Baby Bag

გასაბერი საცურაო ჟილეტით ცურვა ბავშვისთვის უსაფრთხო არ არის

გასაბერი საცურაო ჟილეტით ცურვა ბავშვისთვის უსაფრთხო არ არის

თანამედროვე ტექნოლოგიების გამოყენებით მშობლებს შვილების უსაფრთხოებაზე ზრუნვა გაუმარტივდათ. მიუხედავად ამისა, ბავშვი სრულად დაცული არასდროს არის. ყველაზე სანდო პროდუქტებიც კი, რომელთა შეძენა მარტივად შეგვიძლია, შესაძლოა, არც ისე უსაფრთხო აღმოჩნდეს, როგორც ველოდით.

ტრაგიკულად დაღუპული პატარა ჯუდა ბრაუნის დედა მშობლებს მეტი სიფრთხილისკენ მოუწოდებს. ბავშვი ცურვის დროს დაიღუპა. ჯუდას წყალში ყოფნის დროს დედა ყოველთვის მშვიდად იყო, რადგან მის შვილს გასაბერი საცურაო ჟილეტი ეკეთა, რომელიც მშობლის წარმოდგენაში წყალში ბავშვის უსაფრთხოების გარანტს წარმოადგენდა. კრისტი ბრაუნი მშობლებს ურჩევს, მცდარი წარმოდგენები არ შეიქმნან და არ ჩათვალონ, რომ ბავშვი წყალში უსაფრთხოდ არის, როდესაც მას საცურაო ჟილეტი უკეთია.

კრისტი ბრაუნმა სპეციალური პროექტი შექმნა, რომელიც მშობლებს ცურვის დროს უსაფრთხოების წესების დაცვას ასწავლის და ბავშვების დაცულობის მაღალი ხარისხის შექმნაზეა ორიენტირებული. წყალში ყოველწლიურად არაერთი ბავშვი იღუპება, რაც გაუფრთხილებლობით და უსაფრთხოების წესების არცოდნით არის გამოწვეული.

კრისტი ბრაუნმა შვილისთვის გასაბერი საცურაო ჟილეტი შეიძინა. აუზზე წასვლისას ის პატარა ჯუდას ჟილეტის ღვედს საგულდაგულოდ უკრავდა. კრისტი ბრაუნი დარწმუნებული იყო, რომ ვიდრე ბავშვი ცურვას არ ისწავლიდა, ის ჟილეტის დახმარებით წყალში უსაფრთხოდ ყოფნას შეძლებდა.

საცურაო ჟილეტის გამოყენების დროს პატარა ჯუდას მცდარი განცდა გაუჩნდა, რომ მას ცურვა შეეძლო. პიკნიკზე ყოფნის დროს ის მშობლებს გაეპარა და რამდენიმე წუთით გაუჩინარდა. ბავშვი წყალში დამხრჩვალი იპოვეს. შვილის გარდაცვალების შემდეგ კრისტიმ აღმოაჩინა, რომ საცურაო ჟილეტის მოხმარების დროს ბავშვები წყალში ვერტიკალურად დგომას სწავლობენ, აღნიშნული პოზა ჩაძირვის საფრთხეს ზრდის. კრისტის მიერ დაარსებულ საქველმოქმედო ორგანიზაციაში ბავშვებს ზურგზე ცურვას და წყალში შესვენებას ასწავლიან.

საცურაო გასაბერი ჟილეტები ბავშვს წყალთან ადაპტაციაში ეხმარება, მაგრამ ის პატარებს უსაფრთხოების მცდარ განცდასაც უქმნის. კვლევებით დგინდება, რომ ბავშვების უმრავლესობა, რომელიც წყალში იხრჩობა, საცურაო ჟილეტებს აქტიურად იყენებს. ცურვის დროს უსაფრთხოების სტანდარტების დაცვა უმნიშვნელოვანესია. საცურაო ჟილეტები გარკვეულ ვითარებაში ბავშვის სიცოცხლეს იცავს, მაგრამ მას გვერდითი ეფექტებიც აქვს, რომელთა შესახებ მშობლებმა აუცილებლად უნდა იცოდნენ. მშობლები უნდა დარწმუნდნენ, რომ ბავშვი უსაფრთხოდ არის, რათა შემდგომ მოულოდნელი ტრაგედიის წინაშე არ აღმოჩნდნენ.

მომზადებულია ​moms.com-ის მიხედვით

თარგმნა ია ნაროუშვილმა

არ დაგავიწყდეთ !!!

Momsedu.ge-მ თქვენთვის, ქალებისთვის შექმნა ახალი სივრცე, სადაც ყველაზე მცოდნე დედები იყრიან თავს. ჯგუფის დასახელებაც სწორედ ასეა - „მცოდნე დედების ჯგუფი“, რომლის საშუალებით დედები ერთმანეთს საკუთარ გამოცდილებას გაუზიარებენ. (ჯგუფში გასაწევრიანებლად ნახეთ ბმული - „მცოდნე​ დედების ჯგუფი“)

რატომ არის გასაბერი აუზი ბავშვის სიცოცხლისთვის სახიფათო?
ზაფხულში მშობლები ბავშვების გასაგრილებლად გასაბერ საცურაო აუზებს ხშირად ყიდულობენ. პედიატრები ფიქრობენ, რომ პატარა აუზები ბავშვების სიცოცხლისთვის საფრთხის შემცველია და უფროსებს ურჩევენ მათი შეძენისგან...

