Baby Bag

ძუძუთი კვება ორსულობის დროს - ყველაფერი, რაც ამ შემთხვევაზე უნდა ვიცოდეთ

ძუძუთი კვება ორსულობის დროს - ყველაფერი, რაც ამ შემთხვევაზე უნდა ვიცოდეთ
დღეს ხუთშაბათია და მედიაპორტალი MomsEdu.ge ტრადიციულ რუბრიკას - მეან-გინეკოლოგის რეკომენდაციებს წარმოგიდგენთ. ამჯერად მეან-გინეკოლოგი და ქირურგი ეკა ბუკია მოგაწვდით კომპეტენტურ ინფორმაციას თემაზე - ძუძუთი კვება ორსულობის დროს.
ბევრ ქალს ჰქონია შემთხვევა, როცა პატარა ბავშვი ძუძუთი კვებაზე ჰყავს და იგებს, რომ ორსულადაა. ჩნდება ძალიან ბევრი კითხვა ერთდროულად. შეიძლება თუ არა ძუძუთი კვების გაგრძელება? რამდენად უსაფრთხოა ძუძუთი კვება როგორც ბავშვისთვის, ასევე მუცლად მყოფი ნაყოფისთვის? რა გავლენას მოახდენს ეს ორსულობა დედის რძის რაოდენობაზე? როგორ უნდა მოიქცეს ქალი ამ დროს? შეწყვიტოს ძუძუთი კვება, თუ განაგრძოს ლაქტაცია?

​უსაფრთხოა თუ არა ლაქტაცია ორსულობის დროს?

​დიახ, ლაქტაცია ორსულობის დროს უსაფრთხოა, თუ ეს ჯანმრთელი, ჯანსაღი და კარგი ორსულობაა, ასევე თუ იღებთ საკმარისი რაოდენობით კალორიებს, რომელიც გეყოფათ თქვენ, ძუძუზე მყოფ ბავშვსა და მუცლად მყოფ ნაყოფს!

​ამერიკის ოჯახის ექიმთა აკადემია აცხადებს, რომ ორსულობისას ძუძუთი კვება არ წარმოადგენს რაიმე განსაკუთრებულ პროცესს და ამა თუ იმ გადაწყვეტილებას უნდა იღებდეს მეძუძური დედა თავისი ჯანმრთელობის და ორსულობის მდგომარეობიდან გამომდინარე!

​რა თქმა უნდა, ყველამ ვიცით, რომ ძუძუთი კვება ძალიან კარგია ბავშვისთვის, ამიტომ თუ დედა გადაწყვეტს და შეძლებს ლაქტაციის გაგრძელებას, ეს მისასალმებელია.

​რა რისკებთან და გართულებებთანაა დაკავშირებული ლაქტაცია ორსულობისას?

​თუ ძუძუთი კვება უსაფრთხოა ორსულობისას, ბუნებრივია, გაგიჩნდებათ კითხვა, რატომ წყვეტს დედების გარკვეული ნაწილი ლაქტაციას?
პასუხი მარტივია - ორსულობის პროცესი მეტად ინდივიდუალურია და ყველა ქალში განსხვავებულად მიმდინარეობს. ზოგისთვის ორსულობა მეტად მძიმეა, თან ორსულობისა და ერთდროულად ძუძუთი კვების დროს შესაძლოა, გქონდეთ:
  • ძუძუს თავების ტკივილი
  • გულისრევა
  • ღებინება
  • დაღლილობა
  • შესაძლებელია რძის რაოდენობის, ფერის, გემოსა და კონსისტენციის ცვლილება (ამის გამო შესაძლოა, თვითონ ბავშვმა შეწყვიტოს თავისი ნებით ძუძუთი კვება თქვენი დიდი სურვილის მიუხედავად)
  • უშუალოდ ძუძუთი კვების დროს მუცლის ქვედა არეში ტკივილი (საშვილოსნოს შეკუმშვა, რაც იწვევს მუცლის ქვედა არეში ტკივილს, ეს განპირობებულია ოქსიტოცინის ზემოქმედებით).- საშვილოსნოს შეკუმშვის მიუხედავად ნაადრევი მშობიარობის რისკი მინიმალურია.

