Baby Bag

​ტამპონები, ყოველდღიური საფენები, მენსტრუალური ჭიქა - რა უნდა ვიცოდეთ მათი გამოყენებისას?

​ტამპონები, ყოველდღიური საფენები, მენსტრუალური ჭიქა - რა უნდა ვიცოდეთ მათი გამოყენებისას?

დღეს ხუთშაბათია და მედიაპორტალი MomsEdu.ge ტრადიციულ რუბრიკას - მეან-გინეკოლოგის რეკომენდაციებს წარმოგიდგენთ. ტამპონები, ყოველდღიური საფენები, მენსტრუალური ჭიქა - მეან-გინეკოლოგი და ქირურგი ეკა ბუკია დღეს ამ თემაზე მოგაწვდით კომპეტენტურ ინფორმაციას.

​დღესდღეობით მენსტრუალური ციკლის დროს უდავოდ პირველი ადგილი უჭირავს ტამპონების გამოყენებას, ვინაიდან არსებობს მრავალი სახის, ზომისა და სხვადასხვა შეწოვის უნარის მქონე ტამპონი. ასევე ტამპონებს გააჩნია ის პლუსი, რომ მათი გამოყენების დროს შეიძლება ცურვა. თუმცა ტამპონს აქვს მინუსიც - იშვიათად, მაგრამ მაინც შესაძლებელია, განვითარდეს ბაქტერიული ინფექცია. იმისთვის, რომ შეამციროთ ბაქტერიის ინფექციის განვითარების რისკი:
  • გამოიყენეთ ტამპონები მცირე შეწოვის უნარით
  • ხშირად იცვალეთ ტამპონი
  • როცა გაქვთ მცირე სისხლიანი გამონადენი, ცვალეთ ტამპონი და საფენი მორიგეობით
  • მოერიდეთ მთელი ღამის განმავლობაში ტამპონის გამოყენებას
რისთვისაა საჭირო ყოველდღიური საფენები და როდის შეგვიძლია გამოვიყენოთ?
ყოველდღიურ ცხოვრებაში საშოდან ჭარბი რაოდენობით გამონადენი და არასპეციფიკური სუნი არ უნდა იყოს. ზემოთ ხსენებულის გამო ქალების უმეტესობა იყენებს ყოველდღიურ საფენებს, რაც არ არის რეკომენდირებული, ვინაიდან ჭარბი რაოდენობით გამონადენს და სპეციფიკურ სუნს აქვს თავისი გამომწვევი მიზეზი, რაც საჭიროებს გინეკოლოგიურ ვიზიტს და შესაბამის მკურნალობას. თუმცა ყოველდღიური საფენების გამოყენება შესაძლოა, დაგჭირდეთ მენსტრუალური ციკლის შუა ფაზაში (რომელიც ემთხვევა ოვულაციას), ვინაიდან ამ დროს საშოდან გამონადენის ინტენსივობა მატულობს, რაც ქმნის დისკომფორტს (ეს მდგომარეობა არ საჭიროებს მკურნალობას).
ასევე მენსტრუალური ციკლის დროს, როდესაც ქალი იყენებს ტამპონს, მას შეუძლია დამატებით გამოიყენოს ყოველდღიური საფენი, რომელიც დაეხმარება თავი დაიზღვიოს სისხლიანი გამონადენის გამოჟნვისგან. კომფორტთან ერთად საფენს აქვს მინუსიც - მისი გამოყნების დროს არ შეიძლება ცურვა.
უქმნის თუ არა საფრთხეს ყოველდღიური საფენი ქალის ჯანმრთელობას?
თუ სწორად გამოიყენებთ ყოველდღიურ საფენებს და დაიცავთ ქვემოთ ჩამოთვლილ ნორმებს, თქვენს ჯანმრთელობას საფრთხე არ შეექმნება.