შეიძლება დაინტერესდეთ

როგორ უნდა ავუხსნათ ბავშვს, რომ მისი მშობლები ერთმანეთს უნდა დაშორდნენ - ,,ბავშვთან სწორი კომუნიკაცია აუცილებელია"

როგორ უნდა ავუხსნათ ბავშვს, რომ მისი მშობლები ერთმანეთს უნდა დაშორდნენ - ,,ბავშვთან სწორი კომუნიკაცია აუცილებელია"

​როგორ ვუხსნით ბავშვს გადაწყვეტილებას, რომ მშობლები უნდა დაშორდნენ ერთმანეთს, როგორ ვაწარმოებთ მათთან კომუნიკაციას და როგორ ვცდილობთ, ავუხსნათ ის რთული საკითხი, რასაც განქორწინება ჰქვია - ამის შესახებ ფსიქოლოგი, ელენე ჯაფარიძე საუბრობს.

,,განქორწინება რთული საკითხია და კიდევ უფრო რთულდება, როდესაც გიწევს ამის შესახებ ბავშვთან საუბარი. მაგრამ მაგრამ არსებობს რამდენიმე ფრაზა, რომლითაც უნდა დაიწყო ბავშვთან საუბარი და რაც მას ბევრად შეუმსუბუქებს იმ რეალობას, რომლის წინაშეც ის დგას. ფაქტია, ოჯახი იყოფა და ფაქტია, რომ დედა და მამა ერთად აღარ იცხოვრებენ, მაგრამ ის დასკვნები, რომლებიც ბავშვებს გამოაქვთ, ბევრად უფრო დრამატული და ტრაგიკულია, ვიდრე - რეალობა. 

პირველ ყოვლისა, ჩემი რჩევა იქნება, რომ პარტნიორებმა ერთმანეთში მოილაპარაკონ და შეარჩიონ ისეთი მომენტი ბავშვთან სასაუბროდ, როდესაც ორივე იქნება დამშვიდებული. აუცილებელია, ორივე მშობელი გაესაუბროს ბავშვს და ორივე მათგანმა ერთი და იგივე ინფორმაცია მიაწოდოს მას - ჩვენ გადავწყვიტეთ, დავშორდეთ. სასურველია, ეს მოხდეს ისეთ გარემოში და ისეთ დროს, როდესაც სხვა აქტივობა არ არის დაგეგმილი და იქნება საკმაო დრო გამოყოფილი იმისთვის, რომ საუბარი შედგეს მშვიდად და იყოს დრო, რათა ბავშვმა ეს ყველაფერი აღიქვას. 

ხშირად ხდება, რომ როდესაც წყვილი იწყებს ბავშვთან განქორწინების შესახებ საუბარს, ერთ-ერთი მშობელი ბევრად უფრო ემოციურია - შეიძლება, იტიროს, იჩხუბოს, ინერვიულოს, ასეთ დროს მეორე მშობელს მართებს, იყოს სიტუაციის გადამრჩენი. თუკი ერთი მშობელი ვერ ახერხებს, მეორემ მაქსიმალურად უნდა შეინარჩუნოს სიმშვიდე. 

არსებობს რამდენიმე მნიშვნელოვანი ფრაზა, რომელიც უნდა გაჟღერდეს ბავშვთან კომუნიკაციის დროს. პირველი ფრაზა არის, უთხრათ ბავშვს, რომ ეს არის ორივეს ერთობლივი გადაწყვეტილება. ეს არის ძალიან მნიშვნელოვანი. უთხარით ბავშვს, რომ ეს არის უფროსების გადაწყვეტილება და ის არანაირ კავშირში არ არის მასთან. აუხსენით, რას ნიშნავს დაშორება, რადგან ბავშვებს ხშირად არასწორი დასკვნები გამოაქვთ - მათ მიაჩნიათ, რომ რომელიმე მშობელი ტოვებს. თუკი არსებობს ბინა, რომელშიც რომელიმე მშობელი გადადის, სასურველია, ბავშვმა ნახოს ის და ჩაერთოს პროცესში. გაუმახვილეთ ბავშვებს ყურადღება იმაზე, რომ მშობლების დაშორება არ ნიშნავს, რომ მათი ოჯახი აღარ არსებობს. განუმარტეთ, რომ ის რუტინული საქმეები, რომლებსაც მასთან ერთად ასრულებდით, ყველაფერი მის ცხოვრებაში დარჩება და ერთობლივად განახორციელებთ. თუმცა, გაამახვილეთ ყურადღება, თუ რა შეიცვლება - თუკი აქამდე მამას მიჰყავდა სკოლაში და გარკვეული დღეების მანძილზე ეს ასე ვეღარ იქნება, აუხსენით, რადგან გაურკვევლობას ბავშვი საკუთარი ფანტაზიით შეავსებს, ბევრად უფრო დრამატულად. 

მნიშვნელოვანია, იყოთ მზად, რომ სხვადასხვა ბავშვს ამ საკითხზე აქვს განსხვავებული რეაქცია. თქვენ უნდა იყოთ მზად, ბავშვს აუხსნათ, რომ ეს პროცესი არის მტკივნეული, ნუ დახუჭავთ თვალს და ნუ შეამსუბუქებთ ამ პროცესს. ბავშვმა უნდა იცოდეს, რომ ბევრი რამ ხდება, მაგრამ შეუქმენით მას იმის მოლოდინი, რომ ამას ყველაფერს ერთად გადალახავთ. ბავშვები არ ზიანდებიან იმიტომ, რომ მშობლები უნდა განქორწინდნენ, ისინი ზიანდებიან იმიტომ, რომ მათთან არ აქვთ სწორი კომუნიკაცია. ბავშვთან სწორი კომუნიკაცია აუცილებელია", - განმარტავს ელენე ჯაფარიძე.

წაიკითხეთ სრულად