რა მოხდება, თუ ბავშვი საღეჭ რეზინს ჩაყლაპავს?

​„არ ვიცი, თქვენ აშინებთ თუ არა თქვენს პატარებს იმ შედეგით, რაც საღეჭი რეზინის ჩაყლაპვას მოჰყვება, მაგრამ ჩემი ბავშვობის ერთ-ერთი მთავარი შიში სწორედ ამასთან იყო დაკავშირებული.

​„თუ გადაყლაპავ, ექიმები მუცელს გაგიჭირიან“ - ეს ის იყო, რისიც ყველაზე მეტად მეშინოდა.

​არადა, როგორ უყვართ პატარებს ღეჭვა?! ჯერ ერთი, საღეჭი რეზინი ყოველგვარ კანფეტზე გემრიელი ჰგონიათ, და მეორეც, ღეჭვით ხომ ისინი დიდებს ემსგავსებიან?!

​საღეჭი რეზინისა რა მოგახსენოთ, მაგრამ აღმოჩნდა, რომ ადამიანები უძველესი ხანიდან ღეჭავენ და რაღას არა - მცენარის ფესვებს, კოკასა და თამბაქოს ფოთლებს, ზოგიერთი ხის ფისს. ჰოდა, რა გასაკვირია, თუ თქვენს პატარასაც უყვარს გემრიელი საღეჭი რეზინი?!

​მთავარი ინგრედიენტი წებოვანი მასაა, რომელიც მცენარე საპოდილას (ახრასი) რძე-წვენის დამუშავებით მიიღება. ემატება გემოსა და ფერის მიმცემი პროდუქტები, შაქარი ან შაქრის შემცვლელი. მწარმოებელთა უდიდესი ნაწილი უპირატესობას სწორედ ამ უკანასკნელს ანიჭებს.

​არცერთი ეს ნივთიერება არ იწოვება ნაწლავებიდან. შესაბამისად, თუ ბავშვი საღეჭ რეზინს შემთხვევით ჩაყლაპავს, ეს პატარა გემრიელი ნაჭერი მშვიდობიანად გაივლის კუჭ-ნაწლავის ტრაქტს და თავის მოგზაურობას საბავშვო ქოთანში ან უნიტაზში დაასრულებს.

​საფრთხე ძალიან იშვიათად იქმნება და ისიც მაშინ, თუ ბავშვი დროის მცირე მონაკვეთში დიდი რაოდენობით საღეჭ რეზინს გადაყლაპავს.

​ამ შემთხვევაში არსებობს შანსი, რომ საღეჭი რეზინის დიდმა რაოდენობამ ნაწლავის სანათურის ბლოკირება მოახდინოს და ოპერაციული ჩარევა მართლად გახდეს საჭირო. მაგრამ რადგან მსგავსი ფაქტები მედიცინის ისტორიაში უკიდურესად იშვიათია, ბავშვის მეტისმეტად შეშინება არ ღირს.

​ახლა მთავარი - ღეჭვისას, როცა პატარა დარბის, იცინის, ლაპარაკობს, შესაძლებელია მოხდეს საღეჭი რეზინის გადაცდენა და მისი სასუნთქ გზებში მოხვედრა. მით უმეტეს, რომ ადრეულ ასაკში სრულად მომწიფებული არ არის კოორდინაციული რეაქცია საყლაპავასა და ხორხსარქველს შორის, რაც გადაცდენისას უზრუნველყოფს სასუნთქი გზების უსწრაფეს დახურვას ხორხსარქველით. აი, ეს კი ნამდვილი საფრთხეა!

​როგორ მოვიქცეთ?

​საღეჭი რეზინის ბავშვისათვის შეთავაზება დასაშვებია მხოლოდ მაშინ, როცა ის აცნობიერებს - ეს კანფეტი არ არის და მისი გადაყლაპვა არ შეიძლება. ეს დაახლოებით 4-5 წლიდან ხდება.

​ამ ასაკისათვის დღეში 1-2 საღეჭი რეზინის მიცემა შეიძლება.

​აუცილებლად დაიცავით უსაფრთხოების წესები, რომელიც საღეჭი რეზინის სასუნთქ გზებში გადაცდენას აგაცილებთ თავიდან,“ - წერს პედიატრი თამარ ობგაიძე.