Baby Bag

არასდროს დატოვოთ ბავშვები ჩახუტების გარეშე, ძილის წინ მათთვის დრო აუცილებლად გამონახეთ

არასდროს დატოვოთ ბავშვები ჩახუტების გარეშე, ძილის წინ მათთვის დრო აუცილებლად გამონახეთ
ბავშვი ღამით მასთან ერთად დაწოლას ან ჩახუტებას თუ გთხოვთ, ექსპერტების მოსაზრებები დაივიწყეთ და მისი თხოვნა შეასრულეთ. პატარები ძილის წინ ხშირად ჭირვეულობენ. ისინი მშობლებს კიდევ ერთი ზღაპრის წაკითხვას, ჩახუტებას და მათთან ერთად დაძინებას სთხოვენ. როგორც წესი, უფროსები ბავშვების დროულად და სწრაფად დაძინებას ცდილობენ, რათა ყოველდღიურ საქმიანობას დროულად მორჩნენ. ისინი თვლიან, რომ ბავშვების ახირებების შესრულება მათ ძალიან ბევრ დროს წაართმევს. ზოგიერთი მშობელი კი მიიჩნევს, რომ ღამით ბავშვებთან ერთად წამოწოლა ძალიან ცუდი ჩვევაა. მიუხედავად ამისა, მშობლების ნაწილი ცდილობს ბავშვებს თხოვნა შეუსრულოს, რადგან თვლის, რომ ამ საოცარ წუთებს ცხოვრებაში ვეღარასდროს დაიბრუნებს.

მშობლები, რომლებიც ღამით ბავშვებთან ერთად წამოწოლას და მათი თხოვნის შესრულებას თავს არ არიდებენ, სწორად იქცევიან. უფროსებს ყოველთვის რაღაც საქმე გვაქვს გასაკეთებელი. ჩვენ ვერასდროს ვიცლით ბავშვებისთვის ისე, როგორც ეს მათ სჭირდებათ, ვცდილობთ, დრო ისე გადავანაწილოთ, რომ ყველაფერი მოვასწროთ, რაც გასაკეთებელი გვაქვს, რის გამოც ჩვენი შვილების წინაშე თავს ხშირად დამნაშავედ ვგრძნობთ.


ჯგუფში გასაწევრიანებლად ნახეთ ბმული - „მცოდნე დედების ჯ​გუფი“


ერთ-ერთი მშობელი იხსენებს, რომ ის ყოველთვის ცდილობდა ბავშვების დროულად დაძინებას, უარს ამბობდა მათთან წამოწოლაზე, რადგან მნიშვნელოვანი საქმეები ჰქონდა გასაკეთებელი. ერთ ღამეს ის შვილების საძინებელში შეიპარა, როდესაც ბავშვებს ეძინათ. მისმა უმცროსმა ქალიშვილმა დედის ოთახში ყოფნა იგრძნო და მაშინვე გამოიღვიძა. ის დედას ჩახუტებას სთხოვდა. დედამ მისი თხოვნა შეასრულა. ბავშვთან ერთად წამოწვა და შვილს ჩაეხუტა. ბავშვმა მაშინვე ღრმად ჩაიძინა. დედის თქმით, ეს ერთ-ერთი ყველაზე დაუვიწყარი წუთი იყო მის ცხოვრებაში. ამის შემდეგ მან გადაწყვიტა, რომ ბავშვებთან გატარებული თითოეული წუთი ძალიან მნიშვნელოვანია. ღამის საათებში შვილებთან ერთად წამოწოლა, მათი ფიქრების, საზრუნავის და ოცნებების მოსმენა, მათი სიხარულის გაზიარება და მათ გვერდით ყოფნა ნებისმიერი დედისთვის დაუვიწყარია. ეს ის საჩუქარია, რომელსაც ყველა მშობელი უნდა გაუფრთხილდეს.

ექსპერტების მოსაზრებები დედებისთვის ყოველთვის გამოსადეგი არ არის. შვილებისთვის ძილის წინ დამატებითი დროის გამოყოფა არავის დააზიანებს. გახსოვდეთ, რომ ბავშვები ერთ დღესაც შეწყვეტენ მშობლებისთვის ჩახუტების ან მათთან ერთად დაძინების თხოვნას. შესაძლოა, ეს ხვალ არ მოხდეს, მაგრამ აუცილებლად მოვა დრო, როდესაც ისინი თქვენი ჩახუტებისა და ზღაპრების გარეშე ტკბილად დაძინებას შეძლებენ. ის, რაც დღეს სამუდამოდ გეჩვენებათ, ერთ დღეს გაქრება და თქვენ საოცარი მოგონებების შეგროვებას დაიწყებთ, მაგრამ თუ ყოველთვის ექსპერტების რჩევებს მიენდობით, აღმოაჩენთ, რომ ასეთი მოგონებები ძალიან ცოტა გაქვთ.

