როგორია D ვიტამინის პროფილაქტიკური დოზა ზრდასრულებსა და ბავშვებში? - აღნიშნულ თემაზე ბავშვთა ენდოკრინოლოგმა ნინო ხელაძემ საქართველოს პირველი არხის გადაცემაში „პირადი ექიმი - მარი მალაზონია“ ისაუბრა.
,,D ვიტამინი არ არის მხოლოდ ვიტამინი, ეს არის მნიშვნელოვანი ჰორმონი, რომელიც ადრე ეგონათ, რომ მხოლოდ ძვლის და კალციუმისთვის იყო აუცილებელი, თუმცა ახლა დამტკიცდა, რომ მას აქვს ძალიან მნიშვნელოვანი როლი იმუნური სისტემის გაძლიერებისთვის, ალერგიების პრევენციისთვის, სიმსუქნის შემთხვევაში, გულსისხლძარღვთა სისტემის და დიაბეტის პრევენციისთვის (პირველი ტიპის დიაბეტის პრევენციისთვისაც კი), ონკოლოგიური დაავადებების საწინააღმდეგოდ და ბევრი სხვა. აღმოჩნდა, რომ D ვიტამინის რეცეპტორები თავის ტვინშიც კი არის. ამიტომ ყველა უჯრედისა და ორგანოთა სისტემისთვის არის ძალიან აუცილებელი.
ჩვენთან არის სახელმწიფო გაიდლაინი, სტანდარტი, რომლის მიხედვითაც ყველა ბავშვმა, არა აქვს მნიშვნელობა ძუძუთი იკვებება, თუ ხელოვნურზეა, ორ წლამდე უნდა მიიღოს D ვიტამინის პროფილაქტიკური დოზა, 2 წლის შემდეგ, მათ შორის მოზრდილების ჩათვლით, მნიშვნელოვანია და უკვე აქტუალური ხდება, რომ D ვიტამინი მივიღოთ სეზონურად, როცა მზე ვერ იქნება ამ ვიტამინის აქტიური წყარო.
არის გარკვეული საკვები, რომელიც შეგვივსებს მის დანაკლისს, თუმცა ეს საკმაოდ რთულია, რადგან ამ საკვების დიდი რაოდენობით მიღებაა საჭირო. მაგალითად, 10-15 კვერცხი უნდა მიიღოს ბავშვმა, რომ შეივსოს იმ დღის ნორმა D ვიტამინი, რაც წარმოუდგენელია. ამიტომ ხდება აქტუალური, რომ დანამატის სახით მიიღოს ბავშვმა ასაკის გათვალისწინებით შერჩეული დოზა. ეს ეხება ყველა ჯანმრთელ ბავშვს სეზონურად,'' - აღნიშნა ნინო ხელაძემ.
„ონლაინ ჩართვის დროს ბავშვი ზის ვითომ სკოლაში, ამავე დროს მეორე გაჯეტი უჭირავს და იქ თამაშით არის დაკავებული,“- პედიატრი თემურ მიქელაძე ონლაინ სწავლების ნაკლოვანებებზე
პედიატრმა თემურ მიქელაძემ ბავშვებში ეკრანდამოკიდებულების პრობლემაზე ისაუბრა და მოზარდებზე მის მავნე ზეგავლენას გაუსვა ხაზი:
„ეკრანი საჭიროა იმ შემთხვევაში, როდესაც ყველაფერი იქნება ზომიერად. თუ დააკვირდებით თამაშებს, განსაკუთრებით ხმაურიან თამაშებს, ბავშვები მოდიან მოტორული ტიკებით, აღგზნებულები, გამოუძინებლები. მესმის, მშობელიც ვეღარ აკონტროლებს. დედა-მამა გადის, ბებია-ბაბუაც მუშაობს. ჩვენ დროს მეტ-ნაკლებად ბებია-ბაბუები დაკავებულები იყვნენ შვილიშვილების აღზრდით. ეს კომუნიკაცია უკვე მოიშალა. მშობლები მაქსიმალურად ცდილობენ, რომ ბავშვს მისცენ მაღალი განათლება. ეს ძირითადად ამისთვის კეთდება. ყველა მშობელს უნდა, რომ თავისი შვილისთვის მაქსიმალური გააკეთოს.“
„მინახავს, ონლაინ ჩართვის დროს ბავშვი ზის ვითომ სკოლაში, ამავე დროს მეორე გაჯეტი უჭირავს და იქ თამაშით არის დაკავებული. ძალიან დიდ პროცენტში ეს არის კატასტროფა. ვერც მასწავლებელი ვერ გააკონტროლებს. ჩვენი თაობის მასწავლებლები ყველა ბავშვს ერთნაირად გამოიკითხავდნენ ხოლმე კლასში. რომ დაიწყებდნენ, ორ დღეში მაინც ყველა ბავშვს გამოიკითხავდნენ. კონკრეტულ შემთხვევაში შეიძლება 2-3 ბავშვთან ხდებოდეს კომუნიკაცია. ზოგს საერთოდ არ აინტერესებს. მასწავლებელი ცდილობს, რომ მარტივად ამოწუროს ის 45 წუთი. არიან მასწავლებლები, რომლებიც ყველა ბავშვს ერთნაირად აქტიურად რთავენ და ეს მისასალმებელია. ონლაინ დამოკიდებულების გამო ძირითადი დატვირთვა გადავიდა სკოლებზე. თუ მასწავლებელი კეთილსინდისიერად მიუდგება, ეს მისასალმებელია. შეიძლება გარკვეული პროცენტი გამოვიდეს სუპერ განათლებული, მაგრამ ამ თაობას ჩვენ დავკარგავთ, კიდევ ერთხელ ვიმეორებ, თუ ყველა ერთად არ ჩავერიეთ,“ - აღნიშნულ საკითხზე თემურ მიქელაძემ რადიო „ფორტუნას“ ეთერში ისაუბრა.
