„თუ თქვენ წინაშე ვიღაცამ დანაშაული ჩაიდინა, გაწყენინათ, გული გატკინათ, ყველა შემთხვევაში უნდა მიუტევოთ,“ - შალვა ამონაშვილი

,,კარგად უნდა გვესმოდეს ემოციური ძალადობის გავლენა ადამიანის განვითარებასა  და იმაზე, თუ რა გავლენას ახდენს ბავშვის ქცევებსა და გამკლავების სტრატეგიებზე", - ამის შესახებ ფსიქოლოგმა, პროფესორმა ნატა მეფარიშვილმა პირველი არხის გადაცემაში ,,პირადი ექიმი მარი მალაზონია" ისაუბრა.

,,საუკუნის წინ, როდესაც აღზრდის მეთოდებში შედიოდა ყვირილი, სახაზავის ხელში ჩარტყმა და ა.შ. ეს მიიჩნეოდა ნორმად და დიდი დრო გავიდა მას შემდეგ, რაც გააცნობიერეს, რომ რაც დაკავშირებულია დამცირებასთან, შეურაცხყოფასთან, ტკენასთან, არანაირად არ უკავშირდება აღზრდას. ეს ყველაფერი დაკავშირებულია ემოციურ ძალადობასთან და ტოვებს საკუთარ კვალს. რატომ შეიძლება, ზოგიერთი ბავშვი იყოს მეტად მოწყვლადი სექსუალური ძალადობის ან ოჯახს გარეთ ფიზიკური ძალადობის მიმართ. იმიტომ, რომ შესაძლოა,ჩვენ აღზრდის მეთოდად ემოციური ძალადობა გვაქვს გამოყენებული. როდესაც ჩვენ არ ვფიქრდებით, რომ ამით ბავშვის თვითშეფასებას ვანგრევთ, რომ მას ვუსპობთ იმის გაცხადების შესაძლებლობას, რასაც ფიქრობს, როდესაც ნორმად მიიჩნევს დამცირებას, მაშინ არსებობს ალბათობა იმისა, რომ სახლს გარეთ, ოდნავ მოზრდილი, თუ მოძალადეს გადაეყრება, ამას მეტ-ნაკლებად მიიღებს, როგორც კუთვნილ სასჯელს. 

როგორ ვექცეოდით მანამდე ბავშვს ოჯახში, როგორი დამოკიდებულება აქვს მას საკუთარი უფლებების დაცვის მიმართ, რას ფიქრობს საკუთარ თავზე, როგორი თვითშეფასება აქვს, როგორ შეუძლია - რომ ხმა აიმაღლოს ძალადობის წინააღმდეგ - ეს არის ძალიან მნიშვნელოვანი და გახლავთ პრევენციული. 

ძალადობის შემდგომ ცხოვრება აუცილებლად უნდა გაგრძელდეს და ყველაფერი გაკეთდეს იმისთვის, რომ ძალადობაგადატანილი ადამიანი იყოს მხარდაჭერილ-დახმარებული. პირველ ყოვლისა, აუცილებლად ოჯახი უნდა იყოს ემოციური მხარდამჭერი. თუ ოჯახში ხორციელდება ძალადობა, აუცილებლად უნდა მოხდეს ოჯახის წევრების განათლება ამ მიმართულებით. უნდა არსებობდეს სერვისები, რომლებიც ე.წ. იძულებით განათლებას უზრუნველყოფს მათთვის. როდესაც ოჯახს არ შეუძლია, გაათვითცნობიეროს, რა ქნა, როგორ დაამცირა საკუთარი შვილი, უნდა არსებობდეს სერვისები, რომლებიც მათ გააცნობიერებინებს ამას. 

ძალადობა არის ტრავმა. გამოდის, რომ ტრავმაზე აუცილებლად იქნება სამუშაო და რაც უფრო ადრე იქნება ეს გაკეთებული, მით უფრო ნაკლებია ალბათობა, რომ მოგვიანებით, ზრდასრულობაში  ადამიანს შეექმნება სერიოზული ფსიქოლოგიური პრობლემები", - აცხადებს ნატა მეფარიშვილი.

წყარო: .​.პირადი ექიმი მარი მალაზონია"