ცნობილი ამერიკელი გამომგონებელი ჟაკ ფრესკო ბავშვის დამოუკიდებლობის და კრეატიულობის წახალისების აუცილებლობის შესახებ საუბრობს და აღნიშნავს, რომ ნიჭით დაჯილდოვებული ადამიანები არ არსებობენ, ყველაფერი განათლებაზეა დამოკიდებული. ჟაკ ფრესკოს მტკიცებით, მშობლებმა არ იციან, თუ როგორ აღზარდონ შვილები. ადამიანის აღზრდა ცნობილი გამომგონებლისთვის ურთულესი და კომპლექსურია. ფრესკო აცხადებს, რომ მშობლები შვილებს არასწორი მიდგომებით წამლავენ და მათ ქცევაზე ნეგატიურად ზემოქმედებენ.
ფრესკო საკუთარ ცხოვრებისეულ გამოცდილებასაც გვიზიარებს და იხსენებს, როგორ მივიდა მისი შვილი მამასთან სათამაშო მანქანით ხელში. ბავშვის სათამაშოს საბურავი მოძვრა, პატარა განიცდიდა და მამას დახმარებას სთხოვდა. ფრესკომ ამის პასუხად შვილის სათამაშო ურნაში მოისროლა და ბავშვს ახლის ყიდვას დაპირდა. ფრესკო მიხვდა, რომ ბავშვი მამისგან მანქანის შეკეთებას მოითხოვდა, მან კი ეს არ გააკეთა. ფრესკოს თქმით, მშობელმა ბავშვის ნაცვლად არ უნდა გააკეთოს ის, რისი გაკეთებაც ბავშვს თავად შეუძლია. თუ მშობელი ყოველთვის შვილის ნაცვლად იმოქმედებს, ის ბავშვს უსარგებლო ადამიანად აქცევს.
ფრესკო მშობლებს მოუწოდებს, რომ ბავშვებს პრაქტიკული გამოცდილების მიღებაში დაეხმარონ და მისი უნარები ამგვარად განავითარონ.
მომღერალმა სოფო ნიჟარაძემ იმ ცვლილებების შესახებ ისაუბრა, რომელიც მის ცხოვრებაში შვილმა შემოიტანა. სოფო ნიჟარაძის თქმით, ის სრულფასოვნად არის ჩართული ბავშვის აღზრდაში და ახალი ემოციებით არის სავსე:
„ისეთი სხვა ცხოვრება მქონდა. ბავშვი... სულ სხვა ემოციები მქონდა. სრულიად უცბად დედა გავხდი. დედა სრული ამ სიტყვის მნიშვნელობით, ყველაფრით. მე ვიყავი ყველაფერი. რა თქმა უნდა, დედაჩემი ძალიან მეხმარება, მაგრამ მე ვზრდი. ამიტომ სრულიად სრულფასოვნად ვარ ჩართული.“
„რა თქმა უნდა, დედობამ შემცვალა, როგორც ადამიანიც, როგორც არტისტიც. ხმაში ტემბრიც კი შეიცვალა. სხვა განწყობაა. აუხსნელია ზუსტი სიტყვებით, რაში აქვს ეს, მაგრამ ყველაზე დიდი ბედნიერებაა ადამიანის ცხოვრებაში დედობა და ეს, რა თქმა უნდა, აისახება,“ - აღნიშნულ საკითხზე სოფო ნიჟარაძემ „მთავარი არხის“ გადაცემაში „შენი დილა“ ისაუბრა.