  • გამოიცვალეთ ყოველდღიური საფენი ყოველ 4 საათში, ღამით კი საერთოდ არ გამოიყენოთ
  • მიაქციეთ ყურადღება საფენის ხარისხს, ვინაიდან ამაზეა დამოკიდებული თქვენი ჯანრთელობა და კომფორტის შეგრძნება. ყოველდღიური საფენის შეფუთვაზე აუცილებლად უნდა იყოს მითითებული გაიარა თუ არა პროდუქტმა დერმატოლოგიური ან ჰიგიენური ტესტირება
  • სიფრთხილით გამოიყენეთ ფერადი და არომატიზირებული საფენები, ვინაიდან მათმა ქიმიურმა შემადგენლობამ შესაძლოა, გამოიწვიოს შორისის კანის გაღიზიანება და ალერგიული რეაქცია
  • ყურადღება მიაქციეთ საფენის უკანა მხარეს. ზოგიერთი ბრენდი იყენებს პოლიეთილენის პარკს, რომელზეც მაგრდება წებოვანი ნაწილაკები, რომ საფენი კარგად მიემაგროს საცვალს. ასეთი საფენი გამოიწვევს გენიტალიების ჩახუთვას.
რას უნდა ვიცოდეთ მენსტრუალურ ჭიქაზე?
მენსტრუალური ჭიქა ეს არის სპეციალური ჭიქა, რომელიც დამზადებულია სილიკონის ან რეზინისგან და თავსდება საშოში მენსტრუალური გამონადენის შესაგროვებლად. აღსანიშნავია, რომ მსგავსი ჭიქები არის როგორც ერთჯერადი, ასევე მრავალჯერადი გამოყენების, ამიტომ უნდა მიაქციოთ შეფუთვას ყურადღება და შეარჩიოთ თქვენთვის სასურველი მენსტრუალური ჭიქა. მასაც აქვს პლუსები და მინუსები.
პლუსები:
  • მისი გამოყენება შესაძლებელია 12 სთ-ის განმავლობაში
  • მისი გამოყენების დროს შესაძლებელია ცურვა
  • ის არ არღვევს საშოს PH-ს
მინუსები:
  • თუ გაქვთ ჭარბი მენსტრუაცია, ამ შემთხვევაში ჭიქის გამოცვლა მოგიწევთ 12 სთ-ზე გაცილებით უფრო ადრე
  • თუ იყენებთ საშვილოსნოს შიდა კონტრაცეპტივს - „სპირალს“, მაშინ მენსტრუალური ჭიქა არ გამოგადგებათ, ვინაიდან მისი გამოტანის შემდეგ შესაძლოა, ხელი მოგიხვდეთ სპირალის ძაფზე და გამოიწვიოთ სპირალის ადგილმდებარეობის შეცვლა, ან გამოვარდნა
  • მისი გამოყენების შემდეგ უნდა მოხდეს გარეცხვა და გასტერილება
  • ზოგიერთი მენსტრუალური ჭიქა შეიცავს ლატექსს ამიტომ, თუ ალერგიული ხართ ლატექსზე, აუცილებლად უნდა შეამოწმოთ ეტიკეტზე ლატექსის არსებობა-არარსებობა
  • თუ მენსტრუალური ჭიქის სწორად ჩადგმა ვერ მოახერხეთ, შესაძლებელია, მენსტრუალური გამონადენის გამოჟონვა
  • არ შეიძლება მენსტრუალური ჭიქის გამოყენება, თუ ქალს აქვს საშოს ინფექცია, ვინაიდან სისხლი წარმოადგენს ბაქტერიების გამრავლებისთვის ხელსაყრელ გარემოს.
  • იმისთვის, რომ გაიგოთ რომელი ჰიგიენური საშუალებაა თქვენთვის კომფორტული და თქვენზე მორგებული, შეგიძლიათ სცადოთ თითოეული მათგანი.

