„დღემდე საქართველოში ცოლ-ქმრის ასაკობრივ სხვაობაზე საუბრისას მე და ზურა ვრჩებით სალაპარაკო თემად. რაღაც პერიოდებში კომენტარებით შესევა რომ იციან, ყოველთვის ეხებიან ამ თემას. მათი აზრით, ეს არის შეურაცხმყოფელი. სინამდვილეში ეს არის, რაც არის. რამდენიც უნდა მიკბინოს ვინმემ, ამით რა შეიცვლება.“
ხათუნა ჟორდანიამ აღნიშნა, რომ სხვების მსგავსად ურთიერთობაში სირთულეები მას და მის მეუღლესაც ჰქონიათ:
„არ არსებობს ოჯახი, სადაც პრობლემები არ არის. ქორწინების ყველა ეტაპს აქვს თავისი სიმძიმეები. უმძიმესი პერიოდები გვაქვს გავლილი მე და ზურასაც. ჩვენი ქორწინება ბევრჯერ იყო სასწორზე, მაგრამ რაღაცნაირად შევძელით, როგორც შევძელით. ჩემი ავადმყოფობით ახალი ეტაპი დაიწყო ჩვენს ცხოვრებაში. ძალიან დიდ და მოზღვავებულ სიყვარულს ვგრძნობ ახლა, განსაკუთრებით ზურასგან. არ ვიცი, ვეცოდები, თუ მართლა ასეა, მაგრამ ეს რომ ნამდვილად გულწრფელია, ამას წლები მოწმობს.“
ხათუნა ჟორდანიას თქმით, მან მეუღლისგან ძალიან ბევრი რამ ისწავლა:
„ძალიან ბევრი რამ მასწავლა ზურამ, პირველ რიგში, მოთმინება, ნამდვილი გურული ქალი ვარ, თავისი ყველანაირი შეცხადებებით, ჩქარი გადაწყვეტილებებით, ზურა უფრო დინჯია, დიდხანს უნდა იფიქროს, ვერ იტანს სიურპრიზებს. დიდხანს ეს ნერვებს მიშლიდა. მოვუწყობდი ხოლმე სიურპრიზს და ისეთი სახე ჰქონდა, ვფიქრობდი, რომ არ გაუხარდა ჩემი მისვლა. მერე მიხსნიდა, ხომ იცი, რომ ასეთი ადამიანი ვარო. ბევრ შენიშვნას მაძლევდა ზურა. სულ მეუბნებოდა, შენ ხარ ადამიანი, რომელიც რყვნი შენს ირგვლივ ყველა ადამიანს, იმდენ ყურადღებას, იმდენ სიყვარულს და იმდენ რამეს აძლევ, რომ მერე ყველა ეჩვევა, ამას ჩვეულებრივ ამბად თვლიან, შენ კი ძალაგამოცლილი რჩებიო. ზურა მირჩევდა, რომ სწორად გამენაწილებინა ჩემი ენერგია და სიყვარული ადამიანებზე.“
„ცოლ-ქმრის ურთიერთობაში მთავარი სირთულეები ყოველდღიურ ურთიერთობაშია. რაღაცები ხდება, რაც ან მას არ მოსწონს, ან მე არ მომწონს. ძირითადად კონფლიქტი ამის გამო მოგვდის, თუმცა იმდენად დიდი დრო გავიდა და ისე კარგად ვიცნობთ ერთმანეთს, რომ სულ რომ არაფერი ვთქვათ, მაინც ყველაფერი გვესმის“ - აღნიშნა ხათუნა ჟორდანიამ.
არ დაგავიწყდეთ !!!
Momsedu.ge-მ თქვენთვის, დედებისთვის შექმნა ახალი სივრცე. მოიწონეთ გვერდი მცოდნე დედები