Baby Bag

პოპულარული აპლიკაციის „TikTok“-ის მიმართ ახალგაზრდების ფსიქიკური ჯანმრთელობისთვის სავარაუდო ზიანის მიყენების გამო გამოძიება დაიწყო

პოპულარული აპლიკაციის „TikTok“-ის მიმართ ახალგაზრდების ფსიქიკური ჯანმრთელობისთვის სავარაუდო ზიანის მიყენების გამო გამოძიება დაიწყო

პოპულარული აპლიკაციის „TikTok“-ის მიმართ ახალგაზრდების ფსიქიკური ჯანმრთელობისთვის სავარაუდო ზიანის მიყენების გამო გამოძიება დაიწყო. სოციალური მედია და ტექნოლოგიები ახალგაზრდების განვითარებისთვის ძალიან მნიშვნელოვანია. მიუხედავად იმისა, რომ ინტერნეტსა და სოციალურ მედიას განათლებისა და კომუნიკაციის სახით ბავშვებისთვის სარგებელი მოაქვს, მას ისეთი ნეგატიური ასპექტებიც აქვს, რომელიც მშობლებში შეშფოთებას იწვევს.

„TikTok“-ის პოპულარობა პანდემიის პერიოდში განსაკუთრებით გაიზარდა, როდესაც ადამიანები სახლებში იყვნენ ჩაკეტილები. ის ახალგაზრდებსა და მოზარდებში ამჟამად ყველაზე პოპულარული აპლიკაციაა. აშშ-ის რამოდენიმე შტატმა აპლიკაციის მიმართ გამოძიება დაიწყო მოზარდებისა და ახალგაზრდების ფსიქიკური ჯანმრთელობისთვის მიყენებული სავარაუდო ზიანის გამო.

შტატები იმ მავნე ზეგავლენის გამოკვლევას გეგმავენ, რომელსაც „TikTok“ მოზარდებსა და ახალგაზრდებზე ახდენს. ცნობილი აპლიკაცია აშშ-ის მთავრობის კრიტიკის ობიექტი მანამდეც ყოფილა. გამოძიების დაწყება კი მის მიმართ ნეგატიურ დამოკიდებულებას კიდევ უფრო ამძაფრებს. პოპულარულ აპლიკაციას ბავშვების დიდი ნაწილი აქტიურად იყენებს, ამიტომ მნიშვნელოვანია, მშობლები კარგად იყვნენ ინფორმირებული მისი დადებითი და ნეგატიური მხარეების შესახებ. შტატები, რომლებიც „TikTok“-ის მიმართ გამოძიებას აწარმოებენ შემდეგია: კალიფორნია, ფლორიდა, კენტუკი, მასაჩუსეტსი, ნებრასკა, ნიუ-ჯერსი, ვერმონტი და ტენესი.

გამოძიება აპლიკაციას ალგორითმის გამოყენებით მოზარდებისა და ახალგაზრდებისთვის ისეთი ვიდეოების შეთავაზებას ედავება, რომლებიც კვებითი აშლილობების, თვითდამაზიანებელი და სხვა სახის სახიფათო ქცევების წახალისებას უწყობს ხელს.

„TikTok“-მა საზოგადოების მრისხანება მანამდეც დაიმსახურა, როდესაც ცნობილი გახდა აპლიკაციაში არსებული სახიფათო გამოწვევებისა და ტენდენციების შესახებ. „TikTok“ გამოწვევებში მონაწილეობა ზოგიერთი მოზარდისთვის ფატალური აღმოჩნდა. მნიშვნელოვანია, რომ მშობლებმა შვილებისგან მიიღონ ინფორმაცია, თუ რას აკეთებენ ისინი აპლიკაციაში და რა ზიანი შეიძლება მიაყენოს მათ „TikTok“-ის გამოყენებამ.

წყარო: ​Moms.com

შეიძლება დაინტერესდეთ

​როგორ გადავაჩვიოთ ბავშვი საფენს და რა ხერხებით არის შესაძლებელი, რომ მივაჩვიოთ ქოთანზე დასმას - 10 ნაბიჯი

​როგორ გადავაჩვიოთ ბავშვი საფენს და რა ხერხებით არის შესაძლებელი, რომ მივაჩვიოთ ქოთანზე დასმას - 10 ნაბიჯი

როგორ გადავაჩვიოთ ბავშვი საფენს, რა ხერხებით არის შესაძლებელი, რომ მივაჩვიოთ ქოთანზე დასმას და რა ასაკიდან უნდა მივიჩნიოთ პრობლემად შარდის ან განავლის შეუკავებლობა? - ამ საკითხებზე ​MomsEdu.ge-ს ესაუბრა პედიატრი, ბავშვთა ნეფროლოგი ქეთევან ქვათაძე.