​გისურვებთ ჯანმრთელობას!

არ დაგავიწყდეთ !!!

Momsedu.ge-მ თქვენთვის, ქალებისთვის შექმნა ახალი სივრცე, სადაც ყველაზე მცოდნე დედები იყრიან თავს. ჯგუფის დასახელებაც სწორედ ასეა - „მცოდნე დედების ჯგუფი“, რომლის საშუალებით დედები ერთმანეთს საკუთარ გამოცდილებას გაუზიარებენ. (ჯგუფში გასაწევრიანებლად ნახეთ ბმული - „მცოდნე დედ​ების ჯგუფი“)

შეიძლება დაინტერესდეთ

რამდენად მართებულია მოსაზრება, რომ განაყოფიერება არ ხდება მშობიარობის შემდგომ, სანამ ციკლი აღდგება? - ამ და სხვა საკითხებზე ამ თემაზე ​MomsEdu.ge-ს ესაუბრა მეან-გინეკოლოგი დიანა ჭანუყვაძე

რამდენად მართებულია მოსაზრება, რომ განაყოფიერება არ ხდება მშობიარობის შემდგომ, სანამ ციკლი აღდგება? - ამ და სხვა საკითხებზე ამ თემაზე ​MomsEdu.ge-ს ესაუბრა მეან-გინეკოლოგი დიანა ჭანუყვაძე

არსებობს მოსაზრება, რომ განაყოფიერება არ ხდება მშობიარობის შემდგომ, სანამ ციკლი აღდგება. რამდენად მართებულია და რამდენი უნდა იყოს ორსულობებს შორის შუალედი? - ამ და სხვა საკითხებზე ამ თემაზე ​MomsEdu.ge-ს ესაუბრა მეან-გინეკოლოგი, რეპროდუქტოლოგი დიანა ჭანუყვაძე.

- არსებობს მოსაზრება, რომ განაყოფიერება არ ხდება მშობიარობის შემდგომ, სანამ მენსტრუაციული ციკლი აღდგება, ლაქტაციის პერიოდში. რამდენად მართებულია?

- დიახ, არსებობს ასეთი მითი, რომ სანამ ჩვილს ძუძუთი კვებავთ, ორსულობა არ დადგება, თუმცა სიმართლე ის არის, რომ თქვენ შეგიძლიათ დაორსულდეთ ბავშვის დაბადებიდან 3 კვირის შემდეგ, მაშინაც კი, თუ ძუძუთი კვებავთ და მენსტრუაცია არ დაგწყებიათ. თუ არ გსურთ მშობიარობის შემდეგ მალევე დაორსულება, მნიშვნელოვანია გამოიყენოთ რაიმე სახის კონტრაცეფცია, ყოველი სქესობრივი კავშირის დროს, მათ შორის, პირველის ჩათვლით.

ძუძუთი კვება ხშირად თრგუნავს ოვულაციას, მაგრამ ეს ყოველთვის ასე არ არის. ქალებს, რომლებიც ექსკლუზიურად ძუძუთი კვებავენ ჩვილს, 6 თვის განმავლობაში, ნაკლებად აქვთ ოვულაცია ამ პერიოდში, ვიდრე ქალებს, რომლებიც ძუძუთი არ კვებავენ თავიანთ ჩვილს - კონტრაცეფციის ამ მეთოდს უწოდებენ ლაქტაციურ ამენორეას. ამ მეთოდის ერთ-ერთი მთავარი გამოწვევაა მისი სწორად გამოყენება, ჩვილის კვება 3-4 საათში ერთხელ. თუ კვებათა შორის შუალედს არ დაიცავთ, მეთოდი ნაკლებად ეფექტური იქნება.

Planned Parenthood-ის მიხედვით, ლაქტაციური ამენორეა დაახლოებით 98%-ით ეფექტურია, როდესაც ამ მეთოდს ბავშვის დაბადებიდან პირველი 6 თვის განმავლობაში სწორად იყენებთ. მშობიარობიდან 6 თვის შემდეგ ის ნაკლებად ეფექტური ხდება.

- თავდაცვის საშუალებებზე რომ ვისაუბროთ...

- აღსანიშნია, რომ 100%-ით არცერთი კონტრაცეფციული საშუალება არ იცავს ორსულობისგან, მნიშვნელოვანია თითოეული მეთოდის სწორად შერჩევა და გამოყენება, რომ მისი კონტრაცეფციული მოქმედება მაქსიმალურად იყოს გამოყენებული. მშობიარობის შემდეგ ნებისმიერ დროს, შეგიძლიათ გამოიყენოთ შემდეგი კონტრაცეფციული საშუალებები:

• მამაკაცის პრეზერვატივი;
• ქალის პრეზერვატივი;
• იმპლანტი;
• მხოლოდ პროგესტოგენის შემცველი აბები - მინი პილი;
• შეგიძლიათ აირჩიოთ IUD (საშვილოსნოს შიდა საშუალება), ბავშვის დაბადებიდან 48 საათის განმავლობაში. თუ IUD არ ჩაიდგმევა 48 საათის განმავლობაში, რეკომენდებულია დაელოდოთ მშობიარობიდან დაახლოებით 4 კვირის გასვლას.

