Baby Bag

ჩივილები, ​რომლის დროსაც უნდა მივაკითხოთ გინეკოლოგს

ჩივილები, ​რომლის დროსაც უნდა მივაკითხოთ გინეკოლოგს
ჯანმრთელობა

დღეს ხუთშაბათია და მედიაპორტალი MomsEdu.ge ტრადიციულ რუბრიკას - მეან-გინეკოლოგის რეკომენდაციებს წარმოგიდგენთ. როდის უნდა მივაკითხოთ გინეკოლოგს? - დღეს მეან-გინეკოლოგი და ქირურგი ეკა ბუკია ამ თემაზე მოგაწვდით კომპეტენტურ ინფორმაციას.

გინეკოლოგია მედიცინის დარგია, რომელიც შეისწავლის ქალის სასქესო სისტემასთან დაკავშირებულ დაავადებებს. თუ პაციენტს არანაირი ჩივილები არ აქვს, სასურველია, პირველი ვიზიტი 13-15 წლის ასაკში ჩატარდეს.
​
რატომ უნდა მივაკითხოთ გინეკოლოგს, თუ არანაირი ჩივილი არ გვაქვს?
​
თუ არანაირი ჩივილი არ გაქვთ, სასურველია, წელიწადში 2-ჯერ ჩაიტაროთ პროფილაქტიკური გასინჯვა, რაც განსაკუთრებით მნიშვნელოვანია, რადგან დაავადებების დიდი ნაწილი პრაქტიკულად უსიმპტომოდ მიმდინარეობს.
​
ასევე აუცილებელია სქესობრივი ცხოვრების დაწყებისთანავე გინეკოლოგთან ვიზიტი, რომ მასთან ერთად დაგეგმოთ კონტრაცეპციის მეთოდები არასასურველი ორსულობისგან თავის დასაცავად და ასევე, როგორ იყოთ დაცული სქესობრივი გზით გადამდები დაავადებებისგან.

​რა სიმპტომებისა და ჩივილების დროს და საერთოდ როდის უნდა მივაკითხოთ გინეკოლოგს?
თუ გაქვთ:
​
  • მუცლის ქვედა ნაწილში სხვადასხვა ხასიათის ტკივილი
  • ქაჩვის შეგრძნება
  • შორისის მიდამოში ბურთისებური წარმონაქმნის არსებობა
  • საშოდან სისხლიანი ან ხორცის ნახარშის მსგავსი გამონადენი
  • ანთებითი პროცესები: სიწითლე, შეშუპება, ტკივილი გენიტალიების არეში
  • გამონაყარი გენიტალიების არეში
  • მენსტრუალური ციკლის დარღვევა
  • ჭარბი მენსტრუაცია ან პირიქით შემცირებული მენსტრუაცია
  • სასქესო ორგანოების მიდამოში ქავილი
  • შარდის საგრძნობი გახშირები ან უნებლიე შარდვა
  • შარდვის დროს წვის შეგრძნება
  • საშოდან ჭარბი გამონადენი
  • კონტრაცეპტივის შერჩევისთვის
  • ორსულობის დაგეგმვისთვის.
  • უშვილობის რისკის შემთხვევაში.
  • ე.წ. ალები, კლიმაქტერული სინდრომი

​ციკლის რომელ ფაზაშია უმჯობესი გინეკოლოგთან ვიზიტი?

​ვიზიტისათვის შეარჩიეთ ციკლის პირველი დღეები (სასურველია, მე-7, მე-8 ან მე-9 დღე), ვინაიდან კვლევების უმრავლესობა ტარდება ციკლის პირველ ფაზაში.

​შეიძლება თუ არა მენსტრუალური ციკლის დროს ვიზიტის ჩატარება?

