Baby Bag

პლასტმასის თუ ხის საჭრელი დაფები - რომელს მივანიჭოთ უპირატესობა?

პლასტმასის თუ ხის საჭრელი დაფები - რომელს მივანიჭოთ უპირატესობა?

დიასახლისები სამზარეულოში საჭრელ დაფას ყოველდღიურად იყენებენ. ამ უმნიშვნელოვანესი აქსესუარის შეძენამდე, ქალაბტონებს სერიოზული დაფიქრება მართებთ, რადგან, როგორც აღმოჩნდა, არაჯანსაღი მასალისგან დამზადებულ საჭრელ დაფას ადამიანის დაინფიცირება და დაავადება შეუძლია. როგორც წესი, დიასახლისები პლასტმასის ან ხის საჭრელ დაფებს იყენებენ. ჩვენს სტატიაში ექსპერტთა მოსაზრებებს გაგაცნობთ, რათა შეიტყოთ, რომელი ტიპის დაფაა მეტად უსაფრთხო თქვენი და თქვენი შვილების ჯანმრთელობისთვის.

საჭრელ დაფაზე დიასახლისები უამრავ პროდუქტს ჭრიან. როდესაც დაფა არაჯანსაღი მასალისგან არის დამზადებული, მასზე დაჭრილი პროდუქტებიც ზიანდება. სწორედ ამიტომ, ამ სამზარეულოს აქსესუარის შეძენისას უდიდესი ყურადღება უნდა გამოიჩინოთ. ქალბატონები უპირატესობას პლასტმასის საჭრელ დაფას ანიჭებენ, რადგან ხე ხშირი ხმარების შემდეგ ლპობას იწყებს და უსიამოვნო შეფერილობას იღებს.

ექსპერტები დიასახლისების აზრს კატეგორიულად არ ეთანხმებიან. ისინი გვარწმუნებენ, რომ ხე გაცილებით დიდხანს ინარჩუნებს სისუფთავეს და სიჯანსაღეს, ვიდრე პლასტმასი. ქალბატონები ფიქრობენ, რომ ხის ფოროვანი აგებულობის გამო, მასში ბაქტერიები ადვილად აღწევენ და შესანიშნავ თავშესაფარსაც პოულობენ. ამასთან, ისინი თვლიან, რომ პლასტმასის ნაწარმი ბაქტერიებისთვის შეუვალია.

დიასახლისებს ავიწყდებათ, რომ პლასტმასი ადვილად იკაჭრება და ფუჭდება. ის ბაქტერიებისთვის ნამდვილად საიმედო თავშესაფარს წარმოადგენს. კვლევებით დადგინდა, რომ სალმონელას ბაქტერიისადმი ხის შეუვალობა გაცილებით მაღალი იყო, ვიდრე პლასტმასის. ექსპერტების თქმით, ბაქტერიები ხის ფორებში აღწევენ და ზედაპირზე არ ჩერდებიან. შიგნით შესვლის შემდეგ ისინი მალევე იღუპებიან, რადგან გამრავლებისთვის ხელსაყრელი გარემო არ აქვთ. ამასთან პლასტმასის ზედაპირზე ბაქტერიები ფეხს მარტივად იკიდებენ. ისინი ნაკაწრებსა და ღრმულებში აღწევენ და სწრაფად მრავლდებიან.

რეგულარული წმენდისა და საგულდაგულოდ რეცხვის შემთხვევაში, ხანგრძლივი გამოყენებისას პლასტმასის დაფაც ისეთივე უსაფრთხოა, როგორიც ხის. ინფიცირებისა და დაავადების რისკების მინიმუმამდე დასაყვანად, გირჩევთ, უმი ხორცის, შემწვარი პროდუქტების, ხილისა და ბოსტნეულის გასაჭრელად სხვადასხვა საჭრელი დაფა გამოიყენოთ.

მომზადებულია ​cookist.com-ის მიხედვით

თარგმნა ია ნაროუშვილმა

არ დაგავიწყდეთ !!!

Momsedu.ge-მ თქვენთვის, დედებისთვის შექმნა ახალი სივრცე. მოიწონეთ გვერდი მცოდნე დედები

როგორი ბანანია ყველაზე სასარგებლო?
​ბანანს ეგზოტიკურ ხილად ნაკლებად აღვიქვამთ, რადგან დიდი ხანია, რაც ის ჩვენი ყოველდღიური რაციონის შემადგენელ ნაწილად იქცა. ამ უგემრიელეს ხილს მსოფლიოს ყველა ქვეყანაში სიამოვნებით მიირთმევენ. მის სასარგ...

შეიძლება დაინტერესდეთ

როგორ დავიცვათ ბავშვები მზის სხივებისგან - 6 მარტივი რჩევა

როგორ დავიცვათ ბავშვები მზის სხივებისგან - 6 მარტივი რჩევა

ბავშვობაში მიღებულმა მხოლოდ რამდენიმე სერიოზულმა მზის დამწვრობამაც კი შეიძლება გაზარდოს კანის კიბოს რისკი ზრდასრულობისას. იმისათვის, რომ ბავშვებმა მზის ზედმეტი სხივები მიიღონ, სულაც არ არის აუცილებელი მათი დიდხანს ყოფნა აუზსა ან პლაჟზე. თუნდაც გარეთ სეირნობისას მათ კანს განსაკუთრებული დაცვა ესაჭიროება. გთავაზობთ ​რჩევებს, რომელთა მეშვეობით გაუმკლავდებით მზის ულტრაიისფერ სხივებს.

