„შემოდგომა გვიჩვენებს, ვუახლოვდებით პანდემიის დასასრულს, თუ ველოდოთ ახალ ტალღას,“- თენგიზ ცერცვაძე

ინფექციური პათოლოგიისა და შიდსის ცენტრის გენერალურმა დირექტორმა თენგიზ ცერცვაძემ საქართველოსა და მსოფლიოში არსებული კორონავირუსის სტატისტიკის შესახებ ისაუბრა:

„კოვიდმა საქართველოში პაუზა აიღო და ამას მოჰყვა სიფხიზლის მოდუნება. მსოფლიო სტატისტიკა გვიჩვენებს, რომ ეს მთლად სწორი არ არის. საქართველოში არის ძალიან კარგი ეპიდსიტუაცია, უკეთესი არ შეიძლება. ეს არის დღეში 50-100-მდე ახალი შემთხვევა და სიკვდილობა არის მინიმალურ ნიშნულზე. დღეები გადის, როდესაც არცერთი სიკვდილობა არ ფიქსირდება. პიკიდან მსოფლიოც გამოვიდა და დიდი ტალღები არ არის, მაგრამ გაცილებით მეტი შემთხვევაა, ვიდრე საქართველოში. მსოფლიოში ყოველდღიურად ფიქსირდება კოვიდის 500 000-დან მილიონამდე ახალი შემთხვევა და 1000-დან 1500-მდე გარდაცვალება.

ეს პრაქტიკულად მთელს მსოფლიოშია. ისეთ ქვეყნებში მოიმატა სიკვდილობამ და რაოდენობამ, სადაც ტრადიციულად ადრე დაბალი იყო: იაპონია, სამხრეთ კორეა და ა.შ. საქართველოში დაბალ რიცხვებს უკეთეს ვაქცინაციას ვერ დავაბრალებთ. ვაქცინაციით საქართველო არის ერთ-ერთი ყველაზე დაბალი მოცვის ქვეყანა. პირიქით, ვაქცინაციის მიხედვით რომ ვიმსჯელოთ, საქართველოში გაცილებით მეტი უნდა იყოს შემთხვევა, ვიდრე სხვა ქვეყნებში, მაგრამ პირიქითაა. ერთი ვარიანტია, რომ რაღაც პერიოდში საქართველოში იყო ძალიან ბევრი კოვიდის შემთხვევა და კოვიდგადატანილებს განუვითარდათ ბუნებრივი იმუნიტეტი. მეორე აზრი სკეპტიკოსებში არ არის პოპულარული, მაგრამ კოვიდის მართვა ბოლო თვეებში ძალიან კარგია. სერიოზული გამოცდილება შეიძინა საქართველომ.

არის იმედი, რომ კოვიდის დასასრული მოახლოვდეს. შემოდგომა გვიჩვენებს, ვუახლოვდებით თუ არა კოვიდის დასასრულს, თუ ველოდოთ ახალ ტალღას. ყველა პანდემიას ჰქონდა თავისი კანონზომიერება. 2-3-4-5 წლის შემდეგ პანდემია თავისით მთავრდებოდა. მოელიან, რომ პანდემიის სრული ლიკვიდირება არ მოხდება, მაგრამ ის გადაიქცევა ენდემურ ვირუსად,“ - მოცემულ საკითხზე თენგიზ ცერცვაძემ ტელეკომპანია „რუსთავი 2“-ის გადაცემაში „სხვა შუადღე“ ისაუბრა.

წყარო: ​„სხვა შუადღე“

შეიძლება დაინტერესდეთ

„საერთაშორისო სტანდარტია, რომ ორი წელი უნდა იყოს მშობიარობიდან ახალ დაორსულებამდე,“ - მეან-გინეკოლოგი ვერიკო ბაზიარი

მეან-გინეკოლოგმა ვერიკო ბაზიარმა მშობიარობის შემდეგ ორგანიზმის სრულფასოვანი აღდგენის მნიშვნელობაზე ისაუბრა:

„ექვს თვემდე ძუძუთი კვებას უნიკალური დანიშნულება აქვს. რატომ უსვამენ ამას ხაზს?! მოგეხსენებათ, მშობიარობის შემდეგ წყდება მენსტრუალური ციკლი, ამიტომ ქალი ვერ გებულობს, როდის შეიძლება დარჩეს ის ორსულად. ეს, რასაკვირველია, პირველი ექვსი თვის განმავლობაში არასასურველი ორსულობაა, ხიფათის შემცველია, რადგან ორგანიზმი არ არის მზად ახალი ორსულობისთვის, ენდომეტრიუმი არ არის ბოლომდე აღდგენილი. ეს არის პერიოდი, როდესაც არ არის სასარგებლო დაორსულება. მე მომხრე ვარ, რომ სულ აჩინონ შვილები, მაგრამ პირველი წელიწადი მაინც ორგანიზმს უნდა მისცე გონზე მოსვლის საშუალება.

საერთაშორისო სტანდარტია, რომ ორი წელი უნდა იყოს მშობიარობიდან ახალ დაორსულებამდე, რომ ორგანიზმმა სრულფასოვანი ენდომეტრიუმი აღიდგინოს და დაიბადოს კიდევ ერთი ჯანმრთელი ბავშვი. ეს იმას არ ნიშნავს, რომ თუ დაორსულდები აბორტი უნდა გაიკეთო. სასურველია, რომ იყო დაცული. ყველაზე იდეალური დაცვა არასასურველი ორსულობისგან არის ძუძუთი კვება. ინარჩუნებ შენს გარეგნობას, სტანდარტებს, ბავშვს უნიკალურ იმუნიტეტს აძლევ და შენ გაქვს სიმშვიდე, რომ არასასურველი ორსულობა არ დგება. 6 თვის განმავლობაში თუ ექსკლუზიურად აჭმევ ძუძუს. სამ საათზე მეტ ინტერვალს არ აკეთებ დღის განმავლობაში და 6 საათზე მეტ ინტერვალს ღამის განმავლობაში, არ ჩაუმატებ სხვა საკვებს, 98%-მდე დაცულია ქალი არასასურველი ორსულობისგან ექვსი თვის განმავლობაში. ექვსი თვე გაქვს სრული სიმშვიდე. არ გჭირდება კონტრაცეპტივი და ხარ მშვიდად,“- მოცემულ საკითხზე ვერიკო ბაზიარმა საპატრიარქოს ტელევიზიის გადაცემაში „ერთსულოვნების დილა“ ისაუბრა.

წყარო:​ „ერთსულოვნების დილა“

წაიკითხეთ სრულად