Baby Bag

„მედარდებიან ჩვენი ბავშვები, მოზარდები, მათი ფსიქოსომატური მდგომარეობა... სახლებში გამოკეტილები, კოშმარული სიზმრის დასასრულის მოლოდინით ცხოვრობენ და ენატრებათ სილაღე“

„მედარდებიან ჩვენი ბავშვები, მოზარდები, მათი ფსიქოსომატური მდგომარეობა... სახლებში გამოკეტილები, კოშმარული სიზმრის დასასრულის მოლოდინით ცხოვრობენ და ენატრებათ სილაღე“

ამის შესახებ სოციალურ ქსელში პედიატრი, მედიცინის მეცნიერებათა დოქტორი ინგა მამუჩიშვილი წერს.

მედარდებიან ჩვენი ბავშვები, მოზარდები, მათი ფსიქოსომატური მდგომარეობა... ძალიან ბევრი მირეკავს სხვადასხვა პრობლემით: ფობიები, აგზნებადობა, უძილობა, ისტერიები, ეკრანმიჯაჭვულობა ნომერ პირველი პრობლემა, რაც იწვევს ინფორმაციულ, ემოციურ სტრესს და საბოლოოდ ოქსდაციური სტრესის განვითარებას!!! აღარც სიყვარული, აბა საიდან კომუნიკაციები მხოლოდ ვირტუალური, არც სხვა გრძნობები, რომელთა ატროფიაც ხდება დროთა განმავლობაში... გახსოვთ???? დაჭერობანა, დამალობანა, წრეში ბურთი. ამ თამაშების დროს რაღაცნაირად ხდებოდა გრძნობათა რეალიზება, იმას იჭერდნენ, ვინც მოწონდათ, ბურთს ესროდნენ, დასდევდნენ დაჭერობანას დროს, თმებს აწიწკნიდნენ, გმირობის ჩადენას ლამობდნენ ბიჭები, კლასში შეყვარებული გოგონას ჩადენილ დანაშაულს (მაგალითად, ყვავილის ქოთნის გატეხვა) თვითონ იბრალებდნენ, ამ გრძნობების გამოხატვის უამრავი საშუალება იყო... ახლა... ვირტუალური სამყარო... ენატრებათ მეგობრები, თვალების შემოცეცება, ნაზი შეხება... ქურთუკის საყელოს გასწორება, შოკოლადის ან წიგნის მიწოდების დროს ხელის ხელთან შეხება, რვეულის ან წიგნის წასართმევად გამოკიდება, დაჭერა და თვალებში გრძნობით ჩახედვა, სუფთა და სპეტაკი... დიახ, ეს ყველაფერი ენატრებათ ბავშვებს, ნიღაბში იმალება გრძნობები, ქვეცნობიერში ილექება ნატვრა და ოცნება... მეშინია, გრძნობათა ატროფია არ დაეწყოთ... როდესაც მშობლებს მათი ნერვული აშლილობის ამ მიზეზებს განვუმარტავ, არ უნდათ აღიარება (მშობლიური ეგოიზმი), მაგრამ დამიჯერეთ ასეა... ნუ გაგიკვირდებათ მათი აფექტურობა, წუწუნი, უხასიათობა... იგიჟეთ თქვენც ხშირად მათთან ერთად, მოუსმინეთ იმ მუსიკას, რასაც უსმენენ, გაუტოლეთ თავი, მოუყევით თქვენი თავგადასავლები, მეტად მოეფერეთ, ოღონდ თანაგრძნობის გარეშე! არასოდეს არ დაამციროთ მოზარდი, არ დაუწუნოთ არჩევანი, „არ აშაყიროთ“ (ეს მათ ყველაზე მეტად არ ესმით და აღიზიანებთ) ნუ აავსებთ შენიშვნებით! მეტი ოპტიმიზმი ხმის ტონში! მეტი იმედი! მეტი დამაჯერებლობა!!! ის, რომ მალე დამთავრდება ეს კოშმარი და ჩვეული რუტინული ყოფა დაიწყება, რომელიც მათია და ენატრებათ, მაგრამ თქვენიც მესმის ჩემო ძვირფასებო, თქვენს ნერვებსაც მოფრთხილება უნდა... თუმცა თქვენს მეხსიერებაში კარგი მომენტებიც ხომ არის, ტკბილად გასახსენებელი, ამათ ცნობიერებას კი ძალიან უჭირს, ძალიან!!! ჯერ პატარები არიან, მათ ახლა უნდათ აწყვეტა, თავისუფლება, გრძნობებთან თამაში, სპორტი, სიმღერა, სწავლა... სამწუხაროდ, სახლებში გამოკეტილები, კოშმარული სიზმრის დასასრულის მოლოდინით ცხოვრობენ და ენატრებათ სილაღე. კიდევ ერთხელ გილოცავთ, განსაკუთრებით ჩემს ბავშვებს და მოზარდებს. ჩვენ დავამარცხებთ ვირუსს და თქვენ გაგათავისუფლებთ სულიერი ტყვეობიდან, დაგიბრუნებთ ბედნიერ ბავშვობას, გპირდებით.

