Baby Bag

6 საუკეთესო საჩუქარი თქვენი შვილებისთვის, რომელიც მატერიალურ ხარჯებთან არ არის დაკავშირებული

6 საუკეთესო საჩუქარი თქვენი შვილებისთვის, რომელიც მატერიალურ ხარჯებთან არ არის დაკავშირებული
დედები გადაღლილობის გამო ხშირად საკუთარ ცხოვრებას დაუსრულებელ გამოცდას ​ადარებენ. იმის ნაცვლად რომ ტკბილად გეძინოთ, ბავშვი ღამით ტირილს იწყებს, თქვენ კი ვერ ხვდებით როგორ მოიქცეთ. არ იცით, რა იქნება მისთვის უკეთესი. ვერ გაგირკვევიათ, უნდა მიხვიდეთ და გაართოთ თუ აცადოთ, რომ თავად დამშვიდდეს. თქვენი სკოლამდელი ასაკის შვილი გამომწვევი ქცევებით თქვენს გაღიზიანებას ცდილობს. როგორ უნდა მოიქცეთ ამ შემთხვევაში? ბავშვს სწორი ქცევის წესები ხელახლა უნდა გააცნოთ თუ არასასურველი ქცევის გამო დასაჯოთ? ამ და სხვა ამოცანების გადაწყვეტისას დედებს შიშის გრძნობა იპყრობთ. მათ არასწორი ნაბიჯის გადადგმა არ სურთ, რადგან ეშინიათ, რომ საკუთარი შვილების ფსიქიკას მნიშვნელოვნად დააზიანებენ.

დედებო, უმჯობესია დამშვიდდეთ და ზედმეტ სტრესს ერიდოთ. ყველა პატარა დრამა ბავშვის ფსიქიკაზე დამანგრევლად ნამდვილად არ მოქმედებს. თუმცა არსებობს გარკვეული ფაქტორები, რომლებიც თქვენი შვილის ცხოვრებაში უმნიშვნელოვანეს როლს ასრულებს. ბავშვების გაბედნიერება და მათთვის საუკეთესო საჩუქრების გაკეთება თუ გსურთ, ამისთვის არა დიდი თანხების დახარჯვა, არამედ მეტი სითბოსა და ყურადღების გამოჩენა დაგჭირდებათ.

• ბავშვის უნარები და შესაძლებლობები უნდა აღიაროთ

კარგი დედები ბავშვის თვითშეფასების გაზრდის ნამდვილი ექსპერტები არიან. ისინი მათ თბილი სიტყვებით, კომპლიმენტებითა და გამამხნევებელი ფრაზებით ანებივრებენ. თუმცა ეს ყველაფერი არ არის, რისი გაკეთებაც თქვენი შვილისთვის შეგიძლიათ. ბავშვის უნარებისა და შესაძლებლობების აღიარება თუ გსურთ, მას გამოწვევებთან გამკლავების საშუალება უნდა მისცეთ. თქვენი შვილი სირთულეებს დამოუკიდებლად უნდა გაუმკლავდეს. ბავშვები, რომლებიც დამოუკიდებლობას ეჩვევიან, გაცილებით გამბედავები არიან. მათ სიახლეები ნაკლებად აშინებთ და რისკზე წასვლას არასდროს გაურბიან. როგორც წესი, ისინი ეფექტურად აგვარებენ პრობლემებს და ამ უნარს არც ზრდასრულობისას კარგავენ.

თქვენი შვილისთვის სიკეთის გაკეთება თუ გსურთ, მას მეტი თავისუფლება მიეცით. როდესაც ხედავთ, რომ ბავშვს საშინაო დავალების შესრულება უძნელდება ან დაშლილი სათამაშოს აწყობას ვერ ახერხებს, მის დახმარებას ნუ იჩქარებთ. ბავშვს საკუთარი პრობლემის მოგვარების შესაძლებლობა მიეცით. როდესაც თქვენი 4 წლის შვილი ღელავს, რადგან მისი სათამაშო სატვირთო მანქანა ქვიშის ზიდვას ვერ ახერხებს, იმის ნაცვლად, რომ მანქანიდან ზედმეტი ქვიშის გადმოტვირთვა სცადოთ, ბავშვს სასარგებლო რჩევა მიეცით. უთხარით თქვენს შვილს, რომ მანქანაში არსებული ტვირთის შემსუბუქება, შესაძლოა, პრობლემის მოგვარებაში დაეხმაროს.

