Baby Bag

​რა რისკებთანაა დაკავშირებული ორსულობა 35 წლის ზემოთ?

​რა რისკებთანაა დაკავშირებული ორსულობა 35 წლის ზემოთ?
მედიაპორტალი MomsEdu.ge ტრადიციულ რუბრიკას - მეან-გინეკოლოგის რეკომენდაციებს წარმოგიდგენთ. ორსულობა 40 წლის ასაკში - ამჯერად ამ თემაზე მოგაწვდით კომპეტენტურ ინფორმაციას მეან-გინეკოლოგი და ქირურგი ეკა ბუკია.

40 წლის ასაკში ორსულობის დაგეგმვა, რა თქმა უნდა, შესაძლებელია. ეს შეიძლება იყოს დაკავშირებული სირთულეებთან, თუმცა შეუძლებელი არაფერია.

​​
ფერტილობის (შვილოსნობის) ბიოლოგიური საათი იწყება მაშინ, როდესაც ქალს ეწყება პირველი მენსტრუალური ციკლი და ასაკის მატებასთან ერთად რეპროდუქციული ფუნქცია მცირდება, რაც მეტად უახლოვდებით კლიმაქტერულ პერიოდს, ვინაიდან ასაკის მატებასთან ერთად მცირდება ფოლიკულების რეზერვი.

რა რისკებთანაა დაკავშირებული ორსულობა 35 წლის ზემოთ?

35 წლის და მეტი ასაკის ქალებს შეუძლით ფიზიოლოგიური დაორსულება და ასევე ორსულობის ბოლომდე მიყვანა, თუმცა არსებობს გარკვეული რისკები დედისა და ნაყოფის ჯანმრთელობის მხრივ.
რაც მეტია ქალის ასაკი, მით მეტად მცირდება ფოლიკულების რაოდენობა, ასევე ფოლიკულების ხარისხი, რაც ნიშნავს იმას, რომ უფრო რთული იქნება ფიზიოლოგიური დაორსულება, განაყოფიერებული კვერცხუჯრედის იმპლატნტაცია საშვილოსნოში.
ასევე კვერცხუჯრედის ხარისხის შემცირებასთან ერთად მატულობს თვითნებითი აბორტის (ორსულობის მოშლის) რისკი.
ზემოთ აღნიშნულ გართულებებს ემატება:

  • მკვდარშობადობის რისკი
  • ქრომოსომული ანომალიები
  • ნაადრევი მშობიარობა
  • გესტაციური ჰიპერტენზია
  • პრეეკლამფსია
  • მცირე მასის ახალშობილი
როგორ უნდა მოვიქცეთ, თუ 40 წლის ასაკში ვერ დგება ფიზიოლოგიური ორსულობა?
​იმ შემთხვევაში, თუ ფიზიოლოგიური ორსულობა ვერ დადგა რამდენი ცდის შემდეგ, შეგიძლიათ მიმართოთ დამატებით რეპროდუქციულ ტექნოლოგიებს, როგორებიცაა:

  • IVF - ინ ვიტრო განაყოფიერება - ამ შემთხვევაში მოხდება ჰორმონული მკურნალობის ფონზე კვერცხუჯრედების სტიმულაცია და მომწიფება, რის შემდეგ მოხდება კვერცხუჯრედების ასპირაცია (ამოღება საკვერცხეებიდან) და განაყოფიერება. განაყოფიერების შემდეგ ერთი ან რამდენიმე ემბრიონი გადააქვთ დედის საშვილოსნოს ღრუში.
  • სუროგაცია - ამ შემთხვევაში პროცედურა იგივეა, რაც ინ ვიტროს დროს, იმ განსხვავებით, რომ ბიოლოგიური დედის ნაცვლად ემბრიონები (განაყოფიერებული კვერცხუჯრედები) გადააქვთ სუროგატი ქალის საშვილოსნოში.
  • დონაცია - იმ შემთხვევაში, თუ ქალის საშვილოსნო მზად არის ემბრიონის მისაღებად, მაგრამ არ აქვს საკუთარი კვერცუჯრედები, ან მეუღლის (პარტნიორის) ცოცხალი სპერმატოზოიდები, შეუძლია გამოიყენოს დონორის კვერცხუჯრედი ან სპერმატოზოიდი. შემდგომ ისევ მოხდება ემბრიონების გადატანა ქალის საშვილოსნოში.
გისურვებთ ჯანმრთელობას!

არ დაგავიწყდეთ !!!

