„გურამ დოჩანაშვილს, ერთხელ, ტელეგასაუბრებისას ვკითხე - ღმერთს რომ შეხვდებით, რას ეტყვით-მეთქი. უცებ ცრემლი მოაწვა და ენა დაება“

3 წლის წინ

ავტორი: მწერალი გიორგი კეკელიძე

გურამ დოჩანაშვილს, ერთხელ, ტელეგასაუბრებისას ვკითხე - ღმერთს რომ შეხვდებით, რას ეტყვით-მეთქი. უცებ ცრემლი მოაწვა და ენა დაება. მეო, ისეთი დიდი ცოდვილი ვარო, ისეთი საშინელი დამნაშავე - მე რა უნდა ვუთხრაო. კამერებს მიღმა კიდევ გავცვალეთ ამაზე ორი სიტყვა და მას მერე ვფიქრობ. განა მხოლოდ გურამზე. სხვებიც მინახავს - ნაკლები - სახელგანთქმული და მეტი - სრულიად უცნობი ადამიანი. მორწმუნეც და ურწმუნოც. საკუთარი ქცევით და წესით სულ დარჩეული ხალხი. მინახავს და ვიცი - დანაშაულის განცდა ყველაზე მეტად ასეთებს სტანჯავს ხოლმე, თითქმის უდანაშაულო ადამიანებს. მამაჩემი ფიქრობდა, რომ მთელი ცხოვრება ბავშვობაში მოკლული ბუს გამო ისჯებოდა. სიზმრად ნახულობდა და კანკალით იღვიძებდა. ბაბუაჩემი, 1971 წელს რომ წისქვილიდან მეზობლის ფქვილის ნაწილი წამოიღო, იმას აბრალებდა ყველა უბუდრებას. სხვები, ასეთ ამბებს მეხსიერებასაც არ გააკარებდნენ და თუ შეიტყობდნენ, რომ სხვა დარდობს, იმ სხვას აუცილებლად მოუწყობდნენ სასამართლოს. თანამედროვე სამყარო ხომ ისედაც სხვის თვალში დირეს ძებნის სპორტის დიდი მოედანია, სადაც არც პატიების თხოვნა ფასობს და არც შენდობის სურვილი აქვს ვინმეს. ვირტუალურ გილიოტინად აღმართული ახალი ,,ლინჩის სასამართლო" კითხვებს არ სვამს - მას მხოლოდ პასუხები აქვს და ეს პასუხები უკვე გულისხმობენ საშინელ განაჩენს. დიდი და ნამდვილი დამნაშავეები, სადღაც, მოედანს მიღმა ხითხითებენ, გურამისმაგვარებს კი, საკუთარი, უმცირესი ცოდვები რომ ისედაც სტანჯავთ, იოლად ვერევით და ვქოლავთ. ვიცი არაერთი - ერთმანეთს ასმენდა, სცემდა, კლავდა და ძარცვავდა - კი, მეორე ადამიანის ფიქრს ვერასდროს გაიგებ, მაგრამ მაინც ღრმად მწამს - მათი დარდი და ქენჯნა მეათასედია გურამის სევდასთან, რომელიც მხოლოდ ადამიანად დაბადებას ინანიებდა.

ჩვენი ჭორაობა, რაც ცხადია, ქვეყნად ყოფნის მთავარ ნიშანთაგანია, მხოლოდ მესამის ლანძღვას და ცოდვების ძებნას გულისხმობს. აბა, წარმოიდგინეთ სადმე, სამზარეულოში მსხდარი ან ვირტუალურ სოციალურ ჯგუფში შეკრებილი ორი ჩვენგანი, ვინმეს აქებდეს და მასზე კარგ ამბებს ყვებოდეს - ხომ გაგეცინათ? რა თქმა უნდა - კი. ან გაგეცინათ, ან მაღალი ,,ლიბერალური" კვარცხლბეკიდან დაიქირქილეთ: ,,რა მორალიზმია". გურამი, სწორედ ამ ქირქილს ემალებოდა. რადგან მას სიყვარულის არ რცხვენოდა და სწორედ ამგვარი სიყვარულის გამო შეარცხვენდა ბევრი - საჯაროდ და ხშირად რომ ელაპარაკა.

