Baby Bag

ექსტრემალური ტატუების მოყვარული ქალი, რომელმაც თვალის თეთრი გარსი საღებავით მოიხატა, დაბრმავდა

ექსტრემალური ტატუების მოყვარული ქალი, რომელმაც თვალის თეთრი გარსი საღებავით მოიხატა, დაბრმავდა

ავსტრალიელი ქალი, რომელმაც ექსტრემალურ ტატუებსა და პირსინგებში 26 000 ამერიკული დოლარი დახარჯა, აცხადებს, რომ თვალის თეთრი გარსის მოხატვის შემდეგ დაბრმავდა. 24 წლის ამბერ ლუკი, რომელიც საკუთარ თავს ლურჯთვალა თეთრ დრაკონად მოიხსენიებს, თვალის გარსს 40 წუთის განმავლობაში იხატავდა, რათა ის შედეგი მიეღო, რომელიც სურდა. მას სხეულზე ჯამში ორასამდე ტატუ აქვს. მან მკერდი, ტუჩები და ლოყებიც მოიხატა, ხოლო ყურში სპეციალური იმპლანტი ჩაიდგა, რათა ელფს დამსგავსებოდა.

ყველაზე საშიში ექსპერიმენტი, რომელიც ამბერ ლუკმა საკუთარ სხეულს ჩაუტარა თვალის თეთრი გარსის ლურჯი საღებავით მოხატვა იყო. ამ ექსპერიმენტის შედეგად მან მხედველობა დროებით დაკარგა.

„ვერ გადმოვცემ, რას განვიცდიდი, როდესაც ამას ვაკეთებდი. ისეთი შეგრძნება მქონდა, თითქოს თვალში შუშის ნამსხვრევები ჩამიყარეს. ჩემი ტატუს არტისტი თვალის თეთრ გარსში მეტისმეტად ღრმად შეიჭრა, რაც ძალიან მტკივნეული იყო. მას რომ პროცედურა სწორად ჩაეტარებინა, არ დავბრმავდებოდი. ძალიან შემეშინდა,“ - აცხადებს ამბერი.

ტატუების მოყვარული ამბერ ლუკი აღნიშნავს, რომ მას პროცედურაზე თითოეულ თვალში საღებავის ინექცია ოთხჯერ შეუყვანეს. ახალგაზრდა ქალმა საკუთარ ენას გველის ფორმა მისცა, ყურები კი სპეციალური პროცედურების დახმარებით ელფის მსგავსად დაიყენა. ის აცხადებს, რომ სახიფათო ექსპერიმენტებს აღარ ჩაიტარებს, თუმცა გეგმავს, რომ თავიდან ფეხის წვერამდე სხეული ტატუებით დაიფაროს.

ამბერის დედის თქმით, შვილის გადაწყვეტილება, რომ ის ექსპერიმენტებს აღარ ჩაიტარებს, მისთვის უდიდესი შვებაა: „ვტიროდი, როდესაც ამბერი დაბრმავდა. ჩემი შვილი საკუთარ თავს ჩემი თვალებით არ ხედავს. ის ჩემთვის ისედაც ულამაზესია, მაგრამ მის გადაწყვეტილებებს მხარს ვუჭერდი, რომ მენახა, როგორ მიაღწევდა იმას, რაც სურდა. ტატუ ადამიანს არ ცვლის, უბრალოდ საზოგადოება სხვანაირად აღგიქვამს, როდესაც ამას აკეთებ.“

ამბერს სოციალურ ქსელში 139 000 მიმდევარი ჰყავს. ის აცხადებს, რომ მოზარდობისას საკუთარი თავი სძულდა და არ მოსწონდა.

„ადამიანები იცვლებიან, ისინი საკუთარ თავს პოულობენ. სილამაზეზე ყველას თავისი აზრი აქვს. იმედი მაქვს, სხეულის ტრანსფორმაციისადმი საზოგადოება უახლოეს მომავალში მეტ გახსნილობას გამოავლენს,“ - აცხადებს ამბერ ლუკი.

მომზადებულია​ nypost.com-ის მიხედვით

თარგმნა ია ნაროუშვილმა

არ დაგავიწყდეთ !!!