​ვიზიტის ჩატარება, რა თქმა უნდა, შეიძლება, მაგრამ არ არის სასურველი ციკლის დროს მისვლა, ვინაიდან გარკვეული კვლევების ჩატარება ვერ მოხერხდება და მოგიწევთ განმეორებით მისვლა ციკლის დამთავრების შემდეგ. მაგრამ თუ ციკლის დროს დაგეწყოთ გაუსაძლისი ტკივილი ან სხვა რაიმე ჩივილი, ვიზიტი ნამდვილად არ უნდა გადადოთ.

​როგორ უნდა მოვემზადოთ ვიზიტისთვის?

​რაიმე განსაკუთრებული მომზადება არ არის საჭირო. უმჯობესია, დაიბანოთ ვიზიტამდე წინა საღამოს. თუ იღებთ ანტივირსულ ან ანტიმიკოზურ საშუალებებს, უნდა შეწყვიტოთ ვიზიტამდე რამდენიმე დღით ადრე, ასევე 2-3 დღით შეიკავეთ თავი სქესობრივი ცხოვრებისგან.

​რა ხდება ვიზიტზე გინეკოლოგთან?

​პირველ რიგში, ხდება გასაუბრება, ანამნეზის შეკრება. ექიმი გისვამთ კითხვებს თქვენს ზოგად მდგომარეობაზე, ჩივილებზე, გადატანილ დაავადებებზე. შემდეგ ხდება გინეკოლოგიურ სავარძელზე ქალის გასინჯვა. საშოსა და საშვილოსნოს ყელის ვიზუალური შეფასება. საჭიროების შემთხვევაში საშოს ნაცხის, პაპ-ტესტის აღება, კოლპოსკოპისს ჩატარება (რაც დამოკიდებულია პაციენტის ჩივილებზე).

​ასევე სასურველია, გინეკოლოგიური ულტრაგბერითი კვლევის (ექოსკოპიის ჩატარება). გარდა ამისა, შესაძლოა, დამატებით ანალიზის ჩაბარება გახდეს საჭირო (ისევ პაციენტის ჩივილებიდან გამომდინარე).

​როგორ ინიშნება მკურნალობა?
​
მკურნალობა ინიშნება ანალიზების (ნაცხი, ჰორმონული ანალიზი ან სხვა) პასუხებზე დაყრდნობით. შესაძლებელია დასალევი მედიკამენტის დანიშვნა, ვაგინალური ან რექტალური სანთლის გამოყენება, საშოს სპრეის გამოყენება. საინექციო მედიკამენტის დანიშვნა ხდება შედარებით იშვიათად.
​
გავიმერებ, ყველა პაციენტი არის ინდივიდუალური და საჭიროებს ინდივიდუალურ მიდგომას, ასევე მედიკამენტის სხვადასხვა ფორმის, დოზის და სახის შერჩევას, რაც უნდა მოხდეს პაციენტთან და ექიმთან ერთობლივი შეთანხმებით.

​გისურვებთ ჯანმრთელობას!
#გინეკოლოგი #ეკაბუკია

შეიძლება დაინტერესდეთ

ორსულობა

რამდენად მართებულია მოსაზრება, რომ განაყოფიერება არ ხდება მშობიარობის შემდგომ, სანამ ციკლი აღდგება? - ამ და სხვა საკითხებზე ამ თემაზე ​MomsEdu.ge-ს ესაუბრა მეან-გინეკოლოგი დიანა ჭანუყვაძე

რამდენად მართებულია მოსაზრება, რომ განაყოფიერება არ ხდება მშობიარობის შემდგომ, სანამ ციკლი აღდგება? - ამ და სხვა საკითხებზე ამ თემაზე ​MomsEdu.ge-ს ესაუბრა მეან-გინეკოლოგი დიანა ჭანუყვაძე

​არსებობს მოსაზრება, რომ განაყოფიერება არ ხდება მშობიარობის შემდგომ, სანამ ციკლი აღდგება. რამდენად მართებულია და რამდენი უნდა იყოს ორსულობებს შორის შუალედი? - ამ და სხვა საკითხებზე ამ თემაზე ​MomsEdu.ge-ს ესაუბრა მეან-გინეკოლოგი, რეპროდუქტოლოგი დიანა ჭანუყვაძე.