შეიძლება დაინტერესდეთ

შეიკავეთ თავი მოწევისგან - კორონავირუსი ძლიერ ორგანიზმს ვერ ერევა

შეიკავეთ თავი მოწევისგან - კორონავირუსი ძლიერ ორგანიზმს ვერ ერევა
კორონავირუსის სწრაფი გავრცელების შემდეგ მსოფლიო ჯანდაცვის ორგანიზაცია განსაკუთრებულ ყურადღებას ვირუსის პრევენციისა და კარანტინის რეჟიმის მოწესრიგების საკითხებს უთმობს. გარდა იმისა, რომ ვირუსის გავრცელების არეალში მყოფი ადამიანებისთვის ხელების ხშირი დაბანა და ხალხმრავალი ადგილებისთვის თავის არიდებაა რეკომენდებული, დაავადების პრევენციისთვის იმუნიტეტის გაძლიერებაზე ზრუნვაც ძალიან მნიშვნელოვანია, რათა კორონავირუსით დაინფიცირების შემთხვევაში მას ძლიერი ორგანიზმით შეხვდეთ.

იმუნური სისტემა ინფექციებსა და დაავადებებს ებრძვის. ის საფრთხეს სხვადასხვა მექანიზმის გამოყენებით ძალიან სწრაფად ამოიცნობს, რისი წყალობითაც ვირუსებს, ბაქტერიებს, სოკოებს, პარაზიტებსა და არაჯანსაღ უჯრედებს (როგორიცაა სიმსივნური უჯრედი), აქტიურად ებრძვის. ვირუსებს საკუთარი პროტეინების გასამრავლებლად სპეციალური მექანიზმის ამუშავება ესაჭიროებათ. ვირუსულ ინფექციაზე ბუნებრივი იმუნური პასუხის საუკეთესო საშუალება ბუნებრივი მკვლელი უჯრედების აქტივაციაა, რომლებიც ვირუსულ ინფექციებს წარმატებით ებრძვიან.

არ დაგავიწყდეთ !!!

Momsedu.ge-მ თქვენთვის, ქალებისთვის შექმნა ახალი სივრცე, სადაც ყველაზე მცოდნე დედები იყრიან თავს. ჯგუფის დასახელებაც სწორედ ასეა - „მცოდნე დედების ჯგუფი“, რომლის საშუალებით დედები ერთმანეთს საკუთარ გამოცდილებას გაუზიარებენ. (ჯგუფში გასაწევრიანებლად ნახეთ ბმული - „მცოდნე დედების ჯგუფი“)


თითოეულ ადამიანს განსხვავებული იმუნური სისტემა აქვს. იმუნური სისტემის მდგრადობა ყოველდღიურად იცვლება. იმუნიტეტის ბრძოლისუნარიანობა ძალიან ბევრ ფაქტორზეა დამოკიდებული. იმისთვის, რომ იმუნური სისტემის დასუსტების თავიდან აცილება შეძლოთ და კორონავირუსს ძლიერი ორგანიზმით შეხვდეთ, რამდენიმე ფაქტორზე უნდა გაამახვილოთ ყურადღება.


სტრესის შემცირება

კორონავირუსის შესახებ გავრცელებული დეზინფორმაციის ზეგავლენით ადამიანები უკიდურესად სტრესულ მდგომარეობაში იმყოფებიან. მათი ნაწილი იმდენად დაპანიკდა, რომ საკვებისა და აუცილებელი პროდუქტების მომარაგება დაიწყო. საგანგებო ვითარებისთვის სათანადო მზაობაში ცუდი არაფერია, თუმცა არ დაგავიწყდეთ, რომ სტრესი იმუნიტეტს მნიშვნელოვნად აქვეითებს, რის გამოც თქვენი ორგანიზმი ინფექციურ დაავადებებს ეფექტურად ვერ უმკლავდება. სტრესის ჰორმონის (კორტიზოლი) მცირე დოზით მატება ორგანიზმისთვის სასარგებლოა, თუმცა თუ კორტიზოლის დონე მეტისმეტად იმატებს, ორგანიზმში ანთებითი კერების წარმოშობის საფრთხე ჩნდება. სტრესი ლიმფოციტების წარმოების პროცესსაც აფერხებს. ლიმფოციტები ინფექციებთან ბრძოლაში გადამწყვეტ როლს ასრულებენ. სისხლში მათი დონის შემცირება თქვენ ვირუსებთან გამკლავებაში ხელს მნიშვნელოვნად გიშლით. ვირუსის აფეთქების პარალელურად, ეცადეთ, სიმშვიდე შეინარჩუნოთ. პანიკა თქვენს მდგომარეობას უფრო დაამძიმებს. სტრესის შესამცირებლად რელაქსაციის სხვადასხვა საშუალებას მიმართეთ. კარგია, თუ მედიტაციით დაკავდებით.

