Baby Bag

რატომ უნდა ჩავეხუტოთ შვილებს ყოველდღიურად?

რატომ უნდა ჩავეხუტოთ შვილებს ყოველდღიურად?

ყველასთვის ცნობილია, რომ ჩახუტება ადამიანებს აბედნიერებს. პატარებს სითბოს მიღება და გაცემა ძალიან უყვართ. როგორც აღმოჩნდა, ჩახუტება ბავშვის განვითარებაზე უდიდეს ზეგავლენას ახდენს. სიკეთის, დადებითი ენერგიისა და პოზიტიური განწყობის გაზიარება თუ გიყვართ, თქვენს შვილებს რაც შეიძლება ხშირად ჩაეხუტეთ.

  • ჩახუტება ბავშვს აბედნიერებს

ჩახუტება ბავშვის ფსიქიკაზე დადებითად ზემოქმედებს. ის პატარებს არამხოლოდ თავდაჯერებით ავსებს, არამედ მათ ოპტიმისტ ადამიანებად ჩამოყალიბებაშიც ეხმარება. როდესაც ბავშვი მშობლისგან სიყვარულს გრძნობს, ის სტრესს მარტივად უმკლავდება და ყოველთვის ბედნიერია.

  • ჩახუტება ბავშვებს ემპათიის განცდას უვითარებს

შვილს ჩახუტებით ძალიან ბევრ რამეს ასწავლით. როდესაც ბავშვს მშობელთან თბილი დამოკიდებულება აკავშირებს, ის მასთან ძლიერ ემოციურ და ფსიქოლოგიურ კავშირს ამყარებს. დადებით ენერგიათა ურთიერთგაცვლა თქვენს შვილს ემპათიის მნიშვნელობის გაცნობიერებაში ეხმარება. თუ ბავშვს ხშირად ეხუტებით, ის სხვების განცდების გაზიარების უნარს მარტივად შეიძენს. აუცილებელია, რომ შვილს თანაგრძნობა და სითბოს გამოხატვა ადრეული ასაკიდანვე ასწავლოთ.

  • ჩახუტება ტანტრუმის შეჩერებაში გეხმარებათ

მშობლები ემოციური აფეთქების შემდეგ ბავშვების მოფერებას ერიდებიან, რათა ბავშვის ჭირვეული ქცევა არ წაახალისონ, თუმცა ეს სწორი მიდგომა ნამდვილად არ არის. ჩახუტება ბავშვს საკუთარი ემოციების გაკონტროლებაში დაეხმარება. როდესაც ბავშვს ეხუტებით, მის ორგანიზმში სიყვარულის ჰორმონი გამომუშავდება, რომელიც მას შფოთვის დამარცხებაში ეხმარება.

  • ჩახუტება ბავშვს გონებრივი შესაძლებლობების განვითარებაში ეხმარება

ბავშვებს განვითარებისთვის სხვადასხვა სახის სენსორული სტიმულაცია სჭირდებათ. სწორედ ამიტომ, ფიზიკურ შეხებას მათთვის უდიდესი მნიშვნელობა აქვს. ბავშვთა სახლში მცხოვრებ და სრულფასოვან ოჯახში გაზრდილ ბავშვებს შორის ჩატარებულმა კვლევამ აჩვენა, რომ პატარები, რომლებიც მშობლებთან არ ცხოვრობენ, განვითარების დონით მნიშვნელოვნად ჩამორჩებიან იმ ბავშვებს, რომლებსაც მშობლები ზრდიან. კვლევამ ასევე აჩვენა, რომ დღის განმავლობაში 15 წუთიანი ტაქტილური სტიმულაცია ბავშვთა სახლში მცხოვრებ პატარებს განვითარებაში მნიშვნელოვნად ეხმარებოდა.

  • ჩახუტება ბავშვის სიმაღლეში ზრდას უწყობს ხელს

მართალია, დაუჯერებლად ჟღერს, მაგრამ ჩახუტება ბავშვის სიმაღლეში ზრდას ნამდვილად ასტიმულირებს. კვლევებით დასტურდება, რომ პატარების ფიზიკური ზრდა ჩახუტების გარეშე მნიშვნელოვან შეფერხებებს განიცდის. თუ ბავშვს სითბო აკლია, მას ზრდაში ვერც ვიტამინებისა და მინერალების მიღება ეხმარება. როდესაც ბავშვს ეხუტებით, მის სხეულში ჰორმონი ოქსიტოცინი გამომუშავდება. აღნიშნულ ჰორმონს ორგანიზმისთვის ძალიან ბევრი სარგებელი მოაქვს. ის ბავშვის ფიზიკურ ზრდასაც უწყობს ხელს. ოქსიტოცინის დონის მატება ორგანიზმში ზრდის ჰორმონის გამომუშავებას აჩქარებს, შესაბამისად, როდესაც თქვენს შვილს ჩახუტებით ხშირად ანებივრებთ, ის სიმაღლეში სწრაფად იზრდება.

