Baby Bag

რა უნდა გაითვალისწინოთ თუ ჭოჭინას გამოყენებას აპირებთ? - ორთოპედ-ტრავმატოლოგი დეტალებზე

რა უნდა გაითვალისწინოთ თუ ჭოჭინას გამოყენებას აპირებთ? - ორთოპედ-ტრავმატოლოგი დეტალებზე

რა უნდა გაითვალისწინოს მშობელმა, სანამ ჭოჭინას გამოიყენებს და შეუძლია თუ არა ზიანის მიყენება ბავშვისთვის? - ამ თემებზე ​MomsEdu.ge-ს ესაუბრა ორთოპედ-ტრავმატოლოგი თინათინ ანთაძე.

- ჭოჭინასთან დაკავშირებით აზრთა სხვადასხვაობა არსებობს ექიმებს შორის, რატომ კრძალავს გარკვეული მათგანი ან რატომ ემხრობა მეორე ნაწილი?

​- ჭოჭინით ბავშვები უამრავ ტრავმას იღებენ, ვინაიდან არ არის მყარი კონსტრუქციის და ყირავდება, შესაბამისად ბავშვი გადმოვარდება და იღებს დაზიანებას. ერთადერთი ეს არის არასასურველი, თუმცა თუ ბავშვი ზის ჭოჭინაში, გვერდზე მშობელი უდგას და არის ყურადღების ქვეშ, რატომაც არა. ამ ნივთის გამოყენებას დადებითი ის აქვს, რომ პატარები ერთობიან, მოსწონთ და პოზიტიურ ემოციას იწვევს. ამასთან, ისინი გონებრივად ვითარდებიან. ზოგიერთი მშობელი ჭოჭინას იყენებს, როგორც სასადილო მაგიდას. სხვა სახელმწიფოებში ეს ნივთი იკრძალება იმიტომ, რომ ბევრი ბავშვი იღებდა ტრავმას, დაზიანებებს. როდესაც ადვილად ხელმისაწვდომია ჩამრთველები, ელექტროენერგიის აპარატურა, შესაძლოა, ელექტრო ტრავმაც მიიღონ, ამის გამო საჭიროა სიფრთხილე.

​- რა ხნის ბავშვი შეგვიძლია ჩავსვათ ჭოჭინაში?

​- დაახლოებით 6 თვის, როდესაც ბავშვს უკვე ჯდომა შეუძლია. საერთოდ მე არ მიყვარს ჭოჭინა და მირჩევნია მანეჟი, რადგან იქ უფრო კარგად ვითარდება ბავშვი და თანაც უსაფრთხოა.

​- კონკრეტულად, რა უარყოფითი თვისებები აქვს ჭოჭინის გამოყენებას და რა შემთხვევაში არ შეიძლება გამოვიყენოთ?

​- ვერ ვიტყვით იმას, რომ არ უნდა გამოვიყენოთ, ასეთი შემთხვევა არ არის. მედიცინასთან და ბავშვის ჯანმრთელობის, ძვლების განვითარებასთან არანაირ კავშირში არ არის. ჭოჭინაში რომ ჩაჯდება, ბავშვს ფეხები აქვს განზე და როდესაც ჩვენ გვაქვს დისპლაზია, კორსეტით, პირიქით, განზე ვაწევინებთ. ასე, რომ ჭოჭინას უარყოფითი თვისებები პირდაპირ უკავშირდება ტრავმატიზმს ანუ როდესაც პატარა უყურადღებობისგან იღებს ტრავმებს, ყირავდება, თავს არტყამს, ხელს ჰყოფს ჩამრთველებში და ა.შ. როგორც უკვე ვთქვი, სამედიცინო თვალსაზრისით არანაირი შეზღუდვა არ აქვს.

​- მშობელმა თუ გადაწყიტა, რომ ჭოჭინაში უნდა ჩასვას პატარა, რა წესები უნდა გაითვალისწინოს?

​- რასაკვირველია, უსაფრთხოების ზომები. როდესაც ჩასვამს, იყოს ახლოს მასთან და მარტო არ დატოვოს, მიაქციოს ყურადღება ტრავმების თავიდან ასაცილებლად.

​ესაუბრა მარიამ ჩოქური

არ დაგავიწყდეთ !!!