ზომიერი ფიზიკური აქტივობა

რეგულარული ვარჯიში გულ-სისხლძარღვთა სისტემის მდგომარეობას აუმჯობესებს, ის არტერიულ წნევას არეგულირებს, წონის გაკონტროლებაში გეხმარებათ და დაავადებებთან ბრძოლაშიც გიწყობთ ხელს. ფიზიკური დატვირთვა სისხლის ცირკულაციასაც აუმჯობესებს, რის გამოც იმუნური სისტემა გამართულად და ეფექტურად მუშაობს. რეგულარული ვარჯიში თქვენს ჯანმრთელობაზე დადებითად აისახება, რაც ვირუსულ ინფექციებთან ბრძოლაში გეხმარებათ. ინტენსიური ფიზიკური დატვირთვა ორგანიზმში ანთებითი კერების წარმოქმნას უწყობს ხელს. ვირუსების აფეთქების პერიოდში მეტისმეტად რთული დატვირთვისგან თავი შეიკავეთ.

ბალანსირებული კვების რაციონი

იმუნური სისტემის გამართული მუშაობისთვის ჯანსაღად და სრულფასოვნად კვება აუცილებელია. ღარიბ სახელმწიფოებში, სადაც ადამიანებს საკვების მოპოვება უჭირთ, ვირუსული ინფექციები ყველაზე სწრაფად ვრცელდება. ორგანიზმში გარკვეული მიკრონუტრიენტების დაბალი შემცველობა დაავადებებისადმი იმუნურ რეაქციებს ასუსტებს. დარწმუნდით, რომ ყოველდღიურად სათანადო რაოდენობის თუთიას, რკინას, ფოლიუმის მჟავას, სელენს, სპილენძს, C, A, B6 და E ვიტამინებს იღებთ. თქვენი რაციონი ხილითა და ბოსტნეულით გაამდიდრეთ, რათა ორგანიზმის გაჯანსაღება და გაძლიერება შეძლოთ.

მოწევისგან თავის შეკავება

თამბაქოს მოწევა მნიშვნელოვნად ზრდის პნევმონიითა და სეზონური ვირუსებით დაავადების რისკებს. მწეველი ადამიანის ორგანიზმს ვირუსული ინფექციებისგან გასათავისუფლებლად უფრო დიდი დრო სჭირდება. მოწევა მნიშვნელოვნად ამცირებს სისხლში C ვიტამინის დონეს, რომელიც ორგანიზმისთვის ერთ-ერთი მთავარი დამცავი ანტიოქსიდანტია.

ძილის რეჟიმის მოწესრიგება

კვლევებით დასტურდება, რომ ადამიანები, რომლებსაც მოუწესრიგებელი ძილის რეჟიმი აქვთ, ვირუსული ინფექციებით უფრო მარტივად ავადდებიან. ძილის დროს ორგანიზმში დიდი რაოდენობით ციტოკინი გამომუშავდება. ციტოკინი ცილაა, რომელიც ინფექციებისა და ანთებითი პროცესების წინააღმდეგ ბრძოლისთვის ორგანიზმს აუცილებლად სჭრიდება. როდესაც თქვენ ძალიან ცოტა გძინავთ, ანტისხეულებისა და იმუნური უჯრედების დეფიციტის პრობლემის წინაშე დგებით. ზრდასრულ ადამიანებს დღე-ღამეში 7-8 საათი მაინც უნდა ეძინოთ, ბავშვებსა და თინეიჯერებს კი სულ ცოტა 10 საათი.

ადამიანები იმუნიტეტის გასაძლიერებლად ხშირად მიირთმევენ მცენარეულ პრეპარატებსა და სიროფებს, თუმცა ჯერჯერობით მათი ეფექტურობა მეცნიერულად დამტკიცებული არ არის.

მომზადებულია ​zmescience.com-ის მიხედვით
თარგმნა ია ნაროუშვილმა 

წაიკითხეთ სრულად