Baby Bag

გენმოდიფიცირებული საკვები ჩვილის რაციონში - როგორ შევარჩიოთ ბავშვისთვის უსაფრთხო პროდუქტები

გენმოდიფიცირებული საკვები ჩვილის რაციონში - როგორ შევარჩიოთ ბავშვისთვის უსაფრთხო პროდუქტები
ადამიანების უმრავლესობა გენმოდიფიცირებული პროდუქტებისადმი უარყოფითად არის განწყობილი, რადგან ითვლება, რომ თანამედროვე ბიოტექნოლოგიების გამოყენებით მიღებული ხელოვნური საკვები ჩვენი ჯანმრთელობისთვის სერიოზულ საფრთხეს წარმოადგენს. ჩვენს სტატიაში გენმოდიფიცირებული პროდუქტების შესახებ ვრცელ ინფორმაციას მოგაწვდით, გარდა ამისა გაგაცნობთ რეკომენდაციებს, რომელთა დახმარებით ჩვილი ბავშვისთვის უსაფრთხო საკვების შერჩევას მარტივად შეძლებთ.

დიდი ხანია, რაც აკრონიმი „გმო“ უცხო არავისთვისაა, რადგან მსგავს წარწერას უამრავი საკვები პროდუქტის შეფუთვაზე ვხვდებით. მწარმოებლები ცდილობენ მაქსიმალურად დაიზღვიონ თავი გენმოდიფიცირებული პროდუქტების წარმოებისგან, რადგან ადამიანები მსგავსი საკვების მიღებისგან თავს იკავებენ. მიუხედავად იმისა, რომ გენმოდიფიცირებული საკვები ყველას აშინებს, ადამიანთა უმეტესობა მის შესახებ ძალიან მწირ ინფორმაციას ფლობს. გენეტიკურად მოდიფიცირებული საკვები გულისხმობს სპეციალური ტექნიკების გამოყენებით ხელოვნურად გარდაქმნილ და წარმოებულ ისეთ პროდუქტს, რომლის მსგავსი ბუნებაში არ მოიპოვება.
საკვები პროდუქტების გენმოდიფიცირება გარკვეულ მიზნებს ემსახურება. ხელოვნურად წარმოებული პროდუქცია მწერებისა და გარეგანი დაზიანებებისადმი უფრო მეტი გამძლეობით გამოირჩევა, ის მალფუჭებადი არ არის და მისი მწარმოებლების თქმით, ბუნებრივ პროდუქტებთან შედარებით უფრო ჯანსაღიცაა. აღნიშნული მიზეზების გამო ამერიკული წარმოების გადამუშავებული პროდუქტის 80% გენმოდიფიცირებულია.
არის თუ არა საზიანო გენმოდიფიცირებული პროდუქტი ბავშვებისა და ზრდასრულებისთვის?
გენმოდიფიცირებული საკვების გვერდითი ეფექტებისა და ჯანმრთელობისთვის საზიანო თვისებების შესახებ მტკიცებულებები არ არსებობს. გენეტიკურად მოდიფიცირებული პროდუქტების მწარმოებლების თქმით, ბაზარზე გატანამდე პროდუქცია სიღრმისეულ შემოწმებას გადის და მისი საკვებად გამოყენება ადამიანის ჯანმრთელობისთვის აბსოლუტურად უსაფრთხოა. უკვე თითქმის 20 წელია, რაც გმო გადამუშავებულ პროდუქტებში ძალიან აქტიურად გამოიყენება, თუმცა ჩატარებული კვლევები ცხადყოფს, რომ მის რეგულარულ მომხმარებლებს ჯანმრთელობის გაუარესების ნიშნები არ აღენიშნებათ. მსოფლიო ჯანდაცვის ორგანიზაციაც მეტი ნდობისკენ მოგვიწოდებს და გენმოდიფიცირებული საკვების უვნებლობის შესახებ შეხედულებას აბსოლუტურად იზიარებს.
ყველა გენმოდიფიცირებული საკვები ერთნაირი არ არის. ძალიან დიდი მნიშვნელობა აქვს, თუ რა სახის პროდუქტის გენეტიკური მოდიფიცირება ხდება, ასევე მნიშვნელოვანია ის გზები და საშუალებები, რომელთა დახმარებითაც მწარმოებელი გენეტიკურად მოდიფიცირებულ საკვებს აწარმოებს. მოდიფიცირების წესების დარღვევით წარმოებულ პროდუქტში ისეთი სახის ცილა წარმოიქმნება, რომელიც ბავშვებისა და ალერგიული ადამიანებისთვის სახიფათო ალერგენს წარმოადგენს. მსგავსი არასწორი მოდიფიკაციით ნაწარმოები პროდუქტი, რომელიც ბაზარზე გამოიტანეს იყო გენმოდიფიცირებული სოიოს მარცვალი, რომელიც ბრაზილიური თხილის გენის მატარებელი გახლდათ. აღნიშნული დარღვევის გამოვლენის შემდეგ მსგავსი ფორმით გენმოდიფიცირებული სოიოს მარცვლის წარმოება შეწყდა. ვიდრე გმო-ს შემცველი პროდუქტის კომერციულ ასპარეზზე გამოტანას დაიწყებენ, მწარმოებლები ვალდებულნი არიან ახალი პროდუქცია წლების მანძილზე სიღრმისეულად შეისწავლონ, რათა მის უვნებლობაში აბსოლუტურად დარწმუნებულები იყვნენ. გენმოდიფიცირებული ორგანიზმები, რომლებიც ცილის განსაკუთრებულ ნაირსახეობას შეიცავენ, ბავშვებისთვის სახიფათო ალერგენს წარმოადგენენ, სწორედ ამიტომ, ბავშვთა კვებაში გენმოდიფიცირებული პროდუქტების გამოყენებისას განსაკუთრებული სიფრთხილის გამოჩენა გვმართებს.
