Baby Bag

10 ხერხი, რომელიც ახალბედა დედებს სტრესის შემსუბუქებაში დაგეხმარებათ

10 ხერხი, რომელიც ახალბედა დედებს სტრესის შემსუბუქებაში დაგეხმარებათ

დედობის პირველი დღეები ბევრი ქალისთვის დაძაბული, სტრესული და დამღლელია. არ არსებობს გზა, რომელიც უშუალოდ დაგეხმარებათ ამ დროებითი პრობლემის გადასაჭრელად, თუმცა არსებობს სხვადასხვა ეფექტური ხერხი „რთული დღეების“ გასამარტივებლად.

1. ვარჯიში

მეცნიერულად დადასტურებულია, რომ ვარჯიში ამცირებს ორგანიზმის სტრესის დონეს და მნიშვნელოვნად ამაღლებს განწყობას. მშობიარობის შემდგომი პროცესების წარმატებით გავლის შემდეგ, მნიშვნელოვანია, დაკავდეთ სპორტით და იზრუნოთ ფიზიკურ ჯანმრთელობაზე. ამისათვის საკმარისია სუფთა ჰაერზე სეირნობა, თუნდაც ბავშვთან ერთად. მაგრამ, პირველ რიგში, დარწმუნდით, რომ ნამდვილად წარმატებით გაიარეთ მშობიარობის შემდგომი პერიოდი. წინააღმდეგ შემთხვევაში, ვარჯიში ზიანის მომტანიც კი შეიძლება აღმოჩნდეს. აუცილებლად მიმართეთ ექიმს და გაითვალისწინეთ რჩევები.
2. კითხვა

დედობას მოაქვს უდიდესი პასუხისმგებლობა. ეს ფაქტორი სტრესის გამომწვევ მნიშვნელოვან მიზეზად მიიჩნევა. სწორედ ამიტომ, აუცილებელია თქვენი გონების სტიმულირება ინტელექტუალური გზით. გირჩევთ, აირჩიოთ წიგნი, რომლის მეშვეობითაც გაუმკლავდებით სტრესს და დროს სასიამოვნოდ გაატარებთ. მთავარია, არ დაკარგოთ საკუთარი თავი და იზრუნოთ სასიამოვნო გარემოს შექმნაზე.
3. შეიტანეთ ცვლილებები კვების რაციონში

აუცილებლად დაუმატეთ თქვენს რაციონს ჯანსაღი ცხიმით გაჯერებული საკვები. ეს არამარტო დაგეხმარებათ რძის მომარაგებასა და ენერგიის მიღებაში, არამედ მასში შემავალი მინერალები აგიმაღლებთ განწყობას და მოგანიჭებთ ბედნიერების შეგრძნებას.
4. რამდენიმე საათით მაინც გაატარეთ სიწყნარეში

არანაირი ბავშვის ტირილი, ტელევიზორის ხმა, ტელეფონის ზარი! უთხარით არა ყველანაირ ხმაურს და ჩაიძირეთ სიმშვიდეში. თუნდაც ერთი საათით მოიმარჯვეთ ყურსასმენები და უმზირეთ ჭერს. ამ დროს დროებით გვერდზე უნდა გადადოთ ყველანაირი ფიქრი, შეიგრძნოთ ყველა ემოცია და მიაღწიოთ სიმშვიდის მდგომარეობას. ეს ნამდვილად რთული დავალებაა, თუმცა თუ მას თავს გაართმევთ, ნამდვილად იგრძნობთ შვებას.
5. შხაპი რელაქსაციის მიზნით

სასაცილოა? ალბათ წარმოუდგენლად გეჩვენებათ შხაპის მიღება არა სისუფთავის, არამედ დასვენების მიზნით. ფიქრობთ, რომ ამის დრო და ფუფუნება დედას არ აქვს? სინამდვილეში შხაპი არის შესანიშნავი გზა დაძაბულობისა და დაღლილობის მოსახსნელად. შეიძლება ითქვას, რომ ეს მარტივი სიამოვნებაა, რომლის მისაღებადაც დრო აუცილებლად უნდა გამონახოთ.
6. ისეირნეთ მარტო

აუცილებელია, დრო მხოლოდ საკუთარ თავთან გაატაროთ. ამ დროს, რა თქმა უნდა, არ ივიწყებთ მეგობრებს, უბრალოდ ფუნდამენტურად მნიშვნელოვანია საკუთარ თავთან მარტო დარჩენა.
დედობის ადრეულ დღეებშიც კი შეეცადეთ, დატოვოთ სახლი და ჩაისუნთქოთ სუფთა ჰაერი. ეს აბსოლუტურად შეამცირებს სტრესს და გარდა ამისა, გამოდგება კარგ საბაბად მარტო დარჩენისთვის.
7. დაივიწყეთ მობილური ტელეფონი

