ამერიკაში მოღვაწე ქართველი ექიმი ზურაბ გურული სოციალურ ქსელში ისტორიული დღის, ანუ კოვიდის საწინააღმდეგო ვაქცინის დამტკიცების შესახებ წერს. გთავაზობთ მის ნათქვამს სიტყვა-სიტყვით:
,,ისტორიული დღე იყო 2020 წლის 10 დეკემბერი. FDA-მ კოვიდ-19-ის საწინააღმდეგო ვაქცინის გამოყენების ნებართვა გასცა. 17 ხმა 4-ის წინააღმდეგ. ერთმა თავი შეიკავა. დარწმუნებული ვარ, იმ 17-დან ვერცერთი ვერ დაიძინებდა ამ საღამოს მშვიდად.
ნაცნობი შეგრძნებაა. სიკვდილთან ყოველი დამარცხებისას განუწყვეტლივ ფიქრობ, შეიძლებოდა თუ არა კიდევ რამის გაკეთება და შეცდომა ხომ არ დაუშვი სადმე; იქნებ ვერ იყავი საკმარისად გაბედული; იქნებ უფრო ფრთხილი უნდა ყოფილიყავი; იქნებ... იქნებ .. იქნებ ის ოთხი ადამიანი იყო მართალი; ისინიც ხომ ექსპერტები არიან? იქნებ ... იქნებ ...
დიახ, აქვს ვაქცინებს თავისი გართულებები. ყველამ ვიცით. მაგრამ კაცობრიობამ მიიღო მათი გამოყენების რისკი. პლანეტა ვერ გაჩერდება. ადამიანთა სამყარომ მიიღო და გაითავისა საკუთარ არსებობასთან დაკავშირებული ხიფათები, გათვალა უპირატესობები და პრაგმატული ნაბიჯებით გააგრძელა წინსვლა.
კოვიდმა მთელი წლით გაყინა პლანეტა; გადაასხვაფერა. ესპანური გრიპი ბევრად უფრო ფატალური პანდემია იყო, მაგრამ კოვიდი რატომღაც უფრო შთამბეჭდავი აღმოჩნდა. ალბათ იმიტომ, რომ მსოფლიო საოცრად დაპატარავდა და თან აჩქარდა. ინტერნეტმა შექმნა ეს ილუზია. ქვეყნებმა ერთმანეთის მოპირდაპირედ მდგარი კორპუსების მაცხოვრებლებივით დაიწყეს ერთმანეთის ფანჯრებში ჭვრიტინი, დაწვრილებით შეისწავლეს მეზობლების ქცევა, რუტინა; მოწმეები გახდნენ ერთმანეთის ბედნიერებისა და უბედურების, სიხარულისა და შიშის.
ნეტავ როგორ გავიხსენებთ ამ დღეს რამდენიმე წლის შემდეგ?
როგორც კაცობრიობის დიდი გამარჯვების დღეს? ასეთი სისწრაფით არასოდეს უმუშავია პლანეტის გაერთიანებულ გონს მიკროსამყაროს წინააღმდეგ. ერთ წელიწადზე ნაკლებ დროში შეიქმნა ვაქცინა, ყველაზე ეფექტური და გამანადგურებელი იარაღი სამყაროთაშორის ბრძოლაში. რა სიზუსტის აღმოჩნდება ეს იარაღი? გასროლისას მსროლელსაც ხომ არ დააზიანებს? არავინ იცის აბსოლუტური სიზუსტით, მაგრამ მოცდა აღარ შეიძლება. მხოლოდ ვირუსი არ ემუქრება პლანეტას, შეუცნობელის მოლოდინის შიში დათრგუნავს და დააძაბუნებს.
ექიმებზე უკეთ არავინ იცის ამ შიშის ძალა. უკურნებელი სენით დაავადებული პაციენტი ხომ შიშით მანამ კვდება, სანამ თავად დაავადება მოერევა ორგანიზმს. ამ შიშის გავრცელება უნდა აღიკვეთოს. ვაქცინა იმედია, რწმენაა და იმდენად რაციონალურია ეს რწმენა, რამდენადაც მსოფლიო გონი ენდობა საკუთარ თავსა და შესაძლებლობებს.
შეუცნობლის მიმართ შიშის გამო პლანეტის ნაწილი შეგნებულად უარს იტყვის ამ ვაქცინაზე, მაგრამ ეს შიში აუცილებლად გაიფანტება დროთა განმავლობაში. როგორც კი ინფორმაცია, ცოდნა, გამოცდილება დაგროვდება, შიშის მოქმედების არეალიც შემცირდება.
მაგრამ, მაინც ... ნეტავ ვის უფრო მშვიდად სძინავს ამ ღამით, იმ 17-ს თუ იმ 4-ს?
ალბათ ერთ დღეს გავიგებთ. მანამ კი ყველას გილოცავთ პირველ ნაბიჯს ჩვენი ეგზომ მობეზრებული და ეგზომ მონატრებული რუტინის დასაბრუნებელ გზაზე,'' - აღნიშნავს ზურაბ გურული.
გააზიარეთ პოსტი
არ დაგავიწყდეთ !!!
