Baby Bag

სასარგებლოა თუ არა საკვები რაციონიდან გლუტენის ამოღება წონის კორექციის მიზნით?

სასარგებლოა თუ არა საკვები რაციონიდან გლუტენის ამოღება წონის კორექციის მიზნით?

დღეს სამშაბათია და მედიაპორტალი MomsEdu.ge ტრადიციულ რუბრიკას - ენდოკრინოლოგის რეკომენდაციებს წარმოგიდგენთ. ამჯერად ენდოკრინოლოგ-ნუტრიციოლოგი თინათინ კაჭარავა მოგაწვდით კომპეტენტურ ინფორმაციას, რა არის გლუტენი, რას ნიშნავს გლუტენის აუტანლობა, სასარგებლოა თუ არა საკვები რაციონიდან გლუტენის ამოღება წონის კორექციის მიზნით?

გლუტენი არის პროტეინი (ცილა), რომელიც გვხვდება მარცვლეულში: ხორბალში, ქერსა და ჭვავში. თუ ადამიანს გააჩნია გლუტენის აუტანლობა, ასეთ დროს გლუტენმა შესაძლებელია, გამოიწვიოს ჯანმრთელობის სერიოზული პრობლემები. მიუხედავად იმისა, რომ სხვა მარცვლეული, როგორიცაა: სიმინდი, ბრინჯი და ქინოა, ასევე შეიცავენ გლუტენს, ისინი ნაკლებად ქმნიან იმავე პრობლემებს, რასაც იწვევს ხორბალი, ქერი და ჭვავი. იმის გამო, რომ ხორბალი, ჭვავი, ქერი და მათგან დამზადებული პროდუქტები ჩვენს რაციონში ხშირია, მათი საკვები რაციონიდან ამოღება იწვევს ბოჭკოს, ვიტამინებისა და სხვა საკვები ნივთიერებების მიღების შემცირებას. ამიტომ მნიშვნელოვანია ვიცოდეთ, როგორ უნდა ავარჩიოთ საკვები ორგანიზმის საერთო კვების მოთხოვნილებების შესაბამისად. 
ნებისმიერი კვების ტიპის დროს აუცილებელია, შევინარჩუნოთ დაბალანსებული კვების რაციონი. გლუტენისგან თავისუფალი რაციონი აუცილებელია ცელიაკიის ნიშნებისა და სიმპტომების დროს და ასევე გლუტენთან დაკავშირებული სხვა სამედიცინო მდგომარეობების მართვისას. გლუტენის აუტანლობით ხასიათდება შემდეგი პროცესები: ცელიაკია - არის აუტოიმუნური დაავადება, როდესაც გლუტენი იწვევს იმუნური სისტემის აქტივობას, ზიანდება წვრილი ნაწლავი, დროთა განმავლობაში ეს დაზიანება აფერხებს საკვები ნივთიერებების შეწოვას ორგანიზმში. გლუტენის მიმართ მომატებული მგრძნობელობა, რომელიც იწვევს ცელიაკიის მსგავს ზოგიერთ ნიშნებსა და სიმპტომებს - მათ შორის მუცლის ტკივილს, მუცლის შებერილობას, დიარეას, ყაბზობას, გამონაყარს, თავის ტკივილს - მიუხედავად იმისა, რომ ამ დროს წვრილი ნაწლავის ქსოვილები არ არის დაზიანებული, გამოკვლევებმა აჩვენა, რომ აქაც იმუნური სისტემა თამაშობს გარკვეულ როლს, ეს პროცესი ამ ეტაპზე ბოლომდე შესწავლილი არ არის. ასევე არსებობს ხორბლის ალერგია, ისევე როგორც სხვა კვებითი ალერგიები, რამაც შეიძლება გამოიწვიოს შეშუპება, სუნთქვის გაძნელება და ალერგიისთვის დამახასიათებელი სხვა სიმპტომები.
გლუტენისგან თავისუფალი დიეტა პოპულარული გახდა იმ ადამიანებში, ვისაც გლუტენთან დაკავშირებული სამედიცინო მდგომარეობა არ აქვთ დიაგნოსტირებული. ამის სავარაუდო მიზეზია, რომ გლუტენისგან თავისუფალი კვების სარგებელი არის ჯანმრთელობის ზოგადი მდგომარეობის გაუმჯობესება, წონის კლება, თუმცა ამ კუთხით საჭიროა დამატებითი ღრმა კვლევები.
ადამიანებს უჩნდებათ მცდარი მოლოდინები საკვები რაციონიდან გლუტენის ამოღებასა და წონის კორექციას შორის. ხშირ შემთხვევებში ის პროდუქტები, რომლებიც არ შეიცავენ გლუტენს, ბევრად მაღალი კალორაჟის შემცველნი არიან, ვიდრე გლუტენიანი პროდუქტები. წონის კორექცია ვერ მოხდება საკვები რაციონიდან მხოლოდ გლუტენიანი საკვების ამოღებით. წონის კორექციისთის მნიშვნელოვანია დაბალანსებული, მრავალფეროვანი საკვებისგან შემდგარი რაციონი. თუ თქვენ გაწუხებთ გლუტენის აუტანლობასთან ასოცირებული სიმპტომები შესაძლებელია მისი საკვები რაციონიდან დროებით ამოღება და სიმპტომებზე დაკვირვება, ასევე გლუტენის აუტანლობის დიაგნოსტირება სპეციალური ლაბორატორიული ანალიზით. ყველა სხვა შემთხვევაში გლუტენის გამორიცხვა საკვები რაციონიდან არ არის აუცილებელი.
გისურვებთ ჯანმრთელობას!

