდება. ასეთ დროს მენსტრუაციულ გამონადენთან ერთად, ან მენსტრუაციის 1-2 დღიანი გადაცდენის შემდეგ ხდება განაყოფიერებული კვერცხუჯრედის გამოძევება საშვილოსნოს ღრუდან, ამას ორსულობის ადრეულ დანაკარგებსაც უწოდებენ. აღნიშნული დაკავშირებულია ორსულობის იმუნოლოგიურ ფაქტორებთან, რომელთა ამა თუ იმ დეფექტს მივყავართ ორსულობის ადრეულ შეწყვეტამდე. ამასთან, ორსულობა შეიძლება შეწყდეს მცირე ვადებზე, რაც შესაძლოა გამოვლინდეს მხოლოდ ექოსკოპიაზე ვიზიტის დროს. ორსულობის შეწყვეტის ექოსკოპიური ნიშნებია: ემბრიონის გულისცემის გაჩერება, სანაყოფე პარკის, ასევე ყვითრის პარკის დეფორმაცია, სანაყოფე პარკის გარშემო ჰემატომების არსებობა. თუ ორსულობის შეწვეტა დროულად არ იქნება დიაგნოსტირებული, ამან შეიძლება ქალის ჯანმრთელობას დიდი ზიანი მიაყენოს ინფექციური გართულებების სახით და ასევე, შესაძლებელია მკვეთრად გაუარესდეს ენდომეტრიუმის ხარისხი, რაც შემდგომში დაორსულებას შეუქმნის პრობლემას.
- რა შეიძლება იყოს იმის მანიშნებელი რომ ორსულობა შეიძლება შეწყდეს?
- როგორც აღვნიშნე, ორსულობის შეწყვეტა მენსტრუაციის გადაცდენამდე არცთუ იშვიათი მოვლენაა და სამწუხაროდ, მისი მიმანიშნებელი რაიმე სპეციფიკური ნიშანი არ არსებობს. რაც შეეხება დადასტურებულ ორსულობას, მისი შეწყვეტის სავარაუდო ნიშნებია: სისხლიანი ან/და ყავისფერი გამონადენი საშოდან, ტოქსიკოზის ნიშნების გაქრობა, ტკივილი და დაჭიმულობა მუცლის ქვედა მიდამოში, სხეულის ტემპერატურის მომატება, რაც სავარაუდოდ მიუთითებს ინფექციის არსებობაზე.
- რამდენ ხანშია შესაძლებელი ხელმეორე ორსულობა?
- ხელმეორე ორსულობა შესაძლებელია 3-6 თვეში, თუმცა გააჩნია, თუ რა ვადაზე მოხდა ორსულობის შეწყვეტა. ადრეულ ვადაზე შეწყვეტისას პაციენტს 3 თვეში ეძლევა დაორსულების რეკომენდაცია.
- მკურნალობის მეთოდებზეც რომ ვისაუბროთ...
- თუ ვსაუბრობთ ორსულობის მოსალოდნელ შეწყვეტაზე (ანუ როდესაც ქალს აქვს ზემოთ ჩამოთვლილი სიმპტომები), მკურნალობა გულისხმობს ორსულობის შემანარჩუნებელ თერაპიას, რაც მოიცავს ჰორმონულ თერაპიას, წოლით რეჟიმს, ვიტამინოთერაპიას, ანტიკოაგულანტურ და ანტიაგრეგანტულ მკურნალობას. უკვე შეწყვეტილი ორსულობის შემთხვევაში კი, მსგავსი ფაქტის განმეორების თავიდან ასაცილებლად აუცილებელია სათანადო კომპლექსური გამოკვლევა, რომ დადგინდეს შეწყვეტის მიზეზი და მხოლოდ ამის შემდეგ უნდა შეირჩეს შესაბამისი მკურნალობა.

​ესაუბრა მარიამ ჩოქური
წაიკითხეთ სრულად