დიახ, ეს ნამდვილად შესაძლებელია თუ ძალიან მოინდომებთ. ძალიან ხშირად ნეგატიური განწყობა სწორედ სოციალურ ქსელს მოაქვს. როდესაც ამას შეამჩნევთ, სულ მცირე, წაშალეთ აპლიკაცია და თავი დააღწიეთ უარყოფით ატმოსფეროს.
8. ძილი

შესაძლოა, ეს რჩევა აბსურდულადაც ჟღერს, თუმცა შუადღის ძილიც კი ძალიან მნიშვნელოვანია. აუცილებლად უნდა გამოძებნოთ დრო მოსვენებისა და ძალების აღდგენისთვის. თუ არჩევანის გაკეთება ძილსა და ფილმის ყურებას შორის მოგიწევთ, გირჩევთ პირველს მიანიჭოთ უპირატესობა, რადგან ძალების აღდგენა სრულყოფილი ფუნქციონირების ნამდვილი წინაპირობაა. ნუ გადადებთ სხვა დროისთვის - აუცილებლად დაიძინეთ, როდესაც სურვილი გექნებათ. ეს მნიშვნელოვანია.
9. ისაუბრეთ თქვენს გრძნობებზე

არ აქვს მნიშვნელობა, როგორ გრძნობთ თავს. მნიშვნელოვანი ისაა, რომ ისაუბროთ თქვენს გრძნობებზე და ბოლომდე გამოხატოთ ემოციები. უმჯობესია, თანამოსაუბრედ აირჩიოთ ადამიანი, რომელთანაც ემოციურად ახლოს ხართ და ბოლომდე შეძლებთ გახსნას. უნდა გაანალიზოთ, რომ თქვენ არ ხართ მარტო. იფიქრეთ მარტივად და გაიაზრეთ, რომ ყოველთვის არსებობს ადამიანი, რომელსაც უყვარხართ.
10. არ გადადოთ შეხვედრები

სტრესული გარემო, ცხოვრების დაძაბული პერიოდი ხშირად სახლში ყოფნისკენ გიბიძგებთ. მნიშვნელოვანია, რომ ამ დროს არ მიეჯაჭვოთ საკუთარ ოთახს და იცხოვროთ მაქსიმალურად სავსე ცხოვრებით. მძიმე ემოციური ფონის მიუხედავად, არ გადადოთ შეხვედრები და გაატარეთ დრო სასიამოვნოდ. იზრუნეთ საკუთარ თავზე და თქვენ დაძლევთ ყველა პრობლემას.
წყარო: ​moms.com-ის მიხედვით
ავტორი: მარიამ კვეტენაძე

შეიძლება დაინტერესდეთ

10 რამ, რაც მშობელმა ბავშვის ნაცვლად არ უნდა გააკეთოს

10 რამ, რაც მშობელმა ბავშვის ნაცვლად არ უნდა გააკეთოს

მშობლები შვილებს ხშირად იმაზე მეტად ეხმარებიან, ვიდრე საჭიროა. უფროსებმა ბავშვების ნაცვლად არ უნდა იცხოვრონ. ბავშვი უნდა გაიზარდოს და განვითარდეს, მან დამოუკიდებლობა ადრეული ასაკიდანვე უნდა მოიპოვოს. აუცილებელი არ არის, რომ თქვენს შვილებს ყველაფერში დაეხმაროთ.

1. ბავშვების ნაცვლად არ ისაუბროთ

უცხო ადამიანს, რომელიც ბავშვს სახელს ეკითხება, პასუხი მშობელმა არ უნდა დაუბრუნოს. ხშირად ხდება, რომ მსგავს კითხვებზე უფროსები პატარების ნაცვლად პასუხობენ. როგორც კი ბავშვი ლაპარაკს იწყებს, მშობელმა მის ნაცვლად საუბარი უნდა შეწყვიტოს. მშობლები ბავშვის ნაცვლად ხშირად ლაპარაკობენ. ეს ყოველდღიურად ხდება მაღაზიაში, სამეზობლოში, ქუჩაში, პარკში. საბოლოოდ ბავშვი დამოუკიდებლად საუბრის შესაძლებლობას კარგავს. თუ ბავშვი დახმარებას გთხოვთ და არ იცის რა თქვას, ამ შემთხვევაში მისი დახმარება შეგიძლიათ. თუმცა საკუთარი სურვილით ეს არ უნდა გააკეთოთ. მომავალში, როდესაც ბავშვის ნაცვლად საუბარი მოგინდებათ, თავი შეიკავეთ და ეცადეთ, გაჩუმდეთ.

