Baby Bag

3 შეცდომა, რომელსაც მშობლების უმეტესობა შვილის ბაღში პირველად მიყვანის დროს უშვებს

3 შეცდომა, რომელსაც მშობლების უმეტესობა შვილის ბაღში პირველად მიყვანის დროს უშვებს
სკოლამდელი განათლება

​ 16 სექტემბერს ბაღებში არაერთი ბავშვი წავა პირველად. პატარებისთვის ახალ გარემოსთან შეგუება არ არის მარტივი. ამ პროცესს კი ხშირად მშობლები კიდევ უფრო ართულებენ შეცდომებით, რომლებსაც არცოდნის გამო უშვებენ.

ფსიქოთერაპიისა და კონსულტაციის სახლის  ​„დიალოგ​ის“ ფსიქოლოგი ქეთი მესხიშვილი გვესაუბრა იმ სამ გავრცელებულ შეცდომაზე, რომელიც მშობლებს შვილის ბაღში პირველად მიყვანისას მოსდით:

1. ბავშვის ტირილის იგნორირება

თუ ბავშვი ტირის, არ ჩერდება, აუცილებლად შეყევით ბაღში და მასთან ერთად იყავით ცოტა ხანი. უცხო ადამიანებთან და უცხო გარემოსთან ადაპტირება პატარებს განსაკუთრებით უჭირთ - ღიზიანდებიან, ტირიან. მართალია, მათ მოსწონთ ბაღის სიტუაცია (სათამშოები, ყურადღებიანი აღმზრდელები, ბავშვები), მაგრამ აქვთ შიში, რომ მშობლების გარეშე დარჩებიან. სწორედ ეს შიში გახლავთ ჭირვეულობის მიზეზი. პირველ დღეებში თუ ბავშვი ძალიან განიცდის, შესაძლებელია, ცოტა ხანი მშობელიც მასთან ერთად იყოს ბაღში, თუმცა ეს არ უნდა გაგრძელდეს დიდ ხანს, რადგან მერე უფრო გართულდება შეგუება.

2. პირველ დღეს ბავშვის მთელი დღე ბაღში დატოვება

ბაღში პირველად წასვლა განცდებთან არის დაკავშირებული. პატარები რომ არ გადავტვირთოთ ზედმეტი ემოციებით, მიაკითხეთ უფრო ადრე და სახლში წაიყვანეთ. ბაღში ადაპტაციის პროცესი შეიძლება მშობლების დაგვიანებამ გაართულოს. ეს რომ არ მოხდეს, ბავშვის ბაღში ყოფნის პირველი დღეები უფრო ხანმოკლე უნდა იყოს.


3. ბაღში სიარულის სანაცვლოდ ყოვედღიური წახალისების შეპირება

შეცდომაა, როდესაც მშობლები ბაღში სიარულის სანაცვლოდ, ბავშვს ყოველდღიურად წამახალისებელ ჯილდოს აძლევენ. შესაძლოა, კვირაში ერთხელ წავახალისოთ ბავშვი ბაღში სიარულისა და კარგად მოქცევისთვის, თუმცა ზოგიერთი მშობელი ბაღიდან გამოყვანისთანავე შვილს ჯილდოს სახით ხან კანფეტებს აძლევს და ხან სათამაშოებს. ბავშვს უნდა ავუხსნათ, რომ ბაღში სიარული აუცილებელია და ასეთი აუცილებელი რამეების გამო, მას მომავალში არავინ დააჯილდოებს.

სასურველია, სანამ ბავშვს ბაღში მიიყვანთ, დარწმუნდეთ, რომ ის ნამდვილად მზად არის ​​ამისთვის.​

#საბავშვო ბაღი

შეიძლება დაინტერესდეთ

სკოლამდელი განათლება

აღსაზრდელთა ელექტრონული რეგისტრაცია თბილისის საჯარო ბაღებში 11 ივნისს 10:00 საათიდან იწყება