- არსებობს მოსაზრება, რომ განაყოფიერება არ ხდება მშობიარობის შემდგომ, სანამ მენსტრუაციული ციკლი აღდგება, ლაქტაციის პერიოდში. რამდენად მართებულია?

- დიახ, არსებობს ასეთი მითი, რომ სანამ ჩვილს ძუძუთი კვებავთ, ორსულობა არ დადგება, თუმცა სიმართლე ის არის, რომ თქვენ შეგიძლიათ დაორსულდეთ ბავშვის დაბადებიდან 3 კვირის შემდეგ, მაშინაც კი, თუ ძუძუთი კვებავთ და მენსტრუაცია არ დაგწყებიათ. თუ არ გსურთ მშობიარობის შემდეგ მალევე დაორსულება, მნიშვნელოვანია გამოიყენოთ რაიმე სახის კონტრაცეფცია, ყოველი სქესობრივი კავშირის დროს, მათ შორის, პირველის ჩათვლით.

ძუძუთი კვება ხშირად თრგუნავს ოვულაციას, მაგრამ ეს ყოველთვის ასე არ არის. ქალებს, რომლებიც ექსკლუზიურად ძუძუთი კვებავენ ჩვილს, 6 თვის განმავლობაში, ნაკლებად აქვთ ოვულაცია ამ პერიოდში, ვიდრე ქალებს, რომლებიც ძუძუთი არ კვებავენ თავიანთ ჩვილს - კონტრაცეფციის ამ მეთოდს უწოდებენ ლაქტაციურ ამენორეას. ამ მეთოდის ერთ-ერთი მთავარი გამოწვევაა მისი სწორად გამოყენება, ჩვილის კვება 3-4 საათში ერთხელ. თუ კვებათა შორის შუალედს არ დაიცავთ, მეთოდი ნაკლებად ეფექტური იქნება.

Planned Parenthood-ის მიხედვით, ლაქტაციური ამენორეა დაახლოებით 98%-ით ეფექტურია, როდესაც ამ მეთოდს ბავშვის დაბადებიდან პირველი 6 თვის განმავლობაში სწორად იყენებთ. მშობიარობიდან 6 თვის შემდეგ ის ნაკლებად ეფექტური ხდება.

- თავდაცვის საშუალებებზე რომ ვისაუბროთ...

- აღსანიშნია, რომ 100%-ით არცერთი კონტრაცეფციული საშუალება არ იცავს ორსულობისგან, მნიშვნელოვანია თითოეული მეთოდის სწორად შერჩევა და გამოყენება, რომ მისი კონტრაცეფციული მოქმედება მაქსიმალურად იყოს გამოყენებული. მშობიარობის შემდეგ ნებისმიერ დროს, შეგიძლიათ გამოიყენოთ შემდეგი კონტრაცეფციული საშუალებები:

• მამაკაცის პრეზერვატივი;
• ქალის პრეზერვატივი;
• იმპლანტი;
• მხოლოდ პროგესტოგენის შემცველი აბები - მინი პილი;
• შეგიძლიათ აირჩიოთ IUD (საშვილოსნოს შიდა საშუალება), ბავშვის დაბადებიდან 48 საათის განმავლობაში. თუ IUD არ ჩაიდგმევა 48 საათის განმავლობაში, რეკომენდებულია დაელოდოთ მშობიარობიდან დაახლოებით 4 კვირის გასვლას.

თუ ბავშვს არ კვებავთ ძუძუთი და თქვენმა გინეკოლოგმა ჩაგიტარათ კონსულტაცია, რის საფუძველზეც გაიგეთ, რომ არ გაქვთ უკუჩვენება კომბინირებულ ჰორმონალურ პრეპარატებზე, შეგიძლიათ დაიწყოთ:

• კომბინირებული აბები;
• ვაგინალური რგოლი;
• კონტრაცეპტული პლასტირი.
​
ხოლო თუ ძუძუთი კვებავთ, ჯანმრთელობის გარკვეული დარღვევები გაქვთ ან სისხლის შედედების მომატებული რისკი, ჩვეულებრივ გირჩევთ გადადოთ კომბინირებული აბების, რგოლის ან პლასტირის გამოყენება.