2. ბავშვთან ახლო მეგობრობას ნუ გადაწყვეტთ

ბევრი მშობელი ცდილობს შვილთან იმეგობროს და მისი ყველა საიდუმლო იცოდეს. ყველას კარგად გვესმის, რომ მშობელს შვილის დაცვა უნდა და ამას მასზე ზრუნვით აკეთებს. მიუხედავად ამისა, აჯობებს ყველაფერს სიღრმისეულად შევხედოთ. მეგობარი ის არის, ვისთანაც თანასწორივით საუბარი შეგიძლია. მეგობარს არაფერს უმალავ და მასთან გულწრფელი ხარ. მშობლებს სხვა როლი აქვთ: ისინი შვილებზე ზრუნავენ. არ არის აუცილებელი, რომ მშობელი შვილის ახლო მეგობარი გახდეს. უმჯობესია, რომ ბავშვმა უახლოესი მეგობრები თანატოლებში გაიჩინოს. დედა და მამა ბავშვის გვერდით უნდა იყვნენ მაშინ, როდესაც მას მხარდაჭერა ესაჭიროება. ბავშვს აუხსენით, რომ ურთიერთობაში მეტისმეტი სიახლოვე არ გსურთ და ერთმანეთისადმი პატივისცემის გამოჩენა აუცილებელია.

3. ბავშვის საჭიროებების და მოთხოვნილებების ერთპიროვნულად განსაზღვრა არ შეიძლება

მშობლები ხშირად შვილების ნაცვლად იღებენ გადაწყვეტილებას, თუ რომელი საჭმელი უნდა მოსწონდეთ მათ. რა თქმა უნდა, ყველამ ვიცით, რომ ბროკოლი სასარგებლოა, შოკოლადი კი პატარებისთვის არ შეიძლება. მიუხედავად ამისა, დედამ შვილი არ უნდა აიძულოს, რომ მას ბროკოლი მოსწონდეს. მსგავსი დამოკიდებულება ბავშვს თრგუნავს და მას მეამბოხეობისკენ უბიძგებს. მშობელი შვილის სურვილებსა და საჭიროებებში კარგად უნდა გაერკვეს. ბავშვის „მეს“ ნუ დათრგუნავთ. თუ გსურთ, რომ თქვენს შვილს ჯანსაღი ჩვევები ჰქონდეს, მას ეს იძულებით არ უნდა გააკეთებინოთ. ბავშვთან თბილი და მოსიყვარულე უნდა იყოთ.

4. ბავშვს ყოველთვის არ უნდა დაეხმაროთ

2-3 წლის ბავშვს ტანსაცმლის დამოუკიდებლად ჩაცმა და გახდა შეუძლია. ის თეფშის გარეცხვას და დასვრილი ტანსაცმლის სპეციალურ ყუთში ჩალაგებასაც შეძლებს. ამასთან, ამ ასაკში ბავშვს სურვილი აქვს, რომ ეს ყველაფერი დამოუკიდებლად გააკეთოს. როგორ იქცევიან მშობლები? მათი ნაწილი შვილებს ჩაცმაში მანამ ეხმარება, ვიდრე „ბავშვები“ არ დაოჯახდებიან. მშობლები ხშირად ამბობენ: „ის ამას დამოუკიდებლად ვერ შეძლებს.“ მშობლები ბავშვებს თავად აჭმევენ. ისინი შვილებს დამოუკიდებლად კვების შესაძლებლობას არ აძლევენ. შემდეგ მშობლებს უკვირთ, რომ თინეიჯერობის ასაკში ბავშვი საკუთარ ოთახს არ ალაგებს და დედას სახლის დალაგებაში არასდროს ეხმარება. ბავშვს შესაძლებლობა მიეცით, რომ დამოუკიდებლად იმოქმედოს.

5. ბავშვის ნაცვლად ნუ გადაწყვეტთ, როგორი გემოვნება აქვს მას

მშობლები ცდილობენ, რომ ბავშვს თავს მოახვიონ საკუთარი გემოვნება. მათ სურთ, რომ ბავშვმა ის წიგნები წაიკითხონ, რომლებიც თავად მოსწონთ, იმ ფილმებს უყურონ, რომელსაც თავად უყურებენ და იმ მუსიკას უსმინონ, რომელსაც თავად უსმენენ. მშობლებს, რა თქმა უნდა, მხოლოდ კეთილი მიზნები ამოძრავებთ, თუმცა ისინი ბავშვს ამგვარი ქცევით ინდივიდუალიზმს ართმევენ. ბავშვებს თქვენი გემოვნების შესახებ ხშირად ესაუბრეთ, თუმცა არასდროს დააძალოთ, რომ ის ფილმები ნახონ, რომლებიც თქვენ მოგწონთ.

