გრიპის ვირუსის გამო სასწავლო პროცესის გადადებასთან დაკავშირებული ინფორმაცია სიმართლეს არ შეესაბამება, - ამის შესახებ Moms.ge-ს განათლების, მეცნიერების, კულტურისა და სპორტის სამინისტროში განუცხადეს.
როგორც უწყებაში განმარტავენ, განათლების სამინისტროსთვის დაავადებათა კონტროლის ეროვნულ ცენტრს ზამთრის არდადეგების გახანგრძლივების რეკომენდაციით არ მიუმართავს. მათივე ცნობით, საჯარო სკოლებში სასწავლო პროცესი 15 იანვარს განახლდება.
„საატესტატო და ეროვნული გამოცდების რეფორმის შესახებ ინფორმაცია 2019 წლის დასაწყისში გახდება ცნობილი“ - აღნიშნულის შესახებ საქართველოს განათლების, მეცნიერების, კულტურისა და სპორტის მინისტრმა მიხეილ ბატიაშვილმა სამინისტროში გამართულ პრესკონფერენციაზე განაცხადა.
მისივე თქმით, სამინისტროს უახლოეს პერიოდში ექნება კონკრეტული ხედვა, როგორც დამამთავრებელ კლასებზე, ასევე ეროვნულ გამოცდებზე, თუ რა ცვლილებები შეიძლება მოსწავლეებსა და აბიტურიენტებსშეეხოთ:
„რეფორმების პრეზენტაციის დროს გამოვაცხადეთ, რომ გვექნება კონკრეტული ნაბიჯები. ამჟამად მიმდინარეობს შეფასება სისტემის, რამდენად ადეკვატურია და რამდენად პასუხობს დღევანდელი სისტემა მოთხოვნებს. მუშაობა დაწყებულია, მიმდინარეობს შეფასებები და უახლოეს პერიოდში გვექნება კონკრეტული ხედვა, როგორც დამამთავრებელ კლასებზე, ასევე ეროვნულ გამოცდებზე. გპირდებით, რომ მომავალი წლიდან უკვე მზად ვიქნებით, წარმოვადგინოთ ჩვენი გეგმა, რომ რაც შეიძლება ადრე გაიგონ აბიტურიენტებმა და მშობლებმა, კონკრეტულად რა ცვლილებები იქნება. ეს ყველაფერი გათვლილი იქნება აბიტურიენტების ინტერესებიდან გამომდინარე და იმ ხარისხის ეფექტზე გათვლით, რომ რაც შეიძლება მეტი წარმატებული აბიტურიენტი მოხვდეს წარმატებულ უნივერსიტეტებში“, - დასძინა მინისტრმა.
წაიკითხეთ სრულად
