Baby Bag

წიგნები, რომელთა წაკითხვასაც თქვენი მოსწავლეები არდადეგების დროს მოასწრებენ

წიგნები, რომელთა წაკითხვასაც თქვენი მოსწავლეები არდადეგების დროს მოასწრებენ

თუ დასვენების დღეებზე წასაკითხი წიგნები ჯერ არ შეგირჩევიათ, ​Momsedu.ge გთავაზობთ სამ წიგნს, რომლის წაკითხვას მოსწავლეები არდადეგების პერიოდში მოასწრებენ. 

1. ფრენსის სკოტ ფიცჯერალდის „დიდი გეტსბი“

ირლანდიური წარმოშობის ფრენსის სკოტ ფიცჯერალდი XX საუკუნის ერთ-ერთ უდიდეს ამერიკელ მწერლად მიიჩნევა. კრიტიკოსთა ერთი ნაწილი მის რომანს „დიდი გეტსბი“ - ამავე პერიოდის ინგლისურენოვან 100 საუკეთესო წიგნს შორის მეორე ადგილზე აყენებს. ეს არის ერთი მამაკაცის და ერთი ქალის დიდი ამბავი, ანუ უჩვეულო სიყვარულის ისტორია. მილიონერი ჯეი გეტსბი წლების განმავლობაში ეძებს დაკარგულ საყვარელ ქალს და სჯერა მისი ერთგულებისა. 

იპოვის კიდეც, მაგრამ იგი ამ დროს უკვე სხვისი მეუღლეა. ერთი ქარაფშუტა ქალი, თუმცა კი შეყვარებული გეტსბისთვის ისევ ერთადერთი და განუმეორებელი. ჯეი არაფერს იშურებს მისი გულის მოსაგებად... ამ ერთგულებასა და უანგარობას სწორედ საყვარელი ქალის სანაცვლოდ ეწირება, თანაც ისე, რომ ქალის ცრემლსაც ვერ ეღირსება. 

ასე სრულდება დიდი გეტსბის ტრაგიკული სიყვარული. კაცისა, რომელსაც თან ყველაფერი ჰქონდა და თან - არაფერი! „დიდი გეტსბი“ იმ რომანებს განეკუთვნება, ერთი ამოსუნთქვით რომ იკითხება და ბევრ საფიქრალსაც უჩენს მკითხველს.


2. დათო ტურაშვილის „ჯინსების თაობა“

1983 წელს რამდენიმე ქართველმა ახალგაზრდამ საბჭოთა საქართველოდან თვითმფრინავის გატაცება და ამ გზით ამერიკაში მოხვედრა სცადა. 

გულუბრყვილო მცდელობა წარუმატებელი აღმოჩნდა, რომელსაც მსხვერპლიც მოჰყვა თვითმფრინავის ეკიპაჟის წევრებსა და მგზავრებს შორის. 

დაიღუპნენ გამტაცებლებიც, მათი უმეტესობა კი სასამართლოს წინაშე წარსდგა.


3. უილიამ გოლდინგი - „ბუზთა ბატონი“

1980 წლის ბუკერისა და 1983 წლის ნობელის პრემიების ლაურეატი, ბრიტანელი მწერალი, უილიამ გოლდინგი (1911-1993) მე-20 საუკუნის ერთ-ერთი ცნობილი ლიტერატორია. მან უკვე 40 წელს გადაცილებულმა დაწერა რომანი „ბუზთა ბატონი'' (1954) – უამრავი სიმბოლიკით დატვირთული ერთგვარი ლიტერატურული პაროდია, „რობინზონიადას'' ერთ-ერთი ვარიანტი, რომელშიც ველური კუნძულის ერთადერთი ცივილიზებული წარმომადგენლები ბავშვები არიან. 

ამ რომანით მწერალმა არაერთი სტერეოტიპი დაანგრია და უკაცრიელ კუნძულზე მოხვედრილი სკოლის მოსწავლეების მაგალითზე შეულამაზებლად ასახა ადამიანის ქვეცნობიერში ცივილიზებულობის მიღმა მიმალული ურჩხული. 