თეფშებისა და თეთრეულის რეცხვა მოიცდის, არც გადასახადების გადახდაა მნიშვნელოვანი. ეს ყველაფერი თქვენს ცხოვრებაში 20 წლის შემდეგაც იქნება, მაგრამ 20 წლის შემდეგ თქვენ აღარ გეყოლებათ 3 წლის შვილი, რომელსაც თქვენი მოფერება და ჩახუტება ძალიან სჭირდება.

გახსოვდეთ, თქვენი შვილები იმაზე სწრაფად იზრდებიან, ვიდრე წარმოგიდგენიათ. ასაკთან ერთად ისინი დამოუკიდებლად ძილს მიეჩვევიან. 18 წლის ასაკში შვილები ნამდვილად არ მოგთხოვენ ღამით ზღაპრის წაკითხვას ან მათთან ერთად დაძინებას. არ არსებობს მიზეზი, რის გამოც შვილს ღამით ჩახუტებაზე ან ზღაპრის მოყოლაზე უარი უნდა უთხრათ. არასდროს დატოვოთ ბავშვები ჩახუტების გარეშე. ძილის წინ მათთვის დრო აუცილებლად გამონახეთ.

თქვენ დღეში 1440 წუთი გაქვთ იმისთვის, რომ სხვადასხვა საქმით დაკავდეთ. თქვენი შვილები კი თქვენგან მხოლოდ რამდენიმე წუთს და მცირე ყურადღებას ითხოვენ.

მომზადებულია ​thesoccermomblog.com-ის მიხედვით
თარგმნა ია ნაროუშვილმა 

შეიძლება დაინტერესდეთ

„რეცეპტული ენის დარღვევას ვხვდებით მაშინ, როდესაც ბავშვს უჭირს სხვისგან მიღებული ინფორმაციის გაგება და გადამუშავება“

„რეცეპტული ენის დარღვევას ვხვდებით მაშინ, როდესაც ბავშვს უჭირს სხვისგან მიღებული ინფორმაციის გაგება და გადამუშავება“

რეცეპტული ენის დარღვევაზე MomsEdu.ge-ს ფსიქოკონსულტანტი, ენისა და მეტყველების თერაპევტი თათული ბაკურაძე ესაუბრა.

- რა არის რეცეპტული ენის დარღვევა?

- როდესაც გვესმის ენის განვითარების დარღვევა, მასში არ იგულისხმება მეტყველებასთან, კერძოდ კი არტიკულაციასთან/გამოთქმასთან დაკავშირებული სირთულეები, ეს არის კომუნიკაციური უნარების დარღვევის ერთ-ერთი გამოხატულება, რომელიც შეიძლება იყოს რეცეპტული ენის დარღევა, ექსპრესიული ენის დარღვევა ან რეცეპტული და ექსპრესიული ენის დარღვევა ერთდროულად.

ბავშვებს უჭირთ ენის მნიშვნელობის აღქმა, მათ აქვთ ენის ცოდნასთან დაკავშირებული სირთულეები. ასეთ დროს ბავშვის სმენა წესრიგშია, მას ესმის ყველანაირ სიმაღლეზე ნათქვამი სიტყვა, თუმცა მაინც არ შეუძლია აზრი გამოიტანოს ნათქვამიდან და შესაბამისად, სწორ კონტექსტში დააბრუნოს პასუხი. რეცეპტული ენის დარღვევა ეს არის მდგომარეობა, რომლის დროსაც ბავშვს უჭირს, როგორც ზეპირი საუბრის, ასევე დაწერილი ტექსტის გაგება. მათთვის სირთულეს წარმოადგენს სიტყვების მნიშვნელობების გაგება და მათი ფუნქციური დატვირთვის ცოდნა, შესაბამისად, რეცეპტული ენის დარღვევის მქონე ბავშვს ხშირ შემთხვევაში უჭირს სხვისი საუბრის შინაარსის აღქმა.

- რა ნიშნებით გამოიხატება რეცეპტული ენის დარღვევა ბავშვებში?