მამაჩემზეც გითხარით. კი, მამაჩემი მთელი ცხოვრება ნანობდა, 16 წლისამ გეკოს თოფით ბუ რომ მოკლა. მიყვებოდა ცრემლგამხელილი თვალებით: თავიდან გამიხარდა და ყიჟინით გავიქეცი. მივედი. დავხედე. ამომხედა და თვალებით მითხრა, შვილებთან მივდიოდიო. მამაჩემის ფიქრით ამაზე მოუნანიებელი ცოდვა არ არსებობდა. ასე მგონია, სიკვდილისას ეს ბუ მოფრინდა მასთან და უთხრა: გამომყევი. მამაჩემს შეეშინდა, მაგრამ ბუ არ ჩანდა ბოროტი: „გამომყევი, მე გაპატიე“ - მაშინ მამაჩემი შეაჯდა ბუს და გაფრინდნენ ბუ და მამაჩემი. გურამს კიდევ ბუც არ მოუკლავს. ჰოდა, ღმერთი ალბათ კეჟერაძეების ამბავს თუ აყოლებს, აყოლებს და იცინიან.

იზოლაციაში მყოფ ადამიანებს სტრესის დასაძლევად და ყოველდღიურ რუტინასთან გასამკლავებლად მოტივაცია ნამდვილად სჭირდებათ. გთავაზობთ ციტატებს, რომლებიც დღის სასიამოვნოდ დაწყებაში დაგეხმარებათ და თავდაჯერებას შეგმატებთ.

1. ,,ნებისმიერი წარმატების საწყისი წერტილი სურვილია.“ - ნაპოლეონ ჰილი.

2. ,,ჩვენ ყველა ოცნების ასრულება შეგვიძლია, თუ მიზნამდე მისასვლელად გამბედაობა გვეყოფა.“ - უოლტ დისნეი.

3. „მაშინაც კი, როდესაც ჯოჯოხეთის გავლა გიწევთ, სვლა განაგრძეთ!“ - უინსტონ ჩერჩილი

4. „წარმატება უიღბლობიდან უიღბლობამდე ენთუზიაზმის დაკარგვის გარეშე სვლაა.“ - უინსტონ ჩერჩილი.

5. „შესაძლებლობები არ არსებობს, მათ თქვენ ქმნით.“ - კრის გროსერი.

6. „შეშლილსა და გენიოსს შორის მანძილი წარმატებით იზომება.“ - ბრიუს ფერშტეინი.

7. „თუ საკითხის შესახებ მარტივად საუბარი არ შეგიძლიათ, ე.ი. თქვენ ის კარგად არ გესმით.“ - ალბერტ აინშტაინი.

8. „ლიდერს მიმდევართაგან ინოვაციურობა გამოარჩევს.“ - სტივ ჯობსი.

9. „სრულყოფილება თუ გიზიდავთ, მიზნის მიღწევა დღესვე შეგიძლიათ. ამ წამსვე მიზნად დაისახეთ, რომ საქმეს მხოლოდ სრულფასოვნად შეასრულებთ.“ - თომას უოტსონი.

10. „ადამიანები ამბობენ, რომ მოტივაცია უსასრულოდ არ გრძელდება, ასევეა ბანაობაც. სწორედ ამიტომ ვბანაობთ ყოველდღიურად.“- ზიგ ზიგლარი.

11. „წარმატება საკუთარი თავის მოწონებაა, იმის მოწონება, თუ როგორ აკეთებთ საქმეს, რომელიც მოგწონთ.“ - მაია ანჯელოუ.

12. „წარმატებულ ადამიანებს ძლიერი მამოძრავებელი იმპულსი აქვთ. რაც უფრო მეტ წარმატებას აღწევენ ისინი, მეტად ოცნებობენ წარმატებაზე და მისკენ მიმავალ ახალ გზებს პოულობენ. როდესაც ადამიანი წარუმატებელია, ის გამუდმებით დაღმავალ ხაზს მიუყვება.“ - ტონი რობინსი.

13. „როგორც კი იგრძნობთ, რომ უმრავლესობის მხარეს ხართ, შეჩერდით და დაფიქრდით!“ - მარკ ტვენი.

14. ,,წარმატებული მებრძოლი ჩვეულებრივი ადამიანია, რომელსაც ლაზერისებრი ფოკუსი აქვს.“ - ბრიუს ლი.

15. ,,საცობში არ მოხვდებით, თუ სხვებზე მეტ მანძილს გაივლით.“ - როჯერ შტაუბახი.

ახლა კი დროა საკუთარი ყოველდღიურობის შეცვლაზე იზრუნოთ. მთავარი ფრაზა, რომელიც თქვენს კრედოდ უნდა აქციოთ, შემდეგია: „მოქმედება სიტყვების ნაცვლად!“

მომზადებულია indiatoday.in-ის მიხედვით

თარგმნა ია ნაროუშვილმა

წაიკითხეთ სრულად

შეიძლება დაინტერესდეთ