„იქნებ, ვიტამინები მიგვეცა, რაკი ბოსტნეულს არ ჭამს?“ - როგორ შევაყვაროთ ბავშვს ბოსტნეული

„იქნებ, ვიტამინები მიგვეცა, რაკი ბოსტნეულს არ ჭამს?“ -  როგორ შევაყვაროთ ბავშვს ბოსტნეული

როგორ შევაყვაროთ ბავშვს ბოსტნეული? - ამ თემაზე პედიატრი თამარ ობგაიძე ​წერს. გთავაზობთ მის ნათქვამს სიტყვა-სიტყვით:

„შევთანხმდეთ თავიდანვე, ეს ბლოგი არ ეხება 1 წლამდე ასაკის ჩვილს.

წუნიებს ამქვეყნად რა გამოლევს?! ზოგს ხორცი არ უყვარს, ზოგი ბურღულზე ამბობს უარს, თუმცა ყველაზე ხშირად ბოსტნეულისმოძულე პატარების მშობლები მომმართავენ ამ კითხვით, როცა საქმე ჯანმრთელ კვებას ეხება.
კითხვას აუცილებლად მოჰყვება შემოთავაზება - „და იქნებ, ვიტამინები მიგვეცა, რაკი ბოსტნეულს არ ჭამს?“
უპირატესობა სწორედ ბუნებრივ აქტიურ ნივთიერებებს ენიჭება. და თანაც, ბოსტნეულში ვიტამინების გარდა მინერალები, ანტიოქსიდანტები, საკვები ბოჭკოებია და სხვა საჭირო ნივთიერებებია. ეს ნივთიერებები აძლიერებს ბავშვის ორგანიზმს და მრავალი დაავადებისაგან იცავს.
სინთეზური ვიტამინები მხოლოდ აუცილებლობის შემთხვევაში ინიშნება და აუცილებლად ექიმის რეკომენდაციით, მას შემდეგ, რაც დადგინდება, კონკრეტულად რა ჯგუფის ვიტამინი სჭირდება ბავშვს. უმჯობესია, თუ ვიტამინური პრეპარატი ნატურალური ნედლეულისაგან იქნება მომზადებული.

ვნახოთ, რა ადგილი უჭირავს ჯანსაღი კვების პრინციპის მიხედვით ბოსტნეულს დღიურ რაციონში.

„ჩემი თეფშის“ პრინციპი

ეს არის ჯანსაღი კვების უახლესი მოდელი, რომელიც ითვალისწინებს, თუ რა რაოდენობით უნდა იყოს დღის რაციონში სხვადასხვა პროდუქტი
იმისთვის, რომ ჯანმრთელები ვიყოთ. გაიდლაინი შემუშავებულია აშშ-ის აგრიკულტურის დეპარტამენტის მიერ 2011 წელს, გასულ წლებში ამავე დეპარტამენტის მიერ შემუშავებულ იქნა კვების პირამიდა, რომელიც საჭირო საკვები პროდუქტების რაოდენობებს თაროების მიხედვით გვიჩვენებდა.
„ჩემი თეფშის“ კონცეფციის მიხედვით, საკვების დღიური მოცულობის 30% პროცენტი ეთმობა ბოსტნეულს, 20% - ხილს, 30% - ბურღულეულს და კიდევ 20% ცილების სხვადასხვა წყაროს - ხორცს, პარკოსნებს, თევზს, თხილეულს.

სანამ სუფრას მიუსხდებით

ბოსტნეულისაგან მომზადებული კერძის მომზადებაში ბავშვიც დაიხმარე, რა თქმა უნდა, ასაკის გათვალისწინებით. ნუ დაავალებ ადრეული ასაკის ბავშვს ბოსტნეულის დაჭრას ტრავმატიზმის თავიდან ასაცილებლად. კერძის მომზადებში შეტანილი უმცირესი წვლილიც ხშირად საკმარისია კერძის მოსაწონებლად.

რით დავიწყოთ?

