Baby Bag

რა დადებითი მხარები აქვს წყალში მშობიარობას და შესაძლებელია თუ არა შეიცავდეს რაიმე რისკს?

რა დადებითი მხარები აქვს წყალში მშობიარობას და შესაძლებელია თუ არა შეიცავდეს რაიმე რისკს?

წყალში მშობიარობა მშობიარობის ერთ-ერთი ალტერნატიული მეთოდია, რომელიც რაც დრო გადის, უფრო პოპულარული ხდება. რა დადებითი მხარები აქვს წყალში მშობიარობას და შესაძლებელია თუ არა შეიცავდეს რაიმე რისკს? - ამ საკითხებზე ​MomsEdu.ge-ს ესაუბრა მეან-გინეკოლოგი ნინი მამისეიშვილი.

„წყალში მშობიარობის პირველი აღწერილი შემთხვევა გამოქვეყნდა 1805 წელს, ფრანგულ სამედიცინო ჟურნალში. 1977 წელს საფრანგეთის ერთ-ერთ სამშობიაროში, პროფესორმა ოდენტმა ქალებს შესთავაზა მშობიარობის პირველი პერიოდის გატარება წყალში (ტკივილის შემსუბუქების მიზნით). 1999 წელს BMJ-ში გამოქვეყნდა გილბერტისა და ტუკის კვლევა, რომელიც წყალში მშობიარობის პრაკტიკის საწყისი გახდა“.
- რა დადებითი მხარეები აქვს წყალში მშობიარობას?
- სხეულის ტემპერატურის წყალი (36.6 С) კუნთებისთვის სპაზმოლიტიკის როლს ასრულებს, რითიც ამსუბუქებს საერთო ტკივილებს და ორგანიზმს მოდუნებაში ეხმარება, აგრეთვე იდეალური გარემოა ახალშობილისთვის, რომელიც დაბადების დროს იმავე გარემოში ხვდება და ტემპერატურულ სხვაობას ვერ აღიქვამს.
ამ მეთოდის გამოყენების დროს მინიმუმამდეა დაყვანილი ქალის სამშობიარო გზების ტრავმირების რისკი და ნაკლებია სისხლის დანაკარგი.
- შესაძლებელია თუ არა რაიმე რისკს შეიცავდეს ?
- წყალში მშობიარობა ზუსტად იმავე სირთულეებს შეიცავს, რასაც ფიზიოლოგიური მშობიარობა. უნდა გავითვალისწინოთ, რომ წყალში მშობიარობა შესაძლებელია მხოლოდ ფიზიოლოგიურად მიმდინარე ორსულობის შემთხვევაში, გესტაცია უნდა იყოს 37 0/7-41 6/7 კვირა, უნდა იყოს ერთნაყოფიანი ორსულობა და სპონტანური მშობიარობა.
- რა შემთხვევაში უნდა ვთქვათ უარი წყალში მშობიარობაზე?
- წყალში მშობიარობა არ არის რეკომენდებული თუ მშობიარობის დროს გვაქვს ჭარბი სისხლიანი გამონადენი, მეკონიუმ ნარევი სანაყოფე სითხე, როცა გვაქვს ნაყოფის არაკეთილსაიმედო მდგომარეობა, დედის ცხელება, აქტიური გენიტალური ჰერპესი, სანაყოფე სითხის ნაადრევი დაღვრა, სამშობიარო მოქმედების აღძვრა.
- რას ურჩევდით მომავალ მშობლებს, რა უნდა გაითვალისწინონ?
როდესაც ორსული ქალბატონი მოდის სამშობიაროდ, ფსიქოლოგიურად უნდა იყოს მომზადებული. ფიზიოლოგიური მშობიარობის შესახებ ყველა დეტალის უნდა გაიაროს პირად ექიმთან. 
ესაუბრა მარიამ ჩოქური

შეიძლება დაინტერესდეთ

არის თუ არა სასარგებლო ჭიპლარის გვიან გადაჭრა და როდის არ შეიძლება გადავადება?