- ახდენს თუ არა ზეგავლენას ორგანიზმზე მშობიარობიდან მოკლე პერიოდში ხელახალი ორსულობა და რა მხრივ?

- მშობიარობის შემდგომ ხელახალი დაორსულება, რა თქმა უნდა, შესაძლებელია, თუმცა ასოცირდება გაზრდილ რისკებთან, როგორებიც არის:

• ნაადრევი მშობიარობა;
• თანდაყოლილი პათოლოგიები;
• ნაყოფის ზრდაში ჩამორჩენა და მასის დეფიციტი;
• დედის ანემია;
• მშობიარობის წინ პლაცენტის ნაწილობრივი ან სრული აცლა.

გარდა ამისა, CDC-ის ბოლო დროინდელი მონაცემებით, მშობიარობიდან 18 თვეზე ადრე და 60 თვეზე მეტი ინტერვალის შემთხვევაში დაორსულება შეიძლება ასოცირებული იყოს აუტიზმის განვითარების გაზრდილ რისკთან. კავშირი უფრო გამოკვეთილია აუტიზმის მძიმე ფორმების დროს (​https://www.cdc.gov/ncbddd/autism/features/time-between-births.html).

მშობიარობის შემდგომ მალევე ორსულობამ შესაძლოა ქალს არ მისცეს საკმარისი დრო, რომ მოხდეს ორგანიზმის აღდგენა, როგორც ფიზიკურად, ასევე ფსიქოლოგიურად. მაგალითად, ორსულობამ და ძუძუთი კვებამ შეიძლება გამოიწვიოს ქალის ორგანიზმში სხვადასხვა ვიტამინების და მიკროელემენტების დეფიციტი (რკინა, ფოლიუმის მჟავა, კალციუმი და ა.შ), მშობიარობის შემდგომი დეპრესია და ა.შ.

- რამდენი უნდა იყოს ორსულობებს შორის შუალედი?

- ორსულობის და ჯანმრთელობის რისკის გართულებების შესამცირებლად, კვლევების მიხედვით გვირჩევენ, რომ ორსულობებს შორის შუალედი იყოს 18-დან 24 თვემდე, მაგრამ 5 წელზე ნაკლები. დედის ასაკი 35 წლის ზევით ასოცირდება გაზრდილ რეპროდუქციულ რისკებთან, მათ შორის, უნაყოფობასთან, ქრომოსომულ ანომალიებთან და მშობიარობის არასასურველ შედეგებთან. საჭიროა რისკის და სარგებლის დაბალანსება 35 წელზე მეტი ქალების ორსულობის გადადებასა და ორსულობათა შორის შემცირებულ შუალედებს შორის.

რისკები და რეკომენდაციები არ ვრცელდება წყვილებზე, რომლებსაც ჰქონდათ სპონტანური აბორტი. თუ ჯანმრთელი ხართ და მზად ხართ, არ არის საჭირო ხანგრძლივი შუალედი ორსულობებს შორის.

ბავშვის გაჩენის დროის არჩევა წყვილის პირადი გადაწყვეტილებაა. შემდეგი ორსულობის დაგეგმვისას თქვენ და თქვენმა პარტნიორმა შეიძლება გაითვალისწინოთ სხვადასხვა ფაქტორი, ჯანმრთელობის რისკებისა და სარგებელის. სანამ არ მიიღებთ გადაწყვეტილებას, როდის გააჩინოთ შემდეგი შვილი, ექიმის რეკომენდაციით გამოიყენეთ თქვენთვის მისაღები ჩასახვის საწინააღმდეგო საშუალებები.

ესაუბრა მარიამ ჩოქური
წაიკითხეთ სრულად
გასათიშად დააჭირეთ ESC.