Momsedu.ge-მ თქვენთვის, დედებისთვის შექმნა ახალი სივრცე. მოიწონეთ გვერდი მცოდნე დედები

22 წლის ქალი, რომელმაც ფილერის ინექციის 20 პროცედურა ჩაიტარა და ტუჩის მოცულობა ოთხჯერ გაიზ...
ახალგაზრდა ქალი, რომელმაც ფილერის ინექციის გამოყენებით საკუთარი ტუჩის მოცულობა 4-ჯერ გაზარდა, გაჩერებას არ აპირებს. ბულგარელი ანდრეა ემილოვა ივანოვა მსოფლიოში ყველაზე დიდი ტუჩების ქონაზე ოცნებობს. მან...
ქალს, რომელიც ფრჩხილებს 4 წლის განმავლობაში იზრდიდა, ფრჩხილის მოტეხვაზე კოშმარები ესიზმრებ...
​გრძელი ფრჩხილების ქონაზე ძალიან ბევრი ქალი ოცნებობს. ცნობილმა ბლოგერმა ელენა შილენკოვამ რეკორდულად დიდი ზომის ფრჩხილების გაზრდა მოახერხა, რითაც უამრავი ადამიანის ყურადღება მიიქცია. 35 წლის ქალს 4 წელ...

შეიძლება დაინტერესდეთ

„ჩვენთან ძალიან ბევრი ადამიანი უსაფუძვლოდ შფოთავს სხეულის ტემპერატურის გამო...“ - ინფექციონისტი მაია ბუწაშვილი

„ჩვენთან ძალიან ბევრი ადამიანი უსაფუძვლოდ შფოთავს სხეულის ტემპერატურის გამო...“ - ინფექციონისტი მაია ბუწაშვილი

ინფექციონისტმა მაია ბუწაშვილმა სოციალურ ქსელში პოსტი გამოაქვეყნა, რომელშიც სხეულის ტემპერატურის გამო უსაფუძვლო შფოთვის შესახებ ისაუბრა და აღნინა, რომ ადამიანები „სიცხის“ გამო ექიმთან უსაფუძვლოდ ხშირად მიდიან:

„ჩვენთან ძალიან ბევრი ადამიანი უსაფუძვლოდ შფოთავს სხეულის ტემპერატურის გამო. შეიძლება ითქვას, რომ ექიმთან ვიზიტების გაუმართლებლად დიდი რიცხვი სწორედ „სიცხის“ გამო ხდება. თუმცა, „სიცხის“ განმარტება განსხვავდება იმ წარმოდგენებისგან, რაც საზოგადოებაში არსებობს. ზოგადად, 37C ტემპერატურა მიღებულია სხეულის ნორმალური ტემპერატურის საშუალო მაჩვენებლად. ეს, რა თქმა უნდა, იმას არ ნიშნავს, რომ ყველა ადამიანს რობოტივით აუცილებლად ერთნაირი ტემპერატურა უნდა ჰქონდეს და რომ ეს ციფრი აუცილებლად 37-ს ქვემოთ უნდა იყოს. ​მიღებულია, რომ სიცხედ ითვლება იღლიის ტემპერატურა 37.5-ზე მეტი და პირის ღრუში გაზომილი ტემპერატურა 37.8-38-ზე მეტი.

საქართველოში ყველაზე დამკვიდრებული პრაქტიკაა იღლიის ტემპერატურის გაზომვა, თუმცა ბევრ სხვა ქვეყანაში პირის ღრუს ტემპერატურის ზომავენ და შედარებით უფრო ზუსტი შეფასების საშუალებას იძლევა, ვიდრე იღლიის ტემპერატურა.

სხვადასხვა ინფექციური დაავადებების გადატანის შემდეგ (მათ შორის კოვიდის), სხეულის ტემპერატურის ზომიერი მომატება ჩვეულებრივი მოვლენაა და ამან არ უნდა გამოიწვიოს იმ მასშტაბით ღელვა, რაც ჩვენთან შეინიშნება, მითუმეტეს, რომ, კიდევ ვიმეორებ, 37.5-მდე ტემპერატურა შეიძლება პათოლოგიური სულაც არ იყოს.