მართალია, ბავშვის შექებაში ცუდი არაფერია, მაგრამ მხოლოდ კომპლიმენტებით მას თავს დამოუკიდებელ და ძლიერ ადამიანად ვერ აგრძნობინებთ. თუ ხედავთ, რომ თქვენი შვილი ქვიშის მაღალ კოშკებს აგებს, იმის ნაცვლად, რომ მისი შედევრები დაუსრულებლად ადიდოთ, ბავშვს საინტერესო კითხვები დაუსვით. ჰკითხეთ თქვენს შვილს, როგორ მოახერხა მაღალი კოშკის იმგვარად აგება, რომ მისი მთლიანობის შენარჩუნება შეძლო.

ბავშვს აუცილებლად უნდა აუხსნათ, რომ ახალი წამოწყებები ყოველთვის წარმატებით არ სრულდება, მაგრამ მიზნის მისაღწევად ბრძოლა აუცილებელია. თქვენმა შვილმა უნდა იცოდეს, რომ წარმატებული ადამიანები არასდროს ნებდებიან. ბავშვს შეცდომების დაშვების არ უნდა ეშინოდეს. აუხსენით თქვენს შვილს, რომ ადამიანები სწორედ შეცდომების წყალობით იძენენ ახალ ცოდნას.

• ბავშვს თქვენი ღირებულებები და ფასეულობები უნდა გაუზიაროთ

თქვენს მეუღლესთან ერთად განსაზღვრეთ, თუ რა ფასეულობების მიხედვით გსურთ თქვენი შვილების აღზრდა. სიკეთე, ტოლერანტობა, პასუხისმგებლობა, გულწრფელობა და სიმტკიცე ის უმთავრესი თვისებებია, რომლებიც ბავშვს უნდა განუვითაროთ. იმისთვის, რომ თქვენი შვილი ღირსეულ ადამიანად აღზარდოთ, მას ღირებულებებზე კი არ უნდა ესაუბროთ, ამ ღირებულებების მიხედვით უნდა იცხოვროთ. ტელევიზორის ყურებისას თქვენი შვილების თანდასწრებით შეაქეთ ფილმის ის პერსონაჟები, რომლებიც ღირსეულად იქცევიან. თქვენს მეუღლეს ხმამაღლა ესაუბრეთ ამა თუ იმ გმირის მოსაწონ ქცევაზე. თუ ფილმის რომელიმე პერსონაჟი სხვა ადამიანს თავის საკვებს უწილადებს, თქვენს შვილს აუხსენით, რომ ის მისაბაძ ქცევას ახორიელებს, რადგან ქველმოქმედი და ხელგაშლილი ადამიანია. მშობელი ბავშვისთვის მთავარი როლური მოდელია, რის გამოც მათი თანდასწრებით არაგულწრფელი ქცევა არ უნდა გამოავლინოთ. თუ თქვენი შვილი ხედავს, რომ ნათესავებთან ვიზიტის თავიდან ასაცილებლად ცრუობთ, ის თქვენგან ცუდ მაგალითს იღებს.

