Baby Bag

რა ასაკიდან შეიძლება, გავუკეთოთ ბავშვს საყოველთაო გრიპის აცრა და წელიწადში რამდენჯერ გაციება არის ნორმა - ინტერვიუ პედიატრ თემურ მიქელაძესთან

რა ასაკიდან შეიძლება, გავუკეთოთ ბავშვს საყოველთაო გრიპის აცრა და წელიწადში რამდენჯერ გაციება არის ნორმა - ინტერვიუ პედიატრ თემურ მიქელაძესთან
ჯანმრთელობა

რა ასაკიდან შეიძლება, გავუკეთოთ ბავშვს საყოველთაო გრიპის აცრა, წელიწადში რამდენჯერ გაციება არის ნორმა და შეესაბამება თუ არა სიმართლეს მოსაზრება, რომ აცრა იწვევს აუტიზმს - ამ და სხვა აქტუალურ საკითხებზე ​MomsEdu.ge​-ს ცნობილი პედიატრი თემურ მიქელაძე  ესაუბრა.

- ბატონო თემურ, ვაქცინაციასთან დაკავშირებით საზოგადოების გარკვეულ ნაწილში კვლავ არსებობს მცდარი შეხედულება - აცრა იწვევს აუტიზმს და ა.შ.  რას ეტყოდით მშობლებს, რომლებიც არ ცრიან შვილებს?

- პირველ რიგში გეტყვით, რომ აცრა არ იწვევს აუტიზმს. ჩემი პირადი კონტროლის ქვეშ, 22 წლის განმავლობაში, გაკეთებულა დაახლოებით რამდენიმე ასეული ათასი დოზა ვაქცინებისა და არ დაფიქსირებულა არცერთი შემთხვევა, რომ ვაქცინას გამოეწვია აუტიზმი. მათ შორის, აუტიზმის მქონე ბავშვებიც ჩვეულებრივად იცრებიან. მქონია აუტიზმის მქონე ბავშვების შემთხვევებიც, რომლებიც საერთოდ არ არიან აცრილები.
 
მშობლებს ვეტყვი, რომ წითელას, დიფტერიის, ყივანახველის, ტეტანუსის და სხვა ინფექციების თავიდან ასაცილებლად აუცილებელია გეგმიური და დროული ვაქცინაცია. სახელმწიფოს შემოაქვს მაღალი ხარისხის ევროპული წარმოების ვაქცინები და მე პირადად, ვცრი ჩემს შვილებსაც. ჩვენ გვაქვს ერთ-ერთი ყველაზე სრულყოფილი გეგმიური ვაქცინაციის ეროვნული კალენდარი.

- საყოველთაო გრიპის აცრა რა ასაკიდან შეიძლება, გავუკეთოთ ბავშვს?

- გრიპის აცრა ბავშვს შეიძლება, ჩავუტაროთ 6 თვის ასაკიდან. გარდა ამისა, აცრა სასურველია, ჩაუტარდეს რისკ-ჯგუფის მქონე პაციენტებს. ესენია - 5 წლამდე ასაკის ხშირად მოავადე და სკოლამდელ დაწესებულებაში მყოფი ბავშვები, 65 წელს გადაცილებული ასაკის მქონე პირები, ორსულები, სამედიცინო პერსონალი, სხვადასხვა ქრონიკული პათოლოგიის მქონე პირები. 

გრიპის ვირუსს გააჩნია ანტიგენური სტრუქტურის სწრაფი ცვლილება ამიტომ ყოველ წელს კეთდება ახალი ანტიგენური სტრუქტურის ვაქცინები. აუცრელ პაციენტებს გრიპის ვირუსის დროს უმეტეს შემთხვევაში უტარდებათ სიმპტომური მკურნალობა. ზოგჯერ ჩვენ ვიყენებთ ანტივირუსულ პრეპარატებსაც.

- რას ურჩევდით მშობელს, რომლის შვილიც ბაღში დადის და ხშირად ავადობს, ვირუსების დროს ატაროს თუ არა ბავშვი ბაღში და წელიწადში რამდენჯერ გაციება არის ნორმა?

- აუცილებელია, განვმარტოთ რას ნიშნავს ხშირად ავადობა; 6 წლამდე ჯანმრთელმა ბავშვებმა წლის განმავლობაში შეიძლება, სხვადასხვა ვირუსული ინფექციებით იავადონ 6-10-მდე და ეს ნორმაა. ასაკის მატებასთან ერთად სიხშირე მცირდება და მოზრდილი ავადდება წლის განმავლობაში 2-3-ჯერ. ვირუსული ინფექციის მქონე ბავშვმა გამოჯანმრთელებამდე არ უნდა იაროს ბაღში. აქვე აღვნიშნავ, რომ მშობლებმა ბავშვებს თვითნებურად არ უნდა უმკურნალონ. განსაკუთრებით, თუ ეს ეხება სხვადასხვა ბაქტერიულ და მძიმე ინფექციებს.

