,,მინდა, ეს მოსახლეობის უდიდესმა ნაწილმა დაიჯეროს'' - რა დაასრულებს პანდემიას?

​რესპუბლიკური საავადმყოფოს კლინიკურმა დირექტორმა დევი ტაბიძემ საქართველოში ვაქცინაციის დაბალი ტემპისა და მოსახლეობის პასიურობის შესახებ ისაუბრა:

„მაინცდამაინც უნდა გაიზარდოს რაოდენობა და სამწუხაროდ გაიზარდოს გარდაცვალების ციფრი, რომ მინიმალური შიშის სინდრომი ჩამოყალიბდეს ადამიანებში?! ეს ძალიან ცუდია. თუ ჩვენ ამის მეტი თვითშეგნება არ გაგვაჩნია, ეს კიდევ უფრო უარესია. ​როდესაც წავიკითხავთ, რომ გარდაიცვალა 60, 80 ადამიანი, მაშინ უნდა დავიწყოთ ვაქცინაცია?“

დევი ტაბიძის თქმით, ადამიანებს შემსუბუქების პერიოდში ავიწყდებათ პანდემიით გამოწვეული პროცესების სირთულე:

„შემსუბუქების პერიოდში ადამიანებს ავიწყდებათ ამ პროცესების სირთულე. როგორც კი ეს პროცესები თავის ძალიან ცუდ კალაპოტში დგება და შედეგებიც შესაბამისად ცუდია, მაშინ ახსენდებათ ადამიანებს, რომ თურმე ვაქცინაცია საჭიროა. სხვა მეთოდი დედამიწის ზურგზე არ არსებობს.“

„დღეს დილით მე თვითონ ვუსმენდი და ვნახე ინფორმაცია ინდოეთთან დაკავშირებით. ძალიან საინტერესო ცნობას მოგაწვდით. ​ორიდან თვრამეტ წლამდე ყველა აცრეს და ამ აცრის შემდეგ მიიყვანეს ეს ბავშვები სასწავლებელში. აცრილია პედაგოგების 87 %. მათ მისცეს გაკვეთილების ჩატარების უფლება. მე ინდოეთს არ ვედრები, რა თქმა უნდა, ჩვენი ციფრები სხვაა. იქ ექვს მილიონამდე ადამიანი იცრება ყოველდღე,“ - აღნიშნულ საკითხზე დევი ტაბიძემ „მედიაცენტრ მთავარში“ ისაუბრა.

წყარო: ​„მედიაცენტრი მთავარი“