• დააკვირდით თქვენს სიტყვებსა და საუბრის ტონს

რიგ შემთხვევებში წონასწორობის შენარჩუნება ყველაზე მომთმენ და მოსიყვარულე მშობლებსაც კი უჭირთ. თუ თქვენს შვილზე ბრაზდებით, ეცადეთ თავი მაქსიმალურად შეიკავოთ. მასთან ისე უნდა ისაუბროთ, როგორ თქვენს მეგობართან ისაუბრებდით. ბავშვს თავი თქვენს თანასწორად აგრძნობინეთ. როგორც წესი, მსგავს შემთხვევაში ბავშვები გაცილებით ყურადღებით გისმენენ და თქვენთან საუბარი სიამოვნებას ანიჭებთ. თუ თქვენს შვილთან გულახდილად და მეგობრულად ისაუბრებთ, ის რჩევისთვის თავადვე მოგმართავთ. თქვენი შვილები მომავალში სწორედ ისე დაგელაპარაკებიან, როგორც თქვენ ელაპარაკებით მათ. მოვლენები ბავშვის პერსპექტივიდან უნდა დაინახოთ. თუ თქვენი შვილი თავის საყვარელ სათამაშოს ვერ პოულობს, მას მხარდაჭერა უნდა გამოუცხადოთ. იმის ნაცვლად, რომ ბავშვს უკმაყოფილოდ უთხრათ: „ოჰ, დამშვიდდი, შენი სათამაშო არსად დაიკარგება,“ უმჯობესია დაკარგული ნივთის ძებნა მასთან ერთად დაიწყოთ, რათა იგრძნოს, რომ თქვენ მისი განსაცდელი გულთან ახლოს მიგაქვთ და მის სატკივარს იზიარებთ.

• მეუღლესთან ურთიერთობას მეტი დრო დაუთმეთ

მზრუნველი მშობლები ბავშვებს თავს უსაფრთხოდ და დაცულად აგრძნობინებენ. თუ თქვენი შვილები მოულოდნელად კონცის დროს შემოგისწრებენ, მათ თბილად და მეგობრულად გაესაუბრეთ. ამ გზით ბავშვებს სამომავლოდ ჯანსაღი ურთიერთობების ჩამოყალიბებაში დაეხმარებით. მეუღლესთან ურთიერთობას ყოველდღიურად გარკვეული დრო დაუთმეთ. ბავშვების დაძინების შემდეგ 15 წუთი მაინც უნდა გქონდეთ ერთმანეთთან სასაუბროდ. თქვენს მეუღლესთან ერთად სახლიდან მარტო ხშირად უნდა გახვიდეთ. შეყვარებულობა გაიხსენეთ და პაემნები მოიწყვეთ. ბავშვები იგრძნობენ, რომ თქვენ ერთად ყოფნა ძალიან გსიამოვნებთ. ბავშვების ჯანსაღი მომავლისთვის ბედნიერ ოჯახში ცხოვრება აუცილებელია. თუ თქვენ ქორწინებაში უბედური ხართ, ეს თქვენი შვილის ფსიქიკაზე დამანგრევლად მოქმედებს. უმჯობესია, თუ შვილების თანდასწრებით მეუღლესთან არასდროს იჩხუბებთ, მაგრამ თუ მსგავსი რამ მოხდება, მათივე თანდასწრებით უნდა შერიგდეთ. ამგვარად, ბავშვები იგრძნობენ, რომ თქვენი ურთიერთობა მყარია, რის გამოც ნებისმიერი დაბრკოლების გადალახვა შეგიძლიათ.

• სტრესთან გამკლავება ისწავლეთ

ბავშვები სირთულეებთან გამკლავებას თქვენგან სწავლობენ. ისინი გაკვირდებიან და ყველაფერს ამჩნევენ. მათ აინტერესებთ, როგორ აგვარებთ პრობლემებს და როგორ ამარცხებთ შიშს. თუ ბავშვი ხედავს, რომ მშობლები დაბრკოლებების გადალახვას წარმატებით ახერხებენ და ნებისმიერი სახის ზეწოლას უძლებენ, მას დაცულობის და სიმშვიდის განცდა ეუფლება. მისთვის სახლი მყუდრო ადგილად იქცევა, სადაც თავს უსაფრთხოდ იგრძნობს. თქვენ დროის სწორად გადანაწილება უნდა ისწავლოთ. თუ ბავშვი ექსკურსიაზე მიდის და მას საგზლისთვის გემრიელი მაფინების გამოცხობას დაპირდით, მიცემული პირობა ზედმეტი ალიაქოთის გარეშე უნდა შეასრულოთ. დრო ისე გადაანაწილეთ, რომ ექსკურსიის წინა დღე თავისუფალი გქონდეთ, რათა მაფინების გამოცხობა მარტივად და აუღელვებლად შეძლოთ. თუ ზაფხულში ოჯახთან ერთად დასასვენებლად წასვლას გეგმავთ, თანხის შეგროვებაზე წინასწარ იზრუნეთ. დანაზოგის შესაგროვებლად თანხები რაციონალურად გადაანაწილეთ. ბავშვებმა არ უნდა იგრძნონ, რომ მათთან ერთად დასასვენებლად წასვლა თქვენთვის სერიოზულ ფინანსურ გამოწვევას წარმოადგენს.