საყოველთაოდ ცნობილია, მშობლების მაგალითს პატარასთავის დიდი ძალა აქვს. ამიტომ აუცილებლად აჩვენე ადრეული ასაკიდანვე, როგორი სიამოვნებით მიირთმევ ბოსტნეულისაგან მომზადებულ კერძებს. აღნიშნე, რომ გიყვარს ბოსტნეული.
იმისათვის, რომ ბავშვი დარწმუნდეს ოჯახის წევრების არჩევანში, ყოველთვის ეცადე, რომ ერთდროულად ისადილო. სუფრის ყველა წევრის სწორი არჩევანი შენი ჯიუტი პატარასთვის უხშირესად გადამდებია.
სადილის დროს აუცილებლად ისაუბრე ბოსტნეულის სარგებლიანობაზე ბავშვისათვის გასაგებ ენაზე.
აუცილებლად წაახალისე პატარა წუნია ბოსტნეულის კერძის მიღების შემდეგ.
ყურადღება მიაქციე კერძის გარეგნულ მხარეს და სერვირებას. პატარებსაც უყვართ ლამაზად გაფორმებული საკვები.
შეთავაზე ბოსტნეულისაგან მომზადებული კერძი წასახემსებლად, კვებათა შორის. ის შეიძლება იყოს უმი სახით ან გემრიელი, ჯანმრთელი სოუსით შეზავებულიც. მაგალითად, იოგურტზე ან მაწონზე მომზადებული ბერძნული ძაძიკი კარგი მაგალითია. გამოიყენე შენი ფანტაზია და უნარები!
არ არის აუცილებელი, ბოსტნეული მხოლოდ ცალკე იყოს წარმოდგენილი, მისი შერევა ხორციან კერძთან, პასტასთან და სხვა ინგრედიენტებთან შეიძლება.

ყველაზე დიდი შეცდომები

რამდენიმე მცდელობის მიუხედავად, პატარა უარს ამბობს ბოსტნეულზე და შენ მორჩილად ჩამოსვამ მას სკამიდან, ხელებს საბოლოოდ დაიბან და იტყვი - „ვერ შევაყვარე და რა ვქნა?!“ ეს შეცდომაა.
ადრეულ ასაკში პატარას გემოვნების ჩამოყალიბებას 10 და მეტი მცდელობა სჭირება. ამიტომ ნუ დაიზარებ და წუნიას წინააღმდეგობის მიუხედავად მაინც ჯიუტად შესთავაზე ბოსტნეულისაგან მომზადებული კერძები.
არავითარ შემთხვევაში შეიძლება ბავშვის დასჯა იმის გამო, რომ ბოსტნეულის კერძი არ მიირთვა - „შენ არ მიიღებ დესერტს, რადგან ბროკოლის სუპი არ მიირთვი“, არ ამართლებს. შესთავაზე ხელახლა სხვა დროს, კიდევ და კიდევ.
დედისა და ექიმის მრავალწლიანი პირადი გამოცდლებით შემიძლია გითხრა - შენი მონდომება ამაოდ არ ჩაივლის.
მთავარია, მოთმინებით შეუდგე საქმეს და რაც ადრე, მით უკეთესი. და მთავარი - რაც ადრე შეაყვარებ პატარას ბოსტნეულს, მით უკეთესი. თუ ამ რჩევებს უკვე მოზრდილი ბავშვების „გამოსასწორებლად“ მიჰყვები, ვეჭვობ, დიდ წარმატებას მიაღწიო,“ - წერს პედიატრი თამარ ობგაიძე.

შეიძლება დაინტერესდეთ

რომელი ასაკიდან მივცეთ ბავშვს მწყრის კვერცხი და რა რაოდენობით

რომელი ასაკიდან მივცეთ ბავშვს მწყრის კვერცხი და რა რაოდენობით

მწყრის კვერცხი თქვენი პატარებისათვის - მივცეთ თუ არა და რა ფორმით, - აღნიშნულ თემაზე პედიატრი თამარ ობგაიძე ​საკუთარ ბლოგზე წერს. გთავზობთ მის პოსტს:

„სუპერმაკეტში მაცივრის დახლთან დგახართ და კვერცხს არჩევთ - თეთრი თუ მოყავისფრო, პირველი თუ მეორე კატეგორიის, სოფლის თუ ფერმის? და უცებ თქვენი მზერა პაწაწინა, მუქლაქებიან კვერცუკებზე ჩერდება. არასოდეს განგიხილავთ მწყრის კვერცხი არჩევანის გაკეთებისას?
ეს პაწაწინა კვერცხი იმდენ შეუცვლელ და ძვირფას ნივთიერებას შეიცავს, რომ აუცილებლად მოგინდებათ, განიხილოთ მისი მიცემის საკითხი პატარების კვებისათვის.
და რატომაც არა?
მოდი, ვიტამინებით და მინერალებით დავიწყოთ.
  • მწყრის კვერცხი შეიცავს დიდი რაოდენობით A, D, E, B1 B2 PP ვიტამინებს, იგი მდიდარია კალიუმით, რკინით, კალციუმით, ფოსფორით, მოლიბდენით, მაგნიუმით, მანგანუმით, კობალტით.
  • B ჯგუფის ვიტამინების შემცველობა ქათმის კვერცხისაგან განსხვავებით მწყრის კვერცხში 15-ჯერ უფრო მეტია.
  • რაც შეეხება რკინას, ის მწყრის პაწაწინა კვერცხში 4-ჯერ უფრო დიდი რაოდენობითაა, ვიდრე ქათმის კვერცხში.
  • საინტერესოა, რომ მწყრის კვერცხში ორჯერ უფრო დიდი რაოდენობითაა ცილები და სამჯერ უფრო ნაკლებია ქოლესტერინი და ცხიმები.
  • მწყრის კვერცხი შეიცავს დიდი რაოდენობით შეუცველელ ამინომჟავებს - ლიზინს, მეთიონინს, ტრიფტოფანს, ცისტეინს, რაც აუცილებელია ბავშვის ნორმალური ზრდა-განვითარებისთვის.
  • კიდევ ერთი უპირატესობა ისაა, რომ მწყერი ქათმისაგან განსხვავებით, იშვიათად ავადობს ინფექციური დაავადებებით, ამიტომ მას იშვიათად სჭირდება მედიკამენტები და არ უტარდება აცრები, რაც გამორიცხვას მწყრის ორგანიზმში და მის კვერცხში ამ ნივთიერებების მოხვედრას.
  • საოცარი ნივთიერების, ოვომუკოიდის შემცველობის გამო მწყრის კვერცხს ანტიალერგიული თვისებები აქვს.

