,,ძროხის რძის მიღება ერთ წლამდე ასაკის ბავშვებში რკინადეფიციტური ანემიის განვითარების ერთ-ერთ რისკს წარმოადგენს“

რა ფსიქოლოგიურ მომენტებთან არის დაკავშირებული ახალბედა დედისთვის ძუძუთი კვების პროცესი და რა არის, ამ მხრივ, ძირითადი პრობლემები - აღნიშნული საკითხის შესახებ  მსახიობებმა, თინათინ წულაძემ და ანკა ვასაძემ გადაცემაში ,,იმედის დღე" ისაუბრეს და საზოგადოებას საკუთარი გამოცდილება გაუზიარეს. 

,,ჩემი აზრით, ინფორმაციის ნაკლებობა არის პრობლემა. ძალიან ნორმალურია, რომ ახალშობილი ტირის სხვადასხვა მიზეზის გამო. პირველ შვილზე ძალიან ბევრი რძე მქონდა, მეორეზე მქონდა პრობლემები, მაგრამ მაინც ძუძუთი ვკვებავდი. ძუძუთი კვების დროს დედა არ უნდა იყოს მკაცრ დიეტაზე. მეტსაც გეტყვით, როგორც კი სწორ კვებაზე გადავედი, რძე შემიმცირდა. ის უნდა მიირთვა, რაც გსიამოვნებს. რა თქმა უნდა, მავნე საკვებს არ ვგულისხმობ. დედა უნდა განეწყოს ფსიქოლოგიურად. მე მესმის, რომ არის ქალების კატეგორია, რომელსაც არ შეუძლია, ძუძუთი კვების პროცესი ცუდად ხდის და მათიც მესმის", - აღნიშნავს ანკა ვასაძე.

,,ძუძუთი კვება შედარებით ადრე დავამთავრე, რადგან, სამწუხაროდ, თუნდაც ინფორმაციის ნაკლებობის გამო, რაღაცები ამერია და რძე თავისით გაქრა. მაგრამ მე მგონია, ამის მთავარი მიზეზი იყო, რომ ძალიან ვნერვიულობდი, განვიცდიდი. მე თუ მკითხავთ, ეს არის პირველი მტერი, რადგან ძალიან დიდი მნიშვნელობა აქვს, როგორ განწყობაზე ხარ - უნდა იყო დასვენებული, გამოძინებული, რაც ძალიან რთულია. წვეთებს ვითვლიდი, განვიცდიდი, ბავშვიც ცუდ ხასიათზე იყო და ამან ხელი შემიშალა. პირველი. რაც ალბათ დედამ უნდა შეამოწმოს, არის ის, თუ რამდენად სწორი მოჭიდება აქვს ბავშვს. ამას შემდეგ ძალიან ბევრი გართულება მოჰყვება და პირველივე წამიდან უნდა გაკონტროლდეს, რადგან ბავშვი ეჩვევა და გასწორება უფრო რთულია. ჩემს შემთხვევაში, ამან შემდგომ ბევრი პრობლემა გამოიწვია", - ამბობს თინათინ წულაძე.

,,ძუძუთი კვება ამცირებს დედისთვის ძუძუს კიბოს განვითარების რისკს, ასევე, ბევრ სხვა, ჯანმრთელობისთვის საშიშ დაავადებას. ეს იმდენად დიდი სიკეთეა, რომ მალამოსავით ედება მთელს ორგანიზმს და აფერხებს ჯანმრთელობის პრობლემების განვითარებას". 

წყარო: ,,​იმედის დღე"