დაისვენეთ ჩრდილში

შუადღისას ულტრაიისფერი სხივები განსაკუთრებით საზიანოა, ამიტომ უმჯობესია თუ დღის ამ მონაკვეთისთვის ისეთ აქტივობებს დაგეგმავთ, რომ გარეთ გასვლას არ საჭიროებდეთ. მაგრამ თუ ეს არ ხერხდება, მოძებნეთ ჩრდილი ხის ან ქოლგის ქვეშ. ეს ხერხი დაგეხმარებათ დამწვრობის თავიდან ასაცილებლად.

სწორად შეარჩიეთ ბავშვის სამოსი

გრძელმკლავიანი მაისურები, გრძელი შარვლები საუკეთესო გამოსავალია მზის სხივებისგან თავის დასაცავად. აღსანიშნავია, რომ მჭიდროდ ნაქსოვი ტანსაცმელი და სველი მაისურები უკეთ გვიცავს მზის მავნე გამოსხივებისგან. ასევე, საჭიროა სწორად შევარჩიოთ ფერებიც, უმჯობესია ღია ფერის ტანისამოსის გამოყენება. ზოგიერთი ტანსაცმელი საერთაშორისო სტანდარტების მიხედვით არის დამოწმებული ულტრაიისფერი გამოსხივებისგან თავდასაცავად.

აუცილებლად გამოიყენეთ ქუდი

საზაფხულო ქუდი, რომელიც ფარავს სახეს, სკალპს, ყურებსა და კისერს მარტივი გამოსაყენებელია. ასევე, ე.წ „ბეისბოლის კეპი“ დიდი პოპულარობით სარგებლობს ბავშვებში, თუმცა ის ვერ იცავს ყურებსა და კისერს, ამიტომ ნაკლებად რეკომენდებულია. თუ ბავშვი მაინც კეპს აირჩევს, ყურისა და კისრის მიდამოები უნდა დამუშავდეს მზისგან დამცავი კრემით.

ატარეთ სათვალე

სათვალე იცავს ბავშვის თვალს ულტრაიისფერი სხივების მავნე ზემოქმედებისგან, რომელთა გავლენამ შესაძლოა, მოგვიანებით კატარაქტაც კი გამოიწვიოს. აუცილებელია, შეარჩიოთ სათვალე, რომელიც 100 %-ით დაფარავს თვალს და ამგვარად, უზრუნველყოფს საიმედო დაცვას.

გამოიყენეთ მზისგან დამცავი კრემები

სასურველია, მზისგან დამცავი კრემი გამოიყენოთ გარეთ გასვლამდე ნახევარი საათით ადრე. არ დაგავიწყდეთ, კრემი თანაბრად გადაანაწილოთ ცხვირზე, ყურებზე, ტუჩებზე. სასურველია, კრემი მთელი დღე თან ატაროთ და საჭიროებისამებრ გამოიყენოთ. აუცილებელია, ყურადღებით გაეცნოთ ინსტრუქციას. მზისგან დამცავი ყველა კრემი არ შედგება ერთი და იმავე ინგრედიენტებისგან, თუ ბავშვი ალერგიულია რომელიმე ინგრედიენტზე, თქვენ უნდა მიმართოთ ექიმს, რის შემდეგადაც მარტივად გამოცვლით კრემს.

როგორ მოვიქცეთ მზის დამწვრობის დროს?

დაუცველი კანისთვის დაახლოებით 15 წუთიც კი საკმარისია იმისათვის, რომ ფერი შეიცვალოს და მოვარდისფრო გახდეს. დამწვრობის საბოლოო სახის გამოსავლენად კი 12 საათია საჭირო. ასე, რომ დღეს ბავშვის ოდნავ ვარდისფერი კანი, ხვალ შესალოა, დამწვრობად იქცეს, ამიტომ, პირველ რიგში, ბავშვი მზეს უნდა მოვარიდოთ.

სიგრილე ან მოღრუბლული დღე? ბავშვის კანს მაინც სჭირდება დაცვა. ღრუბელი და შედარებით დაბალი ტემპერატურა სულაც არ „ბლოკავს“ ულტრაიისფერ სხივებს. გამოსხივება კვლავ საშიშია.

ზუსტად დაგეგმეთ თუ რამდენი ხანი უნდა გაატაროს ბავშვმა ღია ცის ქვეშ, ვინაიდან, დამწვრობების გამომწვევი მიზეზი, საკმაოდ ხშირად, გაუთვალისწინებელი შემთხვევებია. ისევ შეგახსენებთ, რომ მუდმივად თან ატარეთ მზისგან დამცავი კრემი. მისი შენახვა შეგიძლიათ მანქანაში, ხელჩანთაში ან ბავშვის ზურგჩანთაში. 

ავტორი: მარიამ კვეტენაძე
წყარო: Centers for Desease control and prevention
წაიკითხეთ სრულად