  • ჩახუტება ბავშვს ჯანმრთელობის შენარჩუნებაში ეხმარება

ჰორმონი ოქსიტოცინი, რომელიც ბავშვის ორგანიზმში ჩახუტების დროს გამომუშავდება, ანთებით პროცესებს წარმატებით ებრძვის. ის ორგანიზმს ჯანმრთელობის შენარჩუნებაში ეხმარება.

  • ჩახუტება შვილსა და მშობელს შორის მყარ ურთიერთკავშირს ქმნის

ჩახუტება შვილსა და მშობელს ერთმანეთის მიმართ ნდობით განაწყობს. ოქსიტოცინი შიშის გრძნობას ამცირებს და ადამიანებს გამბედავი ქმედებებისკენ უბიძგებს. როდესაც ბავშვი მშობელს ეხუტება, ის თავს დაცულად გრძნობს. თუ გსურთ, რომ თქვენი შვილი მამაცი და უშიშარი ადამიანი იყოს, მას ხშირად უნდა ჩაეხუტოთ.

მომზადებულია Brightside.me-ს მიხედვით

თარგმნა ია ნაროუშვილმა

არ დაგავიწყდეთ !!!

Momsedu.ge-მ თქვენთვის, დედებისთვის შექმნა ახალი სივრცე. მოიწონეთ გვერდი ​მცოდნე დედები​

შეიძლება დაინტერესდეთ

,,მზად უნდა ვიყოთ, რომ ხვალ და ზეგ ბავშვი უფრო მეტი თავგადასავლის ძიებას დაიწყებს" - გუგა ქაშიბაძე

,,მზად უნდა ვიყოთ, რომ ხვალ და ზეგ ბავშვი უფრო მეტი თავგადასავლის ძიებას დაიწყებს" - გუგა ქაშიბაძე

,,​ძალიან ბევრმა არ იცის, მაგრამ სამზარეულო არის ყველაზე სახიფათო ადგილი ჩვენს ოჯახში - ელექტროგაყვანილობა, გაზი, ცხელი სითხეები, მჭრელი საგნები და ა.შ. მით უმეტეს, ვისაც ბავშვები ჰყავს, გარემო უნდა შეაფასოთ დეტალურად", - ამის შესახებ დამწვრობის ცენტრის დირექტორმა, გუგა ქაშიბაძემ გადაცემაში ,,იმუნიტეტი" ისაუბრა.

,,ძალიან ხშირად ამბობენ მშობლები - ვერ წარმომედგინა, რომ იმ უჯრას გამოაღებდა და იმ სიმაღლეზე ავიდოდა. მზად უნდა ვიყოთ, რომ ხვალ და ზეგ ბავშვი უფრო მეტი თავგადასავლის ძიებას დაიწყებს.

მდუღარე წყლის გადასხმის შემთხვევაში, ბავშვს რაც შეიძლება სწრაფად ვხდით ტანსაცმელს და გამდინარე, ცივ წყალში ვამყოფებთ, რამდენიმე წუთის განმავლობაში. ყინული არ არის რეკომენდებული, რადგან ზედმეტად გადაციებას იწვევს. თუ კანის მთლიანობა არის დარღვეული, ანტიბაქტერიული მალამო - რომელიც ჯობს, ოჯახის აფთიაქში გვქონდეს - უნდა გამოვიყენოთ და საჭიროა ასევე სტერილური გადახვევა. ჯობს ვიზიტი ექიმთან, რადგან არაერთ რამეზეა დამოკიდებული, რამდენად სახიფათოა დამწვრობა. ჩვენ უფრო ხშირად გვაკითხავენ, როდესაც უკვე გართულებულია მდგომარეობა. 

ქიმიური დამწვრობის შემთხვევაში, რაც სხვადასხვა მჟავითა და ტუტით მიღებულ დამწვრობას გულისხმობს, აუცილებელია სწრაფად რეაგირება და კლინიკაში გადაყვანა, რადგან ქიმიურ დამწვრობას ახასიათებს ნელ-ნელა მოქმედება და სიღრმეში წასვლა - ერთი შეხედვით, თითქოს არაფერია, მაგრამ თუ კლინიკას არ მიმართავთ, მეორე და მესამე დღეს მდგომარეობა იქნება გართულებული. ამ შემთხვევაში, თერმული დამწვრობისგან განსხვავებით, გამდინარე წყლის ქვეშ უფრო ხანგრძლივი დაყოვნებაა საჭირო. ვერც კი წარმოიდგენთ, როგორმა ნივთიერებებმა შეიძლება, გამოიწვიოს ქიმიური დამწვრობა - მაგალითად, ცემენტმა, ნავთმა", - განმარტავს გუგა ქაშიბაძე.

წყარო: ,,​იმუნიტეტი"

წაიკითხეთ სრულად