მხოლოდ გარე დაკვირვებით სტატუსს შეიცვლიან ის მასწავლებლები, რომლებიც უკვე დარეგისტრირებულები არიან გარე დაკვირვებაზე

​„ყველას მოგეხსენებათ, რომ კოვიდინფექციით შექმნილმა ვითარებამ არაერთი გამოწვევის წინაშე დააყენა განათლების სისტემა. მთელი მსოფლიო ინტერესით აკვირდებოდა ყველა იმ პროცესს, რომელიც განათლების მიმართულებით არსებული გამოწვევების დასაძლევად განხორციელდა. სწორედ განათლების სფერო აღმოჩნდა ერთ-ერთი საუკეთესო მაგალითი იმისა, როგორ შეიძლება უმძაფრესი გამოწვევა განვითარების შესაძლებლობად ვაქციოთ. მიუხედავად მრავალი სირთულისა, ტრადიციული ფორმიდან დისტანციურ სწავლებაზე გადასვლის ხარისხით და მასშტაბებით ჩვენი ქვეყანა მსოფლიოში საუკეთესოთა შორის დასახელდა. უმაღლესი განათლების ხარისხზე ზრუნვა სწორედ საგამოცდო სისტემის გამართულობიდან იწყება“, – აღნიშნულის შესახებ საქართველოს განათლების, მეცნიერების, კულტურისა და სპორტის მინისტრის მოადგილე ნუნუ მიცკევიჩმა ერთიანი ეროვნული გამოცდების, საერთო სამაგისტრო გამოცდებისა და სტუდენტთა საგრანტო კონკურსის ჩატარების თარიღებისა და წესის შესახებ გამართულ პრესკონფერენციაზე ისაუბრა.

ნუნუ მუცკევიჩის თქმით, 2020 წლის გამოცდებში მონაწილეთა ჯანმრთელობის მაქსიმალური დაცვა განათლების, მეცნიერების კულტურისა და სპორტის სამინისტროს უპირველესი ამოცანაა და ჯანდაცვის რეკომენდაციების უზრუნველსაყოფად უწყების მხრიდან დამატებითი ხარჯები და რესურსი იქნა გაღებული. საგამოცდო პროცესის მაქსიმალურად სრულყოფილად წარმართვის მიზნით აქტიური მუშაობა სამინისტრომ კორონავირუსის პანდემიად გამოცხადების პირველივე დღიდანვე დაიწყო.

მინისტრის მოადგილემ უსაფრთხოების იმ წესებზე გამახვილა ყურადღება, რომლებიც გამოცდებზე რეგისტრირებული თითოეული გამოსაცდელი პირის, ასევე, მეთვალყურეთა და ადმინისტრაციის წარმომადგენელთა, დამხმარე და ტექნიკური პერსონალის ჯანმრთელობის დაცვას უზრუნველყოფს.

ნუნუ მიცკევიჩმა განაცხადა, რომ 2020 წლის გამოცდების ჩატარების პერიოდი და ძირითადი ფორმატი შენარჩუნდება. დაპირებისამებრ, დაცული იქნება გამოცდების ზუსტი თარიღების გამოცხადების ვადებიც. წლევანდელ გამოცდებში 55 000-ზე მეტი აბიტურიენტი და სტუდენტი მონაწილეობს.

ნუნუ მიცკევიჩმა შეფასებისა და გამოცდების ეროვნულ ცენტრს გაწეული თავდაუზოგავი შრომისთვის მადლობა გადაუხადა და აღნიშნა, რომ განათლების სამინისტროსა და შესაბამისი უწყებების მხრიდან გაწეული ძალისხმევა გამოცდების აკადემიური კეთილსინდისიერებითა და უსაფრთხოდ ჩატარების გარანტი იქნება.