კვლევები გენმოდიფიცირებული პროდუქტების უვნებლობასთან დაკავშირებით
ჯანდაცვის მსოფლიო ორგანიზაციის, ამერიკის სამედიცინო ასოციაციისა და ეროვნული სამეცნიერო აკადემიის საერთო დასკვნით გენმოდიფიცირებული პროდუქტების მავნებლობის შესახებ სათანადო მტკიცებულებები არ მოგვეპოვება. მიუხედავად ამისა, ყველასთვის ცნობილია, რომ გმო-ს შემცველი საკვები არაბუნებრივი, ხელოვნურად მიღებული პროდუქტია, რომლის შექმნა გენების გარკვეული მანიპულაციების შედეგად ხდება. მსგავსი პროდუქტების ხშირი მიღება ადამიანის მიკრობიომაზე დიდ ზეგავლენას ახდენს და ნაწლავებში გავრცელებული ცუდი და კარგი მიკროორგანიზმების თანაფარდობასაც მნიშვნელოვნად ცვლის.
რეპროდუქციული ტოქსიკოლოგიის ჟურნალში გამოქვეყნებულმა კვლევამ აჩვენა, რომ ორსული ქალბატონების სისხლში დიდი რაოდენობით BT ტოქსინი იქნა აღმოჩენილი. BT ტოქსინი ისეთი ბაქტერიაა, რომელიც მხოლოდ გენმოდიფიცირებულ პროდუქტებში გვხვდება. აღნიშნული ბაქტერია მწერებისთვის მომაკვდინებელ და მომწამვლელ ცილას შეიცავს და გმო-ს შემცველ პროდუქტებს დაზიანებისგან იცავს.
BT ტოქსინსა და გენმოდიფიცირებულ საკვებში შემავალ სხვა ჰერბიციდებს ან პესტიციდებს მუცლადმყოფი ბავშვის ან ჩვილის ნერვული სისტემისა და მიკრობიომის განვითარებაზე უარყოფითი გავლენის მოხდენა შეუძლია. ეს უკანასკნელი ბავშვის ზრდისა და განვითარების პროცესში უმთავრეს როლს ასრულებს. მიკრობიომის ნორმალური ფუნქციონირება აუცილებელია ბავშვის ენდოკრინოლოგიური, იმუნური, ნერვული და საჭმლის მომნელებელი სისტემების ჯანსაღი ფუნქციონირებისთვის. გარდა ამისა, ის ბავშვის ორგანიზმის საკვებისადმი ტოლერანტობისა და ალერგიულობის ხარისხსაც განსაზღვრავს.
როგორ უნდა აღმოვაჩინოთ ჩვილის საკვებში დამალული გმო?
ოფიციალური რეგულაციებით, გენეტიკურ მოდიფიცირებას შემდეგი საკვები კულტურები ექვემდებარება: სოიო, სიმინდი, პაპაია, კარტოფილი, ვაშლი, გოგრა და შაქრის ჭარხალი. გარდა ამისა, უნდა აღინიშნოს ისიც, რომ გმოს შემცველი საკვების მიღება ხორცპროდუქტებით კვებისასაც შეიძლება, მაგ. თუ ისეთი ცხოველის ან ფრინველის ხორცს მივირთმევთ, რომელიც გენმოდიფიცირებული მარცვლეულით იკვებებოდა. გადამუშავებული პროდუქტების უმრავლესობა გენმოდიფიცირებულ სოიოსა და სიმინდის ნაწარმს შეიცავს, გარდა ამისა, ძროხის რძეც (დიდი ნაწილი) გმო-ს შემცველ პროდუქტად მიიჩნევა, რადგან მსხვილფეხა რქოსანი პირუტყვის გამოსაკვებადაც ძირითადად გენმოდიფიცირებულ მარცვლეულს იყენებენ.
მშობლებმა უნდა იცოდნენ, რომ წესების სრული დაცვით წარმოებული გენმოდიფიცირებული პროდუქტი ბავშვისთვის სერიოზული საფრთხის მომტანი ვერ იქნება. მიუხედავად ამისა, მაქსიმალურად უნდა მოერიდოთ ჩვილი ბავშვის რაციონში ისეთი გენმოდიფიცირებული პროდუქტების ჩართვას, როგორებიცაა სოიო, სიმინდი, შაქრის ჭარხალი და ყვითელი გოგრა. არ აქვს მნიშვნელობა ორგანული პროდუქტებით იკვებებით თუ შეძენილი საკვების ეტიკეტს საერთოდ არ ეცნობით, თანამედროვე სამყაროში გენმოდიფიცირებული საკვების მიღებისგან სრულად დაზღვეული ვერ იქნებით. მიუხედავად ამისა, ეცადეთ ბავშვთა კვებაში დიდი რაოდენობით ბუნებრივი პროდუქტები ჩართოთ, გადამუშავებულ საკვებს კი ერიდეთ. აუცილებლად გაეცანით გენმოდიფიცირებულ საკვებთან დაკავშირებულ სიახლეებს და ბავშვისთვის განკუთვნილი ნებისმიერი საკვები პროდუქტის ეტიკეტი ყურადღებით წაიკითხეთ.
მომზადებულია ​parents.com-ის მიხედვით
ავტორი: ია ნაროუშვილი