ზედმეტი სტრესის თავიდან ასაცილებლად სახლი ყოველთვის წესრიგში უნდა გქონდეთ, რათა ნივთების ძებნაში დიდი დრო არ დაგეხარჯოთ. თუ სამსახურითა და ბავშვებზე ზრუნვით მეტისმეტად გადაიღლებით, რელაქსაციის ტექნიკები გამოიყენეთ. შეგიძლიათ იოგას გაკვეთილებზე სიარული დაიწყოთ, სუნთქვით ვარჯიშებს მიმართოთ ან პროფესიონალ ფსიქოლოგს გაესაუბროთ. ცხადია, ისიც უნდა გახსოვდეთ, რომ ცხოვრებაში ყველაფერი ისე არ ხდება, როგორც ვგეგმავთ. თქვენი შვილისთვის ყურადღების დათმობა თუ გსურთ, საკუთარ პრობლემებზე ზედმეტად ბევრს ნუ იფიქრებთ. სტრესს აუცილებლად უნდა გაუმკლავდეთ, რადგან ბავშვის ჯანსაღად აღზრდისთვის სიმშვიდე და ენერგია გესაჭიროებათ.

• ხშირად აკოცეთ თქვენს შვილს და ნურც სასიამოვნო სიტყვების თქმა დაგენანებათ

უამრავი კვლევით დასტურდება, რომ ბავშვები, რომლებსაც მშობლები სათუთად ეპყრობიან, მეტად თავდაჯერებულები და ძლიერები არიან, ვიდრე ისინი, ვისაც მშობლის მხრიდან სითბო და ყურადღება აკლია. როდესაც ბავშვს ეფერებით, მის ორგანიზმში დიდი რაოდენობით სიყვარულის ჰორმონი გამომუშავდება, რაც მას უარყოფით მოვლენებთან და შეგრძნებებთან გამკლავებაში ძალიან ეხმარება. ბავშვს ყოველდღიურად უნდა უთხრათ, რომ ის ძალიან გიყვართ. შვილი სკოლაში ყოველთვის თბილი სიტყვებით უნდა გააცილოთ და დაძინების წინაც აუცილებლად უთხარით: „მე შენ მიყვარხარ.“ ზამთრის ცივ დღეებში ბავშვთან ერთად თბილ პლედში გაეხვიეთ და მისი საყვარელი წიგნები წაიკითხეთ. როდესაც თქვენი შვილი სადმე მიდის, აუცილებლად უთხარით, რომ მოგენატრებათ და ერთი სული გაქვთ, როდის დაგიბრუნდებათ.

ბავშვი დილით მოფერებითა და კოცნით უნდა გააღვიძოთ. ხშირად ჩაეხუტეთ თქვენს შვილებს და მათთან ერთად ბევრი იცინეთ. გახსოვდეთ, რომ მსგავს სიამოვნებას ცხოვრებაში სხვა ვერაფერი მოგანიჭებთ. 

მომზადებულია parents.com-ის მიხედვით
თარგმნა ია ნაროუშვილმა 

შეიძლება დაინტერესდეთ

როგორ მოვიქცეთ, თუ ბავშვს უეცრად წაუვიდა გული?