არის თუ არა სასარგებლო ჭიპლარის გვიან გადაჭრა და როდის არ შეიძლება გადავადება?
არის თუ არა სასარგებლო ჭიპლარის გვიან გადაჭრა და როდის არ შეიძლება გადავადება? - ამ საკითხებზე ​MomsEdu.ge-ს ესაუბრა მეან-გინეკოლოგი ნინი მამისეიშვილი.

​„ჭიპლარი - ანატომიური წარმონაქმნია, რომელიც ნაყოფს აკავშირებს პლაცენტასთან და მისი მეშვეობით - დედის ორგანიზმთან. ჭიპლარის სისქე 1,5 სმ-ია ხოლო სიგრძე 50-70 სანტიმეტრს აღწევს. ჭიპლარის ქსოვილში გადის ორი არტერია და ერთი ვენა.“
- არსებობს თუ არა ჭიპლარის პათოლოგიები?
- ჭიპლარის პათოლოგიებს მიეკუთვნება:
  • ჭიპლარის სისხლძარღვების ანომალია - ჭიპლარში ერთი არტერიის არსებობა, მოკლე ჭიპლარი (არსებობს უჩვეულოდ მოკლე ჭიპლარიც).
  • ჭიპლარის კვანძები - ახალშობილთა 1 პროცენტი იბადება ერთი ან რამდენიმე კვანძით. ზოგერთი კვანძი ჩნდება მშობიარობის დროს, როდესაც მარყუჟი იჭიმება. კვანძები წარმოიქმნება ორსულობის დროსაც, როდესაც ნაყოფი ძალიან პატარაა და ბევრს მოძრაობს, განსაკუთრებით მაშინ, თუ ჭიპლარი უჩვეულოდ გრძელია.
- არის თუ არა სასარგებლო ჭიპლარის გვიან გადაჭრა და რატომ?
ჭიპლარის გადაჭრა რეკომენდებულია მშობიარობიდან ერთი წუთის შემდეგ. ბევრმა კვლევამ აჩვენა, რომ გვიან გადაჭრა სასარგებლოა ყველა ახალშობილისთვის, როგორც დროულისთვის, ასავე ნაადრევისთვის. ბავშვის დაბადების შემდეგ სისხლის ფეტარულ-პლაცენტარული მოცულობის 15%-დან 30%-მდე ჯერ კიდევ პლაცენტაში რჩება, ამიტომ დამატებითი ერთი წუთი მის ორგანიზმს ჰემოგლობინით ავსებს, ეს უზრუნველყოფს სისხლში რკინის მაღალ დონეს და იცავს ანემიისგან სიცოცხლის პირველ ნახევარ წელიწადში.
ჭიპლარის გვიან გადაჭრა განსაკუთრებით სასარგებლოა ნაადრევად დაბადებული ახალშობილებისთვის. კვლევებმა აჩვენა, რომ ის ამცირებს ანემიის რისკს და სისხლის გადასხმის საჭიროებას, ასევე ნეკროზული ენტეროკოლიტის და ტვინში სისხლჩაქცევის რისკს.
ჯანდაცვის მსოფლიო ორგანიზაცია რეკომენდაციას უწევს ჭიპლარის გვიან გადაჭრას იმ შემთხვევაშიც, თუ ახალშობილი დაბადებულია საკეისრო კვეთის ოპერაციით.

- როდის არ შეიძლება გადავადება?
- ჭიპლარის დაუყოვნებლივ გადაჭრა აუცილებელია, როდესაც მშობიარობის შემდგომი სისხლდენის რისკი დიდია, თუ ახალშობილი დაიბადა ასფიქსიაში ან დედას ან ბავშვს ესაჭიროება სასწრაფო სამედიცინო დახმარება.

ესაუბრა მარიამ ჩოქური
წაიკითხეთ სრულად