- როგორ გავაკაჟოთ ბავშვები ზამთარში?

- ზამთარში ცურვაზე შეიძლება ბავშვების ტარება, თუმცა აუცილებელია, დაცული იყოს ჰიგიენური ნორმები. მე პირადად, ჰიპერრეაქტიული ბრონქების მქონე პაციენტებს ციგურაობაზე ვურჩევ ხოლმე სიარულს.

ესაუბრა თამარ კიკალიშვილი 
ჯანმრთელობა #ბავშვი #გრიპი #გაციება

შეიძლება დაინტერესდეთ

ჯანმრთელობა

ყველაფერი, რაც მშობლებმა უნდა იცოდნენ, თუ ბავშვის ცურვაზე შეყვანას გეგმავენ - ინტერვიუ ცურვის ინსტრუქტორთან

ყველაფერი, რაც მშობლებმა უნდა იცოდნენ, თუ ბავშვის ცურვაზე შეყვანას გეგმავენ - ინტერვიუ ცურვის ინსტრუქტორთან
როგორ უნდა დაძლიოს ბავშვმა წყლის შიში, რა წესები უნდა დავიცვათ ზამთარში ცურვისას გაციების ასარიდებლად, ყველასთვის სასარგებლოა ცურვა, თუ არსებობენ გამონაკლისებიც - ამ და სხვა აქტუალურ თემებზე Moms.ge-ს ვაკის საცურაო აუზის ცურვის ინსტრუქტორი ირაკლი გოშაძე ესაუბრა.

- რომელი ასაკიდან არის რეკომენდებული ბავშვის ცურვაზე შეყვანა?

- ცურვა კარდიოდატვირთვების ლიდერია და ამ მხრივ ვერც ერთი სპორტი ვერ შეედრება. მშობელს ნებისმიერი ასაკიდან შეუძლია შვილის ცურვაზე შეყვანა. მოგეხსენებათ, ბავშვი მუცლადყოფნის პერიოდშივე წყალშია და მან ფიზიოლოგიურად იცის ცურვა, ასე ვთქვათ, თანდაყოლილად აქვს ეს ნიჭი. გარკვეული პერიოდის შემდეგ კი ფიზიოლოგიური ცურვა სპორტულ ცურვაში გადადის და ბავშვები იწყებენ ტექნიკის შესწავლას. როცა ბავშვს შეუძლია დავალებებზე ადეკვატურად მოახდინოს რეაგირება (3-4 წლის ასაკში), შესაძლებელია მათთვის ცურვის შესწავლა.

- თუ ბავშვს წყლის შიში აქვს, როგორ ეხმარებით მის გადალახვაში?

- თუ ბავშვს წყალთან ურთიერთობა არ ჰქონია და რაიმე ფსიქოლოგიური ტრავმა არ აკავშირებს მასთან, წყლის შიში არ აქვს. ბავშვს შიში უჩნდება მოგვიანებით, როდესაც ის აანალიზებს, რა შეიძლება მოჰყვეს წყალთან ურთიერთობას. როდესაც 3 წლის ბავშვი მოდის ცურვაზე, მასთან ერთად წყალში მასწავლებელიცაა. მასწავლებელს ხელით უჭირავს ბავშვი, ესაუბრება და აძლევს მითითებებს. ეს იმდენად ბუნებრივი პროცესია, რომ შიშის ფაქტორი, თავისთავად გამორიცხულია. დამხმარე საშუალებები დიდ როლს თამაშობს: ჰაერის მუსკულები, დაფები, ჩხირები, ჟილეტები. შიშის ფაქტორის მაქსიმალური გაქარწყლებისთვის ვიყენებთ თამაშების პრინციპს, ვინაიდან ამ დროს ბავშვი მთელი ყურადღებით არის ჩართული და არ ეძლევა საშუალება, დაფიქრდეს, „ვაი, რა მომივა წყალში, მარტო რომ ვიყო“. ტექნიკის შესწავლით ხდება ადამიანი თავდაჯერებული, რაც ნიშნავს იმას, რომ აღარ ეშინია.

- ცურვა ყველა ბავშვისთვის სასარგებლოა, თუ არსებობს გამონაკლისები?