​​ახლა, მოდი, ვნახოთ, რა შეუძლია მწყრის კვერცხის სისტემატური მიღებას?

  • A ვიტამინის მაღალი შემცველობის გამო ის მხედველობას აუმჯობესებს.
  • ცილების განსაკუთრებული შემცველობის გამო კი აძლიერებს იმუნიტეტს, წარმოადგენს საშენ მასალას ორგანიზმისათვის და ხელს უწყობს ბავშვის ინტენსიურ ზრდა-განვითარებას.
  • კალიცუმის, ფოსფორის და D ვიტამინის მაღალი შემცველობა რაქიტის პროფილაქტიკის და ძვლოვანი სისტემის სწორად განვითარებისათვისაა საჭირო.
  • ოვომუკოიდი მწყრის კვერცხს ჰიპოალერგიულ პროდუქტად აქცევს.
  • განსაკუთრებული შემადგენლობის გამო მწყრის კვერცხი ხელს უწყობს თავის ტვინის განვითარებას, აუმჯობესებს დამახსოვრების უნარს ბავშვებში.
  • რკინის მაღალი შემცველობა ანემიის განვითარებისაგან დაგვიცავს.
რამდენი?

ყველაფერს თავისი დოზა აქვს და ეს პაწაწინა კვერცხებიც დოზირებულად უნდა მივცეთ პატარებს.
დიდი რაოდენობით მიღებამ შესაძლებელია შეკრულობა, გაზების დაგროვება გამოიწვიოს.
  • 6 თვიდან 1 წლამდე ბავშვს შეგიძლიათ კარგად მოხარშული 1 კვერცხის მხოლოდ გული მისცეთ.
  • 1 წლიდან 3 წლამდე პატარას 1-2 მთლიანი კვერცხი შესთავაზეთ
  • 3 წლიდან 10 წლამდე - 3 ცალი კვერცხი
  • 10 წლიდან 3-4 ცალი კვერცხი საკმარისია.
როგორი ფორმით სჯობს?
ხშირად მწყრის კვერცხს უმად მიირთმევენ და სალმონელოზის შიში არ აქვთ, რადგან მწყერს ქათმისაგან განსხვავავებით ეს დაავადება პრაქტიკულად არ ემართება. თუმცა არსებობს სალმონელოისმაგვარი სხვა ინფექცია. ამიტომ სჯობს, მწყერს კვერცხი მოხარშოთ.
ქათმის კვერცხისაგან განსხვავებით, ის ძალიან სწრაფად, 5-6 წუთში იხარშება. თუ თქვენ ხანგრძლივად გააგრძელებთ ხარშვას, კვერცხის გული უსიამოვნოდ გამუქდება, ცილა კი რეზინასავით გახდება. გარდა ამისა, სასარგებლო ნივთიერებების დიდი ნაწილიც დაიშლება.
1 წლის ასაკის ზემოთ პატარას მწყრის კვერცხი შემწვარიც შეგიძლიათ შესთავზოთ.
მწყრის კვერცხი დედიკოების და ბებიების სილამაზისათვის
ნურც თქვენს თავს დაივიწყებთ. მწყრის კვერცხი თქვენი სახის კანისათვის შეუცვლელი პროდუქტია. აი, ძალიან ეფექტური ნიღბის რეცეპტი:
მასალად დაგჭირდებათ 3 ცალი მწყრის კვერცხის გული, 1 ჩაის კოვზი თაფლი, 1 ჩაის კოვზი ზეითუნის ზეთი, რამდენიმე წვეთი ლიმონის წვენი. პროდუქტები ერთმანეთში აურიეთ და სახეზე წაისვით თვალის ირგვლივი არეების გარდა. ჩამოიბანთ თბილი წყლით 20 წუთის შემდეგ. ეფექტი ძალიან მოგეწონებათ,“ - წერს პედიატრი თამარ ობგაიძე.

წაიკითხეთ სრულად