Momsedu.ge-მ თქვენთვის, ქალებისთვის შექმნა ახალი სივრცე, სადაც ყველაზე მცოდნე დედები იყრიან თავს. ჯგუფის დასახელებაც სწორედ ასეა - „მცოდნე დედების ჯგუფი“, რომლის საშუალებით დედები ერთმანეთს საკუთარ გამოცდილებას გაუზიარებენ. (ჯგუფში გასაწევრიანებლად ნახეთ ბმული - „მც​ოდნე დედების ჯგუფი“)

შეიძლება დაინტერესდეთ

რა არის პოზიტიური ყურადღება და რატომ არის ის ბავშვისთვის მნიშვნელოვანი?

რა არის პოზიტიური ყურადღება და რატომ არის ის ბავშვისთვის მნიშვნელოვანი?

მშობელი შვილისადმი პოზიტიურ დამოკიდებულას სხვადასხვა ფორმით გამოხატავს. ის შვილს უღიმის, ნაზად უყურებს თვალებში, ეფერება, მას სასიამოვნო, დადებითი სიტყვებით ამხნევებს, მისი იდეების, აქტივობებისა და ინტერესების მიმართ აღტაცებას ვერ მალავს.

პოზიტიური ყურადღება ბავშვს ძალიან სჭირდება. მისთვის მნიშვნელოვანია, რომ თავს საჭირო ადამიანად გრძნობდეს. ბავშვი უნდა გრძნობდეს, რომ მას სხვებისთვის სიხარული და ბედნიერება მოაქვს. მშობლების მხრიდან გამოჩენილი პოზიტიური ყურადღება, დადებითი რეაქციები და დამოკიდებულებები ბავშვს თავს დაფასებულ, სრულფასოვან ადამიანად აგრძნობინებს.

ბავშვი საკუთარი თავის შესახებ წარმოდგენას წლების განმავლობაში იქმნის. ყველაფერი იმაზეა დამოკიდებული, თუ როგორ ექცევიან მას მშობლები და ის უფროსები, რომლებიც მისთვის მნიშვნელოვანი ადამიანები არიან. იმისთვის, რომ თქვენმა შვილმა თავი უსაფრთხოდ იგრძნოს, მისი შიშები ყოველთვის სათანადო არგუმენტების დახმარებით უნდა დაამარცხოთ, მას ახალ გარემოსთან ადაპტაციაში უნდა დაეხმაროთ და ყოველთვის მის გვერდით იყოთ, როდესაც ეს სჭირდება.

ყოველდღიური აქტივობების დროს მშობელსა და შვილს შორის ძლიერი ურთიერთკავშირი მყარდება. საფენის გამოცვლისას, კვების პროცესში ან ბავშვის სკოლაში წაყვანისას, თქვენ ბავშვს განსაკუთრებული ყურადღება უნდა დაუთმოთ. როდესაც ბანაობის შემდეგ ბავშვს პირსახოცით ამშრალებთ, მისი კოცნა და მოფერება პატარასთვის პოზიტიური გამოცდილებაა. ის გრძნობს, რომ მშობელი მისთვის ყველაფერს სიყვარულით აკეთებს.

ბავშვის ასაკს მნიშვნელობა არ აქვს. მის მიმართ სიყვარულისა და სითბოს გამოსახატად, შეგიძლიათ შემდეგი რეკომენდაციებით იხელმძღვანელოთ:

  • ბავშვს რაც შეიძლება ხშირად გაუღიმეთ.
  • გამოიჩინეთ ინტერესი ყველაფრისადმი, რასაც თქვენი შვილი აკეთებს.
  • ბავშვის საუბარს ყურადღებით და ინტერესით მოუსმინეთ.
  • შვილთან ერთად გარკვეული რიტუალები ჩამოაყალიბეთ.

პოზიტიური ყურადღების გამოხატვის სხვადასხვა გზა არსებობს, რომლებიც ბავშვის ასაკის მატებასთან ერთად იცვლება.

პოზიტიური ყურადღების გამოხატვა ჩვილი ბავშვებისადმი

ბავშვი დაბადებიდანვე გრძნობს, თუ რა დამოკიდებულება გაქვთ მისდამი, რას აკეთებთ და როგორ იქცევით. მართალია, ჩვილებს თქვენ მიერ ნათქვამი სიტყვების მნიშვნელობა არ ესმით, მაგრამ ისინი თქვენი საუბრის ტონს, მიმიკებს და ქცევებს ყურადღებით აკვირდებიან.