- ქალბატონო ქეთევან, მშობლებისთვის პრობლემას წარმოადგენს პატარას საფენისგან გადაჩვევა. რა ასაკიდან უნდა დავსვათ ბავშვი ქოთანზე?
- ყველა ბავშვის განვითარება ინდივიდუალურია. ამის გათვალისწინებით განსხვავდება საფენის გახდის და ტუალეტის უნარ-ჩვევების შესწავლის ასაკი. ზოგიერთი კვლევით დასტურდება, რომ ბავშვების უმეტესობა ტუალეტის უნარ-ჩვევების შესწავლისთვის მზად არის 18-24 თვის ასაკისთვის. მიუხედავად ამისა, ასაკი არ არის ერთადერთი გასათვალისწინებელი ფაქტორი.
- რა უნდა გაითვალისწინოს მშობელმა იმ დროს, როცა ქოთანზე დასმას გადაწყვეტს?
- წარმოგიდგენთ რამდენიმე ზოგად რჩევას და მითითებას, რომელიც შეიძლება გამოიყენოს ან გაითვალისწინოს მშობელმა.
პირველ რიგში, უნდა მოიმარაგოთ: კომფორტული დასაჯდომი ქოთანი და ტუალეტზე დასამაგრებელი რბილი ადაპტერი, დასადგომი სკამი ხელების დასაბანად, ილუსტრირებული წიგნი ან ვიდეორგოლები, სადაც არის გზამკვლევი ტუალეტის ტრენინგის შესახებ, პამპერსი ტრუსები, რამდენიმე ცალი ნაჭრის საცვალი, მატრასის დამცავი პამპერსი საფენი და წამახალისებელი სტიკერები.
ნაბიჯი პირველი:
ყურადღების მიპყრობა - ბავშვი მხოლოდ პამპერსით ან საცვლით ქოთანზე დასვით და წაუკითხეთ წიგნი ან აყურებინეთ ვიდეორგოლი, სადაც ტუალეტის ტრენინგის შესახებ არის მოთხრობილი.
ნაბიჯი მეორე:
შეარჩიეთ „კარგი დრო“ - სასურველია, იყოს თბილი ამინდები, რომ იოლად შეძლოთ ხშირად გამოცვლა. ოჯახის წევრები, რომლებიც ამ პროცესში მონაწილეობენ უნდა იყვნენ მაქსიმალურად ორიენტირებულები. არ დაამთხვიოთ მოგზაურობას ან საცხოვრებელი სახლის ცვლილებას.

ნაბიჯი მესამე:
დააწესეთ რუტინა - ბავშვი ქოთანზე ერთი და იმავე დროს დასვით, მაგალითად, სადილის ან ბანაობის შემდეგ, ძილის წინ. თავდაპირველად შესაძლებელია დაჯდეს ჩაცმული ან საფენით.
ნაბიჯი მეოთხე:
პროცესის დემონსტრირება - აჩვენეთ აბაზანაში ქცევის წესები და შეეცადეთ გაამეორებინოთ, ასწავლოთ ხელსახოცის გამოყენება. ​გოგონებმა ჰიგიენური პირობების დაცვა უნდა მოახდინონ წინიდან უკანა მიმართულებით.
ნაბიჯი მეხუთე:
გახადე პერსონალური - შეეცადეთ პირადი პასუხისმგებლობა აუმაღლოთ. ქოთანში ან საფენში მოთავსებული ფეკალიები თქვენი დახმარებით გადააგდებინეთ ტუალეტში.
ნაბიჯი მეექვსე:
წაახალისეთ - მოტივაციის ამაღლებისთვის აუცილებელია წახალისება. ტუალეტის ჩვევებთან დაკავშირებით, ყოველი ახალი წინ გადადგმული ნაბიჯისთვის დააჯილდოვეთ, მაგალითად, აწარმოეთ დღიური, კალენდარი, სადაც ყოველდღიურად წებოვან ილუსტრირებულ სტიკერებს ბავშვი თავად ჩააკრავს.
ნაბიჯი მეშვიდე:

​საცვალი - თავდაპირველად ადაპტაციამდე გამოიყენეთ პამპერსი ტრუსი, რომელსაც დამოუკიდებლად და იოლად თავად გაიხდის და ჩაიცვამს.
ნაბიჯი მერვე:
მარცხი - ჩასველებისას არ გაუბრაზდეთ და არ დასაჯოთ, შეხვდით ამას პოზიტიურად, გამოუცვალეთ და აუხსენით, რომ შემდეგ ჯერზე უფრო მეტად ყურადღება მიაქციოს მოშარდვის ან დეფეკაციის სურვილს.
ნაბიჯი მეცხრე:
ღამე - საწოლში დაუფინეთ დამცავი პამპერსი საფენი, რომელიც მატრასს დასველებისგან დაიცავს. თუ ღამით ტუალეტის ტრენინგის მცდელობა იქნება წარუმატებელი, არ იღელვოთ, ღამით ჩასველება 5 წლის ასაკამდე პათოლოგიასთან არ ასოცირდება.
ნაბიჯი მეათე:
ჯილდო - ტუალეტის ტრენინგის ყოველი მისი წარმატება სიხარულით აღნიშნეთ. სიტყვიერად შეაქეთ და დემონსტრაციულად აღნიშნეთ.
გაითვალისწინეთ, რომ თითოეული ნაბიჯის შესრულების და ადაპტაციისთვის შესაძლოა, მოგიწიოთ რამდენჯერმე განმეორება.
აუცილებელია გაითვალისწინოთ თქვენი ბავშვის სხვადასხვა ინდივიდუალური გარემოება და დეტალური ინფორმაციისთვის შეათანხმოთ ბავშვის პირად ექიმთან.
- რა ასაკიდან არის პრობლემა, თუ ბავშვს არ ჩამოუყალიბდა ეს ჩვევა და ვერ გადაეჩვია საფენს?
- როდესაც ბავშვი 4 წელზე მეტია და არ აქვს ჩამოყალიბებული დღისით ტუალეტის ჩვევები - აქვს შარდის და განავლის შეუკავებლობა,  რეკომენდებულია, კონსულტაცია ექიმთან გაიაროთ.
პედიატრი შემდეგ წყაროებზე დაყრდნობით საუბრობს:  ​წყარო 1 ​წყარო 2

ესაუბრა მარიამ ჩოქური


წაიკითხეთ სრულად