​რა უპირატესობა გააჩნია ორსულობისას ძუძუთი კვებას?

​მიუხედავად იმისა, რომ ძუძუთი კვება და ერთდროულად ორსულობა მეტად დამღლელი და რთული პროცესია, ზოგი დედისთვის ძუძუთი კვებას მაინც აქვს უპირატესობა, რამაც შესაძლოა, სტიმული მისცეს ბევრ ორსულ დედას ლაქტაციის გასაგრძელებლად. ეს უპირატესობებია:
  • ძუძუთი კვებაზე მყოფი ბავშის იმუნიტეტის ამაღლება
  • დამატებითი სასიამოვნო ემოციური და ფიზიკური კონტაქტი ბავშვთან
  • ასევე ლაქტაცია ორსულობისას ხელს უწყობს მშობიარობის შემდგომ პერიოდში რძის ჩადგომას, აფერხებს მკერდის გამაგრებას, აუმჯობესებს რძის სიმკვრივეს.

​ახდენს თუ არა ზეგავლენას ორსულობა რძის რაოდენობაზე?

​ორსულობისას ძალიან ხშირად მცირდება რძის რაოდენობა. ეს ძირითადად ხდება ორსულობის მე-4-ე მე-5 თვეზე (16-20კვირის ვადაზე). ასევე რამდენადმე იცვლება რძის შემადგენლობაც. ვინაიდან ეს პროცესი გამოწვეულია ჰორმონული ცვლილებებით, დამატებით გამოწველა ვერ დაგეხმარებათ რძის რაოდენობის მომატებაში.

​გარდა ამისა, ჰორმონული ცვლილებების გამო დედების უმეტესაობა ღელავს, რომ ორსულობისას გამოყოფილი რძე ზიანს მიაყენებს ბავშვს. შეგიძლიათ მშვიდად იყოთ, ჰორმონები, რომელსაც შეიცავს დედის რძე უსაფრთხოა თქვენი ბავშვისთვის.

​რას გვეტყვით ხსენის თაობაზე?

​მშობიარობის შემდგომ გაჩნდება კითხვა - ეყოფა თუ არა ხსენი ახალშობილს? - ხსენი იქნება თქვენი ახალშობილისთვის მიუხედავად იმისა, რამდენ რძეს მიიღებს თქვენი უფროსი ბავშვი. თქვენივე სიმშვიდისთვის უმჯობესი იქნება ძუძუ შესთავაზოთ ჯერ ახალშობილს, შემდეგ კი თქვენს უფროს ბავშვს.

​მიიღებენ თუ არა საკმარისი რაოდენობით რძეს როგორც ახალშობილი, ასევე უფროსი ბავშვი?

​იმისთვის, რომ გქონდეთ კარგი ხარისხის რძე, დააკმაყოფილოთ ორივე ბავშვის საკვები მოთხოვნილებები და შეინარჩუნოთ თქვენი ჯანმრთელობა, აუცილებელია მეტი საკვები მიიღოთ. რეკომენდებულია დამატებით 500 კალორიის მიღება დღეში, თუ თქვენი უფროსი ბავშვი დედის რძის გარდა იღებს ასევე მყარ საკვებს. იმ შემთხვევაში თუ ბავშვი ექსკლუზიურად დედის რძეზეა, მაშინ დამატებით 650 კალორიის მიღებაა საჭირო დრის განმავლობაში.

​როგორ უნდა მოვიქცეთ, თუ გვინდა ლაქტაციის შეწყვეტა ორსულობის დროს?

​თუ ორსულად ხართ, და გადაწყვიტეთ, რომ დროა, თქვენს მეძუძურ ბავშვს შეუწყვიტოთ ძუძუთი კვება, ეს პროცესი თანდათანობით უნდა განახორციელოთ. მაგალითად, უარი თქვათ ლაქატაციაზე დილასა და ძილის წინ. ასევე თუ ბავშვი შედარებით დიდია, უნდა აუხსნათ რას აკეთებთ და რისთვის, უნდა გამოყოთ მეტი დრო ბავშვთან ფიზიკური კონტაქტისთვის, გააორმაგოთ ჩახუტების, თამაშისა და მოფერების პროცესი.