თუ ბავშვს არ კვებავთ ძუძუთი და თქვენმა გინეკოლოგმა ჩაგიტარათ კონსულტაცია, რის საფუძველზეც გაიგეთ, რომ არ გაქვთ უკუჩვენება კომბინირებულ ჰორმონალურ პრეპარატებზე, შეგიძლიათ დაიწყოთ:

• კომბინირებული აბები;
• ვაგინალური რგოლი;
• კონტრაცეპტული პლასტირი.
ხოლო თუ ძუძუთი კვებავთ, ჯანმრთელობის გარკვეული დარღვევები გაქვთ ან სისხლის შედედების მომატებული რისკი, ჩვეულებრივ გირჩევთ გადადოთ კომბინირებული აბების, რგოლის ან პლასტირის გამოყენება.

- ახდენს თუ არა ზეგავლენას ორგანიზმზე მშობიარობიდან მოკლე პერიოდში ხელახალი ორსულობა და რა მხრივ?

- მშობიარობის შემდგომ ხელახალი დაორსულება, რა თქმა უნდა, შესაძლებელია, თუმცა ასოცირდება გაზრდილ რისკებთან, როგორებიც არის:

• ნაადრევი მშობიარობა;
• თანდაყოლილი პათოლოგიები;
• ნაყოფის ზრდაში ჩამორჩენა და მასის დეფიციტი;
• დედის ანემია;
• მშობიარობის წინ პლაცენტის ნაწილობრივი ან სრული აცლა.

გარდა ამისა, CDC-ის ბოლო დროინდელი მონაცემებით, მშობიარობიდან 18 თვეზე ადრე და 60 თვეზე მეტი ინტერვალის შემთხვევაში დაორსულება შეიძლება ასოცირებული იყოს აუტიზმის განვითარების გაზრდილ რისკთან. კავშირი უფრო გამოკვეთილია აუტიზმის მძიმე ფორმების დროს (​https://www.cdc.gov/ncbddd/autism/features/time-between-births.html).

მშობიარობის შემდგომ მალევე ორსულობამ შესაძლოა ქალს არ მისცეს საკმარისი დრო, რომ მოხდეს ორგანიზმის აღდგენა, როგორც ფიზიკურად, ასევე ფსიქოლოგიურად. მაგალითად, ორსულობამ და ძუძუთი კვებამ შეიძლება გამოიწვიოს ქალის ორგანიზმში სხვადასხვა ვიტამინების და მიკროელემენტების დეფიციტი (რკინა, ფოლიუმის მჟავა, კალციუმი და ა.შ), მშობიარობის შემდგომი დეპრესია და ა.შ.

- რამდენი უნდა იყოს ორსულობებს შორის შუალედი?

- ორსულობის და ჯანმრთელობის რისკის გართულებების შესამცირებლად, კვლევების მიხედვით გვირჩევენ, რომ ორსულობებს შორის შუალედი იყოს 18-დან 24 თვემდე, მაგრამ 5 წელზე ნაკლები. დედის ასაკი 35 წლის ზევით ასოცირდება გაზრდილ რეპროდუქციულ რისკებთან, მათ შორის, უნაყოფობასთან, ქრომოსომულ ანომალიებთან და მშობიარობის არასასურველ შედეგებთან. საჭიროა რისკის და სარგებლის დაბალანსება 35 წელზე მეტი ქალების ორსულობის გადადებასა და ორსულობათა შორის შემცირებულ შუალედებს შორის.

რისკები და რეკომენდაციები არ ვრცელდება წყვილებზე, რომლებსაც ჰქონდათ სპონტანური აბორტი. თუ ჯანმრთელი ხართ და მზად ხართ, არ არის საჭირო ხანგრძლივი შუალედი ორსულობებს შორის.

ბავშვის გაჩენის დროის არჩევა წყვილის პირადი გადაწყვეტილებაა. შემდეგი ორსულობის დაგეგმვისას თქვენ და თქვენმა პარტნიორმა შეიძლება გაითვალისწინოთ სხვადასხვა ფაქტორი, ჯანმრთელობის რისკებისა და სარგებელის. სანამ არ მიიღებთ გადაწყვეტილებას, როდის გააჩინოთ შემდეგი შვილი, ექიმის რეკომენდაციით გამოიყენეთ თქვენთვის მისაღები ჩასახვის საწინააღმდეგო საშუალებები.

ესაუბრა მარიამ ჩოქური
წაიკითხეთ სრულად