ტემპერატურა შეიძლება მერყეობდეს დღე-ღამის განმავლობაშიც. საღამოს საათებში სრულიად ჩვეულებრივი ამბავია უფრო მაღალი ციფრები, ვიდრე დილით. ასევე მკვეთრად მერყეობს ემოციურ ფონზე და ა.შ.

მიუხედავად იმისა, რომ ამ ადამიანების უმრავლესობას არავითარი პათოლოგია არა აქვს, ამის დაჯერება ძალიან უჭირთ და დაჟინებით მოითხოვენ რაიმე დიაგნოზს. პაციენტის მხრიდან ეს ზეწოლა და ასევე ზოგჯერ არაკეთილსინდისიერება შეიძლება იმის საფუძველი გახდეს, რასაც ყოველდღე ვხედავთ - ადამიანები გამოკვლევების შედეგების უზარმაზარი შეკვრით, რომელთა უდიდესი ნაწილი სრულიად ზედმეტი იყო და არასაჭიროდ შეიწირა პაციენტის დრო და ფული.

არადა, ასეთ ადამიანებთან ზოგჯერ ძალიან რთულია კომუნიკაცია. მეც, ისევე როგორც რიგითი ქართველი ექიმი, რომელსაც ასევე უჭირს პაციენტის წნეხთან გამკლავება, რაღაც საბაზისო კვლევებს ვუნიშნავ, რომ გარკვეული ზოგადი შთაბეჭდილება შევიქმნა პაციენტის ჯანმრთელობაზე და ეს კვლევები ზედმეტი ალბათ არავისთვის არ არის. ამის შემდეგ კი პაციენტმა უნდა დაიჯეროს, რომ აღარ არის საჭირო რაღაც უსასრულო და გაურკვეველი გამოკვლევების ჩატარება. არადა, დაჟინებით მოითხოვს გარანტიას, რომ „არაფერი ჭირს“. იმის გარანტია, რომ „არაფერი ჭირს“, არავის არასოდეს არა აქვს - არც ნორმალური ტემპერატურის და​ არც ე.წ. დაბალი სიცხის მქონეს (ანუ 37-37.5). ზოგი პაციენტი უხალისოდ თანხმდება იმაზე, რომ კვლევები აღარ ჭირდება, ზოგიც სხვა, „უფრო ყურადღებიან“ ექიმთან ინაცვლებს, რომელიც აგრძელებს გამოკვლევებს და საბოლოოდ შედეგამდე ვერ მიდის, თუმცა შედეგი, ანუ დიაგნოზი, უმრავლეს შემთხვევაში, ბუნებაში არ არსებობს, იმიტომ რომ პაციენტი რეალურად ჯანმრთელია, უბრალოდ მას ამის დაჯერება უჭირს.

ამდენი კვლევის დროს ზოგჯერ რაღაც, სრულიად ტემპერატურასთან კავშირის არმქონე, პათოლოგიაც შეიძლება გამოვლინდეს, მაგრამ ამ ლოგიკით ადამიანებმა მუდმივად ხომ არ უნდა იკვლიონ ყველა ორგანოთა სისტემა.

მოკლედ, სიტყვა ძალიან გამიგრძელდა, მაგრამ ამ კოვიდის ეპოქაში განსაკუთრებით მომრავლდნენ ამ ე.წ. დაბალი სიცხით დატანჯული ადამიანები. პირველ რიგში იმიტომაც, რომ სიცხის ზომვის ასეთი მასშტაბი ალბათ ისტორიას არ ახსოვს. არადა, მათგან ნაწილს შეიძლება პოსტ-კოვიდი აქვს, ნაწილი კი სრულიად ჯანმრთელია და რატომღაც აუცილებლად უნდა, რომ ტემპერატურა 37-ზე ნაკლები ქონდეს. და ეს ადამიანები აშკარად ძალიან იტანჯებიან, თანაც სრულიად უსაფუძვლოდ,“ - აღნია მაია ბუწაშვილმა. 

წაიკითხეთ სრულად