ენდოკრინოლოგ-ნუტრიციოლოგი თინათინ კაჭარავა

შეიძლება დაინტერესდეთ

რას გულისხმობს ცილოვანი დიეტა და რამდენად უსაფრთხოა მისი დაცვა?

რას გულისხმობს ცილოვანი დიეტა და რამდენად უსაფრთხოა მისი დაცვა?

მედიაპორტალი MomsEdu.ge ტრადიციულ რუბრიკას - ენდოკრინოლოგის რეკომენდაციებს წარმოგიდგენთ. ჯანსაღი ცხოვრების წესი, სხვადასხვა ტიპის დიეტები, წონაში კლება მუდმივად ინტერესის სფეროა ჩვენი მკითხველისთვის. ამჯერად ენდოკრინოლოგ-ნუტრიციოლოგი თინათინ კაჭარავა მოგაწვდით კომპეტენტურ ინფორმაციას ე.წ ცილოვან დიეტაზე.

პირველ რიგში, განვიხილოთ რომელი პროდუქტებია ცილით მდიდარი. ცილით მდიდარია ცხოველური საკვები: ხორცი, კვერცხი, რძის ნაწარმი, თეზვეული და სხვა ზღვის პროდუქტები. ხილში და ბოსტნეულში ცილები მცირე ოდენობით მოიპოვება.

ცილოვანი დიეტის დროს ადამიანის დღის რაციონი შეადგება მხოლოდ ცხოველური ცილებისგან. ამ პერიოდში არ ხდება ხილის და ბოსტნეულის მიღება. ძალიან დიდი შეცდომაა, როდესაც ცილოვან დიეტას მიმართავენ თვითნებურად, თან ხანგრძლივად, რადგან ასეთ დროს შესაძლებელია, ორგანიზმს დიდი ზიანი მივაყენოთ. 

ცილოვან დიეტას შეიძლება თან ახლდეს გვერდითი მოვლენები: შეკრულობა (რადგან ამ დროს პაციენტი არ იღებს ხილს და ბოსტნეულს და ფერხდება ნაწლავთა პერისტალტიკა), იზრდება გულსისხლძარღვთა დაავადებების განვითარების რისკი, დიდი დატვირთვით უწევთ მუშაობა თირკმლებს და ღვიძლს, რამაც შეიძლება მათი დაზიანება გამოიწვიოს. ამიტომ თუ ვსაუბრობთ პრაქტიკულად ჯანმრთელ მოსახლეობაზე, ნუტრიციოლოგ-დიეტოლოგის რეკომენდაციით, წონის კორექციის მსურველ პაციენტებთან ცილოვანი დიეტის დანიშვნა ხდება მაქსიმუმ 7-9 დღით და წელიწადში მაქსიმუმ 2-3 ჯერ. 

ძალიან დიდი მნიშვნელობა აქვს ცილოვანი დიეტის დროს მიღებული წყლის რაოდენობას ისევე, როგორც ნებისმიერ სხვა დროს. ცილოვანი კვების დადებით მხარეებსაც უნდა გავუსვათ ხაზი, ამ დროს ადამიანი არ განიცდის შიმშილის გრძნობას, რადგან ცილების ხარჯზე მუდმივად დანაყრებულია, წონაში ეფექტურად იკლებს, არის შემთხვევები როდესაც სასწორზე წონა არ იძვრის, მაგრამ სწრაფად და საგრძნობლად იცვლება სხეულის გარშემოწერილობები. მიუხედავად ამ დადებითი გავლენისა წონის კორექციაზე, თვითნებურმა ცილოვანმა კვების რეჟიმმა შესაძლოა, ორგანიზმს ზიანი მიაყენოს.

გისურვებთ ჯანმრთელობას!

წაიკითხეთ სრულად