Baby Bag

გამოიგონეს სკამი, რომელზეც მუხლმოკეცილს კომფორტულად ჯდომა შეგიძლიათ

გამოიგონეს სკამი, რომელზეც მუხლმოკეცილს კომფორტულად ჯდომა შეგიძლიათ

ამერიკაში გამოიგონეს სკამი, რომელზეც მუხლმოკეცილს კომფორტულად ჯდომა ​შეგიძლიათ. აღნიშნულ სკამს პლატფორმა და შემაღლებული დასაჯდომი აქვს, რის გამოც მასზე მუხლმოკეცილად ჯდომა დისკომფორტს არ შეგიქმნით. დიზაინერი პეკ მეთიუსი ძალიან წუხდა იმის გამო, რომ ტრადიციული სავარძლები და სკამები განსხვავებულ პოზაში ჯდომის შემთხვევაში მას ფიზიკურ ტკივილს აყენებდნენ და უხერხულობას უქმნიდნენ. კომპიუტერთან ხანგრძლივი დროით მუშაობას ის მხოლოდ წელში გამართული და იატაკზე ფეხებდაბჯენილი ახერხებდა. აღნიშნული პრობლემის მოსაგვარებლად მან მეგობრებს თხოვნით მიმართა და მათთან ერთად დაიწყო ფიქრი გამოსავლის ძებნაზე. საბოლოოდ ურთიერთთანამშრომლობამ საოცარი შედეგი გამოიღო. უნიკალური დიზაინის მქონე სკამი საოცრად მოხერხებულია და მასზე ჯდომისას პოზების ცვლილება მარტივად შეგიძლიათ.

ახალი სკამი ტკივილის შემსუბუქებას და კუნთების დაძაბულობის მოხსნას უწყობს ხელს. მისი დახმარებით სწორ პოზაში ჯდომას მარტივად ეჩვევით. როდესაც ახალი დიზაინის მქონე სკამზე ჯდებით, მენჯი წინ უნდა გადმოხაროთ, ბარძაყები სათანადოდ გაშალოთ, ხერხემალი კი ნეიტრალურ პოზიციას უნდა ინარჩუნებდეს. პეკ მეთიუსი იოგას აქტიური მიმდევარია. როდესაც ის სკამის ახალ დიზაინზე მუშაობდა, ცდილობდა იოგებისთვის მოსახერხებელი დასაჯდომი შეექმნა. იატაკზე მოხერხებულად ჯდომით შთაგონებულმა მეთიუსმა ისეთი დიზაინის სკამი შექმნა, რომელსაც არც საზურგე აქვს და არც სახელურები. ახალი სკამი საოცრად პოპულარულია. მის შესახებ საზოგადოებამ მხოლოდ რამდენიმე დღის წინ შეიტყო, მიუხედავად ამისა კომპანიის პოსტს, რომელზეც ახალი დიზაინის სკამის ფოტო იყო გამოსახული ტვიტერზე 40 000-მდე გაზიარება აქვს.

 

დიზაინერმა მომხმარებლებსშემდეგი სიტყვებით მიმართა: „თუ მუხლებმოკეცილს გიყვართ ჯდომა, ეს სკამი სწორედ თქვენთვისაა!“ მეთიუსის პოსტს უდიდესი გამოხმაურება მოჰყვა. ერთ-ერთმა მომხმარებელმა სინანულით აღნიშნა, რომ მან თავისი ოფისის სავარძელი შემთხვევით გატეხა, რადგან მასზე მუხლმოკეცილად ხშირად ჯდებოდა. აღმოჩნდა, რომ ზოგიერთმა ადამიანმა განსხვავებულ პოზაში ჯდომის გამო სამსახურიც კი დაკარგა. ზოგიერთი პროფესიის წარმომადგენელს კატეგორიულად ეკრძალება სამსახურში მუხლებმოკეცილი ჯდომა.

ახალ სკამს შთამბეჭდავი ფასიც აქვს, მისი შეძენა 875 დოლარი დაგიჯდებათ. თუ მაღალი ხარისხის ხის მასალისგან დამზადებული სკამის ყიდვას გადაწყვეტთ, 1200 ამერიკული დოლარის გადახდა მოგიწევთ. 