როგორ მოვიქცეთ, თუ ბავშვს უეცრად წაუვიდა გული?

როგორ ვლინდება სინკოპე ე.წ. გულის წასვლა ბავშვებში და რა შეიძლება იყოს მიზეზი? ამ საკითხებზე ​MomsEdu.ge-ს ესაუბრა ბავშვთა ნევროლოგი, თამარ ედიბერიძე.

- რა არის სინკოპე და რა შეიძლება იყოს მისი მიზეზი?
- სინკოპე არის გონების ხანმოკლე კარგვა, ე.წ. გულის წასვლა. მისი საფუძველია თავის ტვინის სისხლ-და/ან ჟანგბადმომარაგების ხანმოკლე დარღვევა, რომლის შედეგადაც ბავშვი ან მოზრდილი ხანმოკლედ კარგავს გონებას. ეს შეიძლება განვითარდეს, მაგალითად, არტერიული წნევის დაქვეითების ფონზე, ან სხვადასხვა მიზეზით ორგანიზმის გაუწყლოების შემთხვევაში; შეიძლება ადგილი ჰქონდეს სუნთქვასთან დაკავშირებულ პრობლემას და ამის შედეგად დაირღვეს სისხლის ჟანგბადით გაჯერების პროცესი. სხვა მიზეზი შეიძლება იყოს გარემოში ჟანგბადის შემცველობის დაქვეითება. სინკოპე ხშირად ვითარდება ძლიერი ტკივილის ან ემოციის ფონზე, ფიზიკური და ემოციური გადაღლის შემთხვევაში. ისევე, როგორც არსებობს სხვადასხვა სპეციფიკურ სიტუაციაში განვითარებული სინკოპე - მაგალითად, შარდვის, თმის ვარცხნის, ან კისრის მიდამოს სპეციფიკური გაღიზიანების საფუძველზე; ძალიან საყურადღებოა გულის ნორმალური რითმის დარღვევის ფონზე ტვინის სისხლმომარაგების გარდამავალი დარღვევა და ე.წ. კარდიალური სინკოპე - ეს უკანასკნელი შეიძლება იყოს შექცევადი, თუმცა პოტენციურად სიცოცხლისთვის საშიშიც. შესაბამისად, სინკოპეს გარეგნული მსგავსების მიუხედავად, შეიძლება სრულიად კეთილსაიმედო, ან საკმარისად საყურადღებო გამოსავალი ჰქონდეს. საბედნიეროდ, ბავშვებში სინკოპეს შემთხვევების აბსოლუტური უმრავლესობა კარგი პროგნოზით ხასიათდება და უსაფრთხოა ბავშვის სიცოცხლის თუ ჯანმრთელობისთვის.
- როგორ ვლინდება სინკოპე ბავშვებში?
- სინკოპეს სიმპტომები მსგავსია სხვადასხვა ასაკობრივ ჯგუფში. ბავშვებში სირთულე შეიძლება შექმნას კომუნიკაციამ. ანუ ასაკთან მიმართებით რამდენად მოახერხებენ ბავშვები თავად აღწერონ საკუთარი შეგრძნებები. მცირე ასაკში ეს უფრო რთულია ხოლმე. სინკოპეს შემთხვევაში, ერთი მხრივ, არის ნიშნები, რომლებსაც მხოლოდ პაციენტი გრძნობს და პარალელურად არის ნიშნები, რომლებიც შეიძლება შენიშნონ გარშემომყოფებმა. ყველაზე ხშირად პაციენტები აღწერენ საერთო სისუსტეს, რომელიც ნელ-ნელა ვითარდება, ეკარგებათ ძალა ფეხებში, შეიძლება ჰქონდეთ კიდურებში დაბუჟების შეგრძნება, შემცივნების, თავბრუსხვევის, თვალებში დაბნელების ან აჭრელების განცდა, ხმები თითქოს შორიდან ესმით და ამასობაში კარგავენ გონებას. პაციენტების უმრავლესობა ასწრებს, რომ გვერდით მყოფს სთხოვოს დახმარება, დაიჩივლოს რომ ცუდადაა, მოეჭიდოს რაიმეს, ვიდრე დაეცემა. გარშემომყოფები აღწერენ, რომ პაციენტი გაფითრდა, მოდუნდა და ჩაიკეცა. სიმპტომების ასეთი ეტაპობრივი და ნელი განვითარება არის ერთ-ერთი დამახასიათებელი სინკოპესთვის. პაციენტი თვალდახუჭულია, ფერმკრთალი, მოდუნებული, თუმცა იშვიათად, გამორიცხული არ არის კიდურებში ხანმოკლე დაჭიმვაც, ან ერთეული ბიძგისებრი მოძრაობები, უნებლიე შარდვაც, მათ შორის. ეს ფენომენები არ ცვლის და არ ამძიმებს პროგნოზს. სინკოპე იშვიათად გრძელდება ერთ წუთზე მეტხანს. პაციენტი სწრაფად მოდის გონს და შეუძლია აღწეროს გონების დაკარგვამდე განცდილი შეგრძნებები. ხშირად ხდება, რომ გარეგნულად გონდაკარგულ პაციენტს ბუნდოვნად, მაგრამ თურმე ესმოდა გარშემომყოფების ხმები.

