Baby Bag

30 ათასზე მეტი პედაგოგი გაზრდილ ანაზღაურებას მიიღებს

30 ათასზე მეტი პედაგოგი გაზრდილ ანაზღაურებას მიიღებს

„სულ რამდენიმე დღეში 30 ათასზე მეტი პედაგოგი გაზრდილ ანაზღაურებას მიიღებს და ათასობით დამსახურებულ პედაგოგს ღირსეულად გავაცილებთ სისტემიდან“ - ამის შესახებ  პარლამენტის განათლების, მეცნიერებისა და კულტურის კომიტეტის თავმჯდომარემ, მარიამ ჯაშმა, პლენარულ სხდომაზე გამოსვლისას განაცხადა.

მისივე თქმით, საპენსიო რეფორმა, რომელიც განათლების სისტემაში ხორციელდება, არა მხოლოდ საქართველოსთვის იქნება წარმატებული, არამედ გახდება მაგალითი, როგორც ცენტრალური და აღმოსავლეთ ევროპის ქვეყნებისთვის, ასევე უფრო გლობალური მასშტაბით.

მარიამ ჯაშმა ყურადღება გაამახვილა 2019 წელს განხორციელებულ განათლების სისტემის რეფორმებზე და აღნიშნა, რომ მიმდინარე წელი ისტორიული მნიშვნელობისაა:

„გადაჭარბების გარეშე ვფიქრობ, 2019 წელი იყო ისტორიული წელი საქართველოს განათლების სისტემის რეფორმისთვის. მე-9 მოწვევის პარლამენტში განხილვების პირველივე დღეებიდან ჩვენი კომიტეტი, ყურადღებას ამახვილებდა დაფინანსების მნიშვნელოვნად ზრდის აუცილებლობაზე, რათა მომხდარიყო ფუნდამენტური რეფორმები განათლების მიმართულებით,“ - განაცხადა მარიამ ჯაშმა.

კომიტეტის თავმჯდომარემ იაკობ გოგებაშვილის დედაენის განახლებულ ვერსიასა და პირველკლასელებისთვის თანამედროვე საგანმანათლებლო რესურსების ხელმისაწვდომობაზე ისაუბრა:

„მოგეხსენებათ, რომ წელს, საქართველოს პარლამენტის ინიციატივით, ბრუნდება იაკობ გოგებაშვილის დედაენის განახლებული ვერსია. ყველა პირველკლასელს სკოლაში დახვდა სწორედ აღნიშნული სახელმძღვანელო, ჩვენ ასევე უზრუნველვყოფთ არჩევანის თავისუფლებას და საავტორო უფლებების დაცვას. ყველა პირველკლასელს დახვდა განახლებული და გაუმჯობესებული ტექნიკური მახასიათებლების კომპიუტერები, რომელიც მოსწავლეებს აძლევთ საშუალებას, რომ მათთვის ხელმისაწვდომი იყოს ყველა თანამედროვე საგანმანათლებლო რესურსი,“ - აღნიშნა კომიტეტის თავმჯდომარემ.

მარიამ ჯაშმა სასკოლო უსაფრთხოების კუთხით, განხორციელებულ ცვლილებებზეც გაამახვილა ყურადღება:

„სასკოლო უსაფრთხოების კუთხით, ჩვენ გვაქვს მნიშვნელოვანი ცვლილებები. დღეის მდგომარეობით, დამატებით 41 სკოლაში შევიდა მანდატურის სამსახური და საერთო ჯამში, 2019 წლის ბოლომდე, სკოლების 80 პროცენტში უკვე იქნებიან სკოლის მანდატურები, ეს კი მნიშვნელოვნად გაზრდის სასკოლო უსაფრთხოებას. ასევე 250 ლარით გაიზარდა მანდატურების სახელფასო ანაზღაურება. მანდატურის სამსახურის გაძლიერებასთან ერთად გაძლიერდა ფსიქო-სოციალური სერვისი. ახალციხესა და ზუგდიდში გაიხსნა დამატებითი ფსიქო-სოციალური მომსახურების ცენტრები, წელსვე მოხდა უმნიშვნელოვანესი გადაწყვეტილების მიღება, რის საფუძველზეც სკოლაში ხდება სპეციალური საგანმანათლებლო საჭიროებების ბავშვთა რეგისტრაცია, 515-მა მოსწავლემ უკვე მიიღო აღნიშნული მომსახურება,“ - განაცხადა მარიამ ჯაშმა.

მან ასევე სასკოლო ინფრასტრუქტურის გაუმჯობესების კუთხით განხორციელებულ სამუშაოებზე ისაუბრა:

„მნიშვნელოვანი ნაბიჯები გადაიდგა სასკოლო ინფრასტრუქტურის გაუმჯობესების კუთხით. 880 სკოლაში განხორციელდა სარემონტო სამუშაოები, აშენდა 27 ახალი სკოლა, ასევე ამერიკის შეერთებული შტატებისა და საქართველოს მთავრობების პრიორიტეტული სტრატეგიული პროგრამის ფარგლებში დასრულდა 91 სკოლის მშენებლობა,“ - განაცხადა პარლამენტის განათლების, მეცნიერებისა და კულტურის კომიტეტის თავმჯდომარემ, მარიამ ჯაშმა, პლენარულ სხდომაზე გამოსვლისას.

შეიძლება დაინტერესდეთ

კიდევ ერთი ახალი ტრენინგი მასწავლებლებისთვის

კიდევ ერთი ახალი ტრენინგი მასწავლებლებისთვის

UG-PriEd-ი ახალ ტრენინგს სთავაზობს დაწყებითი კლასების მასწავლებლებს (1 კლასი). ტრენინგი ჩატარდება 1- 2 სექტემბერს. 

სარეგისტრაციო ფორმა იხილეთ ​​აქ

ძირითადი საკითხები:

• კითხვის ფსიქოლოგიური ასპექტების გაცნობა; როგორ დავეხმაროთ მოსწავლეებს გამოიმუშაონ კითხვითი ქცევები და დამოკიდებულებები; 

• კითხვის სწავლების საბაზისო მოდელი - კონსტრუქტივისტულ-ინტერაქტიული მიდგომა;

• კითხვის სწავლების ოპტიმალური მოდელი - პასუხისმგებლობის ნაბიჯ-ნაბიჯ გადაცემა;

• ფონოლოგიური უნარების განვითარების ტრაექტორია და ამ უნარის განვითარების მნიშვნელობა წერა-კითხვის სწავლებისთვის;

• ვიდეორესურსის გამოყენება პედაგოგიურ პრაქტიკაში;

• სადემონსტრაციო აქტივობა (წინასააბანბანო პერიოდის გაკვეთილი);

• მართული პრაქტიკა - ეფექტური გაკვეთილის დაგეგმვა პოსტერების გამოყენებით;

• გაკვეთილზე დაკვირვების ფორმის გაცნობა და გამოყენება;

• ანბანისა და სიტყვების წაკითხვის სწავლება;

• ტექსტების ადაპტირება და საკუთარი მოსწავლეების საჭიროებებზე მორგება;

• კითხვის გაკვეთილისთვის მოსწავლეთა კონკრეტულ საჭიროებაზე მორგებული ეფექტური სასწავლო რესურსების მომზადება;

• სადემონსტრაციო აქტივობა (საანბანო პერიოდის გაკვეთილი);

• მართული პრაქტიკა - ეფექტური გაკვეთილის დაგეგმვა;

• კონსტრუქციული უკუკავშირი.

ტრენინგის ხანგრძლივობაა 2 დღე, ღირებულება - 80 ლარი. 

წაიკითხეთ სრულად