„ბუზთა ბატონი'' გოლდინგის პირველი და ყველაზე ცნობილი რომანია. მის გამოქვეყნებას თავიდან დიდი წარმატება არ მოჰყოლია, მაგრამ 60-იანი წლების დასაწყისში ბესტსელერად იქცა და კრიტიკოსებიც დაინტერესდნენ. 1963 წელს პიტერ ბრუკმა, ხოლო 1990 წელს ჰარიჰუკმა რომანის მიხედვით ფილმები გადაიღეს.

შეიძლება დაინტერესდეთ

შეფასებისა და გამოცდების ეროვნული ცენტრი მათემატიკის ტესტის გამსწორებელთა კონკურსს აცხადებს

შეფასებისა და გამოცდების ეროვნული ცენტრი მათემატიკის ტესტის გამსწორებელთა კონკურსს აცხადებს

მათემატიკის ტესტის გამსწორებლების შესარჩევი კონკურსი 2020 წლის ერთიანი ეროვნული გამოცდებისათვის 24 მაისს ჩატარდება, - ინფორმაციას შეფასებისა და გამოცდების ეროვნული ცენტრი ავრცელებს.

ცენტრის ცნობით, კონკურსში მონაწილეობის მისაღებად კონკურსანტმა უნდა გაიაროს რეგისტრაცია ვებგვერდზე http://emarker.naec.ge​/eMarker 16 მაისს (სასურველი ბრაუზერი: Mozila Firefox და Google Chrome).
„კონკურსის დაწყებამდე, 16 მაისიდან - 22 მაისის ჩათვლით, მონაწილეებს საშუალება ექნებათ ივარჯიშონ - გაასწორონ ნაშრომები ელექტრონული პროგრამის საშუალებით.
ამისათვის საჭიროა, რომ კანდიდატი გაეცნოს ქვემოთ თანდართულ ფაილში მოცემულ დავალებებსა და მათ შეფასების სქემებს; შემდეგ კი დაიწყოს ვარჯიში ამგვარად:
ვებგვერდზე http://emarker.naec.ge/e​Marker შესვლის შემდეგ დააჭიროს ღილაკს „გასწორების გვერდზე გადასვლა“, წაიკითხოს კონკრეტული დავალების პასუხი, საკუთარი შეფასება ჩაწეროს ქვემოთ ამისთვის საგანგებოდ გამოყოფილ უჯრებში და დააჭიროს ღილაკს „შენახვა“. შემდეგ ეს პროცედურა უნდა გაიმეოროს იმდენჯერ, სანამ არ ამოიწურება გასასწორებელი დავალებები და გამოჩნდება წარწერა „დავალება არ მოიძებნა“.

მათემატიკის საგამოცდო ტესტის გამსწორებელთა შესარჩევი კონკურსი ჩატარდება ელექტრონულად სპეციალური პროგრამის გამოყენებით 24 მაისს 11:00 საათიდან 16:00 საათამდე. მსურველებს საშუალება ექნებათ სახლიდან შევიდნენ ბმულზე http://emarker.naec.ge/eMa​rker და გაასწორონ აბიტურიენტთა ნამუშევრები, რათა გამოავლინონ საკუთარი კომპეტენცია.

არაუგვიანეს 15 ივნისისა შედგება რეიტინგული სია და კონკურსის შედეგები ეცნობებათ წარმატებულ მონაწილეებს.

კონკურსში მონაწილე პირი უნდა აკმაყოფილებდეს შემდეგ პირობებს:

  • უნდა ჰქონდეს უმაღლესი განათლების დამადასტურებელი დიპლომი (მათემატიკის სპეციალისტი) და/ან ჩაბარებული უნდა ჰქონდეს მასწავლებლის კომპეტენციის დამადასტურებელი ტესტი (კონკურსში გამარჯვების შემთხვევაში კონკურსანტმა უნდა წარმოადგინოს შესაბამისი დოკუმენტები შეფასებისა და გამოცდების ეროვნულ ცენტრში);
  • ოჯახის წევრი/წევრები არ უნდა აბარებდნენ 2020 წლის ერთიან ეროვნულ გამოცდებს.
ამ ფაილში მოცემულია დავალებები და მათი შესაბამისი პასუხები, რომ მსურველებმა კონკურსამდე შეძლონ ვარჯიში,“ - აღნიშნულია შეფასებისა და გამოცდების ეროვნული ცენტრის მიერ გავრეცელებულ ინფორმაციაში.
წაიკითხეთ სრულად