  • ატირებულ ბავშვს განსაკუთრებული ყურადღება მიაქციეთ, რათა დამშვიდდეს.
  • ჩვილის ღიმილს ყოველთვის ღიმილით უპასუხეთ.
  • ჩვილს ხშირად ესაუბრეთ.
  • ახალშობილს თქვენი გრძნობები ხშირად გაუმხილეთ.
  • ყურადღება მიაქციეთ, რა აინტერესებს ჩვილს. თუ მას ფერადი სათამაშო მიიზიდავს, ასწავლეთ, როგორ უნდა დაიჭიროს ის ხელში.

პოზიტიური ყურადღების გამოვლენა 1-3 წლამდე ასაკის ბავშვების მიმართ

ბავშვი ასაკის მატებასთან ერთად უკეთ იგებს, თუ რას ეუბნებით ან როგორ ეუბნებით.

  • ყოველთვის აღნიშნეთ თქვენი შვილის მოსაწონი ქცევა. აუხსენით ბავშვს, რომ ძალიან მოგწონთ, როდესაც ის კუბიკებით თამაშობს.
  • ბავშვის განცდების გაზიარება სცადეთ. მასთან ერთად იხტუნავეთ და ითამაშეთ.
  • როდესაც ბავშვს ესაუბრებით, მას პასუხის გაცემის შესაძლებლობა მიეცით. მაშინაც კი, თუ ბავშვს არ შეუძლია სრულფასოვნად საუბარი.

პოზიტიური ყურადღების გამოხატვა სკოლამდელი ასაკის ბავშვისადმი

სკოლამდელი ასაკის ბავშვისადმი პოზიტიური დამოკიდებულების გამოვლენა ძალიან ბევრი ფორმით შეგიძლიათ.

  • ბავშვისთვის საყვარელი აქტივობებით მასთან ერთად დაკავდით, კუბიკებით ითამაშეთ, ირბინეთ, ერთად დახატეთ ან იმღერეთ.
  • ბავშვის პოზიტიური ქცევა აუცილებლად წაახალისეთ. თუ თქვენი შვილი სადილის შემდეგ თეფშს ონკანში ჩადებს, შეაქეთ და უთხარით, რომ ის ძალიან გეხმარებათ.
  • დილით გაღვიძებისას ბავშვს ღიმილით შეეგებეთ, მას თვალებში უყურეთ და მოეფერეთ.

პოზიტიური ყურადღების გამოხატვა სკოლის ასაკის ბავშვისადმი

მართალია, სკოლაში წასვლის შემდეგ ბავშვის ცხოვრება უფრო მრავალფეროვანი ხდება, მაგრამ თქვენი სითბო, მოფერება და ყურადღება მისთვის ძალიან მნიშვნელოვანია.

  • როდესაც ბავშვს თქვენთან საუბარი სურს, მიატოვეთ საქმე, რომელსაც აკეთებთ და თქვენს შვილს მოუსმინეთ. შესაძლოა, სკოლის ამბების მოყოლა მან სახლში დაბრუნებისთანავე არ მოისურვოს და ამის შესახებ ძილის წინ გიამბოთ. ბავშვის ამბების მოსასმენად დრო ყოველთვის უნდა გამონახოთ.
  • როდესაც ბავშვი გესაუბრებათ, მას კითხვები დაუსვით, რათა თქვენი ინტერესი გამოხატოთ და საუბარი გამოაცოცხლოთ.
  • ბავშვის პოზიტიური ქცევები წაახალისეთ. შეაქეთ ის, თუ მან მეგობრისადმი ყურადღება და ემპათია გამოავლინა.

ყოველთვის პოზიტიურ განწყობაზე ვერ იქნებით და ეს სავსებით ნორმალურია. მთავარია, რომ ბავშვმა თქვენგან უმეტესად სითბო და სიყვარული იგრძნოს. თუ მშობელს ბავშვისთვის დრო არასდროს აქვს, ეს ბავშვზე ნეგატიურ ზეგავლენას ახდენს. ბავშვი მშობლის უყურადღებობას ადრეული ასაკიდანვე გრძნობს. ჩვილები სტრესის ნიშნებს ექვსი თვის ასაკიდან ავლენენ, როდესაც მშობლის ყურადღება აკლდებათ. მშობლის უყურადღებობა ბავშვის ჯანმრთელობასა და კეთილდღეობას უდიდეს ზიანს აყენებს.

მომზადებულია ​raisingchildren.net.au - ს მიხედვით

თარგმნა ია ნაროუშვილმა 

წაიკითხეთ სრულად