Momsedu.ge-მ თქვენთვის შექმნა ახალი სივრცე. გაწევრიანდით ჯგუფში ჯანმრთე​ლობა

შეიძლება დაინტერესდეთ

„ეს მოდაა, ძალიან არასწორი და სულელური მოდა“ - მეან-გინეკოლოგი ზაზა სინაურიძე საკეისრო კვეთის მზარდი პოპულარობის შესახებ

მეან-გინეკოლოგმა ზაზა სინაურიძემ „იმედის დღეში“ ორსული ქალბატონებისთვის საინტერესო თემებზე ისაუბრა. მან მომავალ დედებს მნიშვნელოვანი რეკომენდაციები და რჩევები მისცა:

„ძველი მონაცემებით ორსული ქალისთვის წონის მატების ნორმად ითვლებოდა 15 კილო, თუმცა დღევანდელი გადმოსახედიდან ასე არ არის. გააჩნია, საწყისი წონა რამდენია. ამის მიხედვით, შეიძლება, შესავსები იყოს ორსული და მერე მოიმატოს. ამ შემთხვევაში კონკრეტულ ციფრს არ აქვს მნიშვნელობა. ნორმად ითვლება 12-15 კილო.“

ზაზა სინაურიძე საკეისრო კვეთის მზარდი პოპულარობის საკითხსაც გამოეხმაურა:

„საკეისრო კვეთის შესახებ სრულფასოვანი პასუხის გასაცემად, ალბათ, 3-4 დღე დამჭირდება, მაგრამ მარტივად რომ გითხრათ, მედიცინა არის რისკების შეწონვა. თუ საკეისრო კვეთის რისკი უფრო მაღალია, ვიდრე ფიზიოლოგიური მშობიარობის, როგორც დედისთვის, ასევე ბავშვისთვის, რა თქმა უნდა, ამ შემთხვევაში საკეისროს არ ვნიშნავთ. თუ ბუნებრივი მშობიარობა უფრო მეტ რისკს შეიცავს, ვიდრე საკეისრო კვეთა, ამ შემთხვევაში ვნიშნავთ. აქ არის ძაღლის თავი დამარხული. რისკების შეფასებისთვის თქვენ გჭირდებათ კვალიფიციური ექიმი. როდესაც დედას არ აქვს ფსიქოლოგიური მზაობა და შფოთავს, არც ეს არის რისკი. ბევრი კარგი სახელმძღვანელო არსებობს, რომლებიც ოჯახის წევრებს და ექიმებს ქალის მშობიარობის პროცესისთვის მომზადებაში ეხმარება. საკეისრო კვეთის მოთხოვნილების ზრდა მოდაა, ძალიან არასწორი და სულელური მოდა, იმიტომ, რომ ქალბატონებმა არ იციან, რა რისკები შეიძლება მოჰყვეს საკეისრო კვეთას. ეს პროცესი ადვილი ჰგონიათ, რადგან თანამედროვე ტექნოლოგიებით საკეისროს გაკეთებას 15 წუთი სჭირდება. ამას ბევრი გართულება შეიძლება მოჰყვეს. სწორედ ამიტომ, ხაზს ვუსვამ, რომ რისკების შეფასებას სჭირდება კვალიფიციური ექიმი.“

„ორსულ ქალს თუ აქვს მიომა, ის არ საჭიროებს საკეისრო კვეთას. თუ საკეისრო კვეთა უნდა გაკეთდეს, უმჯობესია, ეს მოხდეს სპინალური ანუ რეგიონალური გაუტკივარებით და არა ზოგადი ანესთეზიით (ნარკოზი). ეს უკანასკნელი რამდენიმე ეტაპს მოიცავს: სუნთქვა უნდა გაჩერდეს, გადავიდეს ხელოვნურ სუნთქვაზე და შემდეგ სუნთქვა აღდგეს. ამ ყველაფერს 18-20 დასახელების პრეპარატი სჭირდება, რომელიც პლაცენტარულ ბარიერს გადალახავს. თუ ქალბატონი საკუთარ თავზე უფრო ღელავს, ვიდრე პატარაზე, მაშინ შეიძლება, ამაზე წავიდეს. თუმცა დღეს მსოფლიოში პრაქტიკულად არ კეთდება ზოგადი ანესთეზია საკეისრო კვეთის დროს. რეგიონალური ანესთეზიისას ორგანიზმში შედის მხოლოდ ერთი პრეპარატი, ნოვოკაინი, რომელიც აბსოლუტურად უვნებელია, როგორც ქალისთვის, ასევე ბავშვისთვის,“ - აღნიშნა ზაზა სინაურიძემ.

„ბოლო დროს მოდაში შემოვიდა წყალში მშობიარობაც. სამი წლის წინ, როდესაც საქართველოში ეს მეთოდი გამოვიყენეთ, წყალში მხოლოდ უცხოელები მშობიარობდნენ. მე ამ მეთოდით არავინ მიმშობიარებია. ერთადერთი, რაც მეცნიერულ დონეზე შემიძლია გითხრათ, წყალში მშობიარობა არის სრულიად უსაფრთხო. წყალში თქვენც მსუბუქად ხართ, სტრესი გეხსნებათ. ბავშვისთვის, რომელიც 9 თვე იყო წყალში და ისევ წყალში გადადის, ეს პროცესი ნაკლებად სტრესულია. მშობიარეებს აღნიშნული მეთოდი ძალიან მოსწონთ,“ - განაცხადა ზაზა სინაურიძემ. 

წაიკითხეთ სრულად