6. ბავშვის მიერ შეგროვილი ფულის დათვლა

ბავშვები ხშირად აგროვებენ ფულს. მშობელი არ უნდა ცდილობდეს იმის გარკვევას, თუ რა რაოდენობის ფული აქვს შეგროვილი მის შვილს. ამაზე უარესია, როდესაც მშობლები ბავშვის ჩანთას ან საფულეს ჩუმად ჩხრეკენ. ბავსვს უფლება მიეცით, ფული ისე შეაგროვოს, როგორც თავად სურს. ბავშვს ფულის სწორად გამოყენება ასწავლეთ. მათ შესაძლებლობა მიეცით საკუთარ ფულს ისე მოექცნენ, როგორც სურთ.

7. თავად ნუ განსაზღვრავთ ბავშვის სურვილებსა და ინტერესებს

დედას სურს, რომ მისი ქალიშვილი მუსიკაზე ატაროს. ის ამას დიდი სიხარულით აკეთებს. დედას ბავშვი კვირაში სამჯერ დაჰყავს მუსიკის გაკვეთილებზე და უზომოდ ბედნიერია. მამა ვაჟს ფეხბურთზე ატარებს, რადგან თვლის, რომ ეს ბავშვისთვის საუკეთესო სპორტია. ბავშვების ნაცვლად მსგავს გადაწყვეტილებებს ნუ მიიღებთ. ყურადღებით დააკვირდით თქვენს შვილს. გაარკვიეთ, რა მოსწონს მას ყველაზე მეტად, შემდეგ კი ხელი შეუწყვეთ, რომ საყვარელი საქმიანობით დაკავდეს.

8. ბავშვის წარმატებას საკუთარ მიღწევად ნუ ჩათვლით

დედები სოციალურ ქსელებში ხშირად დებენ შემდეგი შინაარსის პოსტებს: „ვისადილეთ,“ „ვისეირნეთ,“ „გავიღვიძეთ.“ მართალია მშობლები შვილებს ყოველთვის ეხმარებიან, მაგრამ ბავშვის წარმატება საკუთარ მიღწევად არ უნდა ჩათვალოთ. ბავშვების ზრდასთან ერთად ეს ყველაფერი უფრო სერიოზულ ხასიათს იძენს. მშობლები შვილების წარმატებაზე ისე საუბრობენ, თითქოს ეს მხოლოდ მათი დამსახურებაა. თქვენი შვილის წარმატება უნდა გახარებდეთ, მაგრამ ამის გამოხატვა სწორად უნდა შეგეძლოთ.

9. ბავშვის დაბადების დღის საჩუქარი თქვენ არ უნდა აირჩიოთ

ბავშვს საუბარი თუ შეუძლია, მან თავად უნდა გადაწყვიტოს, რა საჩუქრის მიღება უნდა დაბადების დღეზე. აუცილებელი არ არის, რომ თქვენს შვილს კიდევ ერთი ახალი მაისური უყიდოთ. ბავშვს არჩევანის დამოუკიდებლად გაკეთება უნდა ასწავლოთ. ეს მას ცხოვრებაში ძალიან გამოადგება.

10. ბავშვის პირად ცხოვრებაში ზედმეტად არ უნდა ჩაერიოთ

თინეიჯერების მშობლები ბავშვების პირად ცხოვრებაში ხშირად ზედმეტად ერევიან. ბავშვებს ამ ასაკში ბევრი მეგობარი ჰყავთ, მათ ცხოვრებაში პირველად უყვარდებათ. ეს ყოველივე სავსებით ნორმალურია. ნუ დაუწყებთ ბავშვს დაკითხვას. ამგვარად ბავშვი ჩაიკეტება და თქვენთან საუბარს არ მოინდომებს. თქვენი შვილი თავად დაგელაპარაკებათ, თუ ეცოდინება, რომ მას გაუგებთ. ბავშვის მიმოწერა ჩუმად არასდროს წაიკითხოთ. თქვენს შვილს პირადი სივრცე დაუტოვეთ და ზედმეტი კითხვებით არ შეაწუხოთ.

მომზადებულია ​brightside.me - ს მიხედვით

თარგმნა ია ნაროუშვილმა 

წაიკითხეთ სრულად