Baby Bag

რატომ უნდა გავასინჯოთ ჩვილებს ოსპი?

რატომ უნდა გავასინჯოთ ჩვილებს ოსპი?

რატომ უნდა გავასინჯოთ ჩვილებს ოსპი, - ამ თემაზე პედიატრი თამარ ობგაიძე ​წერს. გთავზაობთ მის ნათქვამს სიტყვა-სიტყვით:

„ჩვენს წელთაღიცხვამდე დიდი ხნით ადრე ოსპი სამხრეთ-დასავლეთ აზიაში გავრცელებული საკვები პროდუქტი იყო. ევროპაში მას ხშირად ღარიბთა ხორცს უწოდებდნენ მარტივი მიზეზის გამო - თავისი შემადგენლობის წყალობით ძალიან სასარგებლოა და თან ხანგრძლივად ანაყრებს.

  • ოსპი ცილით მდიდარი პარკოსანია. მის შემადგენლობაში არსებული ცილა ადვილად აითვისება ორგანიზმის მიერ
  • ​შეიცავს ვიტამინების და მინერალების სასარგებლო მიქსს - მის შემადგენლობაშია A, C, D, K, B ჯგუფის ვიტამინები
  • მდიდარია თუთიით, სპილენძით, მაგნიუმით, სელენით, კალიუმით, მანგანუმით - რაც აუცილებელია ბავშვის სწრაფადმზარდი ორგანიზმის ზრდა-განვითარებისათვის.
  • რკინისა და ფოლატების მაღალი შცველობის გამო სასარგებლოა ანემიის პროფილაქტიკისათვის
  • ​შეიცავს დიდი რაოდენობით ფოსფორსა და კალციუმს, რაც ძვლოვანი ქსოვილის სიმყარეს უზრუნველყოფს

  • ​ოსპი არ ითვისებს ნიტრატებს, მძიმე მეტალებს და ტოქსინებს, ამიტომ ის ეკოლოგიურად სუფთა პროდუქტია
  • ​დიდი რაოდენობით უჯრედისს შეიცავს, რამაც შესაძლოა გაზების წარმოქმნა და პატარა მუცლის პრობლემები გამოიწვიოს, ამიტომ ოსპის დიდი რაოდენობით მიღება, მით უფრო 1 წლამდე ასაკში სასურველი არ არის. ამავდროულად უჯრედისი მის შემადგენლობაში დაახლოებით 3-ჯერ ნაკლებია, ვიდრე ლობიოში და ამ მხრივ უფრო დამზოგველი მოქმედება აქვს.

როდიდან მივცეთ?

ოსპი ლობიოსთან შეადრებით ადვილად მოსანელებელი პარკოსანია, ამიტომ მისი ჩართვა საბავშო მენიუში 8-9 თვიდანაა შესაძლებელი.

რასთან ერთად შეიძლება მოვამზადოთ ოსპი?

ის კარგად ეხამება სხვა ბოსტნეულს, მაგალითად, სტაფილოს, პომიდორს, კარტოფილს, ყვავილოვან კომბოსტოს.
არ უნდა მისცეთ სხვა პარკოსნებთან კომბინაციაში. მაგალითად, ბარდასთან და ლობიოსთან ერთად.
იმ დღეს, როცა პატარას ოსპს მიართმევთ, ხორციანი სადილი შეგიძლიათ სულაც არ მოუმზადოთ.
არ დაგავიწყდეთ, რომ ოსპი უჯრედისის გაზრდილ რაოდენობას შეიცავს, ამიტომ მისი მიცემა არ ღირს სხვა მსგავსი თვისების პროდუქტთან, მაგალითად, ჭარხალთან ერთად.

რომელი ფერის?

ოსპი ფერადი პარკოსანია. ბავშვებისათვის უმჯობესია წითელი ფერის შეარჩიოთ, რადგან ის უფრო ადვილადმოსანელებელია და გამოიყენება სუპებსა და პიურეებში შეგიძლიათ და თანაც იხარშება 20 წუთში.
ყველაზე დიდხანს ყავისფერ ოსპს სჭირდება ხარშვა, სრული მზადყოფნისათვის 35-40 წუთია საჭირო.

როგორ მოვამზადოთ გემრიელი და სასარგებლო ბოსტნეულის პიურე ოსპით ჩვილისათვის 8 თვიდან?

