Baby Bag

„როგორ არ ხარ ბედნიერი, რომ დღევანდელი დღე გაგითენდა?! დილას ასე რატომ იწყებ?“ - დეკანოზი შალვა კეკელია

​​დეკანოზმა შალვა კეკელიამ ადამიანებში მომძლავრებული აგრესიისა და უხეშობის შესახებ ისაუბრა. მან აღნიშნა, რომ ადამიანი დილით უკმაყოფილო არ უნდა იღვიძებდეს:

„დილით ვაკვირდები ხოლმე, მანქანის მძღოლები როგორ უხეშად დადიან, დილიდანვე როგორ უბღვერენ, აგინებენ, ლანძღავენ ერთმანეთს. ასეთ ხასიათზე დილით როგორ გაიღვიძე? როგორ არ ხარ ბედნიერი, რომ დღევანდელი დღე გაგითენდა?! ძალიან მიკვირს! დღე გაგითენდა და უკმაყოფილომ გაიღვიძე.“

მამა შალვას თქმით, თითოეული დღე, რომელიც გვითენდება, შესაძლებლობაა ჩვენთვის, რომ კარგად ვიყოთ:

„დილით გაიღვიძე და უკვე გაბრაზებული ხარ. დღეს რომ ვიღაცას არ გაუთენდა დღევანდელი დღე, შენ გაგითენდა. როგორც ხარ, ცუდად ხარ თუ გიჭირს, გაგითენდა დღევანდელი დღე. ​შანსი მოგცა ღმერთმა, საშუალება მოგცა იმისა, რომ კარგად იყო. გუშინ თუ ცუდად იყავი, დღეს შეგიძლია, რომ კარგად იყო და კარგ ხასიათზე დადგე.“

„დილიდან ასე რატომ იწყებ? დილით რომ დავდივარ, მანქანა რომ შემხვდება, არ არსებობს გვერდით მძღოლს რომ არ შევხედო, არ გავუღიმო. ყველას ვესალმები, ვიცნობ თუ არ ვიცნობ. ერთხელ საცობში მოვყევი. გვერდით მედგა ადამიანი, გავუღიმე და დაბღვერილი მიყურებდა. მერე კიდევ გავუღიმე და ჯვარი გადავსახე. ძალიან გაბრაზდა და შემაგინა. ამ შეგინების შემდეგ კიდევ გავუღიმე, ფანჯარა დავწიე, დავლოცე, ვუთხარი, ვგრძნობ, რომ ძალიან კარგი ადამიანი ხარ-მეთქი. პირზე შეაშრა სიტყვები, რაღაცის თქმას აპირებდა. რამოდენიმე თვის შემდეგ ეს ადამიანი მოვიდა ჩემთან, მითხრა, რომ რცხვენოდა მოსვლა. რომ მოვიდა, მე ჩავეხუტე. ხომ შეიძლება ადამიანები ასე შეხვდნენ ერთმანეთს, ასეთი ურთიერთობა გვქონდეს?! რას გაძლევს ეს უხეში დამოკიდებულება?! ​რას გაძლევს, რომ ცუდ ხასიათზე ხარ და ცუდად ექცევი ადამიანს?! არ სჯობს, რომ ადამიანს თბილად დაელაპარაკო, სიყვარული და პატივისცემა გამოხატო ადამიანის მიმართ,“ - აღნიშნა დეკანოზმა შალვა კეკელიამ.

​წყარო

არ დაგავიწყდეთ !!!

Momsedu.ge-მ თქვენთვის, ქალებისთვის შექმნა ახალი სივრცე, სადაც ყველაზე მცოდნე დედები იყრიან თავს. ჯგუფის დასახელებაც სწორედ ასეა - „მცოდნე დედების ჯგუფი“, რომლის საშუალებით დედები ერთმანეთს საკუთარ გამოცდილებას გაუზიარებენ. (ჯგუფში გასაწევრიანებლად ნახეთ ბმული - „მცოდნე დედების ჯგუფი“)

„ჩემს შვილებს რომ საჭმელი აქვს და სხვისი შვილი რომ მშიერია, ეს რომ მტკივა და ვერ ვისვენებ,...
​დეკანოზმა შალვა კეკელიამ ადამიანებში შურისა და სხვისი სიხარულის გაზიარების სირთულეებზე ისაუბრა. მან აღნიშნა, რომ შური სიხარულს ახლავს თან, ტკივილს კი - არა:„ტკივილს, განსაცდელს შური თან არ ახლავს. შე...