- არ არსებობს ადამიანი, რომელზეც შეიძლება ცურვამ უარყოფითი ზეგავლენა მოახდინოს, თუმცა აუზის წყალი სპეციალური წამლებით მუშავდება და სწორედ ამ წამლების მიმართ შეიძლება, ზოგიერთი ბავშვი იყო ალერგიული. მათთვის ხელშემწყობი ფაქტორებია საჭირო. 

- რა ინვენტარი უნდა იქონიოს მშობელმა ბავშვის ცურვაზე მიყვანისას?

- არსებობს წყლის წესები, რასაც გვერდს ვერ ავუვლით. ცურვის შესწავლისას აუცილებელია შემდეგი ინვენტარის ქონა: საცურაო კოსტიუმი, წყლის სათვალე, რეზინის ქუდი. დანარჩენი სავალდებულო ნივთებში არ შედის, მაგრამ სასურველია, იქონიონ საკუთარი ჩუსტები და პირსახოცი.

- წყლის ოპტიმალური ტემპერატურა პატარებისთვის...

- პატარები, ძირითადად, დახურულ აუზში შეისწავლიან ცურვას და მისი ოპტიმალური ტემპერატურაა 30 გრადუსი. გააჩნია ჰაერის ტემპერატურასა და ბავშვის დატვირთვასაც. ასაკის მიხედვით მათ განსხვავებული შრომა და მუშაობა უწევთ. 30 გრადუსი არის ნორმა (+2 გრადუსი). შეიძლება 3 წლის ბავშვს ცოტა ცივი მოეჩვენოს წყალი, თუმცა მოგეხსენებათ, ყველა ასაკის ბავშვისთვის ცალკე ტემპერატურის შექმნა შეუძლებელია.

- კვირაში რამდენჯერ და რამდენი საათია რეკომენდებული ცურვა ბავშვებში?

- მინიმალური მაჩვენებელი გულისხმობს კვირაში 3-ჯერ ვარჯიშს 45 წთ-იდან 1 სთ-მდე. ეს არის შესწავლის პერიოდში რეკომენდებული ინტერვალი. როდესაც ბავშვი სწავლობს და ითვისებს რაღაცას, არ შეიძლება ატაროთ კვირაში ერთხელ. ამას არსებითი მნიშვნელობა აქვს. ბავშვი არის ცოცხალი ორგანიზმი, მას აქვს მეხსიერება, მაგრამ ის არ არის ხანგრძლივი. იგი დამოკიდებულია ინსტიქტზე, განსკუთრებით, როცა საქმე ცურვას ეხება. დიდი ინტერვალი იწვევს ათვისების შეფერხებას, ასე ვთქვათ, ადგილზე გაჩერებას.

- საშუალოდ რა დროა საჭირო იმისთვის, რომ ბავშვმა დამოუკიდებლად ცურვა ისწავლოს?

- ეს დამოკიდებულია როგორც ასაკზე, ასევე თუ რამდენად ყურადღებიანია ბავშვი. საკმაოდ ინდივიდუალური საკითხია. ცურვის შესწავლა მთლიანად ადამიანზეა დამოკიდებული და ასევე იმაზე, თუ რა სიხშირით დადის ვარჯიშზე. ბავშვებში ყველაფერი მარტივადაა. ისინი სუფთა ფურცლები არიან, როგორც დაწერ, ისე ისწავლიან. მინიმუმ სამი თვე აუცილებლად სჭირდება ბავშვს, რომ აითვისოს ცურვის 4 სტილი და მოერგოს წყალს. სამი თვის შემდეგ კი იწყება უფრო კონკრეტული მუშაობა. 

- და ბოლოს, რა წესები უნდა დავიცვათ ზამთარში ცურვისას, რომ თავიდან ავიცილოთ გაციება?

- მე წლების განმავლობაში ვიყავი დაკავებული წყალბურთით. ბევრი თანაგუნდელი გამოეთიშა ასპარეზობას ჯანმრთელობასთან დაკავშირებული პრობლემების გამო. სამწუხაროდ, მწვრთნელები ამაზე არ საუბრობენ. ძალიან მნიშვნელოვანია, რომ გამოიცვალოთ ის კოსტიუმი, რომლითაც იცურავეთ, არავითარ შემთხვევაში არ შეიძლება მისი ტანზე დატოვება და შეშრობა. ცხელი წყლით უნდა ჩამოიბანოს აუზის წყალი, გაიშროს ტანი და თავი. აუცილებელი ინვენტარია ქუდი. სველი თმით არ უნდა დატოვოთ აუზი.

ესაუბრა თამუნა კიკალიშვილი
წაიკითხეთ სრულად
გასათიშად დააჭირეთ ESC.