შეიძლება დაინტერესდეთ

ჰიმალაის მარილი - ლეგენდებიდან რეალობამდე

ჰიმალაის მარილი - ლეგენდებიდან რეალობამდე

ჰიმალაის მარილი - ლეგენდებიდან რეალობამდე - აღნიშნულ თემაზე პედიატრი თამარ ობგაიძე ​საუბრობს. გთავაზობთ მის ნათქვამს სიტყვა-სიტყვით:

„თუ თქვენ ფიქრობთ, რომ ჰიმალაის ვარდისფერი მარილი პირდაპირ ჰიმალაის მთებთანაა კავშირში, ცდებით.

მას პაკისტანში, Khewra-ს მარილის საბადოში მოიპოვებენ, რაც ჰიმალაის მთებიდან დაახლოებით 300 კმ-ითაა დაშორებული.

ლეგენდა ამბობს, რომ ალექსანდრე მაკედონელის აზიური ლაშქრობისას მისი ცხენი შემთხვევით მიადგა ვარდისფერი მარილის საბადოებს, თუმცა ამ მარილს ადამიანები მანამდეც, უხსოვარი დროიდან მოიპოვებდნენ და თევზისა და ხორცის ხანგრძლივად შესანახად იყენებდნენ.

ძველ ეგვიპტურ და ბერძნულ წყაროებში კი მის ჯანმრთელობისათვის სასარგებლო თვისებებზეცაა საუბარი.

რა არის სუფრის მარილი

ზოგადად, სუფრის მარილი ნატრიუმის ქლორიდია, რომელიც ორი სახით მიიღება - მარილის საბადოებიდან მშრალი სახით მოიპოვება ხელით ან აფეთქების გზით ან მარილიანი წყლის აორთქლებით და მისი შემდგომი ქიმიური დამუშვებით.

დამუშავებისას მარილი თეთრდება, სცილდება სხვადასხვა მინარევი, ემატება იოდი და ემულგატორები.

ნატრიუმი წყლისმოყვარული ქიმიური ელემენტია, ამიტომ სუფრის მარილის დიდი რაოდენობით მიღება ხელს უწყობს ორგანიზმში სითხის შეკავებას, ზრდის გულ-სისხლძარღვთა დაავადებების განვითარების რისკს, ხელს უწყობს არტერიული წნევის მატებას. სწორედ ამის გამო უწოდებენ მას ხშირად „თეთრ სიკვდილს“.

მარილის სახეობები

ქვამარილი - მიიღება მარილის მიწისქვეშა შახტებში, შეიცავს მიწის, სილის მინარავებს, შესაძლოა შეიცავდეს ასაფეთქებელი ნივთიერებების კვალსაც, რომელსაც მარილის მოპოვებისას იყენებენ. ამ მინარევიებისაგან გასასუფთავებლად მიღებულ მარილს ქიმიურად ამუშვებენ და ემულგატორებს უმატებენ.

ალბათ ხვდებით, ეს მარილი ჯანმრთელობისათვის გარკვეულ საფრთხეს ქმნის.

