„ექსკურსია შეიძლება ერთი დღე და მეტი არა, მანძილის შეზღუდვა 150 კილომეტრია,“- თამარ მახარაშვილი სასკოლო ექსკურსიებთან დაკავშირებით დაწესებულ შეზღუდვებზე

საქართველოს განათლებისა და მეცნიერების მინისტრის პირველმა მოადგილემ თამარ მახარაშვილმა სასკოლო ექსკურსიებთან დაკავშირებით დაწესებული შეზღუდვების შესახებ ისაუბრა:

„მთავარი არის უსაფრთხოება. ეს არის უსაფრთხო გარემო ბავშვებისთვის. მივესალმებით ექსკურსიებს, მაგრამ ამ დროს არსებობს საგზაო მოძრაობის კანონი, რომელსაც უნდა დაექვემდებაროს ზოგადსაგანმანათლებლო დაწესებულება. არსებობს განათლებისა და მეცნიერების მინისტრის ბრძანება ზოგადსაგანმანათლებლო დაწესებულებებში ექსკურსიების წარმოების შესახებ. იქ დეტალურად არის გაწერილი, რას უნდა აკმაყოფილებდნენ და ვინ რა უნდა მოითხოვოს იმისთვის, რომ ექსკურსია შედგეს.

ჩვენ ძალიან მასშტაბურად ვიმუშავეთ ამასთან დაკავშირებით. ყველაზე მთავარი პრიორიტეტი არის სწორედ უსაფრთხოება. ექსკურსია შეიძლება ერთი დღე და მეტი არა. ექსკურსიაზე წასვლა შეიძლება მხოლოდ 150 კილომეტრის დაშორებით. აუცილებელია ტრანსპორტის ტექნიკური გამართულობა, შესაბამისი დოკუმენტაციის წარმოდგენა. ექსკურსიების დაგეგმვის დროს უნდა იყოს მშობლის თანხმობა. ექსკურსიის დროს უნდა იყოს ქმედუნარიანი პირი, რომელსაც აქვს კომპეტენცია, რომ პირველადი სამედიცინო დამხარება გაუწიოს საჭიროების შემთხვევაში ადამიანს. მდინარის ნაპირებზე, მეწყერსაშიშ ზონებზე, ამ მიმართულებით ძალიან მკაცრი რეკომენდაციების ქვეშ ვაძლევთ საშუალებას, რომ ექსკურსია განახორციელონ, “- მოცემულ საკითხზე თამარ მახარაშვილმა ტელეკომპანია „რუსთავი 2“-ის გადაცემაში „დილა მშვიდობისა საქართველო“ ისაუბრა.

წყარო:​ „დილა მშვიდობისა საქართველო“

შეიძლება დაინტერესდეთ

„არ შეიძლება მუდმივად ერთი საქმის კეთება! გადართვა არის აუცილებელი,“- ფსიქოთერაპევტი ლალი ბადრიძე

ფსიქოთერაპევტმა ლალი ბადრიძემ ადამიანისთვის დასვენებისა და ძალების აღდგენის მნიშვნელობაზე ისაუბრა:

„შრომის განწყობაზე რომ ვიყოთ, უნდა დავისვენოთ. როდესაც სულ მუდამ იმ რეჟიმში ხარ, რომ მუშაობ, დაკავებული ხარ და დღე და ღამე გასწორებული გაქვს, შრომის უნარიანობა ძალიან იკლებს. თუ ჩვენს უფროსებს გავაგებინებთ, რომ აუცილებლად გვჭირდება დასვენება იმისთვის, რომ ჩვენი შრომისუნარიანობა უფრო მაღალი იყოს, მაშინ, ალბათ, მოგვცემენ იმის საშუალებას, რომ დავისვენოთ. შაბათ-კვირა ხომ გვაქვს, არა? ის შაბათი და კვირა გამოვიყენოთ დასვენებისთვის. არსებობს აქტიური და პასიური დასვენება. პირველ რიგში, უნდა ვიცოდეთ ჩვენ რა გვინდა. უნდა შეგვეძლოს ჩვენი სხეულის მოსმენა. ზოგჯერ მინდა, რომ დავწვე და არაფერი არ ვაკეთო, ზოგჯერ მინდა, რომ კლუბში წავიდე, გავისეირნო. მოვუსმინოთ საკუთარ თავს და დავისვენოთ ისე, როგორც ჩვენ მოგვწონს.

ძალიან სწორია, რომ მუშაობის პროცესში ზოგჯერ ტელეფონში იყურება ადამიანი. არ შეიძლება მუდმივად ერთი საქმის კეთება. გადართვა არის აუცილებელი. ერთი საათი მუშაობ და 5 წუთი გადაერთვები სადღაც. ასე შრომის ნაყოფიერება უფრო მაღალია და მეც უფრო ვისვენებ. არიან ადამიანები, რომლებიც ამბობენ: „მე არ ვიღლები, სულ ენერგიული ვარ, სულ შემიძლია.“ სინამდვილეში აჟიტირებულია ეს ადამიანი. ბავშვებზე იციან ხოლმე, დაჰყავთ ინგლისურზე, ფრანგულზე, ხატვაზე, ცეკვაზე და არ იღლებაო, შეუძლიაო ბავშვს, ამბობენ. განა არ იღლება ბავშვი, აჟიტირებულია უბრალოდ. ამ დროს დასვენება გჭირდებათ აუცილებლად. როგორი ფორმით, ეს თავად უნდა გადაწყვიტოთ,“- მოცემულ საკითხზე ლალი ბადრიძემ ტელეკომპანია POSTV-ის გადაცემაში „პოსტ ალიონი“ ისაუბრა.

წყარო:​ „პოსტ ალიონი“

წაიკითხეთ სრულად