​- თუ ბავშვს უეცრად წაუვიდა გული, როგორ დავეხმაროთ და რას ურჩევთ მშობლებს?
- პირველი რეკომენდაციაა, რომ შევინარჩუნოთ სიმშვიდე. როგორც უკვე აღვნიშნეთ, ბავშვებშიც და მოზრდილებშიც, სინკოპეს შემთხვევების უმრავლესობა სრულიად უსაფრთხოა. ტრავმატიზაციის რისკიც უფრო ნაკლებია, ვიდრე, მაგალითად, გულყრების შემთხვევაში, რადგან ამ დროს გონების კარგვა ხდება ნელ-ნელა და პაციენტი ასწრებს ითხოვოს დახმარება, ან თვითონვე უშველოს თავის თავს, მოეჭიდოს რაიმეს, მოასწროს დაჯდომა ან დაწოლაც. დახმარების მიზნით აუცილებელია, რომ პაციენტი მოვათავსოთ ჰორიზონტალურ მდგომარეობაში, გვერდულად ან ზურგზე, სწორ და მყარ ზედაპირზე, ხოლო ქვედა კიდურები მოვუთავსოთ შემაღლებულ პოზიციაში. ზურგზე წოლის შემთხვევაში სასურველია, თავი ჰქონდეს გვერდით გადაბრუნებული, რადგან ღებინების რისკი გულყრასთან შედარებით ნაკლები, მაგრამ მაინც არის. აუცილებელია შევუხსნათ მოჭერილი და მჭიდრო ტანისაცმელი, ქამარი და უზრუნველვყოთ სუფთა ჰაერის მიწოდება. ზრდასრულებსა და მოზარდებში შეიძლება გამოვიყენოთ მძაფრსუნიანი საშუალებები (მაგალითად, ნიშადური) გონზე მოსვლის დასაჩქარებლად. გონზე მოსვლის შემდეგ არ წამოაყენოთ პაციენტი სწრაფად. დაელოდეთ რომ სრულად აღდგეს ცნობიერება და წამოაჯინეთ ნელ-ნელა. წინააღმდეგ შემთხვევაში გონების კარგვა შეიძლება განმეორდეს. ისევე, როგორც გულყრების შემთხვევაში - დაუშვებელია პაციენტის ჯანჯღარი, თავდაყირა დაკიდება. არ არის საჭირო ენის დაჭერის მცდელობა. ასევე დაუშვებელია გონდაკარგული ადამიანისთვის დასალევად წყლის ან წამლის მიცემა. დაელოდეთ ცნობიერების აღდგენას და უკვე წამომჯდარ ადამიანს შესთავაზეთ წყალი ან წვენი. კარგად დაიმახსოვრეთ ეპიზოდის დროს მიმდინარე მოვლენები, რადგან დიაგნოსტიკის პროცესში ექიმისთვის უმნიშვნელოვანესია მათი ანალიზი და ინტერპრეტაცია. ვერცერთი გამოკვლევა ვერ შეცვლის ამ ინფორმაციას და ღირებულებას, სწორი დიაგნოზისთვის.