მარილი ექსტრა - ხასიათდება იდეალური თეთრი ფერით, წვრილი დაფქვით. იმისათვის, რომ მან იდეალურად თეთრი ფერი მიიღოს, მარილს ქიმურად ამუშავებენ და ათეთრებენ.

იოდირებული მარილი - დამუშავებულ მარილს ემატება იოდი.

ზღვის მარილი - მიიღება ზღვის მარილიან წყლის აორთქლებიღთ და შემოდგომი ქიმიური დამუშვებით. როგორც წესი, ის შეიცავს ემულუგატორს - კალციუმის სილიკატს.

ვარდისფერი მარილი, რომელიც მოიპოვება ავსტრალიაში, ნეპალში, პერუში, ჩილეში - არ ახდენს ზეგავლენას კერძის გემოზე, ამიტომ საკვებად მას არ იყენებენ.

ყირიმის ვარდისფერი მარილი ზღვის წყლის აორთქლებით მიიღება, მშვენიერ ვარდისფერს კი იმიტომ იღებს, რომ შეიცავს წყალმცენარე Dunaliel laSallina-ს. ეს წყალცმენარე დიდი რაოდენობით ნატურალურ კაროტინოიდებს შეიცავს.

ჰიმალაის შავი მარილი - იგივე წარმოშობისაა, რაც ჰიმალაის ვარდისფერი მარილი, თუმცა დამატებით შეიცავს გოგირდწყალბადს, რაც მას კვერცხის სუნს და გემოს აძლევს. სწორედ ამ თვისების გამო ის ვეგეტარიანელებს უყვართ და მცენარეული საკვებისათვის კვერცხის სპეციფიური არომატის მისაცემად იყენებენ.

ჰიმალაის ვარდისფერი მარილი

რა არის ჰიმაიალის ვარდისფერი მარილი?

ეს ბუნებრივი მარილია, ვარაუდობენ, რომ მისი შახტები ჰიმალაის მახლობლად იურიულ პერიოდშია წარმოქმნილი და პირველყოფილი ოკეანისაგან დარჩა.

ასე, რომ როცა თქვენ მიირთმევთ მას, სავარაუდოდ, სწორედ უძველესი ზღვის დანატოვრ, სუფთა, უცვლელადშენახულ ნობათს იღებთ წარსულიდან.

ვარდისფერი მარილი მოპოვებულია ბუნებრივი საბადოდან მხოლოდ ხელით და არ განიცდის რაიმე ტიპის ქიმიურ დამუშავებას. შეიცავს რკინას და დაახლოებით კიდევ 84 სახეობის მინერალს. სწორედ ეს მინერალები აძლევენ მას ლამაზ, ვარდისფერ შეფერილობას და განსაკუთრებულ არომატს.

ჰიმალაის მარილი საკვებადაც გამოიყენება და საუკეთესო სპა-საშუალებაცაა. მისი აბაზანა ამშვიდებს დაძაბულ კუნთებს დ სასიამოვნო რელაქსაციას იწვევს, აგლუვებს კანს.

განსხვავებით ჩვეულბრივი მარილისაგან, რომლიც ნატრიუმის ქლორიდს წარმოადგენს, ჰიმალაის მარილი კალიუმის ქლორიდს, კალციუმის და სხვა მინერალების მარილებსაც შეიცავს.

თუმცა იმისათვის, რომ ამ მინერალებმა თავისი დადებითი ეფექტი გამოიწვიონ, ისინი დიდი რაოდენობით უნდა იქნას მიღებული. საკვებად გამოყენებისას კი ამ რაოდენობის მარილის მიღება არც დაშვებულია და შეუძლებელიცაა.

ამ ეტაპზე არ არის საკმარისი მტკიცებულებები, რომელებიც დაადასტურებდა, რომ ჰიმალაის მარილის გამოყენება ამცირებს ამა თუ იმ დაავადების განვითარების რისკს ან ზემოქმედებს დადებითად უკვე დაავადებულ ორგანიზმზე.

ჰიმალაის მარილის მთავარი უპირატესობა ისაა, რომ ჩვეულებრივი სუფრის მარილისაგან განსხვავებით ის ბუნებრივია, არ შეიცავს ქიმიურ დანამატებს, ემულგატორებს და მავნე მინარევებს, მიღებულია ეკოლოგიურად სუფთა შახტიდან ხელით, ამიტომ ჯანმრთელობისათვის ამ მხრივ ნამდვილად სასარგებლოა.

დაბოლოს, კიდევ ერთხელ შეგახსენებთ, რა ფერისაც არ უნდა იყოს მარილი, არ ღირს, გადააჭარბოთ მისი მოხმარების დასაშვებ დღიურ ნორმებს

ჯანმრთელობას გისურვებთ!“

წაიკითხეთ სრულად