ბრიტანული თვითმფრინავი გერმანიის ნაცვლად შოტლანდიაში ჩაფრინდა

​პრემიერ-მინისტრმა ირაკლი ღარიბაშვილმა საკოორდინაციო საბჭოს სხდომის ბრიფინგზე მწვანე პასპორტების ამოქმედების შესახებ მიღებული გადაწყვეტილება გააჟღერა:

„დღეს ვიმსჯელეთ მწვანე პასპორტის კონცეფციის და სხვა წამახალისებელი ღონისძიებების თაობაზე. მინდა გითხრათ, რომ მივიღეთ შემდეგი გადაწყვეტილებები:

პირველი დეკემბრიდან ამოქმედდება მწვანე პასპორტის კონცეფცია და გაფართოვდება მისი მოქმედების არეალი.

მინდა განვმარტო, თუ რას ნიშნავს მწვანე პასპორტი. პირს მწვანე სტატუსი აქვს, თუ ის ვაქცინირებულია სრულად, ჩატარებული აქვს 72 საათიანი ვალიდურობის PCR ტესტი ან 24 საათიანი ვალიდურობის ანტიგენ ტესტი, ან გადატანილი აქვს კორონავირუსი.

იყო მოსაზრება, რომ კორონავირუს გადატანილებზე ყოფილიყო ექვსთვიანი შეზღუდვა, მაგრამ ჩემი რეკომენდაცია იყო, რომ ეს შეზღუდვა მოგვეხსნა და საბჭომ გაიზიარა ჩემი მოსაზრება. ამიტომ მწვანე სტატუსი ექნება პირს, ვისაც გადატანილი აქვს კორონავირუსი.

მწვანე პასპორტის მოთხოვნა იმოქმედებს 18 წლის ასაკის ზემოთ მოქალაქეებისთვის, ასევე ტურისტებისთვის.

საბჭოს გადაწყვეტილებით, პირველი დეკემბრიდან მოქალაქეები მხოლოდ მწვანე პასპორტის საშუალებით შეძლებენ სხვადასხვა ობიექტებში შესვლას. ამის თაობაზე ჩვენს პრესსამსახურს ვთხოვ დამატებითი ინფორმაცია გაავრცელოს.

მე, როგორც პრემიერ-მინისტრი ვარ ვალდებული თითოეული მოქალაქის აზრი გავითვალისწინო. ჩვენი მოქალაქეების უმეტესობა არ ემხრობა სავალდებულო ვაქცინაციას. მსოფლიოს ქვეყნების აბსოლუტურ უმრავლესობაში არის ნებაყოფლობითი ვაქცინაცია. სავალდებულო ვაქცინაცია არის ადამიანების არჩევანში უხეში ჩარევა. ყველა ადამიანს აქვს არჩევანის თავისუფლება, ვაქცინაციას სავალდებულოს არ გავხდით. არ არის სავალდებულო და არ იქნება ჩვენს ქვეყანაში ვაქცინაცია. ეს არის ჩვენი მტკიცე გადაწყვეტილება და ამ გადაწყვეტილებას მე არ შევცვლი,“ - განაცხადა ირაკლი ღარიბაშვილმა.