ნევროლოგი, ნინო გზირიშვილი საუბრობს ძილის ჰიგიენაზე და ციფრული ტექნიკისგან გამოწვეულ უძილობის პრობლემაზე, რომელიც პანდემიამ კიდევ უფრო გაამძაფრა:
ზოგადად, ძილი არის ფიზიოლოგიური მდგომარეობა, მიმდინარეობს ჩვენს ორგანიზმში და დაყრდნობილია, სხვადასხვა ქიმიურ პროცესზე. სტიმული, რომელიც იწვევს ძილს, არის ბუნებრივი ჰორმონი მელატონინი და ის გამომუშავდება მხოლოდ მაშინ, როდესაც გარეგანი სტიმულაციით ხდება რეაგირება(დღის და ღამის მონაცვლეობა). დაღამებისას გამომუშავდება მელატონინი, თანდათანობით სისხლში მისი კონცენტრაცია მატულობს და მაქსიმალურ დონეს აღწევს 10 - დან 11 საათამდე. აქედან გამომდინარე, ჩვენი ფიზიოლოგიური ძილი დგება 11 საათიდან.
ციფრული ტექნიკა ძილზე დრამატულ გავლენას ახდენს. გვიწევს სხვადასხვა ტექნიკასთან ურთიერთობა, ამან კი განაპირობა თავის ტვინის მექანიკური სტიმულაცია, ტექნიკის ნათება მის აქტივობას იწვევს და შესაბამისად, არ დგება ძილი".
ნევროლოგის თქმით, რეკომენდებულია დაძინებამდე 1.5 საათით ადრე ტექნიკის გამოყენება შევწყვიტოთ. მისი ზეგავლენით გამოწვეული უძილობის გამო მთელ რიგ პრობლემებს ვაწყდებით:
„მაგალითად, დღის მანძილზე ძილიანობის შედეგად არ გვაქვს შრომის ადეკვატური რეჟიმი, შესაძლოა ჩაგვეძინოს საჭესთან. ასევე, ძილის დარღვევა იწვევს წონის მატებას, რასაც თავის მხრივ, ენდოკრინოლოგიურ პრობლემებამდე მივყავართ.
2017 წელს ძილის ფედერაციამ გამოაქვეყნა ძალიან საინტერესო კვლევა. შეისწავლა ადამიანები, 8 - დან 17 წლამდე და მათი დამოკიდებულება ტექნიკასთან. ძირითადად სამ კომპონენტზე იყო გამახვილებული ყურადღება: წონის მასის ინდექსი, ყურადღების დეფიციტი, ძილის ხარისხი. აქ გამოიკვეთა, რომ ციფრული ტექნიკა განაპირობებს ჩაძინების გახანგრძლივებას, რაც ძალიან ცუდია ჯანმრთელობისთვის, ფიზიოლოგიური ძილის შემოკლებას და დღის განმავლობაში ბავშვების აგრესიულად ყოფნას“.
წყარო: "დილა მშვიდობისა საქართველო"