Momsedu.ge-მ თქვენთვის, ქალებისთვის შექმნა ახალი სივრცე, სადაც ყველაზე მცოდნე დედები იყრიან თავს. ჯგუფის დასახელებაც სწორედ ასეა - „მცოდნე დედების ჯგუფი“, რომლის საშუალებით დედები ერთმანეთს საკუთარ გამოცდილებას გაუზიარებენ. (ჯგუფში გასაწევრიანებლად ნახეთ ბმული - „მცოდნე დედების ჯგუფი“)
კორონავირუსის ახალი ვაქცინა ტესტირებისთვის მზად არის
ამერიკულმა ბიოტექნოლოგიურმა კომპანიამ კორონავირუსის საექსპერიმენტო ვაქცინა სამთავრობო მკვლევარების ჯგუფს იმუნიზაციის პროცესზე მუშაობის დაწყებიდან 6 კვირის შემდეგ გადაუგზავნა. აღნიშნული ვაქცინის გამოყენებით ადამიანებზე ცდების ჩატარება აპრილში იგეგმება. ტესტირების პროცესი, სავარაუდოდ, ერთი წლის მანძილზე გაგრძელდება, რათა მკვლევარებმა ვაქცინის ვარგისიანობის დადასტურება შეძლონ.
კომპანია Moderna-ს მიერ შექმნილი ვაქცინის პირველი სერია mRNA-1273-ის სახელით არის ცნობილი. მისი პირველადი ნიმუშები ალერგიისა და ინფექციური დაავადებების ეროვნულ ინსტიტუტში გადაიგზავნა. Moderna-ს ოფიციალური წარმომადგენლების ცნობით ვაქცინის პირველი ამპულა ამერიკის შეერთეულ შტატებში დაგეგმილ ცდებში უნდა გამოიყენონ. ცდისპირები სრულიად ჯანმრთელი ადამიანები იქნებიან.
არ დაგავიწყდეთ !!!
Momsedu.ge-მ თქვენთვის, ქალებისთვის შექმნა ახალი სივრცე, სადაც ყველაზე მცოდნე დედები იყრიან თავს. ჯგუფის დასახელებაც სწორედ ასეა - „მცოდნე დედების ჯგუფი“, რომლის საშუალებით დედები ერთმანეთს საკუთარ გამოცდილებას გაუზიარებენ. (ჯგუფში გასაწევრიანებლად ნახეთ ბმული - „მცოდნე დედების ჯგუფი“)
„ვოლ სთრით ჟურნალის“ ინფორმაციით, ვაქცინის რამდენიმე ამპულა მოხალისეებზე გამოიცდება, რათა დადგინდეს იწვევს თუ არა ის ორგანიზმში ვირუსის საწინააღმდეგო იმუნურ რეაქციას. CNN-ის ცნობით, აღნიშნულ კვლევაში სულ 45 ადამიანი მიიღებს მონაწილეობას. კლინიკური ექსპერიმენტების წარმატებით განხორციელების შემთხვევაში, ვაქცინის მოქმედებაზე დაკვირვება და მიღებული შედეგების შეფასება კვლავ გაგრძელდება, რაც მისი ფართოდ გავრცელების წინაპირობას შექმნის.
ფარმაცევტული კომპანიები და ჯანდაცვის სფეროს წარმომადგენლები კორონავირუსის საწინააღმდეგო ვაქცინის შემუშავებაზე აქტიურად მუშაობენ. აღნიშნული ვირუსით მსოფლიო მასშტაბით უკვე 80 000-ზე მეტი ადამიანია ინფიცირებული. ექსპერტები ვაქცინის ეფექტიანობის შეფასებას მაქსიმალურად მოკლე დროში გეგმავენ, რადგან მუშაობის პროცესი საგანგებო რეჟიმში მიმდინარეობს. მიუხედავად ამისა, ახალი ვაქცინის ფართო გავრცელებისთვის 18 თვე მაინც არის საჭირო.
Moderna ერთადერთი კომპანია არ არის, რომელიც კორონავირუსის დამარცხებას ცდილობს. ვაქცინის შემუშავებაზე ისეთი გიგანტური ფარმაცევტული კომპანიები მუშაობენ, როგორებიცაა Johnson & Johnson და GlaxoSmithKline. მუშაობის პროცესში აქტიურად არიან ჩართული სამთავრობო მკვლევარებიც.
ჯანდაცვის მსოფლიო ორგანიზაციის ცნობით კომპანია Gilead-ის მიერ წარმოებული პრეპარატი რემდესივირი კორონავირუსის საწინააღმდეგოდ ეფექტურად მუშაობს. Moderna-ს მიერ შემუშავებული ვაქცინის ვარგისიანობა ჯერ დადასტურებული არ არის, მაგრამ ვაქცინის წარმოება რეკორდულად მცირე დროში დასრულდა. კორონავირუსზე გენეტიკური ინფორმაციის მოპოვების შემდეგ Moderna-მ ვაქცინის შექმნა სულ რაღაც 42 დღეში შეძლო.
რამდენიმე წლის წინ განსხვავებული ტიპის კორონავირუსის აფეთქების დროს ვაქცინის შემუშავებას დაახლოებით 20 თვე დასჭირდა. კომპანია Moderna ვაქცინას ახალი გენეტიკური მეთოდების გამოყენებით აწარმოებს. ახალი ვაქცინა ორგანიზმში სპეციალურ პროტეინებს წარმოქმნის, რომლებსაც ვირუსის წინააღმდეგ ბრძოლის უნარი შესწევთ. აღნიშნული მეთოდის გამოყენებით კომპანიამ უკვე წარმატებით შექმნა 6 ვაქცინა, რომელთაგან ერთ-ერთი უკვე ტესტირების მეორე ფაზას გადის. ახალი გენეტიკური მეთოდი მკვლევარებს ვაქცინის სწრაფად და მინიმალური დანახარჯებით შემუშავებაში ეხმარება, რაც მას ტრადიციულ მეთოდებთან მიმართებაში დიდ უპირატესობას ანიჭებს.
