„გაზაფხულის მოსვლასთან ერთად გრიპის ვირუსი და მათ შორის კორონა ვირუსიც ნელ-ნელა გადაივლის'' - თემურ მიქელაძე

კორონავირუსის გავრცელების ფონზე ამერიკის შეერთებული შტატების მთავარი ქირურგი მოსახლეობას მიმართავს და საზოგადოებას ურჩევს, რომ სამედიცინო ნიღბების შეძენა შეწყვიტოს.

ექიმმა ჯერომ ადამსმა სოციალურ ქსელში პოსტი გამოაქვეყნა, სადაც ხალხს დამშვიდებისკენ მოუწოდა:

„ადამიანებო, სრული სერიოზულობით გეუბნებით, შეწყვიტეთ ნიღბების შეძენა! მათ არ აქვთ საზოგადოების კორონავირუსისგან დაცვის უნარი. მარაგის ნაკლებობის გამო ექიმები ნიღბებს ინფიცირებულ პაციენტებს თუ ვერ მიაწვდიან, ეს მოსახლეობას და მედიკოსებს უდიდესი რისკის წინაშე დააყენებს. ხელების რეგულარული დაბანა, შეუძლოდ ყოფნის დროს სახლში დარჩენა და სხვა ყოველდღიური პრევენციული ღონისძიებების გატარება თქვენ ნიღბებზე უკეთ დაგიცავთ,“ - წერს ჯერომ ადამსი.

ამერიკის მთავარი ქირურგი მოსახლეობას გრიპის ვაქცინის გაკეთებისკენ მოუწოდებს, რადგან, მისი თქმით, გრიპით ინფიცირებულთა რიცხვის შემცირება კორონავირუსის დამარცხების შესაძლებლობებს მნიშვნელოვნად ზრდის. ჯერომ ადამსის პოსტი ამერიკის შეერთებულ შტატებში სამედიცინო ნიღბების შეძენის ერთგვარ ბუმს უკავშირდება. კორონავირუსის გავრცელების პარალელურად, ადამიანებმა პირბადეების შეძენა დაიწყეს. ისინი თვლიდნენ, რომ ამ გზით ვირუსისგან თავის დაცვას შეძლებდნენ. დაავადებათა კონტროლისა და პრევენციის ცენტრები მოსახლეობას ყოველდღიურად აფრთხილებდნენ, რომ ნიღაბი ადამიანს ვირუსისგან ვერ დაიცავს. იგივე განაცხადა ამერიკის შეერთებული შტატების ვიცე-პრეზიდენტმა მაიკ პენსმაც. მიუხედავად ამისა, მოსახლეობა პირბადეების შეძენას აქტიურად განაგრძობს.

ჯერომ ადამსის თქმით, ნიღბების მარაგის ამოწურვის საფრთხე დიდია. თუ პირბადეების რაოდენობა ამოიწურება, სამედიცინო პერსონალი მათ შეძენას ვეღარ შეძლებს, რის გამოც მათი სიცოცხლე და ჯანმრთელობა უდიდესი რისკის წინაშე დადგება. მედიცინის დოქტორმა უილიამ შეფნერმა CNN-თან ინტერვიუში აღნიშნა, რომ ნიღბების შეძენისკენ მიდრეკილება ფსიქოლოგიური მოვლენაა: „კორონავირუსი გვიახლოვდება, ჩვენ კი თავს დაუცველად ვგრძნობთ. ნიღბის ტარება იმედს გვისახავს და ფოკუსის გადატანაში გვეხმარება,“ - განაცხადა უილიამ შეფნერმა.

ამერიკის შეერთებულ შტატებში სამედიცინო ნიღბების დეფიციტია. ადამიანებს მათი შეძენა უჭირთ. დაავადებათა კონტროლისა და პრევენციის ცენტრები მოსახლეობას რესპირატორული ვირუსების პრევენციის მიზნით შემდეგი ღონისძიებების გატარებისკენ მოუწოდებენ:

• მოერიდეთ დაავადებულ ადამიანებთან კონტაქტს;
• არ შეეხოთ ხელით თვალებს, ცხვირსა და პირს;
• დარჩით სახლში, როდესაც თავს შეუძლოდ გრძნობთ;
• დახველების ან დაცემინების დროს სახეზე ხელსახოცი აიფარეთ, შემდეგ კი აღნიშნული ხელსახოცი ნაგვის ურნაში ჩაააგდეთ;
• რეგულარულად გაასუფთავეთ იმ საგნების ზედაპირი, რომლებსაც ხშირად ეხებით;
• ​ხელები საპნითა და თბილი წყლით ხშირად დაიბანეთ. ამისთვის სულ ცოტა 20 წამი მაინც დაგჭირდებათ. ხელების დაბანა აუცილებელია საჭირო ოთახით სარგებლობის შემდეგ, ჭამამდე, დახველების ან დაცემინების შემდეგ;
• საპონი და თბილი წყალი თუ არ გაქვთ, ისეთი ხელის გამწმენდი სადეზინფექციო საშუალებები გამოიყენეთ, რომლებსაც 60%-ზე მაღალი ალკოჰოლის შემცველობა აქვთ. თუ ხელი შესამჩნევად დასვრილი ან გაჭუჭყიანებულია, აუცილებლად დაიბანეთ.
  ​

მომზადებულია ​cnn.com-ის მიხევდით

თარგმნა ია ნაროიშვილმა​​

არ დაგავიწყდეთ !!!

Momsedu.ge-მ თქვენთვის, ქალებისთვის შექმნა ახალი სივრცე, სადაც ყველაზე მცოდნე დედები იყრიან თავს. ჯგუფის დასახელებაც სწორედ ასეა - „მცოდნე დედების ჯგუფი“, რომლის საშუალებით დედები ერთმანეთს საკუთარ გამოცდილებას გაუზიარებენ. (ჯგუფში გასაწევრიანებლად ნახეთ ბმული - „მცოდნე დედების ჯგუფი“)