აღსაზრდელთა ელექტრონული რეგისტრაცია თბილისის საჯარო ბაღებში 11 ივნისს 10:00 საათიდან იწყება
11 ივნისს 10:00 საათიდან იწყება აღსაზრდელთა ელექტრონული რეგისტრაცია თბილისის საჯარო ბაღებში. რეგისტრაცია წარიმართება სააგენტოს ვებგვერდზე: www.kids.org.ge.
​
პირველ ეტაპზე რეგისტრაციას შეძლებენ კონკრეტული სტატუსის მქონე ბენეფიციარები. ეს კატეგორიებია:
​
1) ჩვილ ბავშვთა სახლის ბენეფიციარები;
2) სოციალურად დაუცველი ოჯახის შვილები (100 000-მდე ქულა, რეგისტრირებული თბილისის მუნიციპალიტეტში);
3) სპეციალური საგანმანათლებლო საჭიროების მქონე (სსსმ) ბავშვები;
4) დედმამიშვილები (როცა აპლიკანტის დედმამიშვილი უკვე არის ამავე ბაღის აღსაზრდელი);
5) მარტოხელა მშობლის სტატუსის მქონე მოქალაქეთა შვილები.
6) მრავალშვილიანი ოჯახების სტატუსის მქონე მოქალაქეთა შვილები (ოთხი და მეტი შვილი)
7) სამხედრო მოსამსახურეთა შვილები (საქართველოს ტერიტორიული მთლიანობისთვის წარმოებულ ბრძოლებში, საერთაშორისო სამშვიდობი მისიებსა და სამსახურებრივი მოვალეობის შესრულების დროს საქართველოს თავდაცვის სამინისტროს დაჭრილი, დაშავებული, დაღუპული და უგზო-უკვლოდ დაკარგულ სამხედრო მოსამსახურეთა შვილები, ასევე რეგისტრაციის პერიოდში, საერთაშორისო სამშვიდობო ოპერაციებში მყოფი სამხედრო მოსამსახურეების შვილები).
​
ამასთან, სამხედრო მოსამსახურეების შვილები და გსმ სტატუსის მქონე ბენეფიციარები არ გაივლიან რეგისტრაციას ვებგვერდზე. ამ სტატუსის დამადასტურებელი დოკუმენტები უნდა გაგზავნონ ელექტრონული ფოსტით მისამართზე: [email protected]
​
რეგისტრაციის გადამოწმება ბავშვის პირადი ნომრით შეგიძლიათ იმავე გვერდზე, სადაც შეავსეთ მონაცემები.
​
ასევე, გაითვალისწინეთ, რომ რეგისტრაციას ვერ გაივლით ბავშვი, თუ ის უკვე ჩარიცხულია თბილისის რომელიმე სხვა საჯარო ბაღში. ბაღის შეცვლისათვის, ამჟამინდელი რეგისტრაციის ბაღს მოთხოვეთ რეგისტრაციის გაუქმება და მხოლოდ შემდეგ გაიარეთ რეგისტრაცია სასურველ ბაღში.
​

მეორე ეტაპის რეგისტრაცია დაიწყება 18 ივნისს, 10:00 საათიდან. აპლიკანტი ელექტრონულად დარეგისტრირებას შეძლებს ასაკობრივი კატეგორიის შესაბამისად. ამასთან, მშობლებმა რეგისტრაციის გავლისას უნდა გაითვალისწინონ, რომ ბავშვი სააღმზრდელო წლის დაწყების თარიღისთვის (2021 წლის 15 სექტემბრისთვის) უნდა იყოს ორი წლის.
​

ელექტრონულად დარეგისტრირება შესაძლებელი იქნება თბილისის საბავშვო ბაგა-ბაღების მართვის სააგენტოს ვებგვერდზე - www.kids.org.ge. რეგისტრაციის დღეს იმუშავებს მხოლოდ სარეგისტრაციო ფორმა, რათა მომხმარებელს ძებნა გაუმარტივდეს და ინფორმაციის შეყვანისას დრო დაზოგოს.
​

რეგისტრაცია გაგრძელდება ადგილების შევსებამდე. ხოლო იმ აღსაზრდელების მშობლებს, რომლებიც ვერ შეძლებენ ბავშვის დარეგისტრირებას კონკრეტულ ბაღში, შესაძლებლობა ექნებათ 21 ივნისიდან ამავე ბაღში წარადგინონ განცხადება სარეზერვო სიაში მოხვედრის თაობაზე.
​

დარეგისტრირებული აღსაზრდელის მშობელმა საჭირო საბუთები- დაბადების მოწმობის ასლი, 2 ფოტოსურათი (ბიომეტრიული), ჯანმრთელობის დამადასტურებელი ცნობა და მშობლების პირადობის მოწმობის ასლი უნდა წარადგინოს შესაბამის ბაღში.

წაიკითხეთ სრულად
გასათიშად დააჭირეთ ESC.