1 ცალ საშუალო ზომის დაჭრილ სტაფილოსა და კარტოფილს ხარშვისას ჩაუმატეთ 1 ჩაის კოვზი ოსპი. მოხარშეთ სრულ მზადყოფნამდე. ათქვიფეთ. გაათხელეთ დედის რძით ან ხელოვნური ნარევით. დაუმატეთთ 1 ჩ.ზეითუნის ზეთი,“ - წერს თამარ

შეიძლება დაინტერესდეთ

„თუ თქვენ ფიქრობთ, რომ ლობიო ჩვეულებრივი საკვებია, ძალიან ცდებით,“ - გიორგი ღოღობერიძე ლობიოს 5 სასარგებლო თვისების შესახებ

ექიმმა გიორგი ღოღობერიძემ „მთავარი არხის“ გადაცემაში „მთავარი დიაგნოზი“ ლობიოს შესახებ 5 სასარგებლო ფაქტზე ისაუბრა:

„თუ თქვენ ფიქრობთ, რომ ლობიო ჩვეულებრივი საკვებია, ძალიან ცდებით. 100 გრამი ლობიო რომ ავიღოთ, აქედან 10 გრამი ცილაა. ლობიო არის ცილოვანი საკვები. ერთი ცუდი თვისება აქვს ლობიოს. სამწუხაროდ, ის არ შეიცავს ცხრავე ესენციურ ამინომჟავას, რომელიც უნდა მივიღოთ გარედან. თქვენ შეგიძლიათ ეს მარტივად გამოასწოროთ, თუ ლობიოს მომზადების დროს კერძს დაამატებთ ნიგოზს. ამ შემთხვევაში ლობიო იქნება იდეალური, სრულფასოვანი ცილოვანი საკვები.

ლობიოში ბევრი ფოლიუმის მჟავაა, რომელიც ახდენს ჩვენს ორგანიზმში უჯრედების წარმოქმნას. ლობიოში ბლომად გვაქვს რკინაც. თუ ჩვენ ვსაუბრობთ მოზარდზე, მისი სხეული რადგან იზრდება, რკინაზე მოთხოვნილება მეტი აქვს. თუ ვსაუბრობთ ასაკოვან ადამიანზე, მის ორგანიზმში რკინის ათვისება ძნელდება. თუ საქმე ეხება საკვებს, რომელიც რკინას შეიცავს, ერთ-ერთი იქნება ლობიო.

ლობიოში დიდი რაოდენობით არის რთული ნახშირწყლები. ისინი ეხმარებიან ჩვენს ნაწლავებს სწორ პერისტალტიკაში, აყალიბებენ სწორ ბაქტერიულ ფლორას, ორგანიზმში შეიწოვებიან ეტაპობრივად. ლობიოში ძალიან ბევრი ანტიოქსიდანტია. სწორედ ისინი გვიცავენ ჩვენ ჟანგბადის თავისუფალი რადიკალებისგან.

სამწუხაროდ, ლობიოში არის ორი მავნე ნივთიერება. ერთ-ერთი არის ფიტის მჟავა, რომელიც ორგანიზმში D ვიტამინის ცვლას არღვევს. თუ თქვენ D ვიტამინი გაკლიათ, ლობიოს ყოველდღიურად მიღება არ არის რეკომენდებული. ლობიოში კიდევ არის ერთი მავნე ნივთიერება, ლექტინი, რომელიც ტოქსინებს მიეკუთვნება.

როგორ მოიქცე ისე, რომ შენ ლობიოსგან მხოლოდ კარგი მიიღო და ცუდი არაფერი დაგრჩეს? ლობიო შეძენის შემდეგ ძალიან კარგად გარეცხეთ და თუ მასში ერთი გაფუჭებული მარცვალი მაინც არის, მოაშორეთ. ხომ ვიცი, ზოგიერთი დატოვებს იმ მარცვალს, არაუშავს, ერთი ცალიაო. არა, ის ერთი გაფუჭებული მარცვალიც უნდა მოაშორო! როდესაც ლობიოს მომზადებას დააპირებ, მთელი ღამე გააჩერე, ამგვარად მასში არსებული ანტინუტრიენტები გამოილექება. ეს წყალი გადაღვარე. როდესაც ლობიო მოიხარშება, კიდევ ადუღე. დუღილის ტემპერატურაზე ამყოფე 10 წუთის განმავლობაში. ეს მასში არსებულ ტოქსინებს ბოლომდე დაშლის,“- აღნიშნა გიორგი ღოღობერიძემ.

წყარო: ​„მთავარი დიაგნოზი“ 

წაიკითხეთ სრულად