​გისურვებთ ჯანმრთელობას!

შეიძლება დაინტერესდეთ

,,გრიპის ვირუსით ინფიცირებამ შესაძლოა, ძალიან დიდი საფრთხე შეუქმნას ორსულის ჯანმრთელობას" - მეან-გინეკოლოგი

,,გრიპის ვირუსით ინფიცირებამ შესაძლოა, ძალიან დიდი საფრთხე შეუქმნას ორსულის  ჯანმრთელობას" - მეან-გინეკოლოგი

,,​რასაკვირველია, დიდი მნიშვნელობა აქვს, რომ ორსული იყოს ჯანმრთელი. მაგრამ აქვე მინდა, ხაზი გავუსვა, რომ რაც უნდა ჯანმრთელი იყოს ის, სეზონური, გრიპის ვირუსით ინფიცირებამ შესაძლოა, ძალიან დიდი საფრთხე შეუქმნას მის ჯანმრთელობას", - ამის შესახებ მეან-გინეკოლოგმა, მედიცინის დოქტორმა, ნოდარ ზალდასტანიშვილმა ,,პირველი არხის" გადაცემაში ,,პირადი ექიმი მარი მალაზონია" ისაუბრა. 

,,ვირუსი გავრცელდება ზედა სასუნთქ, ქვედა სასუნთქ გზებში.  დიდია ალბათობა, რომ ჯანმრთელი ორსული უფრო ადვილად დაამარცხებს ამ ვირუსს, ვიდრე - საწყისი, ფონური დაავადების მქონე ორსულობის შემთხვევაში - უნდა აღინიშნოს, რომ ეს ფონური დაავადებებია დიაბეტი, გულსისხლძარღვთა პრობლემები, სასუნთქი სისტემის პრობლემები, რომლებიც შეიძლება, ჰქონდეს ორსულს. ვადებთან მიმართებით, რასაკვირველია, ორგანოგენეზის პროცესში უფრო შეასაძლოა, იყოს მეტი საფრთხე გრიპის ვირუსთან მიმართებით, ეს არის პირველი, მეორე ტრიმესტრის დასაწყისი. 

ძალიან ხშირად აღწერილია შემთხვევები, როდესაც გრიპის ვირუსმა შესაძლოა, გამოიწვიოს ორსულობის დროზე ადრე დასრულება ან შესაძლოა, ნაადრევი მშობიარობა - გააჩნია, რა ვადაზე განვითარდება ინფექცია. აღწერილია შემთხვევები, რომ თუ ადრეულ ვადებშია გრიპის ვირუსით დაინფიცირება, შესაძლოა, იყოს მაღალი ტემპერატურა - ამ დროს შესაძლოა, ნაყოფთან მიმართებით განვითარდეს გარკვეული პრობლემები; ეს არის განვითარების პრობლემები, განსაკუთრებით, ნერვული  სისტემის მხრივ. არის მთელი რიგი კვლევები, რაც არ არის მტკიცებითი მედიცინით დადასტურებული. რასაკვირველია, ადრეულ პერიოდში უფრო არის შესაძლებელი, არსებობდეს საფრთხე ან შემდგომ უკვე ახალშობილთან მიმართებით. მაგრამ ნაყოფის სიმახინჯის გამომწვევი გრიპის ვირუსი არ არის, თუმცა, რასაკვირველია, აქვე მინდა, აღვნიშნო, რომ ყველა ორსულს - როგორც ჯანმრთელს, ისე არაჯანმრთლებს, სეზონის პერიოდში  ვურჩევთ გრიპის ვაქცინაციას. ასევე, მნიშვნელოვანია, თავი შეიკავოთ საზოგადოებრივი თავშეყრის ადგილებისგან, დაიცვათ ჰიგიენა, ხშირად გაანიავოთ ოთახი", - აღნიშნავს ნოდარ ზალდასტანიშვილი.

წყარო: ,,​პირადი ექიმი მარი მალაზონია"


წაიკითხეთ სრულად