მომზადებულია says.com-ის მიხედვით
თარგმნა ია ნაროუშვილმა 

შეიძლება დაინტერესდეთ

როგორ ვასწავლოთ ბავშვს თავის დამოუკიდებლად დაბანა?

როგორ ვასწავლოთ ბავშვს თავის დამოუკიდებლად დაბანა?

დედებმა კარგად იციან, რომ სანამ ბავშვი პატარაა, მშობლის პასუხისმგებლობაა მას ჩააცვას, გამოკვებოს და მის სისუფთავეზე იზრუნოს. ბავშვის ასაკის მატებასთან ერთად ცხადი ხდება, რომ მას ამ ყოველივეს გაკეთება თავისითაც შეუძლია. შვილის დამოუკიდებელი უნარების ჩამოყალიბება დედებს შრომას უმსუბუქებს. პასუხისმგებლობის უნარის ჩამოყალიბება ბავშვის განვითარებისა და ზრდისთვისაც კარგია. ეს მშობელს არწმუნებს, რომ მისი შვილი ვითარდება და იძენს უნარებს, რომელიც მას მთელი ცხოვრების მანძილზე დასჭირდება.

ერთ-ერთი ამოცანა, რომელსაც ბავშვმა ასაკის მატებასთან ერთად დამოუკიდებლად უნდა შეასრულოს, თავის დაბანაა. დედები ნერვიულობენ, რამდენად კარგად შეძლებენ ამის გაკეთებას მათი შვილები, რამდენად სრულფასოვნად დიაბანენ თავს და სრულყოფილად მოიშორებენ შამპუნს. ბავშვისთვის თავის დამოუკიდებლად დაბანის სწავლება დედებს რთულ ამოცანად ეჩვენებათ, თუმცა სწორი მიდგომის შემთხვევაში, ყველაფერი მარტივდება.

ბავშვების განვითარების ტემპი განსხვავებულია. ზოგიერთი მათგანი უფრო ადრე ეჩვევა დამოუკიდებლობას, ზოგიერთი კი - გვიან. 8 წლის ასაკიდან ბავშვები აქტიურად მონაწილეობენ პირადი ჰიგიენის პროცედურებში და დედებს თავის დაბანისას ეხმარებიან, თუმცა მათი დიდი ნაწილი დამოუკიდებლად თავის დაბანას 10-12 წლიდან ახერხებს. თუ ოჯახში ბევრი ბავშვია, როგორც წესი, უმცროსები უფრო სწრაფად ითვისებენ იმ უნარებს, რომელთა ასათვისებლად უფროსებს მეტი დრო დასჭირდათ.

მშობლები უნდა დარწმუნდნენ, რომ მიზნისკენ ნაბიჯ-ნაბიჯ მიდიან და ბავშვს ახალი უნარის ათვისებაში სწორად ეხმარებიან. ამ გზით ბავშვს ასწავლით, როდის რა მოიმოქმედოს. სასარგებლოა ბავშვისთვის სურათების ჩვენება, რომლებზეც ასახულია თავის სწორად დაბანის პროცესი. სავარაუდოდ, თქვენს შვილს აქტიური წვდომა აქვს ინტერნეტთან. ამ შემთხვევაში, ინტერნეტში მოძიებული წყაროების რესურსად გამოყენება შეგიძლიათ. Youtube-ზე ბევრ ვიდეოს ნახავთ, რომელიც თქვენს შვილს თავის სწორად დაბანას ასწავლის. ყველაზე მნიშვნელოვანია, ბავშვმა შამპუნის სწორად გამოყენება და მისი სრულფასოვნად ჩამობანა ისწავლოს. მშობელი შვილს უნდა დაეხმაროს, რომ თავის დაბანის ყველაზე რთული ეტაპები მან პრაქტიკაში აითვისოს. მნიშვნელოვანია, რომ მშობელმა მხარი დაუჭიროს ბავშვს, როდესაც ის დამოუკიდებლად იწყებს ამ ამოცანის შესრულებას.

წყარო: ​moms.com

წაიკითხეთ სრულად