ვინ არის ინტერნეტვარსკვლავი ბიჭი, რომლის შესრულებულმა სიმღერამ სოციალური ქსელი დაიპყრო?

​​ინფექციონისტი ფატი გაბუნია სეზონური გრიპის შესახებ საუბრობს და აღნიშნავს, რომ მას მწვავე მიმდინარეობა ახასიათებს:

„გრიპი გახლავთ მწვავე დაავადება მძიმე მიმდინარეობით. მოწმენდილ ცაზე დილას ავდექი, არაფერი მაწუხებს, საღამოს დამეწყო შემცივნება, კანკალი, მომემატა ტემპერატურა, არის 38 ან უფრო მაღალი. არ არსებობს ქრონიკული გრიპი, არ არსებობს შემპარავი გრიპი. არ არსებობს გრიპი, რომელიც იწყება 37 ტემპერატურით და შემდეგ ადის მაღალ ციფრებამდე.“

ფატი გაბუნიას თქმით, გრიპის უმთავრესი სიმპტომი მაღალი ტემპერატურაა:

„მაღალი ტემპერატურა გახლავთ გრიპის კარდინალური სიმპტომი. თუ უბრალოდ არის სურდო, რომელიც მოდის წყალივით, ეს არის რინოვირუსი. თუ არის ხველება ტემპერატურის გარეშე, ეს შეიძლება იყოს ​რესპირატორულ-სინციტიური ვირუსი. მწვავედ განვითარებული დაავადება თავის ტკივილით, სახსრების ტკივილით, მაღალი ტემპერატურით გახლავთ სეზონური გრიპი. გრიპს ახასიათებს მთელი რიგი გართულებებისა. ამ გართულებების თავიდან ასაცილებლად აუცილებელია, რომ პირველ 48 საათში მოხდეს გრიპის საწინააღმდეგო პრეპარატების დანიშვნა. გრიპის ყველაზე ხშირი გართულებაა სინუსიტები და ტრაქეიტი. ამავე დროს არსებობს გრიპთან ასოცირებული პნევმონია, რომელიც საკმაოდ რთულად მიმდინარეობს.“

ფატი გაბუნია აღნიშნავს, რომ გრიპის ვაქცინის გაკეთება ძალიან მნიშვნელოვანია. ინფექციონისტის თქმით, ინფექციური დაავადებებისგან დამცავი ვაქცინაცია მედიცინაში ყველაზე დიდ მიღწევად ითვლება:

„ინფექციური დაავადებების ვაქცინით პროფილაქტიკა არის მედიცინის ყველაზე დიდი მიღწევა და ამ მიღწევის უგულებელყოფა არავის მიერ არ შეიძლება. ​გრიპის ვაქცინა ყოველწლიურია. ვაქცინის საპასუხოდ იმუნიტეტის გამომუშავებას სჭირდება 6-8 კვირა.“

„ძალიან მკაფიოდ მინდა გავუსვა ხაზი, რომ სახელმწიფოს მიერ ქვეყანაში შემოტანილი ყველა​ ვაქცინა შემოწმებულია ხარისხზე. ის მოწოდებულია უშუალოდ ჯანდაცვის მსოფლიო ორგანიზაციისგან და არის აბსოლუტურად უსაფრთხო. მოვუწოდებ მოსახლეობას, რომ უპირატესობა მიანიჭონ უფასო ვაქცინას,“ - აცხადებს ფატი გაბუნია.

წყარო: ​პოსტ ალიონი