საკუთარი თავის დახმარება შეუძლიათ თვითონ პაციენტებსაც. მნიშვნელოვანია, რომ პირველივე სიმპტომების გაჩენისთანავე არ შეეშინდეთ და დროულად ითხოვონ დახმარება. მაშინვე ჩაიმუხლონ ან დაჯდნენ, თუნდაც იატაკზე. ეფექტურია ხოლმე, როდესაც ბავშვი ან მოზრდილი ჯდება წინ გადახრილი ისე, რომ თავი ჰქონდეს მუხლების დონეზე ან უფრო დაბლა პოზიციაში. ეს პოზიცია განსაკუთრებით კომფორტული და ეფექტურია სიმპტომების პირველივე წამებში და გონების სრულად დაკარგვამდე, მაგალითად, ქუჩაში, ტრანსპორტში, სადაც შეიძლება არ იყოს დაწოლის საშუალება. ძალიან მნიშვნელოვანია, რომ სიმპტომების დაწყებისთანავე პაციენტი დარჩეს ადგილზე და ისე ითხოვოს დახმარება, ანუ არ დაიწყოს სიარული, რადგან გონების კარგვის შემთხვევაში შეიძლება წაბორძიკდეს და მიიღოს ტრავმა. გონს მოსვლის შემდეგ ეცადოს, რომ დარჩეს ისევ დაწოლილ ან წინ გადახრილ მდგომარეობაში, ვიდრე ბოლომდე კარგად არ იგრძნობს თავს და შემდეგ ნელა გასწორდეს.
- როგორია სინკოპეს მკურნალობა?
- როგორც აღვნიშნეთ, სინკოპე ხანმოკლე ეპიზოდია და სპონტანურად სრულდება დაახლოებით ერთ წუთში. ის შეიძლება იყოს ერთჯერადი ეპიზოდი ადამიანის ცხოვრებაში, ან განმეორდეს სხვადასხვა ინტერვალით. ასევე, ერთი და იგივე პაციენტის ცხოვრებაში, სხვადასხვა დროს სხვადასხვა მიზეზით იყოს გამოწვეული. მკურნალობა და მართვის პრინციპები განისაზღვრება სწორედ გამომწვევი მიზეზებით. როგორც დასაწყისში აღვნიშნეთ, ყველაზე საყურადღებოა ე.წ. კარდიალური სინკოპე. ამ შემთხვევაში დიაგნოსტიკაც და მართვაც კარდიოლოგების მჭიდრო ზედამხედველობის ქვეშ უნდა მოხდეს. სინკოპეს სხვა ფორმები პროგნოზულად სრულიად კეთილსაიმედოა. მნიშვნელოვანია, რომ სათანადოდ განწყობილმა პაციენტებმა დაიცვან გარკვეული წესები, მაგალითად, თავი აარიდონ მაპროვოცირებელ სიტუაციებს, დახუთულ და ცუდად ვენტილირებულ გარემოს, დაიცვან სითხის და საკვების მიღების რეჟიმი, რომ თავიდან აიცილონ გაუწყლოება. ეს ბავშვებთან მიმართებაში განსაკუთრებით მნიშვნელოვანია. უფრო სპეციფიკურ და ინდივიდუალურ რეკომენდაციებს უკვე ექიმი მიაწვდის პაციენტს და მისი ოჯახის წევრებს. 
ესაუბრა მარიამ ჩოქური

შეიძინე საბავშვო პროდუქტების ნაკრები ექსკლუზიურ ფასად ბმულზე 👉 bit.ly/3iF0YnF

წაიკითხეთ სრულად