- რეცეპტული ენის სირთულე არის განვითარების დარღვევა და ის ადრეული ბავშვობიდანვე შეიმჩნევა. ჩამოვთვალოთ ის ნიშნები, რაც შეიძლება ახასიათებდეს რეცეპტული ენის დარღვევის მქონე ბავშვს:

  • უყურადღებობა, როდესაც მას ესაუბრებიან;
  • უჭირს ინსტრუქციების შესრულება და მიმართული საუბრის გაგება;
  • უჭირს პასუხის გაცემა შეკითხვებზე;
  • ეჭრება და აწყვეტინებს სხვებს საუბარს;
  • საჭიროებს წინადადების ან შეკითხვის რამდენჯერმე გამეორებას ან გამარტივებული ენით თქმას;
  • მისი პასუხი ყოველთვის არ შეესაბამება დასმულ შეკითხვას;
  • წინადადების შინაარსს არასწორად იგებს;
  • ვერ აღიქვამს ხუმრობით ამ გადატანითი მნიშვნელობით ნათქვამ წინადადებას.

- რა უნარებია საჭირო, რათა რეცეპტული ენის განვითარებას ხელი შევუწყოთ?

როდესაც მშობელი ატყობს რომ ბავშვს აქვს გარკვეული სირთულეები ენის აღქმასა და პროდუცირებასთან დაკავშირებით, მნიშვნელოვანი ნაბიჯები, რაც მშობელმა უნდა გადადგას არის:

  • სმენის სკრინინგი, რათა გამოირიცხოს სმენასთან დაკავშირებული სირთულეები,
  • შემდეგ მიმართოს ენისა და მეტყველების თერაპევტს, რათა შეფასდეს ბავშვის ენობრივი განვითარება. სპეციალისტი შეძლებს დიფერენცირებას ენის დარღვევის რომელ სირთულესთან გვაქვს საქმე,
  • დაიწყოს ენისა და მეტყველების თერაპიები,
  • აქტიურად ჩაერთოს პროცესში ოჯახის ყველა წევრი.

რეცეპტული ენის შეფასება და დიაგნოსტირება ყველა ასაკშია შესაძლებელი, თუმცა რაც უფრო ადრე მიმართავს მშობელი სპეციალისტს მით უკეთესია, რადგან მაქსიმალურად მოხდეს ენობრივი უნარების ათვისება და ენის განვითარების მიახლოება ბავშვის ქრონოლოგიურ ასაკთან. ამისათვის საჭიროა, როგორც ენისა და მეტყველების თერაპიების ინტენსიურად მიღება, ასევე, ოჯახის წევრების აქტიური ჩართვა პროცესში, სხვა ბავშვებთან ურთიერთობა, მრავალფეროვანი სამეტყველო გარემო, საუბრით დატვირთული როლური თამაშები, მშობლის მხრიდან ბავშვის ჩართვა თავის ყოველდღიურ აქტივობებში, ეს იქნება სახლის დალაგება თუ საჭმლის მომზადება, ილუსტრირებული წიგნების თვალიერება და მასზე საინტერესო ზღაპრების მოფიქრება, ბევრი სეირნობა და ბუნებასთან პირისპირი კავშირი. ასეთ დროს, მშობელი თავადაც ბავშვი უნდა გახდეს, რადგან მათი თამაში და ურთიერთობა მაქსიმალურად ბუნებრივი, საინტერესო და „მადისაღმძვრელი“ იყოს პატარასთვის, რათა სურვილი გაუჩნდეს მოგბაძოთ და მაქსიმალურად ბევრი ისწავლოს თქვენგან.

- რაში შეიძლება შეუშალოს ბავშვს ხელი რეცეპტული ენის დარღვევამ?

- რეცეპტული ენის დარღვევის მქონე ბავშვებს უჭირთ ადამიანებთან დაკონტაქტება ბაღის, სკოლის ან ნებისმიერ სხვა გარემოში. ამან მათში შესაძლოა გამოიწვიოს სირცხვილის გრძნობა. სირთულე აქვთ, როგორც საკუთარი აზრის ზეპირად ან წერილობით გამოხატვის დროს, ასევე, სხვისი საუბრის აღქმაში. მნიშვნელოვანია აღვნიშნოთ, რომ სირთულეები ენობრივ განვითარებაში არ უკავშირდება ინტელექტუალურ დარღვევას, მათ შესაძლოა ჰქონდეთ საკმაოდ მაღალი ინტელექტი, თუმცა ამის გამოვლენაში ხელს უშლიდეთ მათი არასაკმარისად განვითარებული ენობრივი უნარები, რის გამოც ისინი შესაძლოა იყვნენ საკმაოდ ფრუსტრირებულები და იმედგაცრუებულები. აუცილებელია გვახსოვდეს, რომ ენობრივი განვითარების დარღვევის მქონე ბავშვები, ისეთივე ჭკვიანები არიან, როგორც ისინი, ვისაც ეს სირთულე არ აღენიშნებათ.

ესაუბრა მარიამ ჩოქური

წაიკითხეთ სრულად