დღეს ხუთშაბათია და მედიაპორტალი MomsEdu.ge ტრადიციულ რუბრიკას - მეან-გინეკოლოგის რეკომენდაციებს წარმოგიდგენთ. ამჯერად მეან-გინეკოლოგი და ქირურგი ეკა ბუკია მოგაწვდით კომპეტენტურ ინფორმაციას ისეთ აქტუალურ თემებზე, როგორებიცაა: რამდენად საშიშია ორსულისთვის კორონავირუსით ინფიცირება, გადაეცემა თუ არა ვირუსი ნაყოფს ორსულობის ან მშობიარობის დროს და გადადის თუ არა კორონავირუსი დედის რძით?
ორსულობისას ძალიან ბევრი კითხვა უჩნდება ორსულს. დღევანდელი პანდემიის პირობებში ბევრ ქალს აინტერესებს, რა ზეგავლენას მოახდენს Covid-19-ით დაინფიცირების შემთხვევაში ვირუსი ორსულობაზე, ნაყოფზე. აუცილებლად უნდა შეატყობინოთ თქვენს მკურნალ ექიმს ტემპერატურის მატების შესახებ, ვინაიდან ზოგიერთი ვირუსული დაავადება ზეგავლენას ახდენს თქვენი ნაყოფის განვითარებაზე. ასეთ ვირუსულ დაავადებებს მიეკუთვნება: ციტომეგალოვირუსი, წითელა, ჩუტყვავილა, ჰერპეს ვირუსი.
2019 წელს მსოფლიოში გამოჩნდა ახალი ვირუსი - კორონავირუსი, რომელიც სასუნთქ გზებზე მოქმედებს.
Covid-19 ისევ რჩება ახალ დაავადებად და ჯერ კიდევ ბოლომდე არ არის შესწავლილი. ასევე ბოლომდე არ არის დადგენილი, როგორ მოქმედებს ის ორსულ ქალებსა და ნაყოფზე.
რა უნდა იცოდეთ კორონავირუსზე?
კორონავირუსი არის ვირუსების ოჯახი, რომელიც ვრცელდება როგორც ადამიანებში, ასევე ცხოველებში და შესაძლოა, გამოიწვიოს როგორც მარტივი გაციება, ასევე მძიმე რესპირატორული დაავადებები. სიმპტომები ვლინდება ინფიცირებულ ადამიანთან კონტაქტიდან 2-14 დღეში.
ყველაზე ხშირი სიმპტომებია:
- ხველა
- მაღალი ტემპერატურა
- ქოშინი
- დაღლილობა
ასევე:
- შემცივნება
- ყელის ტკივილი
- თავის ტკივილი
- გემოსა და ყნოსვის დაკარგვა
- კუნთების ტკივილი
არიან თუ არა ორსულები მეტად მგრძნობიარე ვირუსის მიმართ?
ჯერჯერობით ვირუსი ბოლომდე შესწავლილი
არ არის, ამიტომ დაბეჯითებით ამ კითხვაზე პასუხი ამ ეტაპისთვის არ არსებობს. თუმცა სასუნთქი გზების ინფექციების მიმართ ორსულები მეტად მგძნობიარენი არიან, ვინაიდან ერთი მხრივ, ორსულებში ქვეითდება იმუნური სისტემა, მეორე მხრივ, ორსულობა მოქმედებს ფილტვებისა და გულის დატვირთვაზე.
მკურნალობის რომელი მეთოდებია უსაფრთხო ორსულებში?
კოვიდის მკურნალობა ჰგავს სხვა რესპირატორული დაავადების მკურნალობის მეთოდებს. ორსულებში მაღალი ტემპერატურის დროს გამოიყენება სიცხის დამწევი - პარაცეტამოლი, სითხეებით დატვირთვა. თუ ვერ ხერხდება ტემპერატურის დაწევა, გეწყებათ ქოშინი ან ღებინება, სასწრაფოდ მიმართეთ ექიმს.
რამდენად საშიშია ორსულისთვის კორონავირუსით ინფიცირება?
ისევ და ისევ, ვინაიდან ვირუსი არ არის ბოლომდე შესწავლილი, ზუსტი და კონკრეტული პასუხები არ არის. მაგრამ, ორსულობის გამოსავალი კოვიდინფიცირებულ ქალებში შესაძლოა, უფრო მძიმე იყოს, ვიდრე არაინფიცირებულ ორსულებში. შესაძლებელია იყოს თვითნებითი აბორტები, ნაადრევი მშოიარობა, მკვდარშობადობა.
ორსულობის პირველ ტრიმესტრში მაღალმა ტემპერატურამ, მიუხედავად მისი გამომწვევი მიზეზისა, შესაძლოა, გამოიწვიოს ნაყოფის განვითარების ანომალია. ეს ყველაფერი შემაშინებლად ჟღერს, თუმცა საქმე არც ისე ცუდადაა. არის დადასტურებული კვლევები, რომ 147 გამოკვლეული ორსულიდან 8% იყო ინფიცირებული მძიმე ფორმით და მხოლოდ 1% იყო კრიტიკულ მდგომარეობაში.
გადაეცემა თუ არა ვირუსი ნაყოფს ორსულობის ან მშობიარობის დროს?
ეს ნაკლებ სავარაუდოა. ვინაიდან კოვიდით ინფიცირების გზა ჰაერწვეთოვანია (ინფიცირებული ადამიანის ხველა, დაცემინება). თქვენი ბავშვის ამ გზით დაინფიცირება შესაძლოა, მოხდეს მხოლოდ მშობიარობის შემდეგ.
მცირე ექსპერიმენტში, რომელშიც მონაწილეობდა ორსულობის მე-3 ტრიმესტრში დაინფიცირებული 9 ჩინელი ქალბატონი, სანაყოფე წყლებსა და ჭიპლარის სისხლში არ იქნა ნანახი ვირუსი. ასევე ახალშობილის ყელის ნაცხიდან აღებულ მასალაშიც არ იქნა ნანახი ვირუსი.
ასევე არის ცნობები შედარებით უფრო მასშტაბური კვლევიდან. კვლევაში მონაწილე კოვიდინფიცირებული ქალებიდან, რომელთაც იმშობიარეს, 3 ახალშობილი აღმოჩნდა კოვიდდადებითი, დანარჩენი 30 ახალშობილი კოვიდუარყოფითი. ამიტომ არ არის დაზუსტებული ნამდვილად ინფიცირებულები დაიბადნენ ახალშობილები, თუ დაბადებიდან მალევე დაინფიცირდნენ.
სჭირდება თუ არა ქალს საკეისრო კვეთა მშობიარობის მომენტისისთვის ინფიცირების შემთხვევაში?
ფიზიოლოგიურად იმშობიარებთ თუ საკეისრო კვეთის გზით, ეს დამოკიდებულია ბევრ ფაქტორზე და არა მხოლოდ კოვიდინფიცირებაზე. ისევ და ისევ, თუ თქვენ არ გაქვთ საკეისრო კვეთის ჩვენება, მხოლოდ კოვიდინფიცირების გამო საკეისრო კვეთის ჩატარება არ არის რეკომენდებული.
როგორ მოვიქცეთ თუ დაგეგმილია საკეისრო კვეთა ან მშობიარობის აღძვრა არაინფიცირებულ ორსულებში?
მიუხედევად იმისა, ხართ თუ არა ინფიცირებული კლინიკაში მისვლამდე 24-28 საათით ადრე უნდა ჩააბაროთ Pჩღ-ტესტი ცოვიდ-ზე, ვინაიდან შესაძოა დაავადება უსიმპტომოდ მიმდინარეობდეს. გარდა ამისა, ოპერაციული ჩარევა არის რისკი არა მხოლოდ თქვენთვის, არამედ მედ პორსანილისთვის. ამიტომ აუცილებელია გეგმიური შემთხვევების დროს მედ პერსონალისა და სხვა ორსულთა ან მელოგინეების დაცვის მინით გავლილი გქონდეთ შესაბამისი კვლევა.
გადადის თუ არა კორონავირუსი დედის რძით?
.jpeg)
რამდენიმე ჩატარებული კვლევის შედეგად დადასტურდა, რომ დედის რძით კოვიდინფექცია არ გადადის. თუმცა, საბოლოო პასუხის მისაღებად მაინც აუცილებელია კიდევ კვლევების ჩატარება. მეძუძური დედის კოვიდინფიცირების შემთხვევაში აუცილებელია დედამ ატაროს პირბადე (ნიღაბი), კარგად დაიბანოს ხელები კვების დაწყებამდე და, რა თქმა უნდა, დღეში რაც შეიძლება ხშირად.
გისურვებთ ჯანმრთელობას!
წაიკითხეთ სრულად
