ზუგდიდის პირველი საჯარო სკოლის მასწავლებლის მიერ მე-12 კლასელებისადმი მიძღვნილი პოსტი მოქალაქეთა შეშფოთების და სკოლის დისციპლინური კომიტეტის შეკრების მიზეზი გახდა. სწორედ ზუგდიდის პირველი საჯარო სკოლის დისციპლინურმა კომიტეტმა უნდა იმსჯელოს იმის შესახებ, რა სანქცია გატარდება მასწავლებლის მიმართ.
ფეისბუკპოსტში, რომელიც მასწავლებელმა 21 მაისს გამოაქვეყნა და მალევე წაშალა, ნათქვამი იყო, რომ ის სიხარულს განიცდის იმის გამო, რომ გარკვეული მოსწავლეების ნახვა აღარ მოუწევს და ამბობს, რომ ზოგიერთი მათგანის სახელი და გვარის ხსენებაც კი ზარავს:
,,ჩემთვის 26 გამოშვება. უცნაური დღევანდელი მდგომარეობის გამო და არამხოლოდ. არ ირეკება ბოლო ზარი, არ ვწერთ კეთილ სურვილებს მოხატულ პერანგებზე, რაც ყოველთვის გულისამაჩუყებელი იყო და ცრემლებს მგვრიდა. დღეს ეს განცდა არ მაქვს, პირიქით, ვფიქრობ და მიხარია რომ მომავალ სასწავლო წელს მათ გარეშე შევხვდები (რა თქმა უნდა დიდ უმრავლესობას არ ეხება) ზოგიერთი მათგანის სახელის და გვარის ხსენებაც მზარავს. თუმცა მყავს ფავორიტებიც. ჩემს ანდრიას, დათუნას, გიგას, სანდროს, ბადუკას, ვანოს ვუსურვებ წარმატებებს, წინსვლას ცხოვრებაში. თუ 18 წლის არ ვარგიხარ, ვერც 78 წლისას ივარგებ.თქვენ უკვე ხართ 18 წლის, ხართ კარგი ადამიანები, კაცური კაცები, თქვენ იცით პირველ რიგში ეს არის მთავარი და არა, ვთქვათ ქიმიამცოდნეობა. თქვენ შეგიძლიათ თავაწეულებმა იაროთ, სიკეთე და ბედნიერება მოუტანოთ თქვენს ირგვლივ მყოფ ადამიანებს, იარეთ, იარეთ, იარეთ, ამინ!"- წერდა სოციალურ ქსელში პედაგოგი.
პედაგოგიური პრაქტიკის კვლევის დოკუმენტების განთავსების ვადა განისაზღვრა - მასწავლებლის სახლის დირექტორის ბრძანება
იმ მასწავლებლებისთვის, რომლებსაც საკუთარი პედაგოგიური პრაქტიკის კვლევა უარყოფითად შეუფასდა, ელექტრონულ სისტემაში პრაქტიკის კვლევის დოკუმენტების განთავსების ვადად განისაზღვრა 2020 წლის 15 მაისიდან 2020 წლის 19 ივნისის ჩათვლით პერიოდი. შესაბამისი ბრძანება, რომელსაც მასწავლებლის სახლის დირექტორი ბერიკა შუკაკიძე აწერს ხელს, დღეს გამოქვეყნდა.
როგორც მასწავლებლის პროფესიული რეგულირების პროგრამის გარე დაკვირვების მიმართულების მენეჯერი ქრისტინე ინგოროყვა სოციალურ ქსელში წერს, ამ ეტაპზე შემოწმებულია იმ პირების კვლევებიც, რომლებიც შეფასების ჯგუფების მიერ შეფასდნენ დეკემბერში, ცენტრის დირექტორის №265 (19/11/2019) ბრძანების პუნქტი - დ შესაბამისად.
„თითოეული კვლევის პასუხი - დადებითიც და უარყოფითიც უკვე გადაგზავნილია სკოლებში და თუ აკმაყოფილებდით წესით განსაზღვრულ მოთხოვნებს და ჯერ არ მიგიღიათ პასუხი, აუცილებლად გადაამოწმეთ რესურსცენტრში,“ - აღნიშნავს ქრისტნე ინგოროყვა.
ცნობისთვის, გარე დაკვირვების შესახებ ბრძანებაში ცვლილება გუშინ შევიდა. ცვლილების თანახმად, იმ მასწავლებლებს, რომლებმაც 2020 წლის 2 მარტიდან ზოგადსაგანმანათლებლო დაწესებულებებში სასწავლო პროცესის შეჩერების გამო ვერ შეძლეს გარე დაკვირვების გავლა, უფლება აქვთ გარე დაკვირვებაზე რეგისტრაცია გაიარონ 2020-2021 სასწავლო წლის განმავლობაში.