შეიძლება დაინტერესდეთ

„შემეცნებითი პროცესების გაშლა ვერ მოხდება, თუ ბავშვს მნიშვნელოვან უფროსებთან ინტერაქცია არ აქვს,“- ნეიროფსიქოლოგი თამარ გაგოშიძე

„შემეცნებითი პროცესების გაშლა ვერ მოხდება, თუ ბავშვს მნიშვნელოვან უფროსებთან ინტერაქცია არ აქვს,“- ნეიროფსიქოლოგი თამარ გაგოშიძე

ნეიროფსიქოლოგმა თამარ გაგოშიძემ ბავშვის განვითარებისთვის ჯანსაღი მიჯაჭვულობის მნიშვნელობაზე ისაუბრა:

„მიჯაჭვულობა უბრალოდ ის კი არ არის, რომ უბრალოდ მიწეპებული ხარ შენს გადამრჩენ დედიკოსა და მამიკოზე. მასთან რეციპროკული ურთიერთობა გასწავლის ნელ-ნელა შენი აფექტის რეგულაციას. ამ უსაფრთხო მიჯაჭვულობის საფუძველზე რეგულირდება ორგანიზმის ბიოლოგიური და ქცევითი სისტემები, ძლიერდება პოზიტიური ემოციები. ბავშვი სწავლობს, როგორ გაარჩიოს ერთმანეთისგან უსიამოვნო და სასიამოვნო გამოცდილება, როგორ მიხვდეს, რომ ჯილდო მოჰყვება ქცევას. ბავშვის კოგნიტური განვითარება თავისთავად არ ხდება. შემეცნებითი პროცესების გაშლა ვერ მოხდება, თუ მნიშვნელოვან უფროსებთან ინტერაქცია არ არის.“

თამარ გაგოშიძემ მეტყველების განვითარებისთვის აუცილებელ წინაპირობებზე ისაუბრა:

„მეტყველების განვითარებამდე მარჯვენა ჰემისფეროს გააქტიურება ძალიან მნიშვნელოვანია. ბავშვი მარცვლებს ათი ან ზოგი რვა თვიდანაც იძახის. სიტყვის გამეორება, თქმა, სხვა ადამიანისთვის გაგებინება, მარცხენა ჰემიფეროს აქტიურ განვითარებასთან არის დაკავშირებული 1 წლის მერე. მანამდე ბავშვს ინტერაქცია აქვს გარემოსთან, ვითარდება მისი მეტყველებამდელი ინტელექტი. მას დამოკიდებულებებიც მშვენივრად უვითარდება. სიამოვნება-უსიამოვნების გარჩევა შეუძლია ბავშვს. 1-2 წლის განმავლობაში ხდება ჩვენს ემოციებზე პასუხისმგებელი სისტემის განვითარება.“

„დასწავლის პროცესს ხელს უწყობს პოზიტიური ემოციური ფონი, კორტიზოლის ნორმალური დონე. როდესაც შფოთვის დონე მაღალი გვაქვს, დასწავლას ეს ხელს ვერ უწყობს ვერანაირად. ახლის სწავლით მიღებული სიამოვნება იწვევს დაჯილდოვებაზე ორიენტირებული სისტემის აქტივაციას თავის ტვინში. რატომ არის კარგი სკოლა, კარგი საბავშვო ბაღი ზეიმი ბავშვისთვის?! ბავშვს კორტიზოლის დონე აქვს დაბალი, შფოთვა აქვს დაბალი, არ ეშინია შეცდომის დაშვების, წარუმატებლობის, უსაფრთხოდ გრძნობს თავს, მისთვის სწავლა და დასწავლაც კი არის ზეიმი. ბავშვს ჯერ აფექტური რეაგირება აქვს გარემოზე და შემდეგ ითვისებს ენობრივ კომპეტენციებს. ემოციური რეგულაცია ვითარდება გარედან შიგნით. დედა როდესაც გშია გაჭმევს, გცივა - გაცმევს, გარედან ხდება შენი აფექტის რეგულირება. როგორც კი მშობელზე ასეთი დამოკიდებულება აღარ მაქვს, თვითონაც შემიძლია ჩემი მოთხოვნების დაკმაყოფილება,“- აღნიშნა თამარ გაგოშიძემ.

წყარო:​ კოალიცია ბავშვთა ადრეული